Mga Prinsipyo sa Ministering, Marso 2020

Ministering paagi sa Pagserbisyo sa Templo

Kon ginabuligan naton ang iban nga mabaton ang mga bugay sang templo, naga-minister kita.

Litrato sa likod halin sa Getty Images; litrato sang Tegucigalpa Honduras Temple

Takos sa aton pagpaninguha ang aton pagkadto sa templo. Si Pangulong Russell M. Nelson nagpanudlo nga “ang templo importante kaayo sa aton kaluwasan kag pagkahitaas kag sa iya sang aton mga pamilya. …

“… Ang kada isa sa aton nagakinahanglan sang nagapadayon nga espirituhanon nga pagpabakod kag pagpanudlo nga posible lamang sa balay sang Ginuo.”¹

Ang pagkadto sa templo nagapangayo nga aton plastaron ang aton oras, mga responsibilidad, kag galastuhon, subong man ang pagpanghanda sa espirituhanon. Naga-minister kita kon aton ginahibalo ang mga upang nga nagapugong sa aton mga kauturan sa pagkadto sa templo kag ginabuligan sila nga magpangita sang mga solusyon.

Ang Templo Isa ka Bugay nga Pwede Mabaton sang Bisan Sin-o

Isa ka bag-o lang nagpuli nga misyonero, nga si Meg, nagalakat pakadto sa pwertahan sang Kona Hawaii Temple sang natalupangdan niya ang isa ka lamharon nga babayi nga nagapungko nga isahanon sa bangko sa gwa. Nabatyagan ni Meg nga dapat niya istoryahon ang babayi, pero indi sia sigurado kon ano ang iya ihambal. Gani namangkot sia kon ano ang kahulugan sang tattoo sa buko-buko sa tiil sang babayi. Nangin panugod ato sang pag-istoryahanay nga nagtugot sa lamharon nga babayi, nga si Lani, nga isugid ang iya inagihan.

Gin-istorya ni Lani kay Meg ang iya kabudlayan sa pagbalik sa pagkaaktibo sa Simbahan, ang mabuot nga mga miyembro nga nagabulig sa iya, kag ang iya handum nga sa pila ka adlaw maselyuhan sa iya lapsag nga babayi.

Ginhagad ni Meg si Lani nga mag-upod sa iya sa sulod sang hululatan sa templo. Indi pa sila pwede magsulod gid sa templo, pero pwede sila makalab-ot sa salamputan. Nagsugot si Lani, kag upod sila nga nagsulod sa mayor nga pwertahan. Gindul-ong sila sang isa ka temple worker sa pulungkuan sa idalom sang larawan sang Manluluwas.

Samtang nagapungko sila, naghutik si Lani, “Gusto ko gid magkadto sa templo sini nga adlaw, pero ginkulbaan ako.” Bangud ginsunod ni Meg ang Espiritu, ginbuligan niya sabat ang tago nga pangamuyo ni Lani.

Mga Ideya para Mabuligan ang Mga Wala pa sang Recommend

Bisan ang mga wala pa sang temple recommend pwede mabugayan sang templo.

I-istorya ang imo mga balatyagon kon paano ka ginbugayan sang Ginuo paagi sa mga buluhaton sa templo.
Hagara ang isa ka tawo nga magkadto sa open house sang templo ukon visitors’ center. Magpangita sang palaabuton nga mga open house sa temples.ChurchofJesusChrist.org.
Magtan-aw sang mga litrato kag magtuon pa gid parte sa templo sa temples.ChurchofJesusChrist.org.

Mas Pahaposa ang Pagkadto sang Iban sa Templo

Bisan sa mga miyembro nga may temple recommend, makahalangkat ang pagkadto sa templo. Ang iban kinahanglan nga magbiyahe sing malayo. Ang iban mahimo nga may mga kabataan nga magagmay ukon tigulang na nga mga miyembro sang pamilya nga kinahanglan atipanon. Pwede kita magbinuligay para mangin posible para sa tanan ang pagserbisyo sa templo.

Nabudlayan si Leola Chandler sa pag-atipan sang iya nagamasakit nga bana kag sa ila apat ka kabataan. Gani nagpain sia sang oras kada Martes para magkadto sa malapit nga templo. Diri nagahalin ang kalinong kag gahum sa iya kabuhi.

