2020
Sèvis Pastoral atravè sèvis nan tanp
Mas 2020

Prensip Sèvis Pastoral, Mas 2020

Sèvis Pastoral atravè Sèvis nan tanp

Lè nou ede lòt moun jwi benediksyon tanp yo, se sèvis pastoral n ap fè.

ministering

Foto nan fon an soti nan Getty Images; foto Tanp vil Tegucigalpa a nan Ondiras

Ale nan tanp lan vo efò a. Prezidan Russel M. Nelson te anseye ke “tanp lan trè enpòtan pou sali nou ak egzaltasyon nou ansanm ak sali ak egzaltasyon fanmi nou. …

“… Chak grenn nan nou bezwen fòs espirityèl ak konsèy pèmanan ki posib sèlman nan kay Senyè a.”1

Ale nan tanp mande pou nou jere tan nou, responsabilite nou yo ak resous nou, sa mande pou nou prepare nou espirityèlman tou. Nou fè sèvis pastoral lè nou idantifye baryè ki anpeche frè ak sè nou yo ale nan tanp yo epi nou ede yo jwenn solisyon.

Tanp lan Se yon Benediksyon Tout Moun ka Jwi

Yon misyonè ki te fèk retounen ki rele Meg, t ap mache antre nan pòt tanp Kona a nan Awayi lè l te remake yon jènfi ki te chita poukont li sou yon ban deyò a. Meg te santi l te dwe pale avèk jèn fi sa a, men li pat vrèman konn kisa pou l te di li. Konsa, li te mande jènfi a siyifikasyon yon tatouaj li te genyen nan cheviy li. Sa te kòmanse yon konvèsasyon ki te pèmèt jènfi a, ki rele Lani, rakonte istwa li.

Lani te pale Meg de pwoblèm li te genyen pou l te retounen patisipe totalman nan legliz la, li te pale l de bon manm ki t ap ede li, ak espwa l pou l te sele yon jou avèk pitit fi l la.

Meg te envite Lani pou l te vin chita nan sal datant tanp lan avè l. Yo pa t ap kapab ale pi lwen andedan tanp lan, men yo t ap kapab travèse pa pòt la. Lani te dakò, epi yo toulède te franchi premye pòt yo. Yon ouvriye nan tanp lan te montre yo yon ban ki te anba yon tablo ki te reprezante Sovè a.

Pandan yo te chita ansanm konsa, Lani te chichote: “Mwen te vrèman anvi antre nan tanp lan jodia, men m te yon ti jan pè.” Paske Meg te suiv Lespri a, sa te ede l reponn priyè Lani te fè an silans lan.

Ide pou moun ki pa gen Rekòmandasyon

Menm sila yo ki poko gen yon rekòmandasyon tanp yo ka beni pa tanp lan.

Fè Ale nan Tanp Vin Yon Bagay Fasil pou Lòt Moun

Menm pou manm ki gen yon rekòmandasyon tanp yo, ale nan tanp kapab yon bagay ki difisil pou yo. Gen ladan yo ki petèt ap soti byen lwen. Kèk lòt ki petèt gen timoun piti oswa manm fanmi ki granmoun ki bezwen swen. Nou ka travay ansanm pou nou fè sèvis nan tanp lan posib pou tout moun.

Leola Chandler te santi l depase nan pran swen mari l ki te malad ak kat pitit li yo. Konsa, li te deside pou l te pran yon ti tan chak madi pou l t ale nan yon tanp ki te tou prè a. Sa te vin tounen yon sous lapè ak fòs nan lavi li.

Yon jou, li te tande kèk granmoun fi nan pawas li a ki pa t konn sa pou yo ta bay pou yo ta ale nan tanp, men yo pa t gen okenn mwayen transpò. Leola te ofri pou l te ba yo woulib. Pandan pwochen 40 ane apre yo, li te raman al nan tanp poukont li.2

Leola te beni, epi li te beni lòt moun tou lè l te ofri yo pou yo t ale nan tanp lan avèk li a.

Ide pou Ede Lòt Moun Ale nan Tanp

Kòman ou ka ede lòt moun ale nan tanp pi souvan? Ou gen dwa wè menm ide sa yo ede w tou.

  • Ale ansanm. Ofri yon moun pou w kondui li oubyen chèche transpò pou li. Sa ka ankouraje yon lòt moun pou l ale nan tanp tou.

