Hunahunaa ang Pagkamaayo ug Pagkahalangdon sa Dios

Ni Elder Dale G. Renlund

Sa Korum sa Napulog Duha ka mga Apostoles

Ako modapit kaninyo sa paghinumdom matag adlaw sa pagkahalangdon sa Langitnong Amahan ug ni Jesukristo ug sa unsay Ilang nabuhat alang kaninyo.

Sa tibuok kapanahunan, ilabi na sa malisud nga mga panahon, ang mga propeta miawhag kanato sa paghinumdom sa katalagsaon sa Dios ug paghunahuna unsay Iyang nahimo kanato isip mga indibidwal, mga pamilya, ug katawhan.¹ Kini nga direksyon makita sa tanang kasulatan apan ilabi na diha sa Basahon ni Mormon. Ang ulohan nga pahina nagpasabut nga ang usa sa mga katuyoan sa Basahon ni Mormon mao “ang pagpakita ngadto sa salin sa balay ni Israel unsa nga mahinungdanon nga mga butang ang Ginoo mihimo alang sa ilang mga amahan.”² Ang konklusyon sa Basahon ni Mormon naglakip sa hangyo ni Moroni: “Tan-awa, ako moawhag kaninyo nga kon kamo mobasa niini nga mga butang … nga kamo unta mohinumdom unsa ka maloloy-on ang Ginoo ngadto sa mga katawhan, … ug palandonga kini sa inyong mga kasingkasing.”³

Ang walay pagkausab nga mga paghangyo gikan sa mga propeta nga pamalandungan ang pagkamaayo sa Dios talagsaon.⁴ Ang atong Langitnong Amahan gusto nga kita mahinumdom sa Iyang pagkamaayo ug sa Iyang Hinigugmang Anak, dili alang sa Ilang kaugalingon nga katagbawan apan sa impluwensya niana nga paghinumdom diri kanato. Pinaagi sa pagkonsiderar sa Ilang pagkamabination, milapad ang atong panglantaw ug panabut. Pinaagi sa pagpamalandong sa Ilang kamanggiloy-on, mas mapaubsanon na kita, mainampuon, ug makanunayon.

Ang sakit nga kasinatian uban sa kanhi pasyente nagpakita sa unsang paagi ang pagpasalamat sa kamanggihatagon ug kalooy makausab kanato. Niadtong 1987, akong gikaila si Thomas Nielson, talagsaong tawo nga nagkinahanglang pulihan og kasingkasing. Siya 63 anyos ug nagpuyo sa Logan, Utah, sa Estados Unidos. Human sa pagserbisyo sa militar atol sa Ikaduhang Gubat sa Kalibutan, naminyo siya ni Donna Wilkes sa Logan Utah Temple. Nahimo siyang abtik ug malampusong mason sa bika [brick]. Sa milabayng katuigan nalingaw kaayo siyang nakigtrabaho sa kamagulangan niyang apo, si Jonathan, atol sa mga bakasyon sa eskwela. Ang duha nagkasuod, sa ubang bahin kay nakita ni Tom ang daghan sa iyang kaugalingon kang Jonathan.

Nakita ni Tom nga ang paghulat og donor og kasingkasing makasagmuyo. Dili siya ingon ana ka pasensyuso nga tawo. Kanunay siyang makahimo ug makalampus og mga tumong pinaagi sa pagkugi ug sa hingpit nga determinasyon. Naglisud tungod sa depektuso nga kasingkasing, walay uswag nga kinabuhi, si Tom usahay mangutana nako unsay akong gihimo aron madali ang proseso. Mangomedya siya sa pagsugyot og mga paagi aron makakita dayon ko og donor sa kasingkasing.

Usa ka makalipay apan kulba nga adlaw, usa ka sulundon nga donor miabut para ni Tom. Ang gidak-on ug ang tipo sa dugo nagkatugma, ug batan-on ang donor, 16 anyos ang edad. Ang idonar nga kasingkasing iya ni Jonathan, gipangga nga apo ni Tom. Sayo nianang adlawa, grabe ang pagkaangol ni Jonathan dihang ang awto nga iyang gisakyan naigo sa milabay nga tren.

