Osisechakl er a Odingel, Ongedei el Buil 2020
Omesiou loeak a Ureor ra Templo
Sel dolngeseu ra rebebil mel loldeu a rengrir ra ikel klengeltengat ra templo, e kede mesiou.
Sel domes er ngii er a ikrel a mlengai er a Getty Images; siasing er a Tegucigalpa Honduras Temple
A bised el ngara templo a ngarngii a le relii. A President Russell M. Nelson a ulsisechakl el kmo, “a templo a usbechall el kirel a bode sobel e de ngeriakl ma kirel a telungalk. …
“… Dersta er kid a ousbech er sel reng el melemolm el melisiich e olsisechakl eldi mengai er a blil a Rubak.”1
A de ngara templo a kired el lungil lousbech a temed, ngercheled, ma ikel ngarngii er kd, e dirrek el kired el lungil klokiid a rengud. Kede mesiou sel sekum e kede mes a ikel lolibesongel el merob ra rudam ma rudos er kid el mora templo e olngeseu er tir el smiik a ngeseu.
A Templo a Klengeltangat el Ngidi el Chad a Sebechel el Moldeu a Rengul
A dirke mlei el missionari, el Meg, a milrael el kirel a chesimer er a Templo ra Kona Hawaii er a lesa ngeasek el dil el dengchokl el di ngiltang ra kingall ra rikl. A Meg a milchesuar el kmong kirel el mo mengedecheduch er ngikal ngeasek el dil, engdi kora ulmededenger ra bo lolekoi el tekoi. Meng nguleker el kirel a delngod el mlara ochil ngikal ngeasek el dil. Tia e a milchelii a cheldecheduch meng mlo sebechel ngikal ngeasek el dil, el Lani el louchais a chisel.
Ma Lani a uluchais er a Meg el kirel ra le meringel el louedikel el lmuut el mera Ikelesia, e tirkel lungil chad ra ikelesia el ulngeseu er ngii, e loureng el kmo a tara klebesei e bol mouak ngii ma ngelekel tolechoi el redil.
Ma Meg a mle siotai ra Lani mel belsiseb ra ongiall ra templo el dengchokl lobengkel. Ngmo diak el sebechir el melemolm el mo ra chelsel a templo, engdi ng sebechir el mo soiseb er a medal a tuangel. A Lani a kilengei, me te mlong el terung el soiiseb er sel klou el siseball. A chad loureor ra templo a ngiltiterir el mora kingall el ngara cheungel a sunga ra Osobel.
Me te dengchokl el terung, ea Lani mengululau, “Ng meral mle soak el mera templo er chelechal sils, ngdi ak meral mle bekikl.” Leng Meg el ultirakl er a Reng, eng ngilsuir sel longtil a Lani el di miluluuch er a rengul.
Uldasuo el mo Olngeseu er Tirkel diak a Lolab a Kengei el mora Templo
Molmuut er tirkel diak loba kengei le mora templo meng sebechir el muklengeltengat ra templo.
-
Mouchais a ikel blo molchesiu el Rubak ng milekerang ra lomekngeltengat er kau ra ureor ra templo.
-
Mongemedaol ra kmung techang el mora open house ra templo ma visitor center. Mosiik er a merael mei el open house er a temples.ChurchofJesusChrist.org.
-
Momes a siasing e mosuub a lmuut el bebil el kirel a templo er a temples.ChurchofJesusChrist.org.
Mruul me Bol Beot a Mei er a Templo
Ngii me sel le chedal a ikelesia loba babier ra kengei el mora templo, a mora templo a sebechel meringel. A rebebil a locha kirir el merael ra kemangel omerael. E a rebebil a locha oungalek ra remekekerei ma lechub a chuodel el chedal a telungalek el ousbech a ulekerreu. Ng sebeched el dmak loureor el mo meruul a mora templo el sebechel mora rokui el chad.
A Leola Chandler a mlo chuarm el lomes ra smecher el bechil me a teua el rengelekir. Meng tilbir el mo bek el Tuesday el lebora kmeed el templo. Tia mlo uchul a rolel a budech me a klisiich er a klengar er ngii.
Tara klebesei eng rirenges el kmo a bebil er a remechuodel odos er a ikelesia el le ngarngii a kmal mle sorir el mo ra templo, eng di dimlak a mlirir. A Leola a mle soal loltak er tir. A ikel milrael mei el okeua el rak, eng dersta el taem el dil ngiltang el mora templo.2
A Leola a mlukngeltengat, e ulemekngeltengat er a rebebil er sera loltak er tir el mora templo.
