“Kinsa ang Nakadasmag sa Akong Anak?”
Akong napanan-awan ang akong kaugalingon nga gisinggitan ang tawo kinsa nakadasmag sa akong anak, apan gikaatubang nako dayon ang driver.
Paghulagway pinaagi ni Ellerie Arnold
Bag-o lang nakong gihatud ang akong anak nga babaye sa balay sa usa ka higala sa dihang nadawat nako ang tawag gikan sa akong bana, si Jonathan. Siya misulti kanako nga ang among 11 anyos nga anak, si Aiden, nabanggaan sa sakyanan samtang siya ug si Jonathan milabang sa karsada.
Ang drayber miliko sa wala diha sa atubangan ni Jonathan ug wala makakita ni Aiden nga nagbisikleta. Gibanggaan sa driver ang dung sa bisikleta ni Aiden. Nalagput siya, nga naggunit pa gihapon sa bisikleta, ug naigo ang iyang ulo sa kilid sa awto sa dihang nitugpa siya. Dayon mitugpa siya sa karsada nga ang iyang bisikleta midat-og kaniya. Salamat nalang, nga nagsul-ob siya og helmet. Ang drayber ug pipila sa ubang mga tawo mihunong aron sa pagtabang samtang si Jonathan mitawag og ambulansya.
Ang akong hunahuna ug mga pagbati sa kalit lang nagkaguliyang. Gipakusgan nako og padagan padulong sa interseksyon diin nahitabo ang aksidente, nanghinaut nga maabtan pa ang ambulansya aron makauban nako si Aiden.
Ang hunahuna nga kasab-an og maayo ang driver misantop sa akong hunahuna. “Unsa man ang gihunahuna sa driver?” Naghunahuna ko. “Hubog ba sila? Naggamit ba sila sa ilang telepono?” Nasuko kaayo ko ug nasubrahan sa kabalaka. Wala koy ideya kon unsa ka grabe ang pagkaangol ni Aiden.
Sa dihang miabut ko sa nahitaboan, nakabiya na ang ambulansya. Ang duha na lang ka sakyanan sa pulis ug usa ka sakyanan giparking daplin sa karsada ang nahabilin diha sa nahitaboan. Usa ka babaye nga mabalak-on nagbarug tupad sa sakyanan.
Ako siyang giduol ug gipangutana, “Nakakita ba ka si kinsa ang nakabangga sa akong anak?”
Hinay siya nga misulti, “Nakakita ko.”
Akong napanglantawan nga singgitan ang nagdanghag nga tawo kinsa nagbangga sa akong anak, apan sa dihang naatubang na nako ang driver, ang pagkanegatibo nahanaw. Nakahilak nalang ko ug migakos niya. Nangayo siya og pasaylo, ug misulti ko niya nga OK ra ang tanan. Akong nahibaloan nga mao gyud to ang sakto nga mga gipamulong ni Aiden ngadto niya sa wala pa miabut ang pulis. Sa katapusan, si Aiden nakalahutay ra sa pipila ka mga pangos ug bun-og.
Mapasalamaton ko nga sa niana nga mahinungdanong takna, ang atong mahigugmaon nga Langitnong Amahan mipanalangin nako og kalig-on sa pagpasaylo kay sa kasilag, bisan kon wala ko mangayo niana ngadto Kaniya. Nasayud ko nga Siya nagpakabana kanato ug sa kanunay motanyag kanato sa Iyang tabang.