  • Mande manm fanmi ou oswa pawas ou pou yo ede w fè òdonans pou zansèt ou, espesyalman lè w gen anpil non familyal ki prè pou òdonans.

  • Ofri pou w siveye timoun pou paran yo ka al nan tanp. Oswa fè planifikasyon pou nou ede siveye timoun yo youn aprè lòt.

Lè Tanp lan Lwen

Chandradas “Roshan” ak Sheron Antony nan vil Colombo ki nan peyi Sri Lanka te deside pou yo t al sele nan tanp. Zanmi yo, Ann ak Anton Kumarasamy te kontan anpil pou yo. Men yo te konnen ke al nan Tanp Manila a nan peyi Filipin pa t ap fasil ni bon mache pou yo.

Roshan ak Sheron te fè ekonnomi epi yo te fè rezèvasyon kèk mwa alavans pou yo te ka jwenn yon vòl yo te ka peye. Finalman jou a te rive. Men, pandan yo t ap fè eskal nan Malezi, yo te dekouvri , pou yo ta kontinye rive nan Filipin, yo t ap bezwen oubyen yon viza oubyen pran yon lòt avyon. Li pa t posib pou yo te jwenn yon viza, e yo pa t gen kòb pou yo t achte lòt tikè nan yon lòt konpayi avyon. Men yo pa t ka sipòte ide pou yo te retounen lakay yo san yo pa t sele a.

Kòm li pa t si kisa pou l te fè, Roshan te rele Anton. Anton ak Ann te dezespereman anvi ede. Yo sete youn nan pami kèk grenn koup nan peyi Sri Lanka ki te sele nan tanp, epi yo te konnen ki benediksyon sa te ye. Men yo te fèk sot itilize tout ekonomi yo te genyen pou yo te ka ede yon manm fanmi yo ki te nan bezwen, konsa, yo pa t gen ase lajan pou yo te ede Roshan ak Sheron achte tikè pou yon lòt vòl.

Nan peyi Sri Lanka, se yon koutim pou gason k ap marye a achte yon chèn lò pou fi k ap marye avèk li a yon fason pou fi a ta jwenn yon ti lajan si mari a ta mouri. Ann te deside vann chèn ni an pou l te ede yo achte lòt tikè. Kado san parèy li a te rann posib pou Roshan ak Sheron te rive nan randevou tanp yo a nan Manila a.

Ann di: “Mwen konn ki valè yon sèlman nan tanp genyen”. “Mwen te konnen Sheron ak Roshan t ap yon gwo fòs pou branch lan. M pa t vle yo rate opòtinite sa a.”3

Ide pou Ede Moun ki pa ka Ale nan Tanp yo

Yo gen dwa aple w pou w fè sèvis pastoral pou moun ki pa ka ale nan tanp souvan oubyen ki pa ka ale ditou akoz distans lan oswa akoz lajan. Men ou ka toujou jwenn fason pou w ede yo apresye benediksyon tanp yo.

  • Anseye oswa patisipe ansanm avèk yo nan yon klas sou preparasyon pou tanp oubyen yon klas istwa familyal.

  • Ba yo yon foto tanp pou yo ka mete sou mi lakay yo.

  • Si w deja al nan tanp, pataje avèk yo sa w santi apwopo eksperyans ou a ak temwanyaj ou sou òdonans tanp yo.

  • Ede yo aprann plis sou alyans yo te fè yo ak kijan pou yo kenbe yo. Panse pou w itilize atik: “Konprann alyans nou avèk Bondye: Yon apèsi sou pwomès ki pi enpòtan nou yo” nan LyawonaJiyè 2012 la.

© 2020 Intellectual Reserve, Inc. All rights reserved. Enprime nan Etazini Damerik. Apwobasyon Anglè: 6/19. Apwobasyon pou tradiksyon: 6/19. Tradiksyon Ministering Principles, March 2020. Haitian Creole. 16985 036

Nòt

  1. Russell M. Nelson, “Vin Sen Dènye Jou egzanplè,” Liahona, Nov. 2018, 114.

  2. Gade LaRene Gaunt, “Jwenn Lajwa nan Sèvis nan Tanp,” Ensign, Okt. 1994, 8

  3. Ann ak Anton te gen posibilite pou yo te retounen jwenn chèn yo a aprè yo te resevwa ranbousman nan men Fon Jeneral pou Asistans Tanp Legliz la, ki bay asistans finansye pou manm Legliz la ki pa gen posiblite pou yo al nan tanp yo.