2020
Wie Papah nan Poadoapoad en Peneinei
Pepueri 2020

Padahk en Doadoahk en Papah, Pepueri 2020

Wie Papah nan Poadoapoad en Peneinei

ministering

Kasansalda sang Joshua Dennis; kilel en mwuri oh kilel kan sang Getty Images

Sewesehki aramas arail poadoapoad en peneinei wia ehu doadoahk en papah kaselel. Ni amwail kin kadoahke mehteikan ong kadaudokerail kan sang ni soai oh ire pisetik kan en arail peneinei, kumwail pahn audehki loalarail irehkan me re sohte kin kehn mahso (tehk Malakai 4:5–6).

Itarete ma aramaso wia tohn Mwomwohdisoht ki erein ah mour de e saikinte rong duwen kapwurupwurdohn rongamwahu en Sises Krais, sapwellimen Koht seri koaros kin men ese wasa re kohsang ie.

E sohte kin werei en aramas ahr kin kehnda madmadau loal oh poatoapoat me pato nan soai pwukat.

Diar Peneinei ni Piht 30,000

Me keren ni ahi pipihrla nan ahi wasa, I mwohd limwahn Steve nan sompihro, me ehukihong ie kisehn soaiepehu. E kesepwilsang high school, pedelong nan U.S. Armi wia emen sounkair ni eh sounpar 18, oh mwadangete tepda doadoahk nan White House, sawsawaski palien kair ong Preseden en United States. Sang eh sounpar 18 lel 26, e papah Preseden en U.S. riemen. Ah soai kan me inenen kopwuriamwei!

I nda, “Steve,” ke anahne ntingiedi soai pwukan ong kadaudokomw kan! Irail anahne ale soai pwukat sang pein kowe.” E pwungkihla.

Ngehno eri kamwakid ie ien idek reh dahme e ese duwen kadaudok kan me e ipwsangie. Steve ese douluhl duwen peneinei en eh nohnohu, iangahki duwen eh peneinei ehu pak ar mwengehn soutikiong Abraham Lincoln ansou me e wie kakampein seli nan wehio ni usuhs en preseden en US nan pahr 1860 (kid welipwiki weneisek).

Ahpw, e sohte nohn ese duwen peneinein eh pahpau. E men ese douluhl. I kihei nei sehlpwohno oh padikehng duwen FamilySearch app. “Steve, kita kak diar ahmw peneinei kan met!”

Ngehi eri alehdi inderned en nan-sompihro. I kihdiong nei sehlpwohno pohn kisin tehpel me mih mwohi pwe kiht koaros en kak kilang. Kiht eri rapahki Irekdi En Peneinei. Mwurin minit kei kiht koaros kilkilang kisin likoun kapwopwoud en ah pahpahu eh pahpa oh nohno kahlap.

e nda, “Ih irahn men!” “Met I tamandahr en liho lahs neim!”

Ngehn en peren kipeikitedi koaros. Kiht eri kihpene eden ah peneinei kan me e sohte nohn wehwehki nan irair en minit 45. E peki rehi ien inoukihong me se pahn doudoula nan doadoahk wet ni aht lel Colorado. Emente alehdi nein emen nempehn telepwohn ansou me sompihro peidi.

Iet kiht, pipihrki piht 30,000 (9,145 m) nan wehwe, doadoahngki kisin misihn me uwehte nan pehie, diar ohl emen oh lih emen me pwoupwouda sounpar 100 samwalahro me ohlo oh ah peneinei sohla taman. Kapwuriamwei! Ahpw se diar ira. Peneinei kan dokpenehr. Soai kan wialahr mehn ketemen. Re inenen dirikihla kalahngan pwehki wiepen dipwisoun doadoahk kapw akan. Met likamw manaman ehu.

