Puleaina o Meaai e I Ai Aafiaga [i lou tino] i le Lotu
Ata pue o le atigipoo na saunia e Ryan Hender
O se gaoioiga a le autalavou i se po malulu ia Ianuari 2017 na suia ai le aiga o Sorenisone e faavavau. O le atalii o Teri ma Jenilyn o Tana sa 14 tausaga le matua. Sa amata ona faaiuiu le gaoioiga tuufaatasi. Sa ofo mai e se taitai le vaega mulimuli o le taumafataga māmā. O Tana, o lē sa i ai se aafiaga [i lona tino] i pinati, na ia uu mai se kuki ma ū loa. Sa le tatau ona ia aia. O se kuki pinati pata.
“Sa masani lava ona matua faaeteete o ia,” o le tala lea a Teri.
Na mafai lava ona taunuu atu Tana i le fale—sa le mamao atu i lalo o le auala lona falemai lo latou falelotu. Ae sa vave ona le iloa e ia se mea. Sa le toe mānava o ia. Sa tauivi ma le totoa ia aufaigaluega a le falemai ma le potu mo faalavelave faafuasei mo ia. Ae pagā lea, sa lei faamanuiaina a latou taumafaiga.
Sa maliu Tana i lena po ona o meaai e i ai aafiaga [i lona tino].
O Se Faafitauli i le Lalolagi Atoa
I le lalolagi atoa, e tusa ma le lima pasene o tamaiti e i ai meaai e i ai aafiaga [i o latou tino]..1 I le Iunaite Setete, pe tusa ma le fa pasene o tagata matutua ma oo atu i le valu pasene o tamaiti o loo i ai se tulaga o meaai e aafia [le tino],2 faatasi ai ma ni numera talitutusa e lipotia mai i Europa ma nisi o atunuu Asia.3 I se uarota e 200 tagata matutua, e tusa ma le 8 tagata, ma i se Peraimeri e 50, e 4 tamaiti.
E silia ma le 170 meaai ua faailoaina e ono tupu ai le aafiaga [i tino], ae i le Iunaite Setete o le “8 Lapoa” e mafua ai le tele o meaai e i ai aafiaga [i le tino]: susu, fuamoa, pinati, nati mai laau, saito, soi, i’a, ma figota fai atigi.4 I le faaitulagi, o isi meaai e pito i luga o le lisi o meaai e i ai aafiaga [i le tino], e pei o pi lapotopoto i Initia, ituaiga o saito [buckwheat] i Korea i Saute ma Iapani, ma fuāloi i Taialani i Matu. O le susu o povi ma fuamoa e mautinoa le i ai pea i totonu o meaai sili ona taatele le mafua ai o meaai e i ai aafiaga [i le tino] i le lalolagi atoa.5
O se aafiaga o meaai [i le tino] e tupu pe a soona tali mai vaega o le puipuiga o le tino [immune system] i se mea e ono avea ma se taufaamata’u. O le tulaga aupito sili ona matautia o nei tali mai, o aafiaga [i le tino] aupito sili ona ogaoga (anaphylaxis), o se tali vave, ma faatulaga e mafai ona mafua ai le oti.6 O āuga e mafai ona aofia ai le mainiini po o le mageso i totonu o le gutu; fulafula o laugutu, foliga, laulaufaiva, po o isi vaega o le tino; faafaufau po o le faasuati, punitia o le ala ea; topetope o le tātā o le fatu ma le niniva; ma le matuā faateia.7
“E pei lava le ogaoga, pe matua sili atu foi ona ogaoga nai lo se tagata e pe lona itu pe oso le ma’i fatu i le lotu,” o le faailoa mai lea e Dr. Jonathan Olson, e tomai faapitoa i tulaga aafiaga [i le tino] ma o se tagata o le Ekalesia. O se tagata ua i ai se aafiaga [i le tino] e mafai ona vave atu ona maliu nai lo se tagata o loo oso se ma’i fatu.
