Nongonongen Iamwir, March 2020

Iamwir ren Angangen Tempel

Nupwen sia anisi ekkoch pwe repwe pwapwaiti feiochun ewe tempel, sia iamwir ngeniir.

Sasingin nemwirin a eto seni Getty Images; sasingin ewe Tegucigalpa Honduras Tempel

Ach fiti ewe tempel a kan fis pwe sipwe angei feioch. Preseten Russell M. Nelson a aitikich pwe “ewe tempel mi aucheanap ngeni ach fefeitia me ach angei manau ese much me pwan ren ach kewe famini. …

“… Mi namwot emon me emon kich sipwe sopweno ach sipwe angei pochokunen ngun me mirit minne sia chok tongeni angei me non imwen ewe Samon.”¹

Pwe sipwe fiti ewe tempel a namwwot sipwe akkotaochu ach fansoun, ach sekening, me ach pisek, o pwan auchea sipwe monnata non pekin ngun. Sia iamwir nupwen sia esinna ekkewe foun chepetek mi epeti pwich me fefinach pwe resap tori ewe tempel me sia anisiir ne kutta penuan ar kapaseis.

Ewe Tempel mi ew Feioch Meinisin mi Tongeni Pwapwaiti

Emon mi keran niwin seni angangen misineri, Meg, a fetan ngeni ekkewe asamen ewe Kona Hawaii Tempel nupwen a kuna emon fopun a mommot anaemon chok won efoch sea nukkun. Meg a mefi pwe epwe fos ngeni ewe fopun, nge i ese sinei met epwe apasa ngeni. Iwe eis met wewen ewe tattoo won pechen ewe fopun. Ena a poputani ar asosfengen minne a etufichi ewe fopun, Lani, an epwe apworausa manauan.

Lani a ereni Meg usun an weiresin niwiniti manauan ngeni ewe Mwichefen, ekkewe kirekirochun chon ewe mwichefen mi anisi, me an apinukunuk pwe epwe tongeni riri ngeni noun we monukon nengin.

Meg a tingorei Lani an epwe fiti ar repwe tonong non ewe rumwan witiwit non ewe tempel. Resap mwo tufiichin pwerenong non ewe tempel, nge repwe tufichin tonong non ewe asam. Lani a etiwa, o ra tonong non ekkewe asam. Emon chon angangen tempel a emwenir ngeni efoch sea fan ew sasingen ewe Chon Amanau minen peinit.

Nupwen ra mommot fengen, Lani a mongungu, “Ua wesen mochen tonong non ewe tempel ikenai, nge ua nuokus.” Fan itan Meg a tapweno mwirin ewe Ngun mi fen, i a apwonueta an Lani we iotek mi mosonoson.

Ekkoch Ekkiek ne Anisi Ekkewe Ese Mwo Wor Nour Taropwean Mwumwutan Tonong Tempel

Ekkewe ese mwo wor nour taropwean mwumwutan tonong tempel mi pwan tongeni feioch me ren ewe tempel.

• Apworausa mefiom ifa usun ewe Samon a effeiochuk ren angangen tempel.

• Tingor ngeni emon ar repwe fiti mwichen suki tempel are feino ngeni imwan etiwa. Kuna pworausan suki tempel nontemples.ChurchofJesusChrist.org.

• Katon sasing me kaeo usun ewe tempel won temples.ChurchofJesusChrist.org.

Emecheresi Fiti Tempel ngeni Aramas

Pwan ngeni ekkewe chon ewe mwichefen a wor nour taropwen mwumwutan tempel, ar repwe fiti tempel mi tongeni weires. Ngeni ekkoch mi namwot repwe sai towau. Ngeni ekkoch epwe fen wor nour kukkun semirit are aramaser mi chinnap mi namwot epwe wor chon tumunur. Sia tongnei aninis fengen pwe epwe etufichi meinisin repwe fori angangen tempel.

Leola Chandler a mefi weires ren an tumunu punuwan we mi samau me nour kewe fomon semerit. Iwe a fini pwe epwe akota och fansoun iteitan Oru an epwe fiti ew tempel arap ngeni imwan. A winiti ew popunapan kinamwe me manaman non manauan.

Ew ran a rong pwe mei wor fitemon fefin mi chinnap non an we wart ra mochen repwe no ngeni ewe tempel, nge ese wor war. Leola a ereniir epwe uweir. Ren ekkewe faik ier mwirin ena, napangeni fansoun meinisin i ese anaemon ne no ngeni ewe tempel.²

Leola a feioch, me a efeiochu ekkoch ren an a erenir an epwe tufichin uweireno ngeni ewe tempel.

Ekkoch ekkiek ne Anisi Aramas ne Fiti ewe Tempel

Ifa usun ka tongeni anisi aramas ne anapano ar fansoun fiti ewe tempel? Mi tuffich pwe ekkei ekkiek epwe pwan anisuk.