Uldasu el mo Olgeseu er a Rebebil el Mora Templo.
Ke mekera molngeseu er a rebebil el mo blechoel el mora templo? Ke locha metik a ikal uldasu el dirrek el ngosukau.
-
Mdak el mong. Moltak malechub em sikii a mo mlil a kmong techang. Ng dirrek el locha mo omeksemeriar er a kmong techang el mora templo el dirrek.
-
Molengit er a rechedal a telungalek ma lechub a ikelesia el mo olngeseu er kau el meruul chedaol ruoll el kirir a rebeldekem, tokuni sel le betok a ngakl el molab el kldmokl el kirel chedaol ruoll.
-
Bo momes er a rengalek ma rechedil ma rechedam bol sebecherir el mora templo. Malechub e bom kaiseseuul el lomes ra rengelekiu.
Sel sekum me a Templo a Kmal Cheroid
Chandradas “Roshan” me a Sheron Antony er a Colombo, Sri Lanka, a tilbir el mo omak a chebechielir er a templo. A sechelirir er a Ann me a Anton Kumarasamy a kmal mle semeriar el kirrir. Te mle medengei el kmo a omerael el mora Manila Philippines Temple a dimlak el beot ma kal beot a cheral.
A Roshan me a Sheron a mle omatek a ududir e harau ra omerolir er a betok el buil ruchei mel beot er tir el harau. Seikid, el sils a mlei. Engdi, sera lengara Malaysia, e temiltik el sekum te mo melemolem el mora Huripin, e te ousbech ra visa malechub e te kirir el mo ngara kuk tara skoki. Ng dimlak el sebechir el melai er a visa, e diak el sebechel a urudir el mechar a oleng rir er a tara skoki. Eng di dimlak el sorir el lemuut el mo remei e diak el bol moak.
Ng dimlak lodengei el kmo te mekerang, ea Roshan a ulemekedong er a Anton. A Anton me a Ann a kmal mle sorir el olngeseu. Tirka bebil er a mekesai el kaubuch el ngara Sri Lanka el mla moak er a templo, me te medengelii a klengeltengat er ngii. Engdi tirka kmal dirk ke mle ousbech a ududir el mle medechel lulngeseu er a chedal a telungalek el ulusbech a ngesou, meng dimlak a ududir el sebechel ngosouir a Roshan me a Sheron el mechar a olengrir er a tara skoki.
A beluu er a Sri Lanka siukang er ngii el sechal a mecherar a kolt el olbiungel el mora bechil meng sebechel ngarngii a ududel alsekum me a bechil a mad. Ann a mle tibir el mo oterur a olbingelel el molngeseu el kirel olengil a skoki. Tial mla ra rengul sengk a rirelii meng mlo sebechel a Roshan me a Sheron el mechir a belsechel a templo er tir er a Manila.
“Ak medengelii sel klungel a belkul a moak er a templo,” Ann a millekoi. “Ak medengei el Sheron me a Roshan a mo klou el klisichel a ikelesia. Ng dimlak el soak tir a lak el nguu tial techall.”3
Uldasu el mo Olngeseu er Tirkel Diak el Sebechir el Mora Templo
Kau a locha mo nguu okedeong el mo oldingel er tirkel tir a diak el sebechir el blechoel el mora templo malechub eng diak el bong leng cherroid malechub eng oleng a uchul. Engdi kau a sebechem el metik a bebil ra tekoi el ngosuterir el mo omatek aklengeltengat er a templo.
-
Molisechakl malechub e bom dak el ngara klas er a omengedmokl el mora templo malechub a klass er a reksi er a telungalek.
-
Besterir a siasing er a templo mel bol turcheklii er a chelsel a blirir.
-
Alsekum me ke mla ngara templo, e mouchais a oble momelchesiu el kirel a dilubech el merkau e dirrek el mouchais a klaumerang er kau er a chedaol ruoll er a templo.
-
Bom ngesuterir el mo mesuub a lmuut el bebil el kirel a telbiil el tir olab e mekera bo loltirakl. Momdasu a ousbech er a “Understanding Our Covenants with God: An Overview of Our Most Important Promises,” in the July 2012 Liahona.
© 2020 lokiu a Intellectual Reserve, Inc. All rights reserved. Milluches er a USA. Kengei er a English: 6/19. Kengei er a Oidel: 6/19. Oidel a Ministering Principles, March 2020. Palauan. 16985 881