Dihang mibisita ko ni Tom ug Donna sa ospital, hilabihan ang ilang kasubo. Lisud hunahunaon ang ilang gisinati, sayud nga malugwayan ang kinabuhi ni Tom pinaagi sa kasingkasing sa iyang apo. Sa una, mibalibad sila sa gitanyag nga kasingkasing gikan sa nagsubong inahan nga ilang anak ug sa iyang umagad nga mga ginikanan ni Jonathan. Si Tom ug Donna nasayud, hinoon, nga patay na ang utok ni Jonathan, ug nakasabut nga ang ilang mga pag-ampo alang sa usa ka donor alang ni Tom dili maoy hinungdan sa pagkaaksidente ni Jonathan. Kondili, ang kasingkasing ni Jonathan usa ka gasa nga makapanalangin ni Tom sa oras sa panginahanglan. Ilang nasayran nga moabut ang maayong butang gumikan niini nga trahedya ug mihukom nga ipadayon.

Ang mga paagi sa pagbalhin nagmalampuson. Pagkahuman, si Tom lahi na nga tawo. Ang pagkausab milapas pa sa malambuong kahimsog o gani pasalamat. Gisultihan ko niya nga mamalandong siya matag buntag kang Jonathan, sa iyang anak ug sa umagad, sa gasa nga iyang nadawat, ug sa unsay gibilin niana nga gasa. Bisan og ang iyang natural nga kakomedyante ug determinasyon makita gihapon, akong nabantayan nga si Tom mas mahinuklugon, mahunahunaon, ug mabination.

Nabuhi si Tom og 13 ka tuig human sa pagbalhin, mga tuig nga wala unta kon wala pa kadto. Ang saysay diha sa iyang haya nag-ingon nga kining mga tuiga nagtugot nga matandog niya ang mga kinabuhi sa iyang pamilya ug sa uban pinaagi sa kamanggihatagon ug sa gugma. Usa siya ka pribadong tabang ug ehemplo sa kapositibo ug determinasyon alang sa tanan.

Sama kang Tom, matag usa kanato nakadawat og mga gasa diin kita mismo dili makahatag, mga gasa nga gikan sa atong Langitnong Amahan ug sa Iyang Hinigugmang Anak, lakip ang pagtubos pinaagi sa maulaon nga pagsakripisyo ni Jesukristo.⁵ Nakadawat kita og kinabuhi niini nga kalibutan; makadawat kita og pisikal nga kinabuhi human dinhi, ug mahangturong kaluwasan ug kahimayaan—kon kita mopili niini—tanan tungod sa Langitnong Amahan ug ni Jesukristo.

Sa matag higayon nga kita mogamit, makabenipisyo, o gani sa paghunahuna niini nga mga gasa, angay nga hunahunaon nato ang sakripisyo, kamanggihatagon, ug kamanggiloy-on sa mga tighatag. Ang pagtahud sa mga tighatag makahimo og daghan kay sa paghimo natong mapasalamaton. Ang pagpamalandong sa Ilang mga gasa makahimo ug kinahanglang makausab kanato.

Usa ka talagasaong kausaban mao ang kang Alma nga Batan-on. Samtang si Alma “misukol batok sa Dios,”⁶ usa ka anghel mipakita. Sa “tingog sa usa ka dugdog,”⁷ ang anghel mibadlong ni Alma sa paglutos sa Simbahan ug sa “pagluib sa kasingkasing sa katawhan.”⁸ Ang anghel midugang niini nga pahimangno, “Lakaw, ug hinumdumi ang pagkabihag sa imong mga amahan …; ug hinumdumi unsa ka mahinungdanon ang mga butang nga gihimo sa [Dios] alang kanila.”⁹ Uban sa tanan nga pag-awhag, mao kana ang gihatagan og gibug-aton sa anghel.

Si Alma naghinulsol ug nakahinumdom. Siya sa wala madugay mipaambit ngadto sa iyang anak nga si Helaman sa gipahimangno sa anghel. Mitambag si Alma, “Ako manghinaut nga ikaw mobuhat ingon nga ako mibuhat, sa paghinumdom sa pagkabihag sa atong mga amahan; kay sila diha sa pagkaulipon, ug walay makaluwas kanila gawas sa Dios ni Abraham, … Isaac, ug … Jacob; ug siya sa pagkamatuod miluwas kanila diha sa ilang mga kasakitan.”¹⁰ Sa yanong paagi miingon si Alma, “Ako mibutang sa akong pagsalig diha kaniya.”¹¹ Nasabtan ni Alma nga pinaagi sa paghinumdom sa pagkaluwas gikan sa pagkaulipon ug suporta atol sa “mga pagsulay ug mga kasamok sa matag matang,” makaila kita sa Dios ug sa kasiguroan sa Iyang mga saad.¹²

Diyutay ra kanato ang adunay mga kasinatian nga sama ka mahinuklugon kang Alma, bisan pa ang atong pagkausab posibling susama ang kadak-on. Sa karaang panahon ang Manluluwas misaad:

“Hatagan ko usab kamo sa usa ka bag-o nga kasingkasing, ug ang usa ka bag-ong espiritu igabutang ko sa sulod ninyo: kuhaon ko ang batoon nga kasingkasing … , hatagan ko kamo sa usa ka kasingkasing nga unod.

