Pamatii Sia

Ni Pangulong Russell M. Nelson

Pangulo sang Ang Simbahan ni Jesucristo sang mga Santos sa Ulihing mga Adlaw

Ang aton Amay nakahibalo nga kon ginapalibutan kita sang kawala-kasigurohan kag kahadlok, ang makabulig gid sa aton sing lubos amo ang pagpamati sa Iya Anak.

Mahal kong mga kauturan, daw ano ang pagpasalamat ko nga paagi sa paggamit sang teknolohiya nakatigayon kita nga magkililit-anay kag magsimba sining Domingo sang aga. Daw ano nga bugay sa aton ang mahibal-an nga ang ebanghelyo ni Jesucristo ginpanumbalik sa duta!

Sang nagliligad nga pila ka semana, kalabanan sa aton nakaeksperiyensya sang mga sablag sa aton personal nga mga kabuhi. Mga linog, sunog, baha, pamalatian, kag ang mga epekto sini ang nagpauntat sang mga naandan nga pagginawi kag nagtuga sang kakulang sa pagkaon, mga kinahanglanon, kag sinuptan.

Sa tunga sini tanan, ginadayaw ko kamo kag ginapasalamatan kamo sa pagpili nga magpamati sa pulong sang Ginuo sa sining panahon sang kagamo paagi sa pag-upod sa amon sa pangkabilugan nga komperensya. Ang nagadako nga kadulom nga kaupod sang kalisod nagapasilak pa gid sang kasanag ni Jesucristo. Pamensara lang ang kaayo nga mahimo sang tagsa sa aton sa sining tion sang kalibutanon nga kabudlayan. Ang inyo pagpalangga kag pagtuo sa Manluluwas mahimo nga mangin panugod para sa isa ka tawo nga madiskubrehan ang Pagpanumbalik sang kabug-osan sang ebanghelyo ni Jesucristo.

Sa nagligad nga duha ka tuig, kami ni Sister Nelson nakakilit-anay sa linibo sa inyo sa bilog nga kalibutan. Nagtililipon kami upod sa inyo sa mga arena sa gwa kag sa mga tilipunan sa mga hotel. Sa tagsa ka lugar, nabatyagan ko nga ara ako sa presensya sang mga pinili sang Ginuo kag nagatulok ako sa pagtililipon sang Israel nga nagakatabo sa akon mismo atubang.

Nagakabuhi kita sa panahon nga “ginhulat sang aton mga katigulangan nga [may kalangkag nga pagpaabot].”¹ Ara kita nagapungko sa una sa pagsaksi sang pagkatabo sang kon anong nakita ni propetang Nefi sa palanan-awon lamang, nga “ang gahum sang Cordero sang Dios” magapanaog “sa katawhan sang kasugtanan sang Ginuo, nga nag-alaplaag sa bug-os nga kadaygan sang duta; kag ang ila hinganiban amo ang pagkamatarong kag kaupod ang gahum sang Dios sa dako nga himaya.”²

Kamo, mga kauturan ko, kaupod sadtong mga lalaki, mga babayi, kag mga kabataan nga nakita ni Nefi. Hunahunaa ina!

Wala sapayan kon sa diin kamo nagaestar ukon ano ang inyo mga sirkumstansya, ang Ginuong Jesucristo amo ang inyo Manluluwas, kag ang propeta sang Dios nga si Joseph Smith amo ang inyo propeta. Ginpili sia nga daan antes pa sang pagtuga sang kalibutan nga mangin propeta sining ulihing dispensasyon, kon san-o “wala sing bisan ano nga ilipod”³ sa mga Santos. Ang rebelasyon nagapadayon sa pag-abot halin sa Ginuo sa tion sining nagapadayon nga proseso sang pagpanumbalik.

Ano ang kahulugan para sa inyo nga ang ebanghelyo ni Jesucristo ginpanumbalik sa duta?

