Ang pagpili sa Higpit ug Pig-ot diha sa Lapad nga Dalan

Ni Elder Takashi Wada

Sa Seventy

Dihay duha ka dalan sa akong atubangan, ug nasayud ko nga usa lang ang dalan aron masayran asa niini nga subayon.

Mga paghulagway pinaagi ni Chris Ede

Nagtubo ko sa Nagano, Japan, uban sa akong mga ginikanan. Ang relihiyon kabahin na sa tanan nga gimbuhaton sa akong pamilya. Ang akong amahan miluhod sa atubangan sa Buddhist nga altar matag buntag ug gabii. Wala nako hunahunaa ang Buddhismo isip usa ka relihiyon—usa kini ka pamaagi sa among pagpakabuhi. Mas sayon ra unta para nako sa pagpabilin nga Buddhist sa tibuok nakong kinabuhi, apan ang Dios nagmatuod kanako sa makadaghan nga ang sayon o popular nga dalan dili kanunay nga mao ang labing maayong dalan.

Libro o Balaan nga Basahon?

Isip usa ka tin-edyer, nanlimbasug ko og maayo sa akong pagkatawo. Naghunahuna ko nganong naa ko dinhi sa yuta ug kinsa ako angay nga mahimo. Sa dihang mga 13 anyos ko, ang prinsipal sa eskwelahan mihatag sa matag estudyante og kopya sa Bag-ong Tugon sa English ug Japanese nga mag-abay. “Dili kini alang sa relihiyosong mga katuyoan,” miingon siya. “Kini usa ka maayo kaayo nga hubad, busa gamita kini sa pagtuon og Iningles.” Dihang giablihan ko kini hinoon, naghatag kini og mga pakisayran sa kasulatan kon kamo mobati og kaguol, nagkinahanglan og mga tubag sa inyong mga pangutana, o nanglimbasug. Makasabut ko sa tanan niadto nga mga sitwasyon!

Nakabasa ko mahitungod ni Jesukristo. “Umari kanako, kamong tanan nga nabudlay ug nabug-atan, ug papahulayon ko kamo” (Mateo 11:28). “Magpas-an sa [inyong] krus, ug sumunod kanako” (Mateo 16:24). Ang mga pulong nakapadasig kanako bisan og ako dili hingpit nga nakasabut niini. Naghunahuna ko kon kinsa si Jesukristo ug unsay gipasabut sa pag-angkon Kaniya isip ang Manluluwas. Naghunahuna ko kon ako lang ba nga usa ang gibati og ingon nga koneksyon sa unsay angayng mahimong libro lamang.

Modagan o Mopabilin ug Maminaw?

Pipila ka tuig ang milabay nakahimamat ko og mga misyonaryo sa unang higayon. Ang akong mga ginikanan mipasidaan kanako mahitungod sa batan-ong mga Kristiyano kinsa naglibut sa pagsangyaw. Samtang naglakaw ko pauli, ang usa ka taas nga Amerikanong misyonaryo nga mipahiyom mipahunong nako. Wala ko kahibalo unsa ang buhaton. Nahadlok ko nga makig-istorya siya kabahin sa iyang simbahan. Kon gibuhat pa niya, tingali midagan nako sa laing dalan! Ang iya rang gipangutana kon asa ang post office. Gisultihan nako siya ug dayong pauli sa panimalay.

Dihang mibiya ko, aduna koy gibati. Kon makita nako pag-usab, ang mga misyonaryo naghunahuna ko, makig-istorya ko kanila.

Wala madugay human niana, gikahinagbo nako ang lahi nga paresan sa mga misyonaryo. Nakalitan ko nga ang Dios maminaw ug motubag sa pag-ampo sa usa ka bata nga sama nako, hangtud nga akong nabasa ang mahitungod ni Joseph Smith. Nakabasa ko diha sa Bag-ong Tugon nga mag-ampo kanunay, apan ang Dios nagpakita sa usa ka tawo? Ang pamati niini radikal ug husto. Imbis nga modagan, gitakda nako ang sabut aron sila magtudlo nako.

Mangatarungan o Diskubrihon ang Kamatuoran?

Usa ka bulan sa pakigtigum uban sa mga misyonaryo, ilaha akong gidapit sa pagpabunyag. Dili ko gusto nga balibaran sila, apan ako nagduha-duha sa pagbiya sa mga tradisyon sa akong mga ginikanan ug sa tanan nga naglibut kanako. Adunay duha ka dalan sa akong atubangan, ug nasayud ko nga adunay usa lamang ka paagi aron masayud asa niini—nga kinahanglan kong mag-ampo sama ni Joseph Smith. Nangutana ko sa Langitnong Amahan, sa pangalan ni Jesukristo, kon ang mga butang nga gitudlo sa mga misyonaryo kanako tinuod ba.

