Unsaon Nato sa Paglig-on ang Atong Pagtuo—nga Mag-uban

Sa atong pagtuon sa Basahon ni Mormon niining bulana, atong makat-unan ang mahitungod ni Korihor, kinsa mipatuo sa daghan nga mga miyembro sa Simbahan nga sila nailad sa mga propeta apan miangkon sa kaulahian nga siya mismo nalingla ni Satanas ug milingla sa uban. Atong makat-unan ang mahitungod sa mga Zoramite, usa ka tibuok nga katawhan kinsa mipahilayo sa ilang kaugalingon gikan sa Simbahan. Ug kita makakita ni Alma nga Batan-on, nga sa higayon nga aktibong nakig-away batok sa Simbahan, nagtinguha sa paglig-on sa iyang kaugalingong mga anak batok sa mga pagpili nga modala kanila palayo gikan sa Ginoo ug sa Iyang Simbahan.

Pipila kanato adunay mga sakop sa pamilya o mga higala kinsa mopili nga dili na moapil sa gipahiuli nga Simbahan sa Ginoo. Kini mahimong sakit kaayo alang kanato kinsa kusganong mibati sa atong pagtuo. Gusto kita nga motabang, apan daghan kanato ang maghunahuna kon unsaon.

Usa ka isyu sa magasin dili gayud makatubag sa matag rason kon nganong ang pagtuo mabugnaw o hingpit nga makapasabut kon unsay buhaton kon mahitabo kini. Ang panaw sa tanang tawo sa hugot nga pagtuo managlahi. Apan uban niini nga isyu kami naglaum sa paghatag og tabang, sama sa:

• Ang kasinatian sa usa ka tawo sa pagbalik sa Simbahan ug sa unsay iyang nakat-unan gikan niini (tan-awa sa pahina 26).

• Ang kaimportante sa pag-abi-abi sa tanan (tan-awa sa 40).

• Mga sugyot alang sa mga ginikanan kon unsaon sa pagmaniobra sa ilang mga relasyon uban sa hamtong nga mga anak kinsa mipili og lahi nga dalan (tan-awa sa pahina 30).

• Makatabang nga mga panglantaw sa kasaysayan sa Simbahan ug sa unsang paagi kini makapalig-on sa atong hugot nga pagtuo (tan-awa sa pahina 12).

Nanghinaut kami nga kining mga artikulo maghatag og usa ka punto sa pagsugod nimo sa pagtinguha og balaan nga giya alang sa inyong personal nga mga kahimtang.

Matinuoron,

Ni Adam C. Olson

Tigdumalang Editor