Yalen e Machib, February 2020

Pigpig nifen fapi Cheppin e Tabinaew

Ke dag rogon Joshua Dennis; sassing nbay u tomur nge sassing rok Getty

Ayuweg be’ ko cheppin e tabinaew rok e reb wo’en nib gel nrayag ni ngan machib. Nap’an ni gara fal’ag e thaa’ ko gidii’ ngak fapi gidii’ roraed nib kaakrom, ma aram ni gabe suguy bochi low ulan gum’ircha’raed ko tin ni yaed be lamnag ndariy roraed (muguy ko Malachi 4:5–6).

Demutrug ko be’ nike n’uw nap’an ko Galasia fa be’ ndawri runga’ag mornga’agen fare gospel rok Yesus Kristus, gubin pifaak Got mab tu’uf ni ngar nanged ko ggin nikar bad riy.

Dabi n’uw nap’an mara ggin owchen raed ngay, ni woed rogon ko tin ba’aray e marunga’ag.

Guy e Tabinaew ko 30,000 Feet

Dawri n’uw nap’an ni kug waen u skuuki ni ngu sul nga tabinaew, kug par u charen i Steve, nike weliy ngog mornga’agen salpen. Ke mu’ nag e high school, me un ko Salthaw nu Mariken nib fel e murwel rok nap’an e ba 18 e duw rok, ma de n’uw nap’an ngay me un ko murwel ko White House, ni’ir e ma non ma ayuweg e President u Mariken. Nap’an e ba 18 nge mada’ ko 26 e duw rok, ke murwel u tan pa’ l’agruw e President nu Mariken. Marunga’ag rok e rib mangil!

“Steve,” ku gog, “ngam yoloey e pi marunga’ag rom ney ni fan ngak pifaakam! Ba tu’uf ni ngar manged e pi marunga’ag rom ney nike yib rom.” Mangil u waen’.

Me thogthog nag ngog e thothup ningu fith ngak ko mang e manang ko mornga’agen e gidii’ rok ni kaakrom. Steve e bo’or ban’en ni manang ni mornga’agen e chitinngin, nib mu’un ko marunga’ag ni tay gathon e tabinaew rok nra abich gaed Abraham Lincoln nap’an nibe camp u barba’ e nam nifan fare election ko president nu Mariken nap’an e 1860.

Ma buch’uw ban’en ni manang ni mornga’agen e chitamangin, machane. Ri ba’adag ni nge nang boech. Ere gu fek fare fon rog mug bing fare app ko FamilySearch. “Steve, rayag ni ngaed sap nigew e tabinaew rom e chiney!”

Ere gu puthuuy fare fon rog ko Wi-Fi u skuuki. Mug tay fare fon rog nga dakaen fare palaang nga powchaen mow ni ngayag ni guyew ni gamow l’agruw. Gayew ulan fare FamilyTree. De n’uw nap’an ma gamow guy babyoren e mabgol rok e thingtuw rok ngak e thingtaw rok.

“Irraray row!” nike yoeg. “Fani yib ngan’ug fithgan!”

Fare falfalaen’ ko thothup e yib nga dakaen mow nib gel. Ma gamow ul’ul’ ngu falagnew reb e babyor nifen pi gidii’en ni kaakrom gonpa’an ulan 45 e minet. Ke fith ngog ni ngu micheg nag ngak ni kagamow ra ul’ul u ta’abang ni gayew e tiney u Colorado. Ere gu thilyegnew e namba ko telephone romow nap’an ni aw fare skuuki nga but’.

Gamow ba’aray, ni gamow be changag ni 30,000 feet (9,145 m) u dakaen e nifeng, ni buchi fon nib achig ni woed ga’ngin pa’ag, nike gay ba pumo’on nge be’ nib ppin nikar mabgol gow gonpa’an 100 e duw kafram. Ri felael’ e ray! Kug pere’egnew row. Tabinaew nib pethpeth. Marunga’ag nike sul biyay nga wun’uy. Falfalaen’ug ko technology nge fapi talen murwel riy. Ni woed ba ma’ang’ang.