Nagakahulugan ini nga kamo kag ang inyo pamilya sarang nga maselyohan sing ululupod sa katubtuban! Nagakahulugan ini nga tungod ginbunyagan kamo sang isa nga may awtoridad halin kay Jesucristo kag ginkumpirma nga miyembro sang Iya Simbahan, sarang ninyo mabaton ang dalayon nga pagpakig-upod sang Balaan nga Espiritu. Giyahan kag amligan Niya kamo. Nagakahulugan ini nga indi kamo mabilin nga wala sing kaumpawan ukon wala sang paagi nga magkapot sa gahum sang Dios sa pagbulig sa inyo. Nagakahulugan ini nga ang gahum sang priesthood sarang magbugay sa inyo samtang inyo ginabaton ang kinahanglanon nga mga ordinansa kag maghimo sang mga kasugtanan upod sa Dios kag tipigan ang mga ini. Daw ano nga angkla sa aton mga kalag ining mga kamatuoran, ilabi na sa sining mga panahon nga mamadlos ang unos.

Ang Libro ni Mormon nagasaysay sang kinaandan nga pagbangon kag kalaglagan sang duha ka mayor nga mga sibilisasyon. Ang ila kasaysayan nagapakita kon daw ano kahapos para sa kalabanan sang katawhan nga kalimtan ang Dios, sikwayon ang mga paandam sang mga propeta sang Ginuo, kag maghandum sang gahum, popularidad, kag ang mga kailigbon sang unod.⁴ Sing sulit-sulit, ang nagliligad nga mga propeta nagpahayag sang “dalagko kag makahalangyag nga mga butang sa katawhan, nga wala nila pagpatihi.”⁵

Indi ini maglayo sa aton panahon karon. Sa mga tinuig, ang dalagko kag makahalangyag nga mga butang mabatian sa ginpahanungod nga mga pulpito sa bilog nga kalibutan. Ugaling kalabanan sang mga tawo wala nagabaton sining mga kamatuoran—tungod wala sila makahibalo kon sa diin pangitaon ang mga ini⁶ ukon tungod nagapamati sila sa mga wala sang bug-os nga kamatuoran ukon tungod ginsikway nila ang kamatuoran agud paboran ang kalibutanon nga mga handum.

Tuso ang kaaway. Sa milenya ginahimo niya nga malain tulukon ang maayo kag ang maayo nga malain tulukon.⁷ Ang iya mga mensahe masami makusog, maathag, kag nagapadayaw.

Ugaling, ang mga mensahe halin sa aton Amay nga Langitnon dako kaayo ang kinalain. Nagapahayag Sia sing simple, malinong, kag may makatilingala nga kaathag nga indi gid kita magsala sa Iya.⁸

Halimbawa, tagsa nga ipakilala Niya ang Iya Bugtong nga Hinigugma nga Anak sa mga mortal sa duta, ginahimo Niya ini sa pila lang gid ka mga tinaga. Sa Bukid sang Pagbalhin sang Dagway sa ila ni Pedro, Santiago, kag Juan, ang Dios nagsiling, “Ini [ang] hinigugma kong Anak: pamati kamo sa Iya.”⁹ Ang Iya mga tinaga sa mga Nefinhon sa dumaan nga Bugana amo ang “Yari karon ang akon Pinalangga nga Anak, nga sa iya nahamuot ako, nga sa iya ginhimaya ko ang akon ngalan—pamatii ninyo sia.”¹⁰ Kag sa kay Joseph Smith, sa sinang dako nga deklarasyon nga nagbukas sining dispensasyon, ang Dios simple nga nagsiling, “Ini ang Akon Hinigugma nga Anak. Pamatii Sia!”¹¹

Karon, pinalangga kong mga kauturan, pamensara ang kamatuoran sa sining tatlo ka kahigayunan nga bag-o lang ginmitlang, antes lang gid ginpakilala sang Amay ang Anak, ang mga tawo nga imbolbado yara sa kahimtangan sang kakulba kag, sa pila ka bahin, pagkadesperado.

