“Kev Txhawb Pab Dhau los ntawm lub Tuam Rooj Sab Laj,” Liahona, Plaub Hlis Ntuj 2020
Tej Ntsiab Cai txog Kev Txhawb Pab, Plaub Hlis Ntuj 2020
Kev Txhawb Pab Dhau los ntawm lub Tuam Rooj Sab Laj
Vim yog muaj tej lus zoo kawg, tej kab lis kev cai hauv tsev neeg, thiab tej lus qhuab qhia los ntawm tus Tswv cov tub qhe, lub ruam rooj sab laj pab tau peb txhawb pab lwm tus neeg—txawm yog ua ntej lub tuam rooj sab laj, thaum tseem tab tom mloog, los yog tom qab huv tib si!
Ua ob tug xib hwb rau hoob qhia kev npaj mus ua tub txib qhia txoj moo zoo, Susie thiab Tom Mullen ib sij yaum kom cov tub ntxhais kawm hauv nkawd hoob kawm caw ib tug neeg twg los saib lub tuam rooj sab laj.
Tus Muam Mullen hais tias, “Txoj kev caw ib tug neeg ua dab tsi yeej yog ib lub ntsiab tseem ceeb ntawm txoj kev qhia txoj moo zoo, thiab ua li ntawd kuj zoo rau txoj kev txhawb pab thiab.” “Peb cov tub ntxhais kawm ntawv ib sij qhia peb hais tias qhov uas lawv caw lwm tus neeg mus zoo li cas thiab saib tus neeg ntawd teb li cas.”
Nram qab no yog ob peb yam uas cov tub ntxhais kawm ntawv no ua kom caw lwm tus neeg:
-
“Peb txhawb pab peb ib tug phooj ywg uas muaj teeb meem nyuaj siab. Peb caw nws mloog cov lus qhia ntawm lub tuam rooj sab laj saib nws puas txais lus teb pab nws. Thaum peb mus xyuas nws tom qab lub tuam rooj sab laj, nws qhia peb hais tias nws hnov ntau lub tswv yim uas yuav pab nws.”
-
“Peb muaj ib qho kev lom zem saib lub tuam rooj sab laj thiab txhua tus neeg nqa khoom qab zib los noj ua ke. Lom zem kawg nkaus li, ces peb txiav txim siab tias yuav ua dua ntau zaus ntxiv.”
-
“Kuv caw ib tug phooj ywg nrog kuv saib lub tuam rooj sab laj. Thaum wb sib tham txog, wb txiav txim siab tsav tsheb mus tom lub tsev teev ntuj saib wb puas saib tau tod. Wb saib nyob ntawd, thiab yeej yog ib qho zoo kawg nkaus!”
Ib yam li khub niam txiv Mullens thiab nkawd cov tub ntxhais kawm ntawv tau kawm, muaj ntau yam uas yus ua tau kom txhawb pab lwm tus neeg thaum lub sij hawm saib lub tuam rooj sab laj. Yeej yog ib lub cib fim faib qhia tej lus qhia zoo, tej kab lis kev cai hauv tsev neeg, tej kev sib tham zoo, thiab tej lus qhuab qhia ntawm tus Tswv cov tub qhe!
Caw Lwm tus Neeg Tuaj hauv Koj lub Tsev
“Tus Cawm Seej tau txib Nws cov neeg kom ‘ib leeg hlub ib leeg; ib yam li kuv hlub nej’ (Yauhas 13:34). Ces peb saib Nws hlub peb npaum li cas. … Yog tias peb ua raws li Nws tus yam ntxwv tiag, peb yeej yuav tsum sim cev tes mus pab lwm tus neeg txhua tus.” —Thawj Tswj Hwm Dallin H. Oaks1
Ntau xyoo dhau los peb tus neeg qhia tom tsev Mike pom hais tias kuv thiab kuv peb tug me nyuam tsuas muaj ib lub laptop me me saib lub tuam rooj sab laj. Nws txawm caw peb tam sim ntawd kom tuaj xyuas nws thiab nws tus poj niam, Jackie, tom tsev thiab saib lub tuam rooj sab laj, hais tias nkawd yuav nyiam nrog peb saib. Kuv cov me nyuam zoo siab heev saib lub tuam rooj sab laj hauv ib lub TV tiag, es kuv zoo siab heev uas nws txhawb pab peb li ntawd; thiab peb txhua tus muaj kev lom zem ua ke.
Tom qab ntawd, peb saib lub tuam rooj sab laj ua ke txhua zaus ua ib qho kab lis kev cai. Txawm tias nyob nyob peb yuav tau ib lub TV rau peb tsev neeg, los peb tseem mus tom Mike thiab Jackie saib lub tuam rooj sab laj, nqa peb cov tog hauv ncoo, ntawv sau, thiab khoom noj.Hnov cov lus ntawm cov yaj saub ua ke yeej yog ib qho tshwj xeeb heev. Peb zoo ib yam li ib tse neeg tiag. Mike thiab Jackie yeej yog kuv ob tug phooj ywg zoo thiab ua niam tais yawm txiv rau kuv cov me nyuam. Nkawd nrog peb ua phooj ywg zoo thiab hlub peb thiab yeej yog ib txoj koob hmoov rau kuv tsev neeg. Kuv zoo siab ua Vajtswv tsaug rau qhov uas nkawd kam qhib tsev thiab qhib lub siab rau peb.
