Ministering paagi sa Pangkabilugan nga Komperensya

Upod ang tanan nga nagapaisog nga mga sinambit, mga tradisyon sang pamilya, kag mga pinanudlo halin sa mga alagad sang Ginuo, ang pangkabilugan nga komperensya nagahatag sa aton sang madamo nga mga paagi sa pagminister—antes, sa tion sang, kag pagkatapos sang semana sang pangkabilugan nga komperensya!

Bilang mga titser sa klase sang pagpanghanda-para-sa-misyon, sanday Susie kag Tom Mullen regular nga nagapaisog sa mga miyembro sang ila mga klase nga maghagad sang isa ka tawo para magtan-aw sang pangkabilugan nga komperensya.

“Ang paghagad sang isa ka tawo nga himuon ang isa ka butang isa ka importante nga bahin sang pangmisyonaryo nga buluhaton, kag magamit man ini sa ministering,” siling niya. “Ang amon mga estudyante regular nga nagabalik sa pagreport kon ano ang nangin resulta sini sa ila kag sa tawo nga ila ginhagad.”

Ari ang pila sa mga paagi nga ginreport sang ila mga estudyante sa paglab-ot sa iban:

“Nagaminister kami sa isa ka abyan nga may mga isyu nga ginaatubang. Ginhagad namon sia nga mamati sa pangkabilugan nga komperensya para sa mga sabat. Sang gin-istorya namon sia pagkatapos sang komperensya, ginsiling niya sa amon nga madamo sia sang nabatian nga mga ideya nga makabulig.”
“Naghiwat kami sang kasadyahan pagkatapos sang pangkabilugan nga komperensya kag nagdala ang tanan sang mga kalan-unon para sa tanan. Kasadya sadto kaayo amo nga nagdesisyon kami nga himuon ini liwat.”
“May ginhagad ako nga abyan nga magtan-aw sang pangkabilugan nga komperensya upod sa akon. Samtang gina-istoryahan namon ang parte sini, nagdesisyon kami nga maglabay sa simbahan kon pwede nga didto kami magtan-aw. Didto kami tuod nagtan-aw, kag amo ato ang pinakanami namon nga eksperiyensya!”

Sa natun-an sang mga Mullen kag sang ila mga estudyante, madamo sang mga pamaagi sa pagminister paagi sa pangkabilugan nga komperensya. Kanami nga paagi ang magpaambit sang makapaisog nga mga sinambit, mga tradisyon sang pamilya, makahulugan nga paghinambalanay, kag sang mga pinanudlo sang mga alagad sang Ginuo!

Hagara ang Iban sa Inyo Puluy-an

“Ang Manluluwas nagsugo sa Iya mga sumulunod nga ‘maghigugmaanay kamo; subong nga ako naghigugma sa inyo’ (Juan 13:34). Gani ginpamensar namon kon paano Niya kita ginhigugma. … Kon himuon naton Sia nga aton modelo, dapat naton pirme tinguhaan nga ilakip ang tanan.” —Pangulong Dallin H. Oaks¹

Pila ka tuig na ang nagligad, ang amon manami nga home teacher nga si Mike nakatalupangod nga kami sang akon tatlo ka kabataan may gamay lang nga laptop nga ginatan-awan sang pangkabilugan nga komperensya. Iya kami gilayon nga ginhagad nga magkadto sa ila balay para magtan-aw upod sa iya kag sa iya asawa nga si Jackie, nga nagapamilit nga masadyahan gid sila nga makaupod kami. Nasadyahan gid ang mga bata ko nga magtan-aw sang komperensya sa matuod-tuod nga TV; dako gid ang pagpasalamat ko sa suporta; kag nanamian gid kami sang tion nga nag-ululupod kami.

Pagkatapos sadto, nangin tradisyon na namon nga magtan-aw sang pangkabilugan nga komperensya sing ululupod. Bisan pa nga may amon na kami nga TV, masadya kami gihapon nga nagakadto sa balay nila ni Mike kag Jackie dala ang amon mga ulunan, mga notebook, kag mga pamahaw para sa pangkabilugan nga komperensya. Ang pagpamati sa mga pulong sang mga propeta nga ululupod ang naghimo sini nga mas espesyal. Daw nangin pamilya na kami. Sila ni Mike kag Jackie nangin pila sa pinakasuod ko nga mga abyan kag ikaduha nga mga lolo kag lola sa akon mga kabataan. Ang ila pagpalangga kag pagpakig-abyan nangin dako kaayo nga bugay sa akon pamilya. Nagapasalamat gid ako sa ila kabubut-on nga buksan ang ila puluy-an kag ang ila mga tagipusuon para sa amon.