E ui o togafitiga faamoemoeina o loo faaalia e ono aoga, ae e le o i ai se fofo i le taimi nei mo meaai e i ai aafiaga [i le tino]. O le tulaga faatonuina o le tausiga e faaauau pea o le “aloese lea mai i meaai e i ai aafiaga [i le tino] ma le iloa lelei ma le taulimaina o aafiaga [i le tino] aupito sili ona ogaoga [anaphylaxis],” o le tala lea a Dr. Olson.
O Meaai o le Alofa Lea
O meaai e masani lava o le totonugalemu lea o faatasiga. O le faatusa lea o aganuu, tu ma aga masani, ma aso fiafia. O meaai e faaaoga e faaola ai o tatou tino, ae e faaaogaina foi e fafagaina ai o tatou agaga, faaali atu le alofa ma le popole, ma faatosina tagata e faapotopoto mai ma fesootai.
E leai se isi mea e sili atu ona moni ai lenei mea nai lo totonu o le Ekalesia. O meaai suamalie e tufa atu i vasega e faamalosiau ai le auai pe faamalosia ai se lesona. O taumafataga a le uarota, tauvaga kuka i polo feu, ma isi gaoioiga, e tuuina atu ai i le Au Paia se mafuaaga e faapotopoto ma fiafia faatasi ai. Tatou te faia ni meaai mo ni tina fou ma mo falelauasiga o se auaunaga faamaoni. Tatou te tuua ni meaai suamalie i luma o faitotoa e tau atu ai o loo matou mafaufau atu ia te oe.
E oo lava i le Faaola na fafagaina le 5,000 o e na faapotopoto e faalogologo ia te Ia a o aoao atu.8
O nei faataitaiga e fesoasoani ina ia faapupula mai ai le mafuaaga e mafai ai ona matua luitauina le puleaina o meaai e i ai aafiaga [i le tino] ma faigata ai mo nisi ona malamalama i ai—aemaise lava—i le lotu. O le tele lava o taimi o meaai o le alofa. Ae afai e vaavaai tagata o le uarota i tulaga o meaai e i ai aafiaga [i le tino] e avea o se avanoa e auauna atu ai, nai lo le fai fuafua agai ia i latou e aafia i meaai e i ai aafiaga [i le tino], ona mafai fo’i lea ona avea le leai o ni meaai ma se faailoaga o le alofa.
O le Faia o le Faamanatuga Ia Paia—ma Saogalemu
Na saunoa mai Elder Jeffrey R. Holland o le Korama a Aposetolo e Toasefululua: “O le faamanatuga o le Tausamaaga a le Alii [o le] taulaiga autu paia, ma faamamaluina o o tatou aafiaga i tapuaiga faalevaiaso taitasi. …
“… O lenei itula ua faauuina e le Alii o le itula aupito sili ona paia lea i lo tatou vaiaso.”9
Peitai, e pei ona faailoa mai i taiala na lolomiina lata mai nei a le Ekalesia e uiga i tulaga o meaai e i ai aafiaga [i le tino] ma aoaoga e faatatau i meaai ua aafia i mea e ono aafia ai [le tino], “O tulaga o meaai e i ai aafiaga [i le tino] ma aafiaga i meaai e mafai ona i ai se aafiaga tele i le soifua maloloina faalelagona o se tagata ma lona gafatia e auai i sauniga ma gaoioiga a le Ekalesia.”10
O taiala i tulaga o meaai e i ai aafiaga [i le tino] a le Ekalesia e aofia ai faatonuga i le saunia o se falaoa e saogalemu faapea foi ona aloese mai le pa’i atu i mea e ono aafia ai i luga o le laulau faamanatuga. (E mafai ona maua nisi faamatalaga auiliili i le disability.ChurchofJesusChrist.org.) O le mulimuli i nei taiala e mafai ai ona faamautinoa ai se aafiaga saogalemu o le faamanatuga mo le toatele o le au paia.
