Sèvis Pastoral atravè Reyinyon Sentsèn

Reyinyon sentsèn nan bay opòtinite pou nou konekte avèk lòt moun ak sèvi yo.

Reyinyon sentsèn nan se yon moman pou nou nouri nou espirityèlman epi pou nou fè yon refleksyon pèsonèl sou Sovè a ak Ekspyasyon l la. Lè nou patisipe nan sentsèn chak semèn, nou edifye ansanm (gade Doktrin ak Alyans 84:110). Men gen kèk moun nan pawas ak branch nou yo ki gen anpil fado sou do yo oubyen ki pa la ditou.

Men kèk opòtinite sou fason nou ka itilize lè sakre sa a pou nou sèvi lòt moun epi pou nou fè yon diferans nan lavi yo.

Ede pou Reyinyon Sentsèn nan pi bon pou moun w ap fè sèvis pastoral pou yo a.

Premye etap nan aprann kòman pou w fè sèvis pastoral se aprann konnen moun yo oswa fanmi yo ak bezwen yo. Kapab gen lòt fason ou ka ede nan fè eksperyans adorasyon atravè sentsèn nan vin pi byen, senpleman nan aprann konnen moun yo plis.

Pou Mindy, yon jèn manman ki gen marasa, senp efò nan men sè ki fè sèvis pastoral pou li a te fè yon gwo diferans nan eksperyans reyinyon sentsèn ni chak semèn.

Mindy esplike: “Akoz orè travay mari m, mwen mennen de pitit fi marasa m yo legliz avè m chak semèn.” “Sa reyèlman depasan pou mwen pou m asiste tout reyinyon sentsèn nan avèk de timoun piti ki toujou ap bouje, men sè sèvis pastoral mwen an pran sa an men epi li ede m.

“Li chita bò kote nou epi li ede m pran swen tifi m yo chak semèn. Jis genyen l akote m nan vle di yon pakèt bagay, e sa reyèlman soulaje enkyetid mwen lè timoun yo ap kriye oswa lè y ap bay pwoblèm. M pa kwè l ap janm konn nan ki pwen aksyon l yo fè yon gwo enpak sou mwen nan moman sa a nan lavi m nan. Li te wè bezwen m antanke yon jèn manman ki plen anksyete, epi li ede fè legliz la vin yon lye lapè ak lajwa pou nou tout.”

Ide pou Ede Moun ki gen Bezwen Espesifik yo

Voye rapò sou bezwen manm yo bay dirijan kowòm ansyen ak Sosyete Sekou yo.
Dirijan yo va planiffye diskou nan reyinyon sentsèn pou yo ka ede satisfè bezwen manm yo. Si moun w ap fè sèvis pou yo a ap tire yon benefis lè yo tande yon sèten mesaj, pataje ide a avèk lidè w yo.
Si w konn kèk moun ki gen yon andikap oubyen ki fè alèji avèk yon manje ki anpeche yo jwi benediksyon sentsèn yo, mande yo detay sou sa, ak ki aranjman ki ka fèt pou amelyore eksperyans adorasyon yo a. Pataje enfòmasyon sa a avèk dirijan w yo.
Si yon moun w ap fè sèvis pastoral pou li oubyen yon moun ou konnen ki oblije rete lakay, keseswa tanporèman oubyen an pèmanans, mande evèk ou si yo ka ba yo sentsèn nan lakay yo. Ou ta kapab menm pran nòt pandan reyinyon sentsèn nan epi pataje l avèk yo nan telefòn, nan imel oswa an pèsòn.
Si gen yon moun w ap fè sèvis pastoral pou li gen timoun ki piti, ou kapab ofri pou w ede yo pandan reyinyon sentsèn nan.
Si moun w ap fè sèvis pastoral pou yo yo pa vin souvan nan reyinyon sentsèn nan, eseye konprann e gade kòman ou ka ede yo. Si yo bezwen transpò, ou ka ofri yo yon woulib. Si yo santi yo pa jwenn sipò fanmi yo, ou ka envite yo chita avè w. Ou ka fè kèk envitasyon espesyal pou w ede yo santi yo byenveni epi pou ede yo santi prezans yo nesesè nan reyinyon sentsèn nan.

