Ministering paagi sa Pang-Sakramento nga Miting

Ang pang-sakramento nga miting nagahatag sang mga oportunidad sa pagpakig-angot kag pagminister sa iban.

Ang pang-sakramento nga miting isa ka tion para sa espirituhanon nga pag-atipan kag sang personal nga pagpanumdom sa Manluluwas kag sa Iya Pagbayad-Sala. Sa aton pag-ambit sang sakramento sa tagsa ka semana, ginapabaskog kita sing ululupod (tan-awa sa Doktrina kag mga Kasugtanan 84:110). Pero ang pila sa aton mga ward kag branch nagabitbit sang mabug-at nga palas-anon ukon wala na nagasilimba.

Ari ang pila ka mga oportunidad kon paano naton magamit inang sagrado nga tion sa pagminister sa iban kag maghimo sing kinalain sa ila mga kabuhi.

Magbulig nga Himuon ang Pang-Sakramento nga Miting nga Mas Maayo para sa Ila nga Inyo Ginaministeran

Ang una nga tikang sa pagtuon kon paano magminister amo ang kilalahon ang mga indibidwal ukon mga pamilya kag ang ila mga panginahanglan. Ayhan may ara sing mga paagi nga pwede kamo makabulig nga ang ila eksperiyensya sa pang-sakramento nga pagsimba mangin mas manami paagi sa pagkilala sa ila sing mas maayo.

Para kay Mindy, isa ka hubin nga iloy sang magagmay pa nga kapid, ang simple nga mga pagpaninguha sang iya ministering sister naghatag sing dako nga kinalain sa iya eksperiyensya sa pang-sakramento nga miting tagsa ka semana.

“Tungod sang iskedyul sa trabaho sang akon bana, ginadala ko nga ako lang ang akon kapid nga mga bata nga babayi sa simbahan tagsa ka semana,” paathag ni Mindy. “Mabudlay tuod ang magtinguha nga mapatapos ang pang-sakramento nga miting nga may duha ka gihoan nga kabataan, apang ang akon ministering sister nangin responsable sa pagbulig sa akon.

“Nagapungko sia upod sa amon kag ginabuligan ako sa pag-atipan sang akon mga bata nga babayi tagsa ka semana. Ang iya lamang pagtupad sa akon dako na kaayo para sa akon kag nagapakalma sa akon pagkabalaka kon ang mga ini nagabisyo ukon iritable. Ambot kon nahibal-an niya kon daw ano kadako sang epekto sang iya mga aksyon sa akon sa sining tion sang akon kabuhi. Nakita niya ang akon panginahanglan bilang isa ka hubin, puno-sing-pagpangalag-ag nga iloy, kag nagabulig sia nga himuon ang simbahan nga isa ka malinong kag masadya nga lugar para sa amon tanan.”

Mga Ideya para Mabuligan ang Mga may Pat-od nga Mga Panginahanglan

Ireport sa mga lider sang elders quorum kag Relief Society ang mga panginahanglan sang mga miyembro.
Ang mga lider nagaplano sang mga topiko sa pang-sakramento nga miting agud makabulig sabat sang mga panginahanglan sang mga miyembro. Kon ang inyo ginaministeran makabenepisyo sa pagpamati sang isa ka partikular nga mensahe, ipaambit ining ideya sa inyo mga lider.
Kon may kilala kamo nga may kasablagan ukon allergy sa pagkaon nga nagapugong sa ila nga maagom ang mga bugay sang sakramento, pamangkota sila sang mga detalye kag kon ano ang sarang mahimo agud mapanami ang ila eksperiyensya sa pagsimba. Ipaambit ini nga impormasyon sa inyo mga lider.
Kon may ara kamo nga ginaministeran ukon nahibal-an nga indi-makabiya-sa-balay, permanente man ukon temporaryo lang, pamangkota ang inyo bishop kon ang sakramento pwede ihatag sa ila sa ila puluy-an. Pwede man gani ninyo isulat ang mga ginhambalan sa tion sang pang-sakramento nga miting kag ipaambit sa ila paagi sa telepono, paagi sa e-mail, ukon sing personal.
Kon ang inyo ginaministeran may gagmay nga mga kabataan, pwede kamo magtanyag nga magbulig sa ila sa tion sang pang-sakramento nga miting.
Kon ang inyo ginaministeran indi pirme makatambong sa pang-sakramento nga miting, tinguhai nga intiendihon sila kag magpamensar sing mga pamaagi nga pwede kamo makabulig. Kon kinahanglan nila sang masakyan, pwede ninyo sila tanyagan nga pasakyon. Kon sa ila pamatyag wala sila ginasuportahan sang ila pamilya, pwede ninyo sila hagaron nga magpungko upod sa inyo. Pwede kamo maghimo sing espeyal nga mga imbitasyon agud buligan sila nga makabatyag nga ginaabiabi kag ginakinahanglan sila sa pang-sakramento nga miting.