“Igabutang ko ang akong Espiritu sa sulod ninyo. …

“… Ug kamo mahimong akong katawhan, ug ako mahimo nga inyong Dios.”¹³

Ang nabanhaw nga Manluluwas misulti sa mga Nephite sa unsang paagi ang pagkausab magsugod. Iyang gitino ang usa ka importanting butang sa plano sa Langitnong Amahan dihang miingon Siya:

“Ug ang akong Amahan mipadala kanako nga Ako unta ituboy nganha sa krus; ug human niana nga Ako matuboy diha sa krus, nga Ako unta makadala sa tanan nga mga tawo ngari kanako. …

““Ug tungod niini nga hinungdan Ako natuboy; busa, sumala sa gahum sa Amahan Ako modala sa tanan nga mga tawo ngari kanako.”¹⁴

Unsa ang gikinahanglan aron kamo madala ngadto sa Manluluwas? Hunahunaa ang pagtugyan ni Jesukristo ngadto sa kabubut-on sa Iyang Amahan, ang Iyang pagbuntog sa kamatayon, ang Iyang pagdala diha sa Iyang kaugalingon sa inyong mga sala ug mga sayop, ang Iyang pagdawat sa gahum sa Amahan aron pagpangamuyo alang kaninyo, ug ang Iyang hingpit nga pagtubos kaninyo.¹⁵ Kining mga butanga dili ba igo nga kamo madala ngadto Kaniya? Kini mao ngari kanako. Si Jesukristo “nagbarug nga andam mogakus, malaumon ug andam nga moalim, mopasaylo, mohugas, mopalig-on, molimpyo, ug mobalaan [kanimo ug kanako].”¹⁶

Kining mga butanga angay nga maghatag kanato og bag-ong kasingkasing ug mag-aghat nato sa pagpili sa pagsunod sa Langitnong Amahan ug ni Jesukristo. Gani ang bag-ong mga kasingkasing “posibling matipas sa tumong, … posibling mobiya sa Dios [nga atong] gimahal.”¹⁷ Sa pagbatok niini nga kalagmitan, kinahanglang mamalandong kita matag adlaw sa mga gasa nga atong nadawat ug kon unsay gikinahanglan niini. Si Haring Benjamin mitambag, “gani ako manghinaut nga kamo kinahanglan mahinumdom, ug sa kanunay magpabilin sa inyong panumduman, ang pagkahalangdon sa Dios … ug sa iyang pagkamaayo ug pagkamainantuson nganha kaninyo.”¹⁸ Kon kita mohimo niini, kwalipikado kita alang sa talagsaon nga langitnong mga panalangin.

Ang pagpamalandong sa kaayo ug kalooy sa Dios motabang kanato sa pagkahimong mas madawaton sa espiritwal nga paagi. Agi og balus, ang nagtubong espritwal nga pagbati magtugot nga kita mahibalo sa kamatuoran sa tanang butang pinaagi sa gahum sa Espiritu Santo.¹⁹ Naglakip kini sa pagpamatuod sa katinuod sa Basahon ni Mormon, nahibalo nga si Jesus mao ang Kristo, atong personal nga Manluluwas ug Manunubos, ug sa pagdawat nga ang Iyang Ebanghelyo gipahiuli na niining ulahing mga adlaw.²⁰

Kon mohinumdom kita sa pagkahalangdon sa atong Langitnong Amahan ug ni Jesukristo ug unsay Ilang nahimo kanato, dili kita makabaliwala, sama ni Tom nga wala mobaliwala sa kasingkasing ni Jonathan. Sa masadyaon ug talahurong paagi, matag adlaw si Tom mahinumdom sa trahedya nga naglugway sa iyang kinabuhi. Sa dakong kalipay bahin sa pagkahibalo nga maluwas kita ug mahimaya, nagkinahanglan kitang mohinumdom nga ang kaluwasan ug kahimayaan dako kaayo og kantidad.²¹ Kita sa talahurong paagi magmaya kon atong mahibaloan nga kon wala si Jesukristo wala kitay paglaum apan Kaniya kita makadawat sa kinadak-ang gasa nga ikahatag sa Langitnong Amahan.²² Gani, kini nga pagtahud nagtugot kanato sa pagtagamtam sa saad nga “kinabuhi nga dayon niini nga kalibutan,” ug sa katapusan makadawat og “kinabuhi nga dayon … gani sa imortal nga himaya” sa kalibutang moabut.²³

