Mga Young Adult

Pag-atubang sa Walay Kasiguroan nga Umaabut inubanan sa Hugot nga Pagtuo

Usa ko ka tigplano. Gusto kong masayud unsay mapaabut gikan sa matag adlaw, aron ako makaandam alang niini. Apan unsaon nako pagpangandam alang sa umaabut kon kini hilabihan ka layo ug dili sigurado?

Ang kinabuhi halapad kaayo. Adunay hilabihan ka daghang butang niini! Daghan kaayo ang mahimong mahitabo! Adunay daghan kaayo nga mahimo nakong buhaton! Usahay ang mga posibilidad maghingapin.

Adunay daghan nga mga butang nga akong gusto: kapikas, usa ka maayong trabaho, makapuyo gawas sa nasud, makatag-iya og usa ka iring, makasulat og usa ka nobela, makat-on og Russian … Apan nasayud usab ako nga mausab ang mga tinguha ug tumong. Ang mga prayoridad mabalhin.

Usa ka prayoridad nga kinahanglang dili gayud mabalhin mao ang atong pasalig ngadto sa Dios ug sa Iyang plano. Gamit sa Iyang panglantaw, kita mahimong makamaniobra sa usa ka umaabut nga puno sa mga pangutana tungod kay motabang Siya kanato sa pagpangita og mga tubag, usa ka lakang matag higayon. Kinahanglan lang gayud kita nga mohimo sa labing maayo nga pagpili kutob sa atong mahimo sa matag lakang.

Niini nga seksyon, ang mga young adult nagpaambit sa ilang mga personal nga mga kasinatian kon giunsa nila pagplano ang ilang kaugmaon uban sa tabang sa Langitnong Amahan ug sa unsang paagi sila nagpadayon sa unahan inubanan sa hugot nga pagtuo kon nag-atubang og daghan kaayong kawalay kasiguroan.

Kon kabahin na sa umaabut, adunay daghan kaayong mga pangutana, apan nagpasabut lang kana nga adunay daghan kaayong potensyal. Kita usab adunay potensyal—balaang potensyal nga mahimong sama sa atong Langitnong Amahan ug sa Iyang Anak, si Jesukristo.

Ug kana makapahimo sa atong kaugmaon nga mahimayaon.

Meg Yost

Mga Panabut …

Gikan sa mga young adult

kabahin sa pagbaton og hugot nga pagtuo sa umaabut

“Matag buntag naghangyo ko sa Dios sa pagtabang kanako sa pagbuhat unsay Iyang ipabuhat kanako. Kini mao ang usa ka dako nga tabang alang kanako!”

—Ciara Galvin, Iowa, USA

“Magbaton og mahangturong panglantaw—adunay mas dakong mga butang sa kinabuhi sa umaabut kay sa unsay nahitabo karon. Nakaamgo ko nga adunay daghan kaayo nga dili nako kapugngan. Apan ako makasalig sa Ginoo ug sa Iyang panahon.”

—Claire Parsons, Queensland, Australia, Australia

“Buhata ang imong labing maayo karon! Ang Ginoo motabang kanimo.”

—Anli Emano, Philippines

“Ayaw kabalaka sa umaabut; Ang Dios mosangkap. Padayon lang sa pag-ampo ug motuo Kaniya. Nasayud Siya sa inyong mga panginahanglan.”

—Wamboi Jumah, Kenya

Gikan sa mga lider sa Simbahan

“Ang gipahiuli nga ebanghelyo ni Jesukristo nag-awhag kanato sa paghunahuna mahitungod sa umaabut. Kini nagpasabut sa katuyoan sa mortal nga kinabuhi ug sa pagkatinuod sa kinabuhi nga mosunod. Nagtudlo kini og importante nga mga ideya mahitungod sa umaabut aron magiyahan ang atong mga lihok karon. …”

“Tan-awa ang mga butang sa mas lapad nga panglantaw. Unsa ang epekto sa atong umaabut sa mga desisyon nga atong gihimo karon? Hinumdumi ang kaimportante sa pagkuha og edukasyon, pagtuon sa ebanghelyo, pagbag-o sa atong mga pakigsaad pinaagi sa pag-ambit sa sakramento, ug sa pagtambong sa templo.”

Presidente Dallin H. Oaks, Unang Magtatambag sa Unang kapangulohan, “Unsa ang Sangputanan Niini?” Liahona, Mayo 2019, 60, 62.

Giunsa nimo nga naka-adjust ka sa dagkong mga transisyon sa kinabuhi, sama sa pag-uli gikan sa misyon, ang pagbiya sa panimalay, o magminyo? Ipadala namo ang inyong tubag sa liahona.ChurchofJesusChrist.org hangutd Hulyo 31, 2019.

Ipaambit ang Imong Istorya

Aduna ka bay kasinatian nga ikapaambit? O gusto ka ba nga makakita og mga artikulo mahitungod sa pipila ka mga hilisgutan? Kon mao, gusto kaming makadungog gikan kanimo! Mahimo nimong isumiter ang imong artikulo o ang imong feedback diha sa liahona.ChurchofJesusChrist.org.

Pangitaa kini nga mga artikulo ug daghan pa:

• Diha sa liahona.ChurchofJesusChrist.org

• Diha sa Sinemana nga YA (ubos sa mga Young Adult nga seksyon sa Gospel Library)