Atong Luna
Usa ka Makanunayon nga Pag-aghat
Mga paghulagway pinaagi ni Toby Newsome
Usa ka adlaw samtang naghimo sa misyonaryo nga buhat sa abugon nga kadalanan sa Kenya, ang akong kompanyon ug ako nakig-istorya sa usa ka babaye. Gidawat niya ang pamplet nga among gihatag niya apan misulti kanamo nga dili na pabalikon.
Paglabay sa pipila ka adlaw nakaplagan namo ang among kaugalingon diha nianang sama nga dalan, ug kami adunay usa ka pag-aghat sa pagpangumusta kaniya pag-usab. Nangutana ko sa akong kaugalingon, “Nganong mobalik man kami nga misulti man siya kanamo nga dili na mobalik?” Apan misunod kami sa pag-aghat.
Natingala siya pag-abut namo didto apan miingon nga nalipay siya nga nakakita kanamo. Misugod kami sa pagtudlo og usa ka leksyon, apan wala madugay nahimo kining usa ka argumento. Ako ug ang akong kompanyon mitapos sa leksyon sa usa ka pag-ampo ug mibiya, nagka-uyon diha-diha dayon nga dili na mobalik. Apan sa sunod adlaw, aduna na usab kami kusog nga pag-aghat nga mobalik. Dili ko gusto nga mobalik, apan ang akong kompanyon miingon nga kinahanglan kami maminaw sa Espiritu. Busa akong gisalikway ang akong mapasigarbuhong mga pagbati, ug kami mibalik. Pag-abut namo didto, nakalitan ko. Ang babaye ingon og lahi nga tawo. Ang iyang panagway nausab, ug andam siya nga maminaw sa unsay among isulti. Sa sunod namong pagbisita, nangutana siya kanamo kon kanus-a siya pwedeng mabunyagan.
Upat ka semana ang milabay, nabunyagan siya nga miyembro sa Ang Simbahan ni Jesukristo sa mga Santos sa Ulahing mga Adlaw. Human sa iyang kumpirmasyon, mihangup siya kanamo ug misulti kanamo nga mapasalamaton kaayo siya nga mibalik kami. Nakat-unan nako nga kita kinahanglang kanunay nga maminaw ug mobuhat sa mga pag-aghat. Giandam gayud sa Langitnong Amahan ang Iyang mga anak sa pagdawat sa ebanghelyo, ug Siya mogamit kanatong tanan sa pagpangita kanila pinaagi sa Espiritu Santo.
Leaha M., KwaZulu-Natal, South Africa
Kanus-a Ako Makapasakop sa Simbahan?
Niadtong mga singko anyos pa ko, ang akong amahan nawad-an og pagtuo ug nakahukom nga mobiya sa Simbahan. Lisud kaayo kadto, ilabi na sa dihang nag-otso anyos ko. Mahinamon kaayo ko nga mabunyagan, apan dayon miingon ang akong amahan nga dili. Gusto niya nga maghulat ko hangtud nga mas hingkod na ko aron masayud gayud ko nga gusto ko nga mopasalig. Ug sa ingon nagtan-aw ko samtang ang akong mga higala nabunyagan.
Nakahinumdom ko nga naglibug—kon ang Simbahan tinuod, nganong gipugngan man ko sa pagpabunyag? Isip usa ka tin-edyer, lisud kaayo kadto nga makita nga ang tanang mga batan-on moadto sa templo tungod kay gusto kaayo nakong moadto. Lisud ang dili makahimo sa pag-apil, apan kanunay akong nasayud nga makuha nako ang akong kahigayunan!
Niadtong Mayo 2019, sa katapusan ako nabunyagan sa edad nga 16. Nahinumdoman nako ang daghang mga kasinatian nga aduna ko sa pagbati sa hingpit nga kalipay sa ebanghelyo ug sa pagbaton og pagpamatuod. Usa kadto ka espesyal kaayo nga kasinatian, ug latas sa tanang kalisud nga akong naagian hangtud nianang adlawa, nasayud ko sa tibuok nakong kasingkasing nga ang ebanghelyo tinuod ug kanunay gayud.
Trinity C., Colorado, USA
Ang Rason sa mga Lagda
Mahinamon kong moadto sa komperensya sa kabatan-onan, apan dayon akong nahibaloan nga adunay daghan kaayong mga lagda—sama pananglit, walay mga cell phone ug dili mogawas nga mag-inusara. Ingon og ang mga hamtong kanunayng nagbantay kanamo. Apan nalingaw kaayo ko, nakahimo og daghang mga higala, nagtrabaho sa usa ka proyekto sa pagserbisyo, ug nagkat-on mahitungod sa ebanghelyo.
Atol sa miting sa pagpamatuod sa katapusang adlaw sa komperensya sa kabatan-onan, usa sa mga lider naghisgot mahitungod kon unsa kadako ang iyang gugma kanamo, ang kabatan-onan sa stake.
Kon nahigugma ka namo, nganong aduna kami daghan kaayong mga restriksyon dinhi? Naghunahuna ko. Nianang sama nga higayon, ingon og makabasa siya sa akong hunahuna, mitubag siya sa akong pangutana.
Ang mga lider nagpahimutang og mga lagda, miingon siya, dili sa paghasol kanato apan alang sa atong kahilwasan. Sa dihang giingon niya kana, natandog ako sa Espiritu. Nasabtan nako nga ang Langitnong Amahan naghatag kanato og mga sugo alang sa samang rason. Dili kini sa paghasol kanato; kini makatabang kanato nga makabalik nga luwas ngadto Kaniya (tan-awa sa Doktrina ug mga Pakigsaad 82:2–9).
Ang Espiritu Santo mitandog kanako ug mitabang kanako nga masayud nga kini tinuod.
Serge P., Île-de-France, France