Karihngihnyacn Tuhkweni ke Kuhfa luhn Leum

Tuhkweni ke Kuhfa luhn Leum use pacl wowo in kuhpahsryang nuh sin mwet ac lotwelos.

Tuhkweni ke Kuhfa luhn Leum pa pacl ma nguhn ahkkweye kuht ac ohiyac lasr sifacna nuh sin Mwet Lahngo ac Iwaclah Lal. Ke kuht ipeis ke kuhfa luhn Leum ke kais sie wik, kuht tuhkweni ahkwoyeyucklac (liye Doctrine and Covenants 84:110). Tuhsruhk kuhtuh ke wards ac pracns lasr ah us tuhkuh ma toasr lalos weluhlos kuh wacngihn we.

Pa inge kuhtuh sin ohiyac wowo ma kuht ac sahp orekmakihn ao sacohk sac in luti mwet sahyac ac ekuhllah sie ma ah ke moul lalos.

Kahsruh Oruh Tuhkweni ke Kuhfa luhn Leum in Wo nuh sin Mwet suc Kom Luti

Ma se met in lotwelah lah kom ac luti fuhakh an pa oruh kom in etwaclah kais sie mwet kuh sucu se ac mwe enenuh lalos. Oasr inkacnek sahyac ma sahp kuh in kahsruh oruh ahkfuhlwact lalos ke kuhfa luhn Leum in wo fal nuh etwacack yohk lalos.

Sel Mindy, ninac fuhsr se nahtuh fak se, orekma fihsracsr luhn tahmtahel se wiyacl ma lotwel ah oraclah eklac na yohk se ke ahkfuhlwactyeyacn tuhkweni lal ke kuhfa luhn Leum ke wik nuhkwewa.

“Ke srihpen ao in orekma luhn mukul tuhmuhk ah, Nga sifacna us fak muhtwacn se nahtuhsr inge nuh ke alu ah ke wik nuhkwewa,” Mindy el ahkuhtweyac. “Arulacna tiacna fihsracsr in srihke muhtwacnglah tuhkweni ke kuhfa luhn Leum ne ke tari ke kahfofo luhk ke tuhlihk luo inge, tuhsruhk tahmtahel se wiyuck ma lutiyuc ah sifacna eis pacl lal in kahsreyuc.

“El wi kuht muhta ac kahsreyuc karihngihn tuhlihk muhtwacn luo wiyuck ah ke wik nuhkwewa. Muhta lal siskuck yohk napwacye kalmweyac nuh sihk ac arulacna ahkfihsracsryelah elyah luhk ke pacl in sruhluhn tuhlihk ac okahrkahr lalos. Nga tiacna etuh lah elac oacna etuh lah ohiyac lal inge ahkkweyeyuc ke kain pacl se inge in moul luhk. El liye enenuh luhk ke nga sie ninac fuhsr, sesseslah ke elyah, ac el kahsruh oruh alu ah acn in engan ac mihs se nuh sesr nohfohn.”

Nuhnak in Kahsrelos ke Kais Sie Mwe Enenuh

Fohlohk fahk nuh sin mwet kol ke u srihsrihk luhn elders ac Relief Society ke mwe enenuh luhn mempucr.
Mwet kol ahkkoelah sramsram ke tuhkweni in kuhfal uhn Leum in kahsruh tuhngalyac enenuh luhn mempucr. Fin mwet ma kom luti an muh ahkinsewowoyeyuck ke lohngyacn pweng inge, akacsruhi nuhnak inge nuh sin mwet kol lowos.
Fin kom etuh muh oasr mwet oasr suhkahpahs la kuh tiac kuh in kang mongo se ma lusrong elacn tiac eis mwe ahkinsewowo ke kuhfa luhn Leum, siyuck selos kac ac meac fal kuh in oreklac in ahkwoyelah ahkfuhlwact lalos. Akacsruhi mwe fahkwack inge nuh sin mwet kol lowos.
Fin mwet se kom luti kuh etuh muh el muhta na in lohm sel, lah muhta ma pahtpaht kuh kihtin pacl na, siyuck sin pisap lom lah kuhfa luhn Leum kuh in ituckyang nuh selos e lohm selos ah. Kom kuh in suhmuhslah ma lutiyuck ke pacl in tuhkweni ke kuhfa luhn Leum ac akacsruhi nuh selos ke tacluhfon ah, ke email, kuh in sun na mwet sacn fahk nuhsel.
Fin oasr tuhlihk fushr nuhtin mwet se kom luti ngacn, kom kuh in siyuck kom in kahsreltahl ke pacl in tuhkweni in kuhfa luhn Leum.
Fin mwet se kom luti ngacn tiacna tuhkuh nuh ke tuhkweni luhn kuhfa luhn Leum, srihke in kahlwem kac ac nuhnkuh ke ohiyac ma kom kuh in kahsruh. Fin elos enenuh mwe kahsruhsr, kom kuh in kahsruh wucnuhltahl. Fin eltahl tena arlac ahkkweyeyuck sin sucu laltahl, kom kuh in solwacltahl in wi kom muhta. Kom kuh in oraclah solsol wowo in kahsreltahl in puhla pwacngack wowo ac luhngseyuck ke pacl in tuhkweni ke kuhfa luhn Leum.

