Doadoahk en Papah sang ni Kamadipw Sarawi

Kamadipw sarawi kin kiheng kitail ansou mwahu en kak tuhwong oh papah mehteikan.

Kamadaipw sarawi iei ehu ansou en kekeirdahn palingehn oh peihn en emen emen madamadau ong Sounkomouro oh Sapwellime Tomw. Ni atail kin ale kamadipw sarawi nan ehu ehu wihk, kitail kin kapwungkitaila sang ni atail kin ehupene (kilang Doctrine oh Covenants 84:110). Ahpw ekei nan atail ward oh pwrant kin wa arail katoutou laud kan de sohte douluhl kin iang patala.

Ietakan ekei wiepe me mie ong ia mwomwen atail pahn kak doadoahngki awa sarawio pwe kitail en kak papah mehteikan oh wekidala arail mour.

Sewese Wiahda Ansou en Kamadipw Sarawi, en Mwahu ong Irail kan me Kumwail kin Papah

Keieu en wiepe en esehla mwomwen papah iei esehla emen emen irail de peneinei kan oh arail anahn akan. E pahn kak mie ekei wiepe me kumwail kak sawaski en wiahda arail pepehm en kamadipw sarawi en kak mwahu sang ni amwail pahn ese iraila ni mehlel.

Ong Mindy, me wia nohno pwulopwul men ong umwpwor en seri pwelel ehu, sang ni sawas mengei me e kin alehdihsang rehn rie lih me kin papah ih wiahda lapalahn wekidekla ong ah pepehm me e kin alehdi sang nan kamadipw sarawi en wihk koaros.

“Pwehki en ai pwoud koasondihn doadoahk me mie, ih kin kelehpw wahda nei umwpwor en serepein riemeno kohla sarawi nan wihk koaros,” Mindy ahpw koasoia. “E inenen kin wia pwukoah laud ien kin kanekehla kamadipw sarawi ni ai kin apwalih seri riemen, ahpw riei lih en papah me alehda pwukoah pwehn kin sewese ie.

“E kin mwohd reht oh sewese ie apwalih nei serepein ka wihk koaros. Ni ah kin mwohndi limwahi e kin kiheng ie koapwoaroapwoar laud oh ni mehlel kin kihsang ai kapwunod ni ansou me irail kin lingeringerda de ketihwohda. I sohte medewe me e pahn kak ese ia wen ah wiewia ah wia mehkot laud ong ie ansou wet nan ai mour. E kilang ai anahn akan ni ai wia nohno pwulopwul men, me diren kapwunod, oh e sewese ie wiahda ihmw sarawio en wia wasa meleilei oh kaperen ong kiht koaros.”

Ireh kan me pahn kak Sewese Irail kan me anahne Anahn Pisetik kan

Pakairkihla rehn pwihn en kuorum oh kaun en Pwihnen lih kan duwen anahn en toweh kan.
Kaun akan en koasonehdi padahk en kamadipw sarawi me pahn kak sewese anahn en toweh kan. Ma irail kan me kumwail kin papah pahn kapaikihda sang ni rongorong padahk ehu, ah kumwail ehukiheng amwail kaun akan.
Ma kumwail ese emen me ahniki soumwau tohrohr ni eh sohte kak peihn apwalih peihn ih de mwonge me sohte mwahu me kakete irehdihsang irail en iang perepereniki kapai kan en kamadipw sarawi, idek rehrail pisetikpeh kan oh songen wiepe kan me anahne wiawi pwehn kak kamwauihala arail pepehm en sarawi. Ehukiheng amwail kaun akan audepe wet.
Ma emen me kumwail papah de wewehki sohte kak kohsang ah wasahn kouson, erehin de ongete lepin ahnsou, kalelapak rehn pisop ma kamadipw sarawi kak wisikla rehrail ni arail wasahn kouson. Kumwail pil kak intingihdi audepen padahk kan en ansou en kamadipw sarawio oh ehukiheng irail nan delepwohn, nan ihmeihl, de pil ni paliwar.
Ma emen me kumwail kin papah nainiki seri pwelel, kumwail kak kiheng irail amwail sawas ni ansou en kamadipw sarawi.
Ma irail kau me kumwail kin papah sohte kin kalapw kohdo iang kamadipw sarawi, nantiheng wewehki oh kilangada songen wiepeh kan me kumwail kak sawaski. Ma irail anahne peidaihd, kumwail indahng irail me kumwail pahn pwok irailda. Ma irail sohte kin ahniki pepehm mwahu sang arail peneinei, a kumwail luke irail en kin mwohd rehmwail. Kumwail kak luke irail ni wiepe ehu me pahn kasalehda me irail kesemwpwal pwe en kak sewese irail en ahniki pepehm en men iang patehng oh me mie anahneperail ni ansou en kamadipw sarawi.

