Elder Matthew S. Holland

General Authority Seventy

Si Elder Matthew S. Holland dili na bag-o ngadto sa mga General Authority o sa mga kinatibuk-ang komperensya.

Daghang mga Santos sa Ulahing mga Adlaw nakaila kaniya isip anak nga lalaki ni Elder Jeffrey R. Holland sa Korum sa Napulog Duha ka mga Apostoles. Tingali ang uban makahinumdom kaniya isip ang 17 anyos nga namulong atol sa sesyon sa pagkapari sa Abril 1983 nga kinatibuk-ang komperensya.

“Usa ka talagsaon nga panalangin, sa tibuok nakong kinabuhi, nga magtan-aw kon sa unsang paagi ang akong mama ug papa nagpuyo, sa unsa sila mapasaligon, ug unsay gipabuhat kanila,” miingon si Elder Holland, kinsa nagdumala karon sa North Carolina Raleigh Mission.

“Apan, tungod niining personal nga mga obserbasyon, sobra ra ang among nasayran mahitungod niini nga calling aron maghunahuna nga igo kaming nasangkapan alang niini,” midugang siya. “Maayo gani, nakat-unan usab namo nga ang Ginoo mopasarang niadtong Iyang gitawag, ug nakakuha kami og dakong pagtuo ug kahupayan gikan niana.”

Si Elder Holland mihinumdom nga ang pagpamulong diha sa kinatibuk-ang komperensya makahadlok. Ang pag-andam og mensahe nga sa katapusan miabut “pagtulun-an human sa usa ka pagtulun-an, lagda human sa usa ka lagda” (2 Nephi 28:30) nahimong “sayo, makahupay nga panalangin nga masayud nga kon modawat ka og mga buluhaton gikan sa Ginoo, motabang Siya nimo ug mohatag nimo og mga hunahuna ug mga impresyon sa mga butang nga kinahanglang ipaambit.”

Si Mateo Scott Holland natawo niadtong Hunyo 7, 1966, sa Provo, Utah, USA, ang anak ni Jeffrey R. ug Patricia Holland. Giminyoan niya si Paige Bateman niadtong Mayo 20, 1996, sa St. George Utah Temple. Mga ginikanan sila sa upat ka anak.

Ang mga nakab-ot ni Elder Holland sa edukasyon naglakip sa tulo ka degree sa political science—usa ka bachelor of arts gikan sa Brigham Young University niadtong 1991 ug master of arts ug doctor of philosophy, parehong gikan sa Duke University, niadtong 1997 ug 2001.

Samtang nagtrabaho isip usa ka associate professor sa political science sa BYU (2001–2009), gitudlo siya isip presidente sa Utah Valley University niadtong 2009, miserbisyo hangtud sa iyang 2018 nga tawag isip presidente sa misyon.

Nakaserbisyo siya isip bishop, high councilor, magtatambag sa bishopric, adviser sa Young Men sa ward, ward mission leader, magtutudlo sa Sunday School, ug full-time nga misyonaryo sa Scotland Edinburgh Mission.