Sinugdanan kadto sa akong kausaban. Sukad niadto, nasayud ko mismo nga ang gipahiuli nga ebanghelyo tinuod. Walay tawo nga makakuha niana nga kahibalo gikan kanako. Nasayud ko kon hain nga dalan ang subayon, ug walay makapausab niana.

Daghan ko og mga pangutana sa dihang bata pa ko. Akong nakat-unan nga ako anak sa Dios, Siya nahigugma kanako, Siya adunay plano alang kanako, ug Siya gusto nga motubag sa akong mga pag-ampo. Kini nga kahibalo nakapausab sa akong tibuok nga panglantaw sa kinabuhi. Akong nakat-unan nga kinsa ako ug unsay akong gibuhat mahinungdanon.

Makighiusa o Mopalahi?

Sa wala pa ko nakat-on nga ako anak sa Dios, gusto ko nga masagol sa tanan. Nahadlok ko nga malahi. Apan human nga nakat-on ko nga ako anak sa Dios, nakaamgo ko nga makabarug ko, nga pwede akong molahi.

Ang pag-ampo ug pag-amgo nga ako anak sa Dios nakahatag kanako og kaisug sa pagpasabut sa akong mga pagbati ngadto sa akong mga ginikanan, apan wala kaayo sila nakasabut. Nagtuo sila nga masinupakon ra kaayo ko ug dili pa hingkod sa paghimo og desisyon sa pagpabunyag. Sila naulaw nga ang ilang anak nga lalaki nagsunod niining katingad-an nga relihiyon kay sa ilang mga tradisyon. Nasayud ko kon si kinsa ako ug unsay akong gusto, apan gusto usab ko nga mopasidungog sa akong mga ginikanan ug nanghinaut nga sila mopasidungog sa akong relihiyon.

Motahud sa Akong mga Ginikanan o Ibaliwala ang Pagpakabana Nila?

Akong gipasabut ang akong sitwasyon ngadto sa mga sister nga mga misyonaryo. Sila dunay ideya—mahimo sila nga moanhi ug makig-istorya sa akong mga ginikanan aron moarang-arang ang ilang gibati mahitungod niining relihiyon. Giingnan nako sila nga nabalaka ko nga ang akong mga ginikanan dili gusto nga makig-istorya nila. Dayon usa sa mga sister misugyot nga magdungan mi sa pagpuasa.

Sa dihang wala ko mikaon sa pamahaw, naguol ang akong mama. “Nganong dili ka mokaon?” nangutana siya. Akong gipasabut nga nagpuasa ko, ug kana nakapabalaka pa kaniya og dugang.

“Una miadto ka niining wala mailhi nga relihiyon, ug karon dili ka mokaon. Nabalaka ko. Nakalitan ko! Akong tawagon kadtong mga misyonaryo.”

Gitawag gayud niya ang mga sister, ug sa unsang paagiha sila naimbitar ngadto sa among panimalay alang sa panihapon!

Nakaangkon kami og talagsaon nga panahon. Ang mga misyonaryo mitudlo sa akong mga ginikanan sa himno nga “Ako Anak sa Dios” (Mga Himno, nu. 189), ug kini among gikanta. Ang akong amahan ganahan niana. Human sa panihapon uban sa mga sister, walay usa sa akong mga ginikanan nga nabalaka mahitungod sa pag-adto nako sa simbahan. Ug akong gibati nga nakahimo ko sa pagtahud kanila pinaagi sa pagsunod sa ebanghelyo tungod kay kini naglangkob sa tanang butang nga sila mitudlo kanako. Naghunahuna ko kon ako mohigugma kanila sa igong gidugayon, ug motratar kanila sa igo nga pagtratar, sa katapusan sila mosabut. Mikabat og 35 ka tuig human sa akong bunyag, apan ang akong inahan nabunyagan ug misulod sa templo pipila ka tuig lang ang milabay!

Ang pagkasayud nga ako anak sa Dios nakaimpluwensya sa daghang mga desisyon sa akong kinabuhi. Nasayud usab ako nga kon kita mosunod sa Espiritu ug buhaton unsay gisugo sa Langitnong Amahan kanato, bisan kon malisud kini, Siya mopanalangin kanato. Kana sa kanunay mao ang labing maayo nga pagpili.