• Feino fengeni ngeni tempel. Erenir pwe ka tufichin kuta wan pwan emon. Mi tufich epwe apechekuna pwan emon repwe fiti ewe tempel.

• Tingorei chon om famini are wart ar repwe anisuk ne fori angang mi pin fanesengesin chon om newo, mi pwan mecheres nupwen mei wor chommong iten om famini mi fen monnata ngeni angang mi pin.

• Ereni sam me in pwe ka tufichin tumunu nour pwe repwe tongeni no ngeni ewe tempel. Are oua tongeni ekkesiwin fansoun tumunu noumi kewe.

Nupwen ewe Tempel mi Touau

Chandradas “Roshan” me Sheron Antony seni Colombo, Sri Lanka, ra finata pwe repwe rir fengeni non ewe tempel. Chiener Ann me Anton Kumarasamy mi kan meseik rer. Nge ra sinei pwe ar repwe sai ngeni ew Manila Philippines Tempel esap mecheres are mokukkun.

Roshan me Sheron ra isoini nour moni me ra moni nour tiket fitu maram akkomwan pwe repwe tufichin moni. Mwirin och fansoun, ewe ran a war. Nge, nupwen ra kouno non Malaysia, ra kuna pwe ika pwe repwe sopweno ar sai ngeni Finipin, mi namwot pwe epwe wor nour fisa are pwe repwe fiti pwan ew sepenin mi sokkono. Ese tufich pwe repwe angei fisa, me rese tufichin moni tiket seni pwan ew sepenin. Ra men netipechou ren ewe ekkiek pwe repwe niwiniti imwer nge resap mwo ririfengen.

Non an osukosuk, Roshan a kokkori Anton. Anton me Ann ra men mochen anisiir. Ir nein ekkwe fitemon chon pupunu non Sri Lanka mi fen riri non ewe tempel, me ra sinei auchean ewe effeioch non manauer. Nge ra keran nouni nour we moni mi isois ne ansi pwan emon chon ar famini mi weires, me ese nafoch nour moni ne anisi Roshan me Sheron ne moni echo tiket minafo.

Ew oreni me non Sri Lanka pwe ewe mwan epwe moni efoch mwaramwar kolt ngeni punuwan pwe epwe wor noun moni ika pwe ewe mwan epwe mano. Ann a fini pwe epwe amomono mwarin we pwe epwe tufichin moni ekkewe tiket. An nifang mi amwarar mi etufichi Roshan me Sheron pwe repwe tori ar we fansoun tonong tempel non Manilla.

“Ua sinei auchean ewe ririn non tempel,” Ann a apasa. “Ua sinei pwe Sheron me Roshan repwe fokkun pechekun ngeni ewe pranch. Use mochen pwe repwe misini ewe tufich.”³

Ekkoch Ekkiek ne Ansi Ekkewe Rese Tongeni Feinno Tempel

Mi tufich epwe wor wisom ne iamwir ngeni ekkewe rese tufichin fiti tempel fan chommong are rese chok tufich fan itan weiresin touau are moni. Nge ka tongeni kutta ekkoch napanap ne anisiir ne pwapwaiti feiochun ewe tempel.

• Aitiir are fitiir ne fiti sukkunen ammonnatan tempel are uruon famini.

• Nifang ngeniir echo sasingin ewe tempel pwe repwe pacheta won etipan imwer.

• Ika ka fen tonong non ewe tempel, ka tongeni apworausa mefiom me om kapasen pwarata usun angangepinen ewe tempel.

• Anisiir ne kaeo pwan och usun ekkewe angang mi pin ra fen fori me ifa usun repwe apwonueta. Ekkieki ika mi fich kopwe aea “Understanding Our Covenants with God: An Overview of Our Most Important Promises,” non ewe July 2012 Liahona.

© 2020 seni Intellectual Reserve, Inc. All rights reserved. A för non USA. Kapungunon non fosun Merika: 6/19. Kapungunon chiakun: 6/19. Chiakun Ministering Principles, March 2020. Chuukese. 16985 901

Esinesin

1. Russell M. Nelson, “Winiti Aramas mi Pin non Fansoun Soponon mi Amwarar,” Liahona, Nov. 2018, 113.

2. Nengeni LaRene Gaunt, “Finding Joy in Temple Service,” Ensign, Oct. 1994, 8.

3. Ann me Anton mi tufichin moni sefanni mwarir we mwirin an Ewe Mwichefen we General Temple Patron Assistance Fund, ewe a etufichi chon ewe Mwichefen fan ew chok ika pwe repwe tongeni no ngeni ewe tempel ika pwe rese pwisin kofichin moni ne tori ewe tempel.

Aporousa Pworausen Om Angangen Iamwir

Tinato om memef nupwen ka iamwir ngeni ekkoch ika ekkoch ra iamwir ngonuk. Tota won liahona.ChurchofJesusChrist.org me tiki “Submit an Article or Feedback.”