Jonathan Petty, Colorado, USA

Peneinei Kapw ehu Kapelpene

Maria solahr kalapw iang sarawihki sounpar 20 samwa. Sounpwung kei samwalahrko, se mwohdehng awahkei nan imwato, raprapahki ah peneinei kan nan rekohd en pelien wadepen aramas oh nan rekohd teikan. Ahnsou kiso liho pilen mese kereker nda, “I esehla duwen ahi peneinei nan awahte riau me laudsang dahme I esehier erein ei mour!”

Ni imwin aht mwomwohdpenehu, se padahkiheng liho duwen Relatives Around Me me wehwehki Peneinei kan me Mihseli Limwahu me mih nan app en FamilyTree o. Oh se diarada me ngehi oh ahi pwoud, kiht koaros wia kisehn Maria. Liho pil pwurehng sengidi nda me e kin medemedewe me e kelkelehpw. Liho sehse me miehte kiseh nan wasahu. Wihk kei mwuri Maria tuhwong aht pisopo. Liho met kaukaunop en kohla nan tehnpas sarawi, oh e tuhwongdi ah peneinei “kapw” kei me e pahn kin rianki nan aht ihmw sarawio!

Carol Riner Everett, North Carolina, USA

Audepen Doadoahk en Papah

Ngehi oh lih souleng men me I kin papah, ede Ashley, kiht koaros naineki pwuhk en kuk sang aht nohno kahlap ko. Nah pwuhko kohsang rehn en ah nohnou ah-nohno kahlap, a neio I ntingihasang nan nein ahi Nohno kahlap Greenwood kakon en ah resepi mwurin ah mehla.

Ngehi oh Ashley emente pilada ehu resepi sang nait pwuhk ko, oh kiht kohpene mwurin doadoahk ehu pwohngo pwe sen sohngada. Liho pilada ehu resepi en deserd, kiht eri doaloahda oh kiheng nan sidohpo. I pilada chip dip—kisin mwenge ehu me kin kalapw wiawihda nan en peneinei en Greenwood kamadipw koaros. Nein Ashley serepein Alice sewesei kiht song kisin mwengehko. Eri, pwehki Ashley sohte men nah serihko en kangala mwenge sukehko koaros, e wahla ekei rehn riat lih kei me e kin papah.

Me I kin keieu perenki ni aht kin tuhkihpene nait mehn dol mwenge kan iei ni ansou me se kin kungkuk oh uhmw nan uhmw lioal, se kin koaskoasoaia ire kan me pid papah kan—aht kahpwal kan. Ahpw se pil kin koasoia aht nohno kahlap oh en ei nohno kan, me se kin poakpoake.

Jenifer Greenwood, Utah, USA

Ahl en Sawas Sansal kan

Poadoapoad en peneinei kak wia ansou mwahu en papah ma mwomwen apwal en dierek dahme pahn konehng wiawi. Iet ekei wiepe kan me kumwail kak song.

  • Sewese irail en rekohdihdi oh kapidelong rekohd en soai en poadoapoad en peneinei kan, ahpw mehlel soai me mie kasdo de kilelpe kan.

  • Wiahda irekdien eden peneinei kan de poadoapoad en peneinei me kak ngtingda me kumwail kak wiahki amwail mehn kisakis.

  • Padahngki mwomwen arail kak alehdi pein arail poadoapaod sang ni amwail kin ntingiedi ni mwohmw me irail pahn pereniki. Pwuhk en deip rekohd kan? Pwuhk en kilel kan? Kahng en kasdo kan? Mie soangsoangen wiepe tohto ong irail akan me sohte kin mwahuki pwuhk en ntingiada te.

  • Patpene kohla nan tehnpas sarawi pwehn wia tiahk sarawi en peneinei me melahr akan. De sewese irail wia en arail peneinei kan tiahk sarawi ma irail sohte kak kelehpw kanekehla.

  • Patpene pwehn ehukipene koasondi kan en peneinei.

  • Patpene nan ehu kasukuhl en poadoapoad en peneinei.

© 2020 Intellectual Reserve, Inc. All rights reserved. Ntingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwepen Ministering Principles, February 2020. Pohnpeian. 16995 885