Mga Hulagway sa Hugot nga Pagtuo
Ignatius ug Adelaide Baidoo
Accra, Ghana
Sila si Ignatius ug Adelaide nakakita kon sa unsang paagi ang parograma sa literasiya sa Simbahan ug ang gipanghingusgan nga nakasentro sa panimalay nga pagkat-on sa ebanghelyo nakapanalangin sa mga sakop sa ilang stake ug sa pamilya.
Christina Smith, tiglitrato
Ignatius:
Nalambigit ko sa programa sa literasiya sa ebanghelyo isip usa ka sakop sa kapangulohan sa stake. Nakabisita ko og usa ka klase ug nakaamgo nga kini dili lamang alang niadtong kinsa dili makabasa ug makasulat. Kini alang kanatong tanan aron mas masabtan ang ebanghelyo ni Jesukristo.
Adelaide:
Nakaila ko og daghan sa mga sister sa among ward kinsa natabangan sa klase sa literasiya sa ebanghelyo. Usa ka sister dili maayo ang gibati sa iyang kaugalingon tungod kay siya dili makabasa, makasulat, o makatabang sa iyang mga anak sa homework. Misulod siya sa klase ug karon makabasa ug makatabang na. Nalipay kaayo siya. Kon makakita ko niya, kanunay ko nga moingon, “Kini nga ebanghelyo tinuod gayud. Kini nakausab ug nakapanalangin sa mga kinabuhi sa mga tawo.”
Ignatius:
Ang Dali, Sunod Kanako ug ang nakasentro sa panimalay nga pagkat-on sa ebanghelyo makatabang usab sa mga pamilya nga mobasa sa mga kasulatan ug makat-on gikan sa usag usa.
Ang sukaranang bato sa atong relihiyon mao ang Basahon ni Mormon. Dinhi sa Africa, kaming tanan gimatuto nga masayud sa Biblia. Daghan, hinoon, ang wala makaila nga ang Basahon ni Mormon naglangkob sa yano ug bililhong mga kamatuoran. Samtang kami mogamit sa Dali, Sunod Kanako sa pagtuon sa Basahon ni Mormon diha sa programa sa literasiya sa ebanghelyo ug sa nakasentro sa panimalay nga pagkat-on sa ebanghelyo, kami makat-on ug makasabut sa tanang impormasyon nga among gikinahanglan sa pagtabang kanamo sa pag-uswag niini nga kinabuhi.
Adelaide:
Sa dihang gipahibalo ang nakasentro sa panimalay nga pagkat-on sa ebanghelyo sa kinatibuk-ang komperensya, gihunahuna nako ang pipila sa among miyembro sa ward ug aduna koy gamayng kabalaka. Unsaon man kaha nila kini sa paghimo? Naghunahuna ko. Nag-ampo ko nga ang mga miyembro mosunod niining pagpadayag. Nasayud ko nga kon sila mosunod sa unsay gisulti sa propeta, makatabang kini nila sa ilang mga panimalay.
Sa among pamilya, naningkamot kami ug gibuhat ang tanan namong mahimo. Ang tanan miapil. Malipayon kaayo ko kon sa unsang paagi ang akong mga anak nagtinabangay kon magbasa kami sa Basahon ni Mormon. Ganahan sila sa Basahon ni Mormon. Maanindot kaayo ang among higayon sa pagbasa ug pagpaambit sa among mga pagpamatuod.
Ignatius:
Si Presidente Russell M. Nelson miingon, “Ang kahimayaan pamilya nga buluhaton.”1 Gihigugma nako ang akong asawa ug mga anak. Gusto ko nga makauban sila ug ang atong Langitnong Amahan sa kahangturan, mao nga kami kinahanglan nga magtinabangay sa usag usa.
Adelaide:
Ang mga sister sa Relief Society nagtabang usab sa usag usa. Kon mag-uban kami, maghunahuna kami nga, “Kini nga sister nagkinahanglan nako” o, “ako nagkinahanglan kaniya.” Magtupad kami ug magtinabangay sa pagbasa, pagsabut, ug pagpaambit unsa among nakat-unan. Among gibuhat ang among labing maayo, “Kon ang Manluluwas naa dinhi, unsay Iyang buhaton?”
Ignatius:
Adunay usa ka aspeto sa programa sa literasiya sa ebanghelyo nga naghangyo sa mga estudyante sa pagdibuho og hulagway sa unsay ilang buhaton aron molambo sa ebanghelyo nga pagkat-on ug pagtuon sa kasulatan. Usa ka larawan nga gidibuho nagpakita og usa ka pamilya nga nag-alirong sa usa ka lamesa nga gibutang ang ilang mga kasulatan sa ilang atubangan nga nanaghisgot sa ebanghelyo. Natandog kaayo ko niana. Ang literasiya sa ebanghelyo dili lang kabahin sa pagbasa ug pagsulat. Ang mga biswal makatabang usab kanato nga makat-on. Bisan kon naghunahuna kita nga nakahibalo na ta sa tanan, sa kanunay makakat-on pa gayud kita og dugang mahitungod sa ebanghelyo ug madugangan ang atong pagpamatuod sa Ginoo, si Jesukristo.
Ang kasulatan nag-ingon nga siya nga lig-on modala kaniya nga nagluya aron siya mahimo usab nga malig-on (tan-awa sa Doktrina ug mga Pakigsaad 84: 106). Kon ang pipila kinsa mibati nga sila luya diha sa ebanghelyo, kita makapangalagad ngadto kanila, sa tinagsa-tagsa, ug motabang sa pagpabarug kanila. Ang pagpangalagad molahutay og dugay aron sa pagbayaw sa mga miyembro.
Ang nakasentro sa panimalay nga pagkat-on sa ebanghelyo nakapalig-on sa pagpamatuod sa anak nga mga lalaki sa Baidoos nga silang, Jayden ug Hubert. Kasagaran sila mangulo sa mga panaghisgutan sa ebanghelyo diha sa pamilya.
Ang pagkanta og mga himno isip usa ka pamilya makatabang nga makadala sa Espiritu sa mga home evening.
Ang regular nga pag-ampo sa pamilya nakahimo sa Baidoos nga panimalay nga usa ka dapit sa hugot nga pagtuo ug gugma.
Si Ignatia nakakat-on mahitungod sa kaimportante sa pag-ampo sa iyang mga ginikanan ug igsoong mga lalaki.
Ang pagtabang sa mga buluhaton sa panimalay, lakip sa pagkat-on sa ebanghelyo, nagpanalangin sa relasyon tali sa mga igsoon sa Baidoo nga pamilya.
Ang pagkat-on sa ebanghelyo ug pagserbisyo sulod sa pamilya nakapalig-on sa gugma nga gibati sa mga Baidoo alang sa usag usa ug mipanalangin kanila sa daghang mga paagi.
Pag-ampo tali sa bana ug asawa nakatabang ni Ignatius ug Adelaide nga madala ang ilang mga anak sa mga pamaagi nga gitudlo sa propeta ug mga apostoles.