Suzanne Erd, California, USA
Tej Ntsiab Cai rau Koj Xav Txog
“Tau Pom”
Tus Cawm Seej yeej siv sij hawm pom tej yam uas lwm tus neeg xav tau thiab nws txawm ua tej yam pab kho tej kev xav tau ntawd (saib Mathais 9:35–36; Yauhas 6:5; 19:26–27). Peb ua tau zoo ib yam.
“Caw tam sim ntawd”
Tom qab peb pom tau tej kev xav tau ntawm cov neeg peb txhawb pab, ces peb yuav tsum ua tej yam pab daws tej kev xav tau ntawd.“Hnov tej lus ntawm cov yaj saub”
Peb yuav tsum “sib ntsib ua ke ntau zaus” (Maulaunais 6:5) kom kawm ua ke, loj hlub tuaj ua ke, thiab hais txog tej yam ntawm sab ntsuj plig uas tseem ceeb tshaj rau peb sab ntsuj plig.
“Los, mloog tus yaj saub lub suab, thiab hnov Vajtswv txoj lus”2 tej zaum yog txoj kev caw tseem ceeb tshaj plaws uas peb yuav hais tau rau lawv cov uas peb txhawb pab.
“Kev Hlub thiab Kev Ua Phooj Ywg”
Kom pab thiab tshoov lwm tus neeg lub siab tiag tiag, peb yuav tsum nrog lawv sib raug zoo thiab muaj kev khuv leej thiab “kev hlub uas tsis yog dag” (saib Lus Qhuab Qhia thiab Kev Khi Lus 121:41).
Faib rau hauv Internet
“Tej kev xa xov xwm hauv Internet (social media) yog tej cuab yeej uas sawv daws thoob plaws ntiaj teb no siv tau kom pab neeg coob heev, txawm yog tib neeg ib leeg xwb los yog hauv tsev neeg huv tib si. Thiab kuv ntseeg tias lub sij hawm tau los rau peb ua Khetos cov thwj tim kom siv tej cuab yeej no raws li kev tsim nyog thiab kom phim kom thiaj ua tim khawv txog Vajtswv Leej Txiv Nyob Mus Ib Txhis Li, Nws txoj kev zoo siab rau Nws cov me nyuam, thiab Nws Leej Tub, Yexus Khetos, ua tus Cawm Seej ntawm lub ntiaj teb.” —Txwj Laug David A. Bednar3
Qhov internet cia peb faib qhia txoj moo zoo nrog rau lub ntiaj teb tag nrho. Kuv nyiam qhov ntawd tiag! Kuv qhia ob peb yam uas peb tau ua rau lub tuam rooj sab laj, tiam sis feem ntau kuv sim pab lwm tus neeg sib tham txog tej yam los ntawm lub tuam rooj sab laj tej lus qhuab qhia. Thaum peb pom tej lus nug los ntawm lwm tus neeg yeej pab tau peb pom txhua yam yam tshiab tshiab li thiab yeej ua tau rau peb nug peb cov lus nug thiab.
Kuv pom tias thaum yus nug tej lo lus nug kom nrog cov neeg uas yus txhawb pab sib tham txog lub tuam rooj sab laj, ua li ntawd pab yus pom tau tej yam lawv muag zog ua thiab lawv tej kev xav tau huv tib si. Ib lo lus nug uas kuv nyiam nug yog, Koj xav hais tias lub ntsiab ntawm lub tuam rooj sab laj zaum tas los no yog dab tsi?
Lo lus teb rau lo lus nug ntawd yeej los pab yus pom tau saib tau muaj li cas hauv lawv lub neej thiab saib muaj dab tsi uas tseem ceeb rau lawv tiag. Ua li ntawd cia yus los ua ib tug neeg txhawb pab lawv zoo dua vim yus pom tau lawv tseeb tseeb tiag.
Camille Gillham, Colorado, USA
Tej Ntsiab Cai rau Koj Xav Txog
“Qhia txog txoj moo zoo”
Peb tau khi lus tias peb yuav “ua tim khawv txog Vajtswv txhua lub sij hawm thiab ua tim khawv txog txhua yam, thiab ua tim khawv nyob hauv txhua qhov chaw” (Mauxiyas 18:9
“Pib kev sib tham”
Tej lus qhia los ntawm lub tuam rooj sab laj yeej tshoov tau peb lub siab kom sib tham txog tej yam ntawm sab ntsuj plig uas zoo kawg nkaus thiab phim peb lub neej. Thiab tej kev sib tham no yuav pab tau kom koj nrog lwm tus neeg sib raug zoo, pab koj zaj lus tim khawv loj hlob tuaj, thiab ua rau koj xyiv fab heev! (saib Lus Qhuab Qhia thiab Kev Khi Lus 50:22).
“Siv tej lus nug”
“Tej lus nug zoo yuav pab koj to taub tej kev txhawj xeeb thiab tej lus nug uas lwm tus neeg muaj, thiab tej yam uas lawv nyiam ua. Tej lus nug yuav pab koj qhia zoo dua, caw tus Ntsuj Plig los, thiab pab lwm tus neeg kawm zoo.”4
© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, April 2020.Hmong 16986 295