Nahadlok ang mga Apostoles sang makita nila si Jesucristo nga ginpalibutan sang panganod sa Bukid sang Pagbalhin sang Dagway.

Nahadlok ang mga Nefinhon bangud nakaeksperiyensya sila sang kalaglagan kag kadulom sang pila ka adlaw.

Si Joseph Smith yara sa pagkagapos sang puwersa sang kadulom antes lang gid magbukas ang langit.

Ang aton Amay nakahibalo nga kon ginapalibutan kita sang kawala-kasigurohan kag kahadlok, ang makabulig gid sa aton sing lubos amo ang pagpamati sa Iya Anak.

Bangud kon nagahandum kita nga magpamati—matuod-tuod nga magpamati—sa Iya Anak, pagagiyahan kita agud mahibal-an kon ano ang himuon sa bisan ano nga sirkumstansya.

Ang una gid nga tinaga sa Doktrina kag mga Kasugtanan amo ang dungga.¹² Buot silingon sini ang “magpamati nga may intensyon sa pagtuman.”¹³ Ang dungga nagakahulugan nga “pamatian Sia”—nga pamatian kon ano ang ginahambal sang Manluluwas kag dayon sa pagsunod sang Iya laygay. Sa sining duha ka mga tinaga—“Pamatii Sia”—ang Dios nagahatag sa aton sang sulundan sang kadalag-an, kalipayan, kag kasadya sa sining kabuhi. Dapat naton pamatian ang mga pulong sang Ginuo, dunggon ang mga ini, kag sundon kon ano ang Iya ginsiling sa aton!

Sa aton paghandum nga mangin mga disipulo ni Jesucristo, ang aton mga pagpaninguha nga pamatian Sia nagakinahanglan nga mangin mas hungod sa buot. Nagakinahanglan ini sang hungod kag padayon nga pagpaninguha nga pun-on ang aton adlaw-adlaw nga pangabuhi sang Iya mga pulong, sang Iya mga pinanudlo, sang Iya mga kamatuoran.

Indi lang kita dapat magsalig sa impormasyon nga aton masalapuan sa social media. Nga may binilyon nga mga tinaga online kag sa kalibutan nga puno-sang-pagpang-engganyo nga tayuyon nga ginabombardeyo sang magahod, malaw-ay nga pagpaninguha sang kaaway, sa diin kita pwede magkadto agud magpamati sa Iya?

Makakadto kita sa balaan nga mga kasulatan. Nagatudlo ang mga ini sa aton parte kay Jesucristo kag sa Iya ebanghelyo, sang kasangkad sang Iya Pagbayad-Sala, kag sang dako nga plano sang kalipayan kag pagtubos sang aton Amay. Ang adlaw-adlaw nga pagpaayaw sa pulong sang Dios importante para sa espirituhanon nga pagkabuhi, ilabi na sa sining panahon sang nagadako nga kabudlayan. Samtang nagapaayaw kita sa mga pulong ni Cristo adlaw-adlaw, ang mga pulong ni Cristo magahambal sa aton kon paano aktuhan ang mga kabudlayan nga wala naton ginahunahuna nga atubangon.

Mahimo man naton nga pamatian Sia sa templo. Ang balay sang Ginuo isa ka balay sang pagtuon. Didto ang Ginuo nagatudlo sa Iya kaugalingon nga paagi. Didto ang tagsa ka ordinansa nagatudlo parte sa Manluluwas. Didto matun-an naton kon paano buksan ang belo kag makighambal sa langit sing mas maathag. Didto matun-an naton kon paano pakigbatuan ang kaaway kag magkapot sa gahum sang priesthood sang Ginuo para pabaskugon kita kag ang aton mga pinalangga. Daw ano kita dapat kalangkag nga maghandum sa pagpasilong didto.

