Mga Young Adult
Ang Pagpangita og Kapikas—ug ang Grasya sa Manluluwas
Litrato gikan sa Getty Images
Ang Ginoo misaad nga ang “[Iyang] grasya igo alang sa maaghup” (Ether 12:26). Kini nga mga pulong makahatag kanatong tanan nga mga young single adult og paglaum ug kahupayan, ilabi na sa pagpangita og mahangturong kauban. Ang masaligong mga disipulo ni Kristo kanunayng mangita og gugma nga bukas ang kasingkasing, nga masagmuyo lamang tungod sa wala matubag nga mga paglaum o maglagot tungod sa ngil-ad nga kinaiya niadtong ilang gika-date. Kini nga pagpangita makamugna og kahadlok, kasuko, kayugot, ug kaluya, ilabi na kon magpadayon kini og mga tuig lapas sa imong gilauman nga petsa sa kaminyoon!
Apan, sama sa imong mahunahunaan, kini nga mga emosyon dili mao ang tuyo sa Dios nga kanunay natong bation samtang mosunod kita sa Iyang sugo nga magminyo ug magpadako og matarung, malipayon nga mga pamilya. Sa pagkatinuod, ang Dios gusto nga mobati kita og kalipay atol niana nga pagpangita!
Nagkonsiderar niini, ang mga artikulo niini nga seksyon gituyo aron sa pagtabang kanimo nga dili mobati og kahasol sa pagpangita sa imong mahangturong kauban. Makakita ka og mga istorya kon unsaon sa pag-uswag sa kinabuhi bisan unsa pa ang imong estado sa pagkaminyo ug tambag nga makatabang sa pag-andam kanimo alang sa umaabut nga mahigugmaon, maalimahon, ug lig-on og pundasyon nga kaminyoon.
Samtang mangita ka sa tawo kinsa mohatag kanimo sa iyang tibuok kasingkasing sa samang paagi nga imong ihatag kaniya ang imoha, paggahin og panahon sa pagbasa niini nga mga artikulo. Mosaad ko nga usa niini mopagaan sa imong kasingkasing ug motabang kanimo sa pagsalig nga ang grasya sa Manluluwas igo alang kanimo.
Matinuoron,
Landon Hawes