Pigpig u Napan e Mo’olung ko Sacrament

Mo’olung ko sacrament e ma ayuweg e gidii’ ni ngan nang salpey min pigpig ngak boech e gidii’.

Mo’olung ko sacrament e ngiyal’ ko thothup nge ngiyal’ ni ngan tafneynag fare Tathapeg nge fare Bayul Rok. Napan ni gadead ra fek fare sacrament ni gubin e wiik, ma arram ni kan ta’areb gaed (muguy ko Doctrine and Covenants 84:110). Boech e gidii’ nbay ulane ward rodead fa branch rodead e bagel e gafgow roraed fa boech e ngiyal’ e darma yag ningar bad.

Ba’aray rogon nrayag ni ngad yus niged ni ngad pigpig gaed ulane re awa nem ngak boech e gidii’ nrayag ninge thilyeg nge mon’og nag e yafos roraed.

Mu Pi’ e ayuw ko fare Mo’olung ko Sacrament ni ngeyag ninge Ayuweg e Pi Cha’en ni Gama Pigpig Ngoread.

Bin somm’on ni ngan fil ko rogon ni ngan pigpig e ngan nang salpen facha’ fa gidii’en fare gathon fare tabinaew nge tin nib tu’uf roread. Rayag nbay kanawo’en nrayag ni ngam ayuweg read ninge mon’og rogon ni yead be tayfan napan ni garam fil mag nang salpen read.

Woed Mindy, ba mitin nbay l’agruw i athlog ni fak ni kab madway, ayuw nima ta’ ba sister ni’ir fare ministering sister e ri ayuweg ni rib gel u napan e mo’olung ko sacrament ko gubin e wiik.

“Bachane rogon e ngiyal’ nima murwel e pumo’on rog, I gag e guma fek fagli athlog ni fak mow ko misa ni gubin e wiik,” Mindy e weliy e biney’. “Rib momaw’ ni nggu athamgil ko napan e mo’olung ko sacrament nbay e gali athlog ney ni dar miyaw gow, machane fare bpin ni’ir e ministering sister rog e ma ayuwegneg.

“Ma par u chireg me ayuwegneg ko gali athlog rog ni gubin e wiik. Kemus nibe un ngog nge par u chireg me ayuwegneg e rib ga’fan ngog ni rib ga’ ni ngiyal’ ni gali athlog ney e yow be pi’ gilngun row fa dar miyow gow. Dagur lemnag ni be nangfan gelngin e ayuw rok ngog ni rib ga’ ni ngiyal’ ney ulane yafos rog. Ke guy e n’en nib tu’uf rog, ba mitin ni magareag, ma ke ayuwegneg ni ngeyag ni fare misa e nge par nib gapas ngog ma gamead falfalen’ riy.”

Rogon ni Ngan Ayuyweg e Tin Th’abi Tu’uf ko Gidii’

Fulweg e thin ngak e tiyugang’ ko elders quorum nge Relief Society ko mornga’agen e tin nib tu’uf ko gidii’en e galasia.
Tiyugang’ mu fla’aged rogon fapi non ko sacrament ni nge ayuweg e tin nib tu’uf ko gidii’en e galasia. Fa’anra bay ban’an nrayag ninge ayuweg be’ ni gabe michib ngak ko reb fapi mulwon, moeg ngak e tiyugang’ rom.
Fa’anra bay be’ nbay e m’ar rok fa mit e gaan nib kireb ko dogur rok nibe taleg read dabra thapaged e tawa’ath ko sacrament, mfith mornga’agen nge rogon nrayag ni ngan ayuweg read ninge yag ninge fel’ rogon e tayfan roread. Weliy e pi n’ey ngak e tiyugang’ rom.
Fa’anra bay be’ ni gama michib nag nima par u tabinaew rok ndabyag ninge un ko misa, demtrug ko ta’ab chingyal’ fa n’umngin napan e yafos rok, mfith ngak e bishof rom ko rayag ni ngan fek e sacrament nga tabinaew roread. Rayag ni ngam yoeloy e tin nikan fil u napan e mo’olung ko sacrament mag weliy ngak be’ u telefon, fa email, fa be’ ni gamew be guy mew.
Fa’anra be’ ni gabe michib nag nbay e bitir rok ni kab achig, rayag ni ngam pi’ e ayuw ngak u napan e mo’olung ko sacrament.
Fa’anra gidii’ ni gama michib ngak e gathi rima yib ko mo’olung ko sacrament, mu gay rogon ngam nangfan ko mangfan nge rogon nrayag ni ngam pi’ e ayuw. Fa’anra ba tu’uf e ma’af rorad, rayag ni ngam moeg ngoread ni ngar uned ngom. Fa’anra yead be thamiy ni dar pi’ e tabinaew e ayuw ngorad, rayag ni ngam pining rad ngar pired ko gin ni gabe par riy. Rayag ni ngam ayuweg read ngar thamiyed ni yead ba tu’uf ma ba tu’uf ni ngar uned ko fare mo’olung ko sacrament.