O tagata e i ai tulaga aafiaga [i le tino] e mafai ona talanoaina ma o latou epikopo ia fetuunaiga e talafeagai mo le faamanatuga. E mafai e tagata o le Ekalesia ona saunia a latou lava falaoa e le i ai ni mea e aafia ai [le tino] i totonu o se tagapepa iila e faamau lelei.
E le gata i lea, o aiga e i ai meaai e i ai aafiaga [i le tino], e feagai ma luitau pe a aumai e isi ni meaai po o ni meaai mama i le sauniga faamanatuga. Talu ai o nisi o aafiaga [o le tino] e mafai ona tupu i le na o le manava i totonu po o le pa’i atu i se meaai e aafia ai [le tino], o aiga e i ai tulaga i meaai e i ai aafiaga [i le tino] e mafai ona faataunuuina le sauniga faamanatuga e ala i le suia o o latou nofoa po o le me’i atu i le polotito pe afai o loo i ai meaai i le falesa.
I se fonotaga faaleaoaoga ia Aperila 2015, na fautua mai ai Peresitene M. Russell Ballard, o le Sui Peresitene o le Korama a Aposetolo e Toasefululua, “O la tatou sini autu lava ia maua e tagata uma se aafiaga faaleagaga ma se faatuatua faamalosia i lo tatou Tamā Faalelagi ma le Alii o Iesu Keriso i le tausia o le aso Sapati.” Sa ia faaopoopo mai, “E mautinoa lava e mafai ona tatou faamoemoeina o telefoni feaveai ma iPad, o taaloga ma meaai e mafai ona faataatia ese mo se itula taua e tasi mai le 168 itula i le vaiaso mo le sauniga faamanatuga lea e tuuto atu i le Tamā Faalelagi ma Lona Alo Pele, le Alii o Iesu Keriso.”11
Mo ni mafuaaga eseese, e le mafai ai e tagata uma ona tuueseina meaai i le taimi o le lotu. Ae faatasi ai ma le faasologa faatulagaina puupuu, atonu e tatou te mafai ona mafaufau i lenei fautuaga mai ia Peresitene Ballard ma manatu loloto pe e te manaomia ona aumaia ni meaai i totonu o le sauniga faamanatuga.
Tauaveina o Avega a le Tasi i le Isi
E ui e mafai ona ogaoga le aafiaga faaletino o meaai e i ai aafiaga [i le tino], ae e tutusa lava le loloto o le aafiaga faaleagaga—mo le lelei po o le leaga.
E aafia leaga lava [le tino] o le tama teine a Faranisesa i le susu. A o i ai lana tama teine i le Peraimeri, sa fiafia se tasi o ona faiaoga e aumai tamai keke sa ia faia i le fale i le vasega mo aso fanau. Sa ofo mai Faranisesa e aumai tamai keke e saogalemu i soo se taimi sa fai ai se aso fanau. Na teena e le faiaoga le ofo ae nai lo lena sa ia auina atu le teineitiiti e ono tausaga le matua e nofo i le polotito ina ua faasoa meaai mama o le aso fanau.
“Sa matuai faatiga lava lenei mea i le tele o tulaga,” o le tala lea a Faranisesa. “Nai lo le aoaoina o isi tamaiti ina ia ‘faapei o Iesu’ ma ia lava le alolofa e faaaofia tagata uma, na ia aoaoina i latou e faaese isi.”
O le faaaofia ma le faaesea o ni autu masani pe a e talanoa i aiga e i ai tulaga o meaai e i ai aafiaga [i le tino]. O le tama tama iva tausaga a Cynthia, o le e aafia [le tino] i pinati ma nati mai isi laau, sa faamoemoe e auai i se tolauapiga ao. Ae peitai, i le taeao o le tolauapiga, sa oo mai se valaau mai se taitai o loo talosaga atu ia te ia e aua nei auai. Sa le mafai ona latou taulimaina ona tulaga aafia [o le tino] ona o meaai.