Kon hunahunaon nato ang kamaayo sa atong Langitnong Amahan ug ni Jesukristo, ang atong pagsalig Kanila molambo. Ang atong mga pag-ampo mausab kay mahibalo kita nga ang Dios mao ang atong Amahan ug kita Iyang mga anak. Wala kita magtinguha sa pag-usab sa Iyang kabubut-on apan sa pagpahaum sa atong kabubut-on sa Iya ug mosiguro sa atong kaugalingong mga panalangin nga gusto Niya nga ihatag, apan mag-agad sa atong pagpangayo niini.²⁴ Atong pangandoy ang pagka mas maaghup, pagka-mas putli, pagka-mas lig-on, pagka-mas Kristohanon.²⁵ Kini nga mga kausaban mopasarang kanato og dugang nga langitnong mga panalangin.

Pinaagi sa pagdawat nga ang matag maayo nga butang naggikan kang Jesukristo, atong ipaambit ang atong pagtuo sa mas epektibong paagi ngadto sa uban.²⁶ Makabaton kita og kaisug kon mag-atubang kita og daw imposibling mga tahas ug mga kahimtang.²⁷ Atong malig-on ang atong determinasyon sa pagtuman sa mga pakigsaad nga atong gihimo sa pagsunod sa Manluluwas.²⁸ Mapuno kita sa gugma sa Dios, magtinguha sa pagtabang sa nanginahanglan sa walay paghukom, mohigugma sa atong mga anak ug padak-on sila sa katarung, magbaton og kapasayloan sa atong mga sala, ug kanunayng magmaya.²⁹ Mao kini ang talagsaong mga bunga sa paghinumdom sa kamaayo sa Dios ug kalooy.

Agig pagkumpara, mipahimangno ang Manluluwas, “Walay butang nga ang tawo makapasakit sa Dios, o batok ni bisan kinsa nga ang iyang kasuko mapukaw, gawas niadtong kinsa dili mokumpisal sa iyang sayop diha sa tanan nga mga butang.”³⁰ Tingali ang Dios dili mainsulto kon mahikalimtan nato Siya. Hinoon, tingali masagmuyo Siya sa hilabihan. Siya nahibalo nga gihikawan nato ang atong kaugalingon sa oportunidad nga mapaduol Kaniya pinaagi sa paghinumdom Kaniya ug sa Iyang pagkamaayo. Kita dili makahimo sa atong kaugalingon paduol Kaniya ug sa pihong mga panalangin nga Iyang gisaad.³¹

Ako modapit kaninyo sa paghinumdom matag adlaw sa pagkahalangdon sa Langitnong Amahan ug ni Jesukristo ug sa unsay Ilang nabuhat alang kaninyo. Himoa nga ang inyong paghunahuna sa Ilang kamaayo mas lig-ong nakahigot sa natipas ninyong kasingkasing ngadto Kanila.³² Pamalandungi ang Ilang kamanggiloy-on, ug ikaw mapanalanginan og dugang nga espiritwal nga pagbati ug mas mahisama kang Kristo. Ang pagpamalandong sa Ilang pagbati makatabang ninyo sa “pagpabiling matinud-anon hangtud sa katapusan,” hangtud nga kamo “pagadawaton ngadto sa langit” nga “mopuyo uban sa Dios diha sa usa ka kahimtang nga walay katapusan ang kalipay.”³³

Ang atong Langitnong Amahan, nga nagpaila sa Iyang Hinigugmang Anak, miingon, “Paminaw Kaniya!”³⁴ Samtang lihukon ninyo kadtong mga pulong ug maminaw Kaniya, hinumdumi, sa malipayon ug talahurong paagi, nga ang Manluluwas gusto nga mopahiuli sa dili ninyo mapahiuli, gusto Siya nga moayo sa mga samad nga dili ninyo maayo, gusto Siya nga mouli sa unsay dili na maulian;³⁵ mobayad Siya sa bisan unsay dili patas nga gipahamtang kaninyo;³⁶ ug gusto Siya nga permanente ang pagkaayo gani sa gisakitan nga mga kasingkasing.³⁷

Samtang akong gipamalandungan ang mga gasa gikan sa atong Langitnong Amahan ug ni Jesukristo, akong nahibaloan ang Ilang walay kinutubang gugma ug ang Ilang dili matugkad nga kamanggiloy-on alang sa tanan nga anak sa Langitnong Amahan.³⁸ Kini nga kahibalo miusab kanako, ug kini usab makausab kaninyo. Sa ngalan ni Jesukristo, amen.