Tay u Wun’um, ni Ayuw nib Achig e Bay Angin ngak e Gelingin

Mornga’agen e michib, Sister Jean B. Bingham, Relief Society General President, e fil: “Boech i ngiyal’ ma gadad ma lemnag ni rib tu’uf ni ngad rrin’ed banan ni rib ga’ ma fin aram e yibe dag ni yibe pigpig ngak e buguliyiror rodaed. Machane ea pigpig nib achig e bay angin ngak e gidii’—ma kab ga’ angin ngodaed.”¹

Bay e ward nib achig u Belgium, Evita e baga’ nima pilyeg e thin nu Spanish ngak e gidii’ be milekag urom nge gidii’en e galasia napan e mo’olung ko Galasia. Bay boran, ni mada’ nag Evita be’ nu Dominican Republican nibe fil mornga’agen e Galasia. Manang buchuw’ e thin nu Ngalis, machane Spanish e iraram e thin ni manang. Ere yoeg Evita ngak ninge ayuweg ninge pilyeg e thin nifan ngak ko ngiyal’ ney mo’olung ko sacrament ere thamiy nike macham bu’uw.

“Pilyeg e thin e rayag nib momaw rogon ko ngiyal ko Madnom,” ke yoeg Evita. “Machane gura rrin’ ni woed rogon ni gube thamiy nibe yoeg fare thothup ni nggu fith ngak be’ ko ba tu’uf be’ ninge pilyeg e thin nifan ngoread e rima pi’ ngog e falfalen’ ni gu manang nrayag ni nggu ayuweg rad ngar thamiyed e Kan ni Thothup mar adaged fare mo’olung.”

Ayuw nib Achig Rogon

Mfith ngak e tiyugang’ ko mini’ e ba tu’uf e ayuw rok ko napan e mo’olung ko sacrament. Fa ra bay be’ ni gamnang, moeg ngak e tiyugang’ ngeyag ni nar nganed.
Par nga but’ ndabi yen lamay ngalang mag son nag fare mo’olung ninge tabab. Biney e ra ayuweg “e gum’ircha’en e gidii’ nike m’ingaen’ make kirbaen’ nib yileg dead”² nib tu’uf e gapas rok nrayag ninge yib ko giney nib thothup.
Madnom nifen e baley nag e abich, mu rrin’ nifan ngak be’ ni gama michib nag ni be’ nib tu’uf ningan pi’ me thamiy e gapas.
Meybil nifan ngak be’ nrayag ni ngam par nga charen ko ngiyal’ ni mo’olung ko sacrament fa be’ nrayag ningam ayuweg ndemtrug rogon.

Mo’olung ko Sacrament e Tigil’ Gubin e Gidii’

President Joseph Fielding Smith (1876–1972) e fil, “Mo’olung ko sacrament e ir fare bin th’abi ga’fan, nge fare bin th’abi thothup, ko gubin fapi mo’olung ko Galasia.”³ Ni bachan e biney, rib ga’fan ni gidii’ nibe yib nge un ko mo’olung ko sacrament e yad be thamiy ni yad ba tu’uf ma yad be thamiy e thothup—ni rib ga’ ni gidii’en e galasia nib be’ech fa tin nike n’uw napan ndawri yib.

Merania e be’ nu New South Wales, Australia, ni fel’ e thin rorow reb e bpin nibe fil mornga’agen e Galasia ulan e ward rok. “Ke mang reb e fagar rog ni rib tu’uf rog e chiney,” ke yoeg Merania. “Ri gub adag ni guma par u charen ko ngiyal’ ni mo’olung ko sacrament ni gubin e wiik, gubin ngiyal’ ni guma fith ko bay banan nib tu’uf rok nrayag ni nggu ayuweg riy.” Buch’uw ngay, min tawfe nag fare fagar rok Merania. Ayuw ko gidii’en fare ward, nge tu’ufeg nibay ko fare mo’olung ko sacrament, e rib ga’ angin ngak e chan’ey nikan tawfe nag.

Rogon ni ngam Michib ngak e Gidii’ nike Sul fa Gidii’ nib Be’ech

Fa’anra kanoeg ngom ni ngan non ulan fare mo’olung ko sacrament, rayag ni ngam pining e tafagar rom, gidii’en e tabinaew rom, nge boech e gidii’ ningar bad ngar motoyil gead ko mulwol rom.
Rayag ni ngam sapnag e gidii’ fa pining e magar ngak e gidii’ nike yib fa be’ nibe par rok ni yigo ir fa be’ nib tu’uf e ayuw rok. Mfith ko rayag ngam par nga charen fa pining nge un ngom ko gin ni gabe par riy.
Napan nran mu’ ko fare mo’olung, rayag ni ngam pining e gidii’ ni gama michab ngak nge un ko gosgos nifen e Galasia, fa un nga temple, fa tin ni yibe rrin’.
Fa’anra be’ ni gama michib nag ma kuma un ko mo’olung ko sacrament machane ke n’uw napan ndawri yib, ma rayag ni ngam fith ngoread ko bay e duwer roread ko tin ni kan fil mornga’agen u galasia. Moeg ngoread nrayag ni ngar fithed e duwer ni fa’anra bay e thin, salpen mornga’agen banen, fa mornga’agen e michib ndar nanged fan. Rayag ni ngam gayed mornga’agen u ta’abang ni fa’anra rayag fa ba tu’uf.

© 2020 ko Intellectual Reserve, Inc. Gubin ma bay mat’won. Kan yoloey u Mariken. Kan micheg nag ko thin nu Ngalis: 6/19. Micheg i pilyeg: 6/19. Translation of Ministering Principles, June 2020. Language. 16988 905