“Sa ou tuu i lalo le telefoni ma ou tagi masūsū,” sa manatua e Cynthia, “o loimata o le faanoanoa loloto, mai le ta’ele o lo’u fatu mo si a’u tama sa toe faaesea foi.”
Sa faapea mai Katie Edna Steed, o le pule faatonu mo manaoga faapitoa mo le Ekalesia: “E tuua e le Faaola le 99 ae saili i le toatasi. E tatau ona tatou manatua lena faataitaiga—o le vaai atu lea i le toatasi ma ia iloa ai le toatasi.”
E Mafai Ona Tatou Fesoasoani
E tele naua mea e mafai ona faia e tagata o le Ekalesia e i ai meaai e i ai aafiaga [i le tino] ma aiga o a latou uarota e faaalia ai le alofa ma faia ia avea ai le auai i le lotu ma tulaga e saogalemu ma faaaofia ai.
O a mea e mafai ona faia e aiga e i ai i meaai e i ai aafiaga [i le tino]?
E mafai e aiga e i ai meaai e i ai aafiaga [i le tino] ona faamalamalama o latou manaoga i taitai ma faiaoga—ma toe faailoa atu foi pe a suia taitai ma faiaoga. E mafai ona latou ofo atu e sapalai ni meaai saogalemu ma fesoasoani e fuafua ni lisi o mea e fai ma gaoioiga. E mafai ona latou tuuina atu ni aoaoga faigofie, faasao ai le soifua, ma ni fuafuaga mo faalavelave faafuasei. O le a latou malamalama pe a faaalia e tagata o le Ekalesia le fefe po o le le mautonu, ae o le a latou aoaoina ma le onosai tagata o le Ekalesia ma galulue faatasi e saili ni filifiliga saogalemu ma faaaofia. E tatau ona latou talosagaina ni fetuunaiga talafeagai e mafai ona faia ma lagolagoina e le uarota.
O a mea e mafai ona fai e tagata o le uarota?
E mafai e tagata o le uarota ona saili ia malamalama i tulaga o tagata taitoatasi. E tatau i tagata o le uarota ona faatali i faatonuga faamatua e uiga i le tuuina atu o meaai i se tamaitiiti. Afai e manaomia se meaai mo se gaoioiga po o se lesona, e mafai e faiaoga ma taitai ona fesili atu i tagata taitoatasi ma matua pe o le a saogalemu ia meaai. E mafai e tagata o le uarota ona valaaulia tagata taitoatasi ma matua e auai ma foia faafitauli e pei ona manaomia.
O Susana e tele ni meaai e i ai aafiaga [i lona tino]. Ua faapitoa lava ona ootia o ia i le nofouta o ositaulaga i lana uarota a o latou tapenaina le faamanatuga. “Ua matua faalotomaualaloina lava a’u e alii talavou ua faia ia saogalemu mo a’u e ai ma inu i le faamanatuga,” o lana tala lea.
I se tasi Aso Sa, e le i pasi atua le faamanatuga ia te ia. Sa iloa atu e ositaulaga na saunia le faamanatuga ua faaleagaina lana falaoa i le pa’i atu i isi falaoa i luga o le laulau.
“Sa latou maua a’u ina ua maea le sauniga faamanatuga, sa faamatala mai le mea na tupu, ma ta’u mai ia te au ua latou mauaina se faatagaga faapitoa mai le epikopo e faatautaia le faamanatuga mo a’u i se potuaoga,” o le tala lea a Susana. “Sa ou tagi a o faamanuiaina ma tufaina le faamanatuga i lena tamai potu. Sa matuai malosi lo’u lagonaina o le alofa o le Faaola ma Lona silafia o le tele o lo’u tauivi ma lenei luitau.”