Jonathan Petty, Colorado, Mariken

Ke yeleg boech e Tabinaew nib Be’ech

Maria e ke gaman 20 e duw ni dakir mayib ko missa. In e puul kafram, yib nga tabinaew rog nge par ni gaman in e awa, ni yibe gay gathon e tabinaew rok ko boech e babyor. Taw nge bangiyal’ riy me non nibe map e luu’ u owchaen nibe ga’ar, “Kug fil ni bo’or mornga’agen e tabinaew rog ulan l’agruw e awa ko ga’angin lan e yafos rog!”

Tomren e biney, mug dagew ngak boech pi gidii’eg nib yelegneg nbay ko fare FamilyTree app. Ni kabi m’ug ni gag nge figirngig e ba’ rogon mow ngak Maria. Maki map e luu’ u owchaen bayay, nibe yoeg nike lamnag ni yigo’ ir rok. Ma dani nang nbay pi gidii’en ko giney nbay riy. In e wiik nga tomren me mada’ nag Maria e bisof romow. Chiney e be fal’ag rogon ir ninge yaen nga temple, ma ke mada’nag ni bo’or pi gidii’en nib “be’ech” ulan fare ward!

Carol Riner Everett, North Carolina, Mariken

Tabon e Fulweg ko Machib

Ashley, bee’ nib ppin ni guma machib nag, ma gamow l’agruw nbay babyoren e luum ko titiaw romow. Biroq e babyor e yib rok e thing-taw rok, ma birog e babyor e gu chagliy nga ta’abang ni chaaw rok e Titaw rog i Greenwood nap’an nike yim’.

I gag nge Ashley e gu mel’egnew reb fapi babyoren e luum ulan fagli babyor, magmow mada’ nga ta’abang ni nguyew rogon. Ke mel’eg ninge fal’ag e ggan nib athibthib, ere gu fal’agnew nge mu’ magmow tay ngalan e oven. Kug mel’eg ni ngu fal’ag e sos ko chip—nib sos ni gubin ngayal’ ma yima kay ko gubin e party ko Greenwood. Alice ni fak Ashley e ayuwegmow ninge rii’ lamen fare ggan. Bachan, e dabun Ashley ninge kay pifaak gubin fapi ggan nib athibthib, ere pii’ boech ngak be’ nib ppin nima machibnag.

N’en ni guba’dag ni mornga’agen e luum romow u ta’abang e, sabathin ni kug tew ni mornga’agen machib—tin nibe gafgow riy nge tirog e gafgow. Kug weliyew mornga’agen e titaw romow nge chitinnginmow, ni rib tu’uf ngomow.

Jenifer Greenwood, Utah, Mariken

Bay Rogon Ningan Pii’ e Ayuw

Cheppin e tabinaew e rayag ni nge bing e maab ko machib nap’an boech ban’en e dar rrin’. Ba’aray bochi kanawo’en nrayag ni ngam gay rogon.

Ayuwegraed ngar yoloeyed fan record nag laman fapi marunga’ag ko tabinaew roraed, nib ga’ ni tin nibe puluw e sassing riy.
Mu ngognliy babyoren e cheppin e tabinaew nrayag ni ngam pii’ ni fan e tawa’ath.
Fil mornga’agen rogon nrayag ni ngan yoloey mornga’agen e cheppin e tabinaew nib moem. Lamay ni yibe non nifen fapi journal? Sassing ko journal? Video ni gabe weliy salpem riy? Bo’or nrayag ni ngan mel’eg riy ni fa’an nra dabum ni ngam yoel ngalan e journal.
Yaen nga temple u ta’abang ni ngan fal’ag e m’ag nifen fapi gidii’ ni kaakrom. Fam og nigem ni ngam rrin’ fapi m’ag nifan ngak e tabinaew roraed ni fa’an nra bo’or ndabyag roraed ni gubin.
Mbaed nga ta’abang ni ngam nanged salpen e yelen romaed.
Mu uned ko class u ta’abang ngam filed mornga’agen e cheppin e tabinaew.

© 2020 Intellectual Reserve, Inc. All rights reserved. Kan yoloey u Meriken. Kan micheg nag ko thin nu Ngalis: 6/19. Micheg i pilyeg: 6/19. Pilyeg e thin ko Ministering Principles, February 2020. Yapese. 16995 905