Sèvis Pastoral atravè Konferans Jeneral

Avèk tout sitasyon edifyan yo, tradisyon familyal yo, ak ansèyman ki soti nan men sèvitè Senyè yo, konferans jeneral ba nou anpil fason pou nou fè sèvis pastoral—anvan, pandan, epi aprè wikenn konferans jeneral la!

Antanke enstriktè klas preparasyon misyonè, Susie ak Tom Mullen toujou ankouraje manm klas yo pou yo envite yon moun gade konferans jeneral.

“Envite yon moun pou l fè yon bagay se yon pati enpòtan nan travay misyonè, e li aplike a sèvis pastoral tou,” se sa Susie di. “Etidyan nou yo fè yon rapò regilyèman sou kijan sa te pase pou yo epi tou pou moun yo te envite a.”

Men kèk nan fason etidyan yo di yo te atenn moun:

“Nou fè sèvis pastoral pou yon zanmi ki ap lite anba kèk pwoblèm. Nou te envite l koute konferans jeneral pou l ka jwenn repons. Lè nou te pale avèk li apre konferans lan, li te di nou ke li te tande anpil ide ki tap ede l.”
“Nou te gen yon fèt konferans jeneral e chak moun te pote bagay manjab pou yo pataje. Sa tèlman te amizan nou te deside fè l ankò.”
“Mwen te envite yon zanmi gade konferans jeneral la avèk mwen. Pandan nou t ap pale de sa, nou te deside kondi ale nan chapèl la pou wè si nou kapab gade konferans lan la. Nou te fè sa, e la nou te la a sete pi bèl eksperyans lan.

Jan Mullens yo ak etidyan yo te aprann nan, gen anpil fason pou n sèvi moun atravè konferans jeneral. Se yon fason mèveye pou nou pataje sitasyon edifyan, tradisyon familyal, diskisyon ki gen anpil siyifikasyon, ak ansèyman sèvitè Senyè a yo.

Envite lòt moun lakay ou.

“Sovè a te kòmande disip li yo pou ‘youn renmen lòt; jan mwen renmen nou an.‘ (Jan 13:34). Konsa, nou gade kijan l te renmen nou. … Si nou fè l tounen modèl nou, nou ta dwe toujou ap eseye fè kontak pou nou enkli tout moun.” —Prezidan Dallin H. Oaks¹

Sa gen kèk ane enstriktè ofwaye mèveye nou an, Mike te remake ke twa timoun mwen yo ak mwenmenm te gen sèlman yon ti laptòp pou nou te gade konferans jeneral. Imedyatman li te envite nou vin lakay li pou gade konferans lan avèk limenm ak madanm ni, Jackie e li te ensiste pou di yo t ap renmen konpayi nou. Timoun mwen yo te kontan gade konferans lan nan yon vrè televizyon; mwen te vrèman apresye sipò a; epi nou tout te renmen moman nou te pase ansanm nan.

Apre sa, gade konferans jeneral ansanm te vin tounen yon tradisyon. Menm lè nou te vin gen pwòp televizyon pa nou, nou te toujou ale kay Mike ak Jackie avèk zòrye nou, kaye nou, ak yon ti soutnikè pou konferans jeneral la. Tande pawòl pwofèt yo ansanm te rann sa pi espesyal. Nou te vin tankou fanmi. Mike ak Jackie te vin tounen de nan pi bon zanmi mwen ak dezyèm granparan pou timoun mwen yo. Lanmou yo ak amitye yo te yon benediksyon enkwayab pou fanmi m. Mwen vrèman rekonesan pou dispozisyon yo pou yo te ouvri kay yo ak kè yo ba nou.

Suzanne Erd, California, Etazini Damerik

Prensip pou nou konsidere

“Te remake”

Sovè a te pran tan nan yon espri lanmou pou wè bezwen lòt moun epi li te aji pou satisfè bezwen sa yo (gade nan Matye 9:35–36; Jan 6:5; 19:26–27). Nou ka fè menm bagay la tou.

“Te envite imedyatman”

Apre nou fin remake bezwen moun n ap fè sèvis pastoral yo, pwochen etap la se aji. “Tande pawòl Pwofèt yo.”

Nou dwe “reyini ansanm souvan” (Mowoni 6:5) pou n aprann ansanm, grandi ansanm, epi pale de bagay espirityèl ki pi enpòtan pou nanm nou yo.

“Vin koute vwa yon pwofèt, ak tande pawòl Bondye”² kapab youn nan envitasyon ki pi enpòan nou kapab fè moun n ap sèvi yo.

”Lanmou ak amitye”

Pou n vrèman ede ak enfliyanse lòt moun yo, nou dwe bati relasyon avèk konpasyon ak “lanmou san fent” (gade nan Doktrin ak Alyans 121:41).

Pataje sou Intènèt.

“Kanal medya sosyal yo se zouti global ki kapab pèsonèlman ak pozitivman fè enpak sou anpil moun ak fanmi. E mwen kwè lè a rive pou noumenm, kòm disip Kris la, itilize zouti enspire sa yo nan fason ki apwopriye e ki pi efikas pou nou temwaye de Bondye Papa Etènèl la, de plan bonè L la pou pitit Li yo, ak de Pitit Gason L lan, Jezikri kòm Sovè mond lan.” —Èldè David A. Bednar³

Entènèt la pèmèt nou pataje levanjil la avèk tout mond lan. Mwen renmen sa! Mwen pataje kèk aktivite pou konferans jeneral, men mwen plis eseye ede lòt moun kreye yon diskisyon sou diskou konferans jeneral yo. Souvan wè kesyon lòt moun yo genyen kapab ede nou wè bagay yo nan yon fason diferan epi sa kapab reprezante yon katalizè pou pwòp kesyon diskisyon pa nou yo.

Mwen twouve ke lè nou itilize kesyon pou n diskite sou diskou konferans jeneral yo avèk fanmi nou ap sèvi yo, sa ede nou wè fòs yo ak bezwen yo tou. Youn nan kesyon m pi renmen poze se: Kisa ou santi ki te tèm konferans jeneral ki pi resan an?

Repons lan prèske toujou pèmèt ou wè sa k ap pase nan lavi yo ak sa ki enpòtan pou yo. Li pèmèt ou vin yon pi bon frè ou sè sèvis pastoral paske ou rive konprann yo pi byen.

Camille Gillham, Colorado, Etazini Damerik

Prensip pou nou Konsidere

“Pataje levanjil la”

“Nou te fè alyans pou nou ”sèvi kòm temwen Bondye tout tan, nan tout bagay, e tout kote” (Mozya 18:9).

“Kreye yon diskisyon”

Mesaj konferans jeneral yo kapab enspire konvèsasyon ki fòmidab, enpòtan epi ki dirije espirityèlman. Epi tip diskisyon sa yo kapab ranfòse relasyon w, ede temwayaj ou grandi, e pote lajwa pou ou! (gade nan Doktrin ak Alyans 50:22).

“Itilize kesyon”

“Bon kesyon ap ede w konprann enterè, preyokipasyon, oubyen kesyon lòt yo genyen. Yo kapab amelyore ansèyman w, envite Lespri a, epi ede moun yo aprann.”⁴

© 2020 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/19. Apwobasyon pou tradiksyon: 6/19. Tradiksyon Ministering Principles, April 2020. Haitian Creole. 16986 036