Kon makakas na ining temporaryo nga mga limitasyon tungod sang COVID-19, palihog magtalana sang regular nga tion sa pagsimba kag pagserbisyo sa templo. Ang tagsa ka minuto sinang tion magabugay sa inyo kag sa inyo pamilya sa mga paagi nga indi mahimo sang bisan ano. Maghatag sang tion sa pagbinag-binag sang inyo nabatian kag nabatyagan samtang didto kamo. Pangabaya ang Ginuo nga tudloan kamo kon paano buksan ang mga langit agud bugayan ang inyo kabuhi kag ang mga kabuhi sang inyo mga ginapalangga kag ginaserbisyohan.

Samtang ang pagsimba sa templo sa karon indi pa pwede, ginaagda ko kamo nga dugangan ang inyo partisipasyon sa family history, lakip na sa pag-research sa family history kag indexing. Ginapromisa ko sa inyo nga mientras ginadugangan ninyo ang inyo tiyempo sa templo kag sa buluhaton sa family history, ginadugangan ninyo kag ginapauswag ang inyo ikasarang sa pagpamati sa Iya.

Kita man nagapamati sa Iya sing mas maathag samtang aton ginapapino ang aton ikasarang sa pagkilala sang mga paghutik sang Balaan nga Espiritu. Wala na sing mas importante pa sangsa paghibalo kon paano ang Espiritu nagahambal sa inyo sangsa subong. Sa Panguluhan sang Dios, ang Balaan nga Espiritu amo ang mensahero. Ginadala Niya sa inyo kaisipan ang mga panghunahuna nga gusto sang Amay kag Anak nga inyo mabaton. Sia ang Manugpaumpaw. Magadala Sia sang balatyagon sang kalinong sa inyo tagipusuon. Nagasaksi Sia sang kamatuoran kag magakumpirma kon ano ang matuod samtang inyo ginapamatian kag ginabasa ang pulong sang Ginuo.

Ginasulit ko ang akon pangabay sa inyo nga himuon ang bisan ano nga kinahanglanon agud patubuon ang inyo espirituhanon nga ikasarang sa pagbaton sang personal nga rebelasyon.

Ang paghimo sini makabulig sa inyo kon paano magpadayon sa inyo kabuhi, kon ano ang himuon sa tion sang krisis, kag sa pagkilala kag paglikaw sang mga tentasyon kag sang mga pagpatalang sang kaaway.

Kag, sa katapusan, kita nagapamati sa Iya samtang aton ginatuman ang mga pulong sang mga propeta, mga manugpanan-aw, kag mga manugbaton sang rebelasyon. Ang gin-ordin nga mga Apostoles ni Jesucristo pirme nagasaksi sa Iya. Ila ginatudlo ang alagyan samtang nagapanglakaton kita sa tunga sang masubo nga nagaliko-liko nga dalan sang aton mortal nga mga eksperiyensya.

Ano ang matabo kon hungdon ninyo nga pamatian, dunggon, kag sundon ang ginhambal sang Manluluwas kag ang Iya ginahambal sa karon paagi sa Iya mga propeta? Ginapromisa ko sa inyo nga pagabugayan kamo sang dugang nga gahum para atubangon ang tentasyon, mga kabudlayan, kag kahuyang. Ginapromisa ko ang mga milagro sa inyo pag-asawahay, mga relasyon sa pamilya, kag sa adlaw-adlaw nga trabaho. Kag ginapromisa ko nga ang inyo ikasarang sa pagbatyag sang kalipay magatubo bisan pa nga magadako ang kagamo sa inyo kabuhi.

© 2020 iya sang Intellectual Reserve, Inc. Tanan nga mga kinamatarong ginahuptan. Ginbalhag sa Pilipinas. Petsa sang pagtugot sa Ingles: 5/19. Petsa sang pagtugot sa paglubad: 5/19. Paglubad sang First Presidency Message, May 2020. Hiligaynon16987 861