Panumduma, Ang Simple nga mga Buhat May Dako nga Epekto

Nga nagahambal parte sa ministering, si Sister Jean B. Bingham, Pangkabilogan nga Pangulo sang Relief Society, nagtudlo: “Kon kaisa abi naton nga kinahanglan naton maghimo sang dako kag mabaganihan nga butang agud ‘makabig’ nga pag-alagad sa aton mga kaingod. Pero ang simple lang nga mga buhat sang pag-alagad mahimo nga may dako nga epekto sa iban—subong man sa aton mga kaugalingon.”¹

Sa isa ka gamay nga ward sa Belgium, si Evita masami nga nagatanyag nga maglubad para sa mga naga-Espanyol nga mga bisita kag mga miyembro sa mga miting sa Simbahan. Isa ka bes, si Evita ginpakilala sa isa ka taga-Dominican Republic nga nagatuon parte sa Simbahan. Makahibalo sia sang diutay nga Iningles, pero Espanyol ang iya kinadak-an nga lenggwahe. Gani si Evita nagtanyag nga malubad sing mahinay para sa iya sa pang-sakramento nga miting agud mangin mas komportable sia.

“Ang paglubad kon kaisa medyo nagapasako sang akon Domingo,” siling ni Evita. “Pero ang pagsunod sa mga pagpabatyag nga pamangkuton ang iban kon nagakinahanglan sila sing manug-interpret pat-od nga nagahatag sa akon sing kalipay kag manami nga balatyagon nga mahibal-an nga nakabulig ako nga ila mabatyagan ang Espiritu kag magkalipay sa ila mga miting.”

Mga Ideya sa Pagbulig Paagi sa Simple nga Mga Buhat

Makighambal sa inyo mga lider agud mahibal-an kon sin-o ang mahimo nga nagakinahanglan sang ekstra nga pag-alagad sa tion sang pang-sakramento nga miting. Ukon basi may ara kamo nga nahibal-an nga may panginahanglan, seguroha nga ang inyo mga lider nakahibalo sang mga ini.
Magpungko sing mahipos samtang nagahulat sa miting nga magsugod. Makabulig ini “sa iban nga mga tagipusuon nga nagakasakit kag sa mga espiritu nga nagakasubo sa palibot naton”² nga nagakinahanglan sang katawhay nga nagaabot paagi sa kaligdong sa isa ka balaan nga duog.
Sa Domingo sang puasa, pamensara nga idedikar ang inyo pagpuasa kag mga pangamuyo sa tawo nga inyo ginaministeran nga mahimo nagakinahanglan sing ekstra nga pagpaumpaw.
Magpangamuyo agud mahibal-an kon may ara sing makabenepisyo sa inyo pagpungko sa tupad nila ukon malapit sa ila sa tion sang pang-sakramento nga miting ukon may iban pa nga paagi nga mahimo kamo makabulig.

Ang Pang-Sakramento nga Miting Mahimo nga Mangin Isa ka Maabi-abihon nga Duog para sa Tanan

Si Pangulong Joseph Fielding Smith (1876–1972) nagtudlo, “Ang pang-sakramento nga miting amo ang pinakasagrado, pinakabalaan, sa tanan nga mga miting sang Simbahan.”³ Sa sini nga kaso, importante nga maseguro nga ang tanan nga nagatalambong sa pang-sakramento nga miting nagabatyag sang pag-abiabi kag nabusog sa espirituhanon—ilabi na ang bag-o nga mga miyembro ukon mga miyembro nga malawig-lawig na nga wala makasimba.

Si Merania nga taga-New South Wales, Australia, nagpangamiga sa isa ka babayi nga nagatuon parte sa Simbahan sa iya ward. “Nangin isa na sia sa mga pinalangga ko nga mga abyan sa karon,” siling ni Merania. “Nanamian ako magpungko upod sa iya sa pang-sakramento nga miting tagsa ka semana, kag masami ko sia ginakamusta kag kon may ara ako sing mabulig sa iya.” Wala madugayi, ang abyan ni Merania ginbunyagan. Ang mga pagpaninguha sang mga miyembro sang ward, subong man ang maabi-abihon nga kapalibotan sa pang-sakramento nga miting, may dako nga parte sa iya desisyon.

Mga Ideya sa Pagminister sa Mga Nagabalik ukon Bag-o nga Mga Miyembro

Kon magahambal kamo sa pang-sakramento nga miting, pwede kamo mag-agda sang mga abyan, pamilya, kag iban pa nga magkadto kag magpamati sa inyo mensahe.
Pwede ninyo pangitaon kag abi-abihon ang mga nagaisahanon ukon mahimo nga nagakinahanglan sing bulig. Pamangkota kon pwede kamo makapungko sa tupad nila ukon agdaha sila nga magpungko upod sa inyo.
Pagkatapos sang miting, pwede ninyo agdahon ang inyo ginaministeran kag ang iban sa palaabuton nga mga kahiwatan sa Simbahan, sa templo, ukon sa isa ka kahiwatan-sosyal.
Kon ang inyo ginaministeran nagatambong sa pang-sakramento nga miting pero wala na sining pila na ka miting, pwede ninyo sila pamangkuton kon may mga pamangkot sila parte sa mga gintudlo. Hambali sila nga pwede gid sila magpalapit sa inyo kon may termino, sugilanon, ukon isa ka doktrina nga wala nila mahangpan. Pwede ninyo pangitaon ang mga sabat nga magkaupod kon kinahanglanon.

© 2020 iya sang Intellectual Reserve, Inc. All rights reserved. Ginbalhag sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, June 2020. Hiligaynon. 16988 861