Isa ka adlaw nabatian niya nga may pila ka gulang na nga mga sister nga gusto gid magkadto sa templo, pero wala sila sang masakyan. Nagtanyag si Leola nga idul-ong sila. Sa nagsunod nga 40 anyos, talagsa lang gid sia nagakadto sa templo nga nagaisahanon.²

Ginbugayan si Leola, kag ginbugayan niya ang iban paagi sa pagtanyag nga magdungan sila sa iya pakadto sa templo.

Mga Ideya para Mabuligan ang Iban nga Makakadto sa Templo

Paano mo buligan ang iban nga mas masunson nga makakadto sa templo? Mahimo nga makabulig man sa imo ang ini nga mga ideya.

Maglakat sing ululupod. Magtanyag ukon magpatigayon sang masakyan sa iban. Mahimo nga makabulig man ang pagpaisog sa iban nga magkadto man sa templo.
Pangabaya ang mga miyembro sang imo pamilya ukon ward nga buligan ka sa paghikot sang mga ordinansa para sa imo mga himata, labi na gid kon madamo ka sang mga nakahanda na nga mga ngalan sang pamilya para sa mga ordinansa.
Magtanyag nga magbantay sang bata para makakadto ang mga ginikanan sa templo. Ukon magpatigayon nga magbulos-bulos bantay sang kabataan sang iban.

Kon Malayo ang Templo

Sanday Chandradas “Roshan” kag Sheron Antony sang Colombo, Sri Lanka, nagdesisyon nga magpaselyo sa templo. Nalipay gid para sa ila ang ila mga abyan nga sanday Ann kag Anton Kumarasamy. Pero nakahibalo sila nga indi mahapos ukon barato ang pagkadto sa Manila Philippines Temple.

Nagsupot sanday Roshan kag Sheron kag nagbakal sang ila ticket binulan antes para makakuha sang biyahe nga masarangan nila. Sang ulihi, nag-abot na ang adlaw. Ugaling, sang nagpundo sila sa Malaysia, nadiskubrehan nila nga para makapadayon sa Pilipinas, kinahanglan nila sang visa ukon magsakay sa lain nga eroplano. Imposible na magkuha sang visa, kag indi sila makasarang magbakal sang tiket sa lain nga eroplano. Pero indi man nila mabatas nga magpuli nga wala maselyuhan.

Nga nagalibog kon ano pa ang himuon, gintawgan ni Roshan si Anton. Gusto gid ni Anton kag Ann nga makabulig. Isa sila sa pila lang ka mag-asawa sa Sri Lanka nga naselyuhan na sa templo, kag nakahibalo sila kon daw ano ini nga bugay. Pero wala lang dugay nga nagamit nila ang ila sinuptan para buligan ang isa ka miyembro sang pamilya nga nagakinahanglan, kag kulang ang ila kuwarta para buligan sanday Roshan kag Sheron nga makabakal sang tiket sa lain nga biyahe.

Sa Sri Lanka kustombre sang palamanhon nga baklan ang iya palangasawhon sang bulawan nga kulintas para may kuwarta sia kon mapatay ang iya bana. Nagdesisyon si Ann nga ibaligya ang iya kulintas para makabulig bakal sang bag-o nga tiket. Nangin posible para kanday Roshan kag Sheron nga makaabot sa ila natalana nga appointment sa templo sa Manila tungod sang iya maalwan nga regalo.

“Nahibal-an ko ang balor sang pagselyo sa templo,” siling ni Ann. “Nakahibalo ako nga si Sheron kag Roshan mangin dako nga kusog sa branch. Indi ko gusto nga indi nila mabaton ang ini nga oportunidad.”³

Mga Ideya para sa Ila nga Indi Makabisita sa Templo

Mahimo nga tawgon ka nga mag-minister sa mga indi ukon talagsa lang makakadto sa templo tungod sa kalayuon ukon gasto. Pero pwede ka gihapon magpangita sang mga paagi nga mabuligan sila nga maapresyar ang mga bugay sang templo.

Magtudlo ukon mag-upod partisipar sa ila sa klase sang pagpanghanda para sa templo ukon family history.
Hatagi sila sang litrato sang templo para ipakabit sa ila balay.
Kon nakakadto ka na sa templo, i-istorya ang imo mga nabatyagan parte sa imo eksperiyensya kag ang imo panaksihon parte sa mga ordinansa sang templo.
Buligi sila nga madugangan ang ihibalo parte sa mga kasugtanan nga ila ginhimo kag kon paano ini tumanon. Pamensara nga gamiton ang “Understanding Our Covenants with God: An Overview of Our Most Important Promises,” sang Hulyo 2012 Liahona.

© 2020 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, March 2020. Hiligaynon. 16985 861