Ang Maisug nga Airman
Walay nangahas motubag sa drill instruktor, apan makapatingala, usa ka batan-ong lalaki ang mipataas sa iyang kamot.
Paghulagway pinaagi ni David Malan
Daghang katuigan ang milabay, miapil ko sa Air Force sa Estados Unidos aron sa pagserbisyo sa akong nasud. Wala madugay anaa na ako sa usa ka boot camp sa Texas, USA. Hinay nga milabay ang mga semana samtang milahutay ko sa daghang mga butang nga kasagaran masinati sa usa ka tawo diha sa boot camp.
Usa ka adlaw mitambong ko og dako nga miting sa sobra sa 200 ka airmen, ang tanan anaa sa pagbansay sama kanako. Ang miting gisugdan uban sa usa sa among mga drill instruktor—kinsa kanunay misinggit og saba ug bastos nga mga butang—nga nagsinggit, “Aduna bay bisan kinsa nga supak sa pamaagi nga ako midumala sa kini nga pagbansay?”
Siyempre, walay nangahas motubag, apan makapatingala, usa ka batan-ong lalaki ang mipataas sa iyang kamot.
“Airman, barug!” misinggit ang instruktor. “Unsa man ang butang nga supak ka?”
Kaming tanan naminaw pag-ayo samtang ang batan-ong lalaki mideklarar sa dako og tingog, “Supak ako sa imong paggamit sa ngalan sa akong Manluluwas sa pagpasipala. Nakapasakit kini sa akong kalag. Mohangyo ko nimo nga mohunong.”
Hingpit nga nahilom ang lawak. Mitutok ang instruktor kaniya ug dayon nangutana kaniya kon unsa nga relihiyon siya nahisakop. Mapasigarbuhong miingon ang maisug nga airman, “Miyembro ako sa Ang Simbahan ni Jesukristo sa mga Santos sa Ulahing mga Adlaw!”
Gipasalamatan sa instruktor ang airman alang sa iyang kaisug sa pagsulti, ug nagpadayon ang miting. Kini nga kasinatian adunay dakong epekto ngari kanako. Kanunay kong naghunahuna nga gusto kong makabaton sa samang kaisug niadto nga airman.
Human sa boot camp ug sa medikal nga pagbansay, gi-assign ko sa usa ka air force base sa Colorado, USA. Usa ka adlaw, nakadawat ko og sulat gikan sa akong kinamagulangan nga igsoong lalaki nga naka-estasyon sa Pilipinas. Miapil siya sa air force mga usa ka tuig sa wala pa ko miapil. Misulti siya kanako nga siya nahimong usa ka miyembro sa Simbahan, ug gusto niya nga makigkita ko sa mga misyonaryo. Diha-diha dayon nahinumduman nako ang kasinatian didto sa boot camp uban sa maisug nga airman. Ang akong asawa ug ako nakigkita sa mga misyonaryo, ug sa wala madugay nabunyagan kami.
Pipila ka bulan ang milabay, gipabisitahan nako sa mga misyonaryo ang akong manghud nga lalaki. Siya ug ang iyang asawa nabunyagan usab. Ang akong mga igsoon nga lalaki ug ako karon adunay dagko nga mga pamilya nga naay mga apo. Kaming tanan nahigugma sa Ginoo ug sa Iyang Simbahan.
Wala ako masayud sa ngalan sa maisug nga airman. Wala na ako makakita kaniya pag-usab, apan hangtud sa hangtud akong mapasalamaton alang sa iyang kaisug sa pagbarug sa unsay iyang gituohan.