Suzanne Erd, California, USA

Mga Prinsipyo nga Dapat Hunahunaon

“Natalupangdan”

Ang Manluluwas mapinalanggaon nga naghatag sing oras para tan-awon ang mga panginahanglan sang iban kag dayon naggiho para masabat inang mga panginahanglan (tan-awa sa Mateo 9:35–36; Juan 6:5; 19:26–27). Sarang man naton ini himuon.

“Gilayon nga ginhagad”

Pagkatapos nga matalupangdan ang mga panginahanglan sang aton mga ginaministeran, ang madason nga tikang amo ang mag-akto.“Pagpamati sa mga pulong sang mga propeta”

Dapat kita “masunson nga magtililipon sing tingob” (Moroni 6:5) para magtuon sing ululupod, magtubo sing ululupod, kag maghinambalanay parte sa espirituhanon nga mga butang nga may importansya sa aton mga kalag.

Ang “Dali, magpamati sa tingug sang propeta, kag pamatii ang pulong sang Dios”² mahimo nga isa sa pinakaimportante nga imbitasyon nga pwede naton itanyag sa aton mga ginaministeran.

“Pagpalangga kag pagpakig-abyan”

Para matuod-tuod nga makabulig kag makaimpluwensya sa iban, dapat kita magpundar sang mga relasyon nga may kaluoy kag “sinsero nga pagpalangga” (tan-awa sa Doktrina kag mga Kasugtanan 121:41).

I-share sa Internet

“Ang mga channel sa social media mga pang-kalibutanon nga kasangkapan nga may epekto sa personal kag positibo nga nagaapekto sa madamo nga mga indibidwal kag mga pamilya. Kag nagapati ako nga nag-abot na ang tiyempo para sa aton bilang mga disipulo ni Cristo nga gamiton ining inspirado nga mga kasangkapan sing husto kag mas epektibo para magpamatuod sa Dios nga Wala Katapusan nga Amay, sa Iya plano sang kalipayan para sa iya mga anak, kag sa Iya Anak, nga si Jesucristo, bilang Manluluwas sang kalibutan.” —Elder David A. Bednar³

Ang internet nagatugot sa aton nga ipaambit ang ebanghelyo sa bilog nga kalibutan. Nanamian ako sina! Ginaistorya ko ang pila ka mga aktibidades sa pangkabilugan nga komperensya, pero sa masami ginatinguhaan ko nga magbulig sa iban nga magsugod sang paghinambalanay parte sa mga pamulong-pulong sa pangkabilugan nga komperensya. Ang makatalupangod sang mga pamangkot halin sa iban masami makabulig sa aton nga makita ang mga butang sa lain nga perspektibo kag mahimo nga mangin panugod sang aton kaugalingon nga mga pamangkot sa paghinambalanay.

Natukiban ko nga kon kamo maggamit sang mga pamangkot para hambalan ang mga pamulong-pulong sa pangkabilugan nga komperensya sa mga pamilya nga inyo ginaministeran, mabuligan kamo sini nga makita ang ila mga kusog dala na ang ila mga panginahanglan. Isa sa paborito ko nga ipamangkot amo ang, Ano sa pamatyag ninyo ang tema sang pinakaulihi nga sesyon sang pangkabilugan nga komperensya?

Ang sabat halos kasami magapakita sa inyo kon ano ang nagakatabo sa ila mga kabuhi kag kon ano ang importante para sa ila. Ginatugotan ka sini nga mangin mas maayo nga ministering brother ukon sister tungod mas makilala ninyo sila sing maayo.

Camille Gillham, Colorado, USA

Mga Prinsipyo nga Dapat Hunahunaon

“Ipaambit ang ebanghelyo”

Nagpromisa kita nga “magtindog bilang mga saksi sang Dios sa tanan nga tinion kag sa tanan nga mga butang, kag sa tanan nga mga duog” (Mosias 18:9).

“Magsugod sang paghinambalanay”

Ang mga mensahe sa pangkabilugan nga komperensya mahimo nga mag-inspirar sang manami, mapuslanon, kag espirituhanon nga mga paghinambalanay. Kag ang ining klase sang mga paghinambalanay makapabaskog sa inyo mga relasyon, makabulig sa inyo panaksihon nga magbaskog, kag makadala sa inyo sang kalipay! (tan-awa sa Doktrina kag mga Kasugtanan 50:22).

“Maggamit sang mga pamangkot”

“Ang maayo nga mga pamangkot makabulig sa inyo nga maintiendihan ang mga interes, palaligban, ukon pamangkot sang iban. Mapanami sini ang imo pagtudlo, makaimbitar sang Espiritu, kag makabulig sa mga tawo nga makatuon.”⁴

© 2020 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, April 2020. Hiligaynon. 16986 861