Ol Prinsipol blong Wok blong Givhan, Maj 2019

GIVHAN TRU LONG TEMPOL SEVES

Taem yumi helpem ol narawan blong oli glad long ol blesing blong tempol, yumi stap givhan ia.

Bakgraon i kam long Getty Imej; fotograf blong Tekugigalpa Handoras Tempol

Atendens blong tempol hem i wan gudfala efot. Presiden Russell M. Nelson i tijim se “tempol hem i impoten blong salvesen blong yumi mo fasin blong kam olsem god mo hemia blong ol famli blong yumi. …

“… Wanwan long yumi i nidim paoa ia long saed blong spirit we i stap gogohed mo instraksen we i nidim nomo insaed long haos blong Lod.”¹

Blong go long tempol i nidim blong yumi yusum gud taem blong yumi, ol responsabiliti, mo ol risos, mo tu blong rere gud long saed blong Spirit. Yumi stap givhan taem yumi luksave ol samting we i stap blokem mo stopem ol brata mo sista blong yumi blong go long tempol mo helpem olgeta blong faenem ol ansa.

Tempol Hem i wan Blesing We Eniwan i Save Glad long hem.

Wan misinari we i jes kambak long misin, Meg, i stap wokbaot i go kolosap long doa blong Kona Hawae Tempol taem hem i luk wan yang woman i stap sidaon hemwan long wan jea aotased. Meg i filim se hem i mas toktok long yang woman ia, be i no save wanem blong hem i talem. Mekem se hem i askem mining blong tatu ia long ankel blong woman ia. Hemia i statem storian ia we i letem yang woman ia, Lani, blong i serem storian blong hem.

Lani i talem long Meg abaot ol traehad blong hem blong save kambak fulwan long Jos, ol naes memba we oli stap helpem hem, mo i hop se wan dei hem i save sil wetem bebe gel blong hem.

Meg i invaetem Lani blong kam wet long rum blong wet insaed long tempol wetem hem. Tufala i no save go moa insaed long tempol yet, be tufala bae i save pas tru blong go insaed long tempol. Lani i agri, mo tufala i go tugeta tru long mein doa blong tempol. Wan man we i wok long tempol i soem long tufala wan jea we peinting blong Sevya i stap andanit long hem.

Taem tufala i sidaon tugeta, Lani i toktok slo, “Mi rili wantem blong kam insaed long tempol tedei, be mi fraet smol.” From se Meg i folem Spirit, hem i helpem blong ansa long saelen prea blong Lani.

Ol Aedia blong Helpem Olgeta we i No Gat Rekomen

Sapos yu nogat wan tempol rekomen yet, tempol i save blesem yu.

Serem ol filing blong yu abaot hao nao Lod i blesem yu tru long tempol wok.
Invaetem wan man blong atendem tempol open haos o vista senta. Faenemaot ol open haos we i stap long temples.ChurchofJesusChrist.org
Luk ol foto mo lanem moa abaot tempol long temples.ChurchofJesusChrist.org

Mekem Tempol Atendens i Kam Moa Isi blong Ol Narawan

Blong stap go long tempol i save kam wan jalenj, iven blong ol memba we oli gat wan tempol rekomen. Sam oli nid blong travel longfala distens. Narafala ating bae oli gat ol smol pikinini o ol famli memba we oli olfala mo i nid blong lukaot long olgeta. Yumi save wok tugeta blong mekem tempol seves i posibol long evriwan.

Leola Chandler i harem i tumas blong lukaotem man blong hem we i sik wetem foafala pikinini blong tufala. Mekem se hem i putum wan taem evri Tiusdei blong go long tempol we i kolosap. Hemia i kam wan sos blong pis mo paoa long laef blong hem.

Wan dei hem i harem sam olfala sista long wod blong hem we oli wantem tumas blong go long tempol, be oli nogat wan trak blong karem olgeta i go. Leola i askem blong draevem olgeta i go. Blong nekis 40 yia, hem i neva go long tempol hemwan.²

Leola i gat blesing, mo hem i blesem ol narawan taem hem i askem blong draevem olgeta i go long tempol wetem hem.