Tamataman, Wiewia Mengei kan kin Werei

Pwehki kitail koaskoasoia duen papah, Sister Jean-Bingham me wia Preseden Lap en Pwihn en lih padahngki me: “Ekei pak kitail kin medewe me kitail anahne wia mehkot me laud oh indandiki atail kin papah kempoakepahtail kan. Ahpw wiewiahn sawas menage kan kak wia mehkoht laud ohng irail akan—oh pil ohng peihn kitail.”¹

Ni ward ehu nan Belgium, Evita kin kalapw wia ah sawas ong kaweweh lokaiahn Spein ohng irail me kin pwaredo oh toweh kan ni rahn en Sarawih kan. Ehu pak, Evita ahpw tuhwongedi aramas emen sang Dominican Republic me wie kaskaskuhlki duen Mwomwohdiso. E ekis ese lokaiahn Wai, ahpw lokaiahn Spein me udahn ah lokaia. Eri Evita wia ah sawas ohng ih ni ah kaweweh nan ansou en kamadipw sarawi eri e ahpw insenamwaula.

“Kaweweh kin ekei pak karehda ai Rahn en Sabad kin ekis mwur kediropwla,” Evita koasoia. “Ahpw ni ai kin idawehn pepehm en ahniki kalalapak rehn mehteikan ma irail anahne soun kaweweh kin inenen kiheng ie pepehm en peren oh meleilei ni ai kin ese me i kak sewese irail kehn Ngehno oh perepereniki arail tuhpene kan.”

Ireh kan me kak Sawas ong ni Wiewia Mengei kan

Koasoieng amwail kaun akan en kilang isime pahn anahne ekis sin sawas nan ansou en kamadipw sarawi. De ma kumwail ese emen me anahne, a kumwail anahne kehsehki amwail kaun akan en wewehki.
Mwohndi nenenla awih ansou me sarawi pahn tep. Met pahn kak sawas “ekei me mongiong olahr oh pali ngehn pahtoulahr me mihmi seli limwahtail”² me anahne popohl pahn kak alehdi meleilei nan wasa ehu me sarawi.
Ni rahn Sarawi en kaisihsol, medewe kumwail en kaisihsolki oh kapakapki emen me kumwail kin papah me pahn anahne sawas en koaloaloamwahu.
Kapakap pwe kumwail en ese ma mie me pahn kak ahniki insenamwahu sang amwail pahn mwohd limwarail de karanih irail ni ansou en kamadipw sarawi de ma mie songen wiepeh kei kumwail kak sawaski.

Kamadipw Sarawi kak wia Wasahn Kasomw ong Koaros

Preseden Joseph Fielding Smith (1876–1972) padahngki, “Sarawihn kamadipw sarawi iei me keieu sarawi nan kapokon koaros en Mwomwohdiso.”³ Iei me karehda, e inenen kesemwpwal, kitail en ese me koaros me iang kamadipw sarawi en ahniki pepehm me irail iang wia towe oh palingenerail en audauwuda—ahpw mehlel toweh kan me kapw de irail kan me sohla pwaredo ansou kis.

Merana sang New South Wales, Australia, kempoakepahkihda lih emen me wie kaskuhlki duwen Mwomwohdiso nan ah wardo. “Met e wiahlahr emen kempoakepahi kesemwpwal,” Merania ahpw inda. “I kin pereniki mwohd reh ni ansou en kamadipw sarawi nan wihk koaros, oh i kin kalapw idek reh ia ire oh ma mie mehkot me i kak sewesehki ih.” Mwurin ansou kis, kempoakepahn Merenia ahpw pepdaisla. Doadoahk mwahu en toweh kan en wardo, oh pil patehng kasomw kaselel me kin wiawi nan ansou en kamadipw sarawi wia ehu lapalahn pilipil ong ih

Ireh kan ong ni Papah irail Toweh kan me Ahpwtehn Pwurodo de me wia Towe kapw akan

Ni ansou me kumwail pahn wia padahk nan rahn en kamadipw sarawi, kumwail kak luke kempoakepahmwail kan, peneinei, oh mehteikan en kohdo iang rong amwail padahk.
Kumwail kak rapahki oh kasomwoh irail kan me kelehpw de me anahne sawas. Idek ma kumwail kak mwohndi rehrail de luke irail en mwohd rehmwail.
Ni ansou me sarawio imwsekla, kumwail kak luke irail kan me kumwail kin papah oh mehteikan ong ni kemwekid kan en Mwomwohdiso me pahn wiawi ansou keren, kohla ni tehnpas sarawi, de ehu kemwekid laud.
Ma emen me kuwmail kin papah iang kamadipw sarawi ahpw sohte iangki ansou kei, kumwail kak idek rehrail ma mie arail iren peidek ohng dahme sansal nan padahko. Indahng irail me ansou koaros irail kak kohdo rehm ma mie lepin lokaia, soi, de lepin mahsen me irail sohte wewehki. Kumwail kak ehupene oh rapahkihda pasapeng kau ma mie anahnepe.

© 2020 sang Intellectual Reserve, Inc. Kolokol pwuhng koaros. Intingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwepen Padahk kan en Doadoahk en Papah, Suhn 2020.Pohnpeian.16988 885