“O le faaalia o le naunautai e faia se siosiomaga saogalemu i le lotu mo tagata e i ai vaega e aafia [o latou tino] e ogaoga, o le faaalia foi lea o se naunautaiga e tauave avega a le tasi ma le isi,” o le tala lea a Susana.
O loo i ai nei le tama teine a Faranisesa i Tamaitai Talavou. Sa lagona e lona peresitene o Tamaitai Talavou le uunaiga e fesoasoani i lenei aiga i la latou avega. “Sa ou lagonaina e pei sa tatau ona matou faia mea uma na manaomia e faamautinoa ai sa lei faamalosia o ia e filifili i le va o lona saogalemu ma lana tapuaiga,” o lana tala lea. “Sa ou tatalo e uiga i le auala e tatau ona matou fetaiai ai ma lenei tulaga ma na malosi le lagona sa manaomia ona matou talisapaia lenei aiga ma faamautinoa ua faaaofia atoatoa i latou.”
Na talia e taitai o le autalavou le lu’i e fuafua se konafesi e tasi le po a le autalavou e mafai ai ona auai ma le saogalemu le tama teine a Faranisesa. Sa fesoasoani Faranisesa e fuafua le lisi o meaai ma fai le faatau mo meaai. Sa faaaoga e alii talavou se masini e fufulu ai le ogaumu a o le i faaaogaina e kuka ai.
“Sa matagofie tele!” o le tala lea a Faranisesa. “Sa ou tagi ma lagonaina le alofa o le Atua e ala ia latou faatinoga agalelei ma le faaaofia. Sa faapena foi si a’u tama teine.”
Ua Faaalia Mai Galuega a le Atua
Ua lagona e le aiga o Tana le tele o vavega, tetele ma itiiti, talu mai le maliu o lo la atalii. La te faamoemoe o le faateleina o le silafia e uiga i meaai e i ai aafiaga [i tino] o se tasi lea o na mea.
“E le faapea o nei tamaiti e i ai meaai e aafia ai [o latou tino] e faatamala. E le faapea latou te le o mafaufau i ai. Ae o i latou o ni tamaiti,” o le tala lea a le tamā o Tana, o Teri. “E na o le tasi lava le sekone e te le manatu faaeteete ai.”
Ae o le auauna atu e mafai ona fesoasoani ia i latou e faatumauina ai lo latou lava puipuiga.” “O le auauna atu, i le faauigaga, o lona uiga o le tali atu i manaoga o isi,” o le tala lea a Dr. Olson. “O mea uma e uiga i le Ekalesia e faavae i manaoga o le tagata ma le faamautinoaina ua ausia o latou manaoga faaleagaga ma faaletino.”
Na aoao mai e Sharon Eubank, o le fesoasoani muamua i le Au Peresitene Aoao o le Aualofa: “Na fetalai atu ma le agamalu Keriso ia sa Nifaē, ‘Ua ou poloaiina ia aua nei i ai se tasi o outou e alu ese atu.’ … O se tulaga manaomia lē fetuunaia mo soo Kerisiano ma le Au Paia o Aso e Gata Ai le faaalia o le alofa moni i le tasi ma le isi.”12
Mo Faranisesa, ina ua maea se tauiviga faaletagata lava ia ina ia malamalama i le mafuaaga na feagai ai lana tama ma se tulaga o vaega e aafia ai [le tino], na ia iloa ai, “O nisi taimi e faamalolo ai e le Atua se tasi e i ai se manaoga faapitoa e faaali atu ai Ana galuega mamalu, ma o nisi taimi Na te faatagaina ai se tasi e faatumauina le i ai o o latou manaoga faapitoa ona e finagalo o Ia ia faaalia Ana galuega i le auala e faia ai e isi lena tagata. E tuuina mai e le Atua ia i tatou ia avanoa uma e aoao ai ina ia agalelei ma aoao ia avea faapei o Ia e ala i le faatagaina o i tatou e avea ma se vavega mo se tasi i o latou puapuaga.”