Esam, Ohiyac Fihsracsr Som nuh ke Inkacnwek Loeloes

Sramsramkihnyuck ke luti, Sister Jean B. Bingham, Prestuhn Luhlahp ke Relief Society, el luti: “Kuhtuh pacl uh kuht nuhnkuh muh kuht enenuh in oruh sie ma yohk ac pwengpewng in ‘oekyucklac’ muh pa kuhlwacnsapuh mwet wiyacsr. Tuh ohiyac srihsrihk ke kuhlwacnsap kuh in konwacack eklac luhn mwet sahyac—oacpacna nuh sesr sifacna.”¹

Ke sie ward srihsrihk fin acn Belgium, Evita el kwacna eis pacl lal in lweng luhn mwet muhtwacta Spanish ac mempucr ke Alu in tuhkweni ah. Sie pacl ah, Evita el ahkkahlwemyeyuck nuh sin sie mwet ke Dominican Republic suc lutlut ke Alu uh. El etuh kuhtuh kahs English, tuhsruhk kahs Spanish pa kahs napwacye lal uh. Na Evita el siyuck in mwet lwengse lal ke pacl in tuhkweni ke kuhfa luhn Leum na el fah puhla woyak kac.

“Lweng uh kuh in oruh ahkfohsye kuhtuh srihk lwen Sahpuht luhk uh, Evita el fahk. “Tuhsruhk ukweyacn kolyuck in siyuck mwet sahyac fin elos enenuh mwet in lweng se lihksreni use nuh sihk puhla in engan ac wo se in etuh lah nga kuh in kahsreltahl puhla Nguhn ac engan ke tuhkweni lalos.”

Nuhnak in Kahsruh ke Ohiyac Fihsracsr

Sramsram nuh sin mwet kol lom in liye lah suc enenuh kahsruh srihsrihk ke pacl in tuhkweni ke kuhfa luhn Leum. Kuh fin kom etuh muh oasr sie mwet, oruh mwet kom lom an in etuh kaclos.
Muhta mihslac ke kom tuhpan tuhkweni an in muhtwacwacack. Ma se inge fah kahsruh “kuhtwena insiyac muhsahllah ac nguhna keoklac fah raunikuht lac.”² suc enenuh mihs ma kuh in tuhkuh ke akwuck ke acn muhtahl.
Ke Sacnri in lalo, nuhnkuh in sang kuhiyom in lalo ac pruhe nuh sin mwet se ma kom luti suc fah enenuh kuhtuh mwe ahkinsewowo.
Pruhe in etuh lah oasr mwet suc kuh in ahkinsewowoyeyuck ke muhta lom siskacl kuh apkuhran nuh yohrohl ke pacl in tuhkweni ke kuhfa luhn Leum kuh fin oasr inkacnwek sahyac kuh in kahsruh.

Tuhkweni ke Kuhfa luhn Leum Kuh in sie Acn Pwacngack Wo nuh sin Nuhkwewa

Prestuhn Joseph Fielding Smith (1876–1972) el luti, “Tuhkweni ke Sacrament pa sacohk emet, muhtahl emet, ke tuhkweni nuhkwewa ke Alu uh.”³ Ke ohiyac se, yohk srihpac in liye lah mwet nuhkwewa ma wi tuhkweni ke kuhfa luhn Leum puhla paingyuck wowo ac nwacnwaclah ke nguhn—yohk na mempucr sasuc kuh mempucr suc ma tiacna arlac fahsri alu uh ke pacl.

Merania fin acn New South Wales, Australia, kawuckyak nuh sin sie muhtwacn suc lutlut ke Alu uh ke ward lal ah. “El oacna sie kawuck sacohk luhk mihsenge,” Merania el fahk. “Nga luhngse weluhl muhta ke pacl in tuhwkeni ke kuhfa luhn Leum ke wik nuhkwewa, ac nga kwacna siyuck lah el fuhkah ac lah oasr kuhtwena ma el ke ngacn oruh in kahsrel.” Ke kihtihn pacl, kawuck se lal Merania ah pacptaislac. Orekma luhn mempucr ke ward sac, oacyacpac paingyuck wowo inwalihl sac ke tuhkweni in kuhfal uhn Leum, oraclah ip yohk se ke sulwaclah lal.

Nuhnak in Karihngihn Luti in Fohlohkihn kuh Mempucr Sasuc

Ke kom ac sramsram ke tuhkweni luhn kuhfa luhn Leum, kom kuh in suli kawuck, sucu, ac mwet sahyac in tuhkuh lohng sramsram lom an.
Kom kuh in suk ac paing elos suc ma muhkwena muhta kuh suc sahp enenuh kahsruh. Siyuck lah kom kuh in muhta siskacltahl kuh solwacltahl in wi kom muhta.
Ke toeni an sahflah, kom kuh in suli mwet ma kom luti ac mwet sahyac nuh ke mukwikwi luhn Alu ke pacl fahsruh, nuh ke tempuhl, kuh nuh ke tuhkweni sahyac.
Fin mwet se kom luti ngacn wi toeni ke kuhfa luhn Leum tuh tiac ke pacl, kom kuh in siyuck seltahl efin oasr kihsensiyuck lalos ke ma lutiyuck ah. Fahk nuh selos lah eltahl sukohsohk pacl nuhkwewa in sun kom fin oasr kahs se, sramsram soko, kuh ipin mwe luti yohk se ma eltahl tiac kahlwem kac. Komtacl kuh in tuhkweni konwacack top kac an fin enenuh.

© 2020 ke Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng ke Ministering Principles, June 2020. Kosraean. 16988 868