Sonje, Senp Jès yo Mennen Byen Lwen

Pandan l t ap pale sou sèvis pastoral, sè Jean B. Bingham, Prezidant Jeneral Sosyete Sekou a, te anseye: “Dèfwa nou panse nou oblije fè yon gwo bagay ki ewoyik pou l ka ‘konte’ kòm sèvis n ap rann pwochen nou. Men, ti zak sèvis byen senp yo kapab gen efè pwofon sou lòt moun—osibyen sou tèt nou.”¹

Nan yon ti pawas nan Bèljik, Evita souvan ofri pou l tradui pou vizitè ak manm ki pale Espanyòl yo pandan reyinyon legliz yo. Gen yon lè, yo te prezante Evita a yon moun ki te soti nan Repiblik Dominikèn ki t ap aprann konsènan legliz la. Li te ka di kèk mo Anglè, men Espanyòl sete lang natifnatal li. Konsa, Evita te ofri l pou l te tradui pou li an chichotman pandan reyinyon sentsèn nan pou l te ka santi l pi konfòtab.

Evita di: “Tradui ka pafwa rann Saba m yon ti jan plis mouvmante.” “Men, suiv pouse pou m mande lòt moun si yo bezwen yon entèprèt la definitivman ban m yon santiman lajwa ak yon chalè paske m konnen m gen posibilite pou m ede yo santi Lespri a e pran plezi nan reyinyon yo.”

Ide sou Fason nou ka Ede atravè kèk Jès ki Senp

Pale avèk dirijan w yo pou wè kiyès ki ta ka bezwen yon ti sèvis anplis pandan reyinyon sentsèn nan. Oubyen si w konn yon moun ki bezwen sa, asire w ke dirijan w yo konn sa.
Chita trankil pandan w ap tann reyinyon an kòmanse. Sa ap ede “lòt moun ki gen kè brize ak lespri aflije ki bò kote nou yo”² ki bezwen lapè ki soti nan reverans nan yon lye sen an.
Nan jou dimanch jèn yo, panse pou w dedye jèn ou an ak priyè w yo a yon moun w ap fè sèvis pastoral ki ka bezwen yon ti rekonfò anplis.
Priye pou w konnen si gen yon moun ki kapab benefisye lè w chita bò kote l oswa tou prè l pandan reyinyon sentsèn nan oubyen si gen yon lòt fason ou ka ede.

Reyinyon Sentsèn nan Kapab yon Andwa Akeyan pou Tout Moun

Prezidan Joseph Fielding Smith (1876–1972) te anseye: “Reyinyon Sentsèn nan se reyinyon ki pi sakre, pi sen, pase tout reyinyon nan Legliz la.”³ Nan ka sa a, li enpòtan pou nou asire nou ke tout moun ki nan reyinyon sentsèn yo santi yo byenveni epi nouri espirityèlman—espesyalman nouvo manm yo oswa manm ki absan pandan yon bout tan yo.

Merania, ki nan New South Wales, nan peyi Ostrali, te vin zanmi ak yon fi ki t ap aprann osijè Legliz la nan pawas li. Merania di: “Li vin yonn nan pi bon zanmi mwen kounyea.” “M renmen chita avèk li nan reyinyon sentsèn chak semèn, e m toujou mande l kòman l ye, e si pa gen anyen mwen ka fè pou m ede l.” Aprè yon ti tan, zanmi Merania a te vin batize. Efò manm pawas yo, ansanm ak atmosfè akeyan nan reyinyon sentsèn nan, te jwe yon gwo wòl nan desizyon l la.

Ide sou Sèvis Pastoral pou Moun ki Retounen oswa Nouvo Manm

Lè w pral pale nan Reyinyon Sentsèn, ou ka envite zanmi, fanmi, ak lòt moun pou yo vin tande mesaj ou a.
Ou kapab chèche epi akeyi moun ki poukont yo oubyen ki ka bezwen èd. Mande yo si w ka chita akote yo oswa envite yo pou yo chita avè w.
Lè reyinyon an fini, ou kapab envite moun w ap fè sèvis pastoral pou yo yo oswa lòt moun nan pwochen aktivite Legliz yo, nan tanp, oswa nan yon evènman sosyal.
Si gen moun w ap fè sèvis pastoral pou yo ki vini nan reyinyon an men ki te fè yon bon ti tan depi yo pa t vini, ou ka mande yo si yo gen kesyon sou sa yo te ansenye a. Di yo ou pa gen okenn pwoblèm pou yo apwoche w si ta gen yon tèm, yon istwa, oswa yon doktrin yo pa t konprann. Ou ka chèche repons lan ansanm avè yo si sa nesesè.

© 2020 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/19. Apwobasyon tradiksyon: 6/19. Tradiksyon Ministering Principles, June 2020. Haitian Creole. 16988 036