Maisugon nga mga Ehemplo
Ang Surprisa nga Tawag sa Misyon
Mipahiyom si Edwin Dharmaraju samtang siya migawas gikan sa airport ug ngadto sa kahayag sa adlaw. Makakita siya sa mga punoan sa palmera nga naglinya sa kadalanan ug makasimhot sa mga lamas gikan sa duol nga merkado. Siya ug ang iyang asawa, si Elsie, nabalik na sa India! Nagpuyo sila kaniadto sa Samoa, apan karon nauli na usab sila.
Si Edwin ug Elsie wala lang mianhi aron mobisita. Gitawag sila sa pagserbisyo isip mga misyonaryo sa Ang Simbahan ni Jesukristo sa mga Santos sa Ulahing mga Adlaw. Mibati og gamayng kakulba si Martin. Apan nasayud siya nga ang Langitnong Amahan motabang kanila. Daghan na kaayo og natabang ang Langitnong Amahan kanila.
Si Edwin ug Elsie natawo didto sa India. Apan unang nakadungog si Edwin kabahin sa Simbahan samtang nag-eskwela sa Estados Unidos. Misimba siya didto og kausa. Mibasa gani siya sa Basahon ni Mormon. Apan sa dihang mipauli siya sa India, nakalimot siya sa Simbahan.
Pipila ka tuig ang milabay, si Edwin ug Elsie mibati nga kinahanglan nilang mobalhin ngadto sa Samoa. Si Edwin usa ka bug scientist, ug mikuha siya og trabaho sa isla nga naghimo og pagsiksik. Didto nahimamat nila ni Edwin ug Elsie ang mga misyonaryo. Sa dihang mibasa si Edwin pag-usab sa Basahon ni Mormon, mibati siya og usa ka butang nga espesyal. Mibasa usab si Elsie sa Basahon ni Mormon. Mipili sila nga magpabunyag, uban sa ilang mga anak.
Human mipasakop sa Simbahan, ang labing gusto ni Edwin mao nga ang iyang pamilya didto sa India makakat-on sa ebanghelyo. Ang problema kay walay mga misyonaryo sa India nga magtudlo kanila! Misulat sila si Edwin ug Elsie ngadto sa punoang buhatan sa Simbahan sa paghangyo kanila sa pagpadala og mga misyonaryo sa India.
Ang sunod nga miabut mao ang usa ka dako nga surprisa. Si Presidente Spencer W. Kimball mitawag kanila sa pagserbisyo isip mga misyonaryo sa India!
Ug karon, ania na sila.
Ang ilang unang adtoan sa India mao ang balay sa igsoon nga lalaki ni Edwin. Ang mga ginikanan ug mga igsoon ni Edwin anaa didto usab. Diha-diha dayon, misugod sila si Edwin ug Elsie sa pagtudlo kanila. Ang ilang pamilya nalipay nga makakat-on sa ebanghelyo.
Pipila ka semana ang milabay, si Edwin ug ang iyang pamilya nagpundok palibut sa swimming pool sa nataran sa iyang igsoon nga lalaki. Ang pool gilimpyohan na, gipintalan, ug gipuno sa presko nga tubig. Ang tanan nagsul-ob og puti. Ang mga babaye nagsul-ob og nagbitay nga mga sari nga nagpatong ibabaw sa ilang mga abaga. Ang mga lalaki nagsul-ob og luag nga estilo sa Indian nga mga jacket ug karsones.
Mibarug si Edwin sa pool uban sa iyang amahan. “Samuel David,” miingon si Edwin, “ingon nga sinugo ni Jesukristo, ako mobunyag kanimo sa ngalan sa Amahan, ug sa Anak, ug sa Espiritu Santo.”
Nalipay si Edwin samtang gibunyagan niya ang iyang amahan. Gani mas nalipay siya sa dihang gibunyagan niya sunod ang iyang inahan. Sa pagtapos sa adlaw, nabunyagan ni Edwin ang 18 ka tawo!
Pagkasunod adlaw, misakay og tren sila si Edwin ug Elsie sulod sa unom ka oras. Mibisita sila og dugang nga mga sakop sa pamilya ug mitudlo kanila mahitungod sa ebanghelyo. Mibunyag si Edwin og upat pa sa iyang mga paryente sa duol nga sapa.
Sa katapusan, mibiyahe og 16 ka oras sakay sa tren sila si Edwin ug Elsie aron sa pagbisita sa mga ginikanan ni Elsie. Ang amahan ni Elsie usa ka lider sa laing simbahan. Wala siya mabunyagi, apan nagtuo siya nga ang Basahon ni Mormon usa ka maayo nga basahon. Mitabang siya sa paghubad sa Basahon ni Mormon ngadto sa Telugu, usa sa mga pinulongan sa India.
Sa dihang nahuman sila si Edwin ug Elsie sa ilang misyon, aduna nay igong bag-ong mga miyembro aron magsugod sa usa sa unang mga branch sa Simbahan sa India! Malipayon sila si Edwin ug Elsie sa dihang mibalik sa Samoa. Mapasalamaton sila nga gipadala sila sa Langitnong Amahan sa usa ka misyon!