Ol Aedia blong Helpem Ol Narawan blong Go Long Tempol

?Olsem wanem nao yu helpem ol narawan blong go long tempol evritaem? Bae yu faenem se ol semmak aedia ia i save helpem yu tu.

Go tugeta. Ofarem blong givim o arenjem transpot blong wan man. Hemia maet bae i leftemap tingting blong wan narafala man blong go long tempol tu.
Askem ol memba blong famli blong yu o wod blong helpem yu mekem ol odinens blong ol bubu blong yu, speseli taem i gat fulap nem we i redi blong mekem ol odinens ia.
Ofa blong lukaotem ol pikinini mekem se mama mo papa i save go long tempol. O arenjem blong wan afta wan i lukaot pikinini blong yufala.

Taem Tempol I Longwe

Chandradas “Roshan” mo Sheron Antony blong Kolombo, Sri Lanka, i disaed blong sil long tempol. Ol fren blong tufala Ann mo Anton Kumarasamy oli glad tumas long tufala. Be oli save se blong oli kasem Manila Filipin Tempol bae i no isi o i jip.

Roshan mo Sheron i mas sevem mane blong tufala mo bukum wan flaet sam manis i pas blong oli save karem wan flaet we oli pem. Dei ia, i kam. Be, taem oli stap long Malesia, oli faenemaot se blong oli gohed blong kasem Filipin, oli nidim wan visa o oli nidim blong flae long defren plen. Hem i no posibol blong karem wan visa, mo oli nogat inaf mane blong pem wan nara plen tiket. Be oli no wantem blong gobak we oli no sil long tufala.

Roshan i no save wanem blong mekem mo i ringim Anton. Anton mo Ann oli bin wantem tumas blong help. Tufala i wan long sam kapol long Sri Lanka we oli bin sil long tempol mo oli save ol blesing blong hem. Be oli jes yusum evri mani we oli sevem blong helpem ol famli memba we i stap long nid, mo oli nogat inaf mani blong helpem Roshan mo Sheron blong pem wan niu plen tiket.

Long Sri Lanka hem i wan kastom blong mared man i pem wan gol nekles blong woman blong hem blong mekem se bae hem i gat inaf mani taem man blong hem i ded. Ann i disaed blong salem nekles blong hem blong help blong pem niu plen tiket. Presen blong hem we i kam long hat i mekem i posibol blong Roshan mo Sheron blong go long apoemen blong tufala long tempol long Manila.

“Mi save valiu blong tempol siling,” Ann i talem. “Mi save se bae Sheron mo Roshan bae i wan bigfala help blong mekem branj i kam strong moa. Mi no wantem tufala blong mestem bigfala janis ia.”³

Ol Aedia blong Helpem Olgeta We Oli No Save Visitim Tempol

Ating bae oli singaotem yu blong givhan long olgeta we oli go long tempol evri taem o olgeta we oli no save go nomo from se i longwe o i sas tumas. Be stil yu save faenem ol wei blong helpem olgeta blong oli talem tangkyu long ol blesing blong tempol.

Tijim olgeta blong tekpat long rere blong go long tempol o famli histri klas.
Givim wan foto blong tempol long olgeta blong oli hangem long aos blong olgeta.
Sapos yu go long tempol finis, serem ol filing blong yu mo eksperiens mo testemoni blong yu abaot ol tempol odinens.
Helpem olgeta blong lanem moa abaot ol kavenan we oli mekem mo olsem wanem blong kipim olgeta. Tingting blong yusum “Understanding Our Covenants with God: An Overview of Our Most Important Promises,” Liahona blong July 2012.

© 2020 i kam long Intellectual Reserve, Inc. All rights reserved. Oli printim long YSA. Oli letem long Inglis: 6/19. Oli letem translesen: 6 /19. Translesen blong Ministering Principles, March 2020. Bislama. 16985 852