Unsay posisyon sa Simbahan kalabut sa diskriminasyon tungod sa kaliwatan [racism]?
Nagtuo kita nga ang Dios mao ang Amahan sa tanang katawhan ug “siya wala maglimud kang bisan kinsa nga moduol ngadto kaniya, itom ug puti … ; ug ang tanan managsama ngadto sa Dios” (2 Nephi 26:33). Tungod kay ang tanang katawhan patas sa atubangan sa Dios, nagtuo kita nga walay tawo nga tukmang makaangkon nga mas labaw kay sa lain tungod sa ilang background sa kaliwat o kultura. Agig dugang, nagtuo kita nga sala ang pagtamay, pagbiay-biay, o pagpihig batok sa uban tungod sa ilang kaliwat.
Ang modernong mga propeta ug apostoles mipanghimaraut sa diskriminasyon tungod sa kaliwatan sa labing kusganon nga mga pulong. Sama pananglit:
-
Presidente Gordon B. Hinckley (1910–2008): “Walay tawo kinsa mobiaybiay sa ubang kaliwatan ang makakonsiderar sa iyang kaugalingon nga tinuod nga tinun-an ni Kristo. Ni makonsiderar niya ang iyang kaugalingon nga nahiuyon sa mga pagtulun-an sa Simbahan ni Kristo.”1
-
Presidente M. Russell Ballard, Akting nga Presidente sa Korum sa Napulog Duha ka mga Apostoles: “Kinahanglan natong gakson ang mga anak sa Dios pinaagi sa kalooy ug wagtangon ang pagkamahukmanon, lakip sa kaliwatan, sa sekso, ug nasyonalismo.”2
-
Presidente Dallin H. Oaks, Unang Magtatambag sa Unang Kapangulohan: “Ang diskriminasyon tungod sa kaliwatan tingali maoy pinakakomon nga tinubdan sa pagpanghukom karon, ug kitang tanan gitawag sa paghinulsol niana.”3