“Kev Txhawb Pab Los ntawm lub Koom Txoos tej Yam Ntxim Saib Ntxim Ua,” Liahona, Xya Hli Ntuj 2020
Daim duab txog cov tub hluas tsa lub tsev pheeb suab los ntawm Bud Corkin; daim duab txog ib tug ntxhais hluas tso tais rau lub rooj los ntawm Sherie Price McFarland; duab sab tom qab yog los ntawm Getty Images
Tej Ntsiab Cai txog Kev Txhawb Pab, Xya Hli Ntuj 2020
Kev Txhawb Pab Los ntawm lub Koom Txoos tej Yam Ntxim Saib Ntxim Ua
Tus kws kho ntawv cov lus cim: Tsab ntawv no los twb tsim ua ntej phaum mob COVID-19. Tej lus uas hais nram qab no los ib txhia siv tsis tau thaum peb sib nrug nyias nyob nyias tiam sis koj siv tau thaum twg peb rov qab muaj lub Koom Txoos tej kev sib ntsib thiab tej yam ntxim saib ntxim ua. Yog tias yuav tsum hloov tej no, ces cia li hloov raws li tej lus qhia los ntawm lub Koom Txoos thiab tsoom fwv.
Ib txoj kev uas peb yuav txhawb pab peb cov mej zeej hauv pawg ntseeg, cov neeg zej zog, thiab phooj ywg yog dhau los ntawm lub Koom Txoos tej yam ntxim saib ntxim ua. Txawm nej npaj ua ib yam ntxim saib ntxim ua raws li tej yam uas ib tug uas koj txhawb pab nyiam los sis koj caw lawv koom nrog koj ua tej yam pab lwm tus, ib pawg ntseeg, ceg txheem ntseeg, los sis ntau ceg txheem ntseeg tej yam ntxim saib ntxim ua yeej yuav pab cov mej zeej koom siab koom ntsws thiab yuav txhawb lawv lub dag zog.
Lub Koom Txoos tej yam ntxim saib ntxim ua kuj yuav qhib kev rau koj txhawb pab lwm tus. Piv txwv hais tias, lub Koom Txoos tej yam ntxim saib ntxim ua ua rau yus muaj cib fim koom ua hauj lwm pab lwm tus thiab ua rau neeg zej zog sib raug zoo. Lub Koom Txoos tej yam ntxim saib ntxim ua kuj ua rau yus muaj cib fim pab cov mej zeej ntawm lub Koom Txoos uas tsis tshua muab siab rau ntseeg thiab ua phooj ywg nrog cov phooj ywg uas teev ntuj txawv peb los sis cov uas tsis ntseeg ntuj.
Qhov uas yus thov neeg coob tuaj koom tej yam ntxim siab ntxim ua hauv lub Koom Txoos yeej tsim ib lub cib fim rau tus Tswv foom koob hmoov thiab txhawb nqa peb pawg ntseeg thiab ceg ntseeg thiab peb tej zej zog.
Kev Sib Raug Zoo
Twb yuav txog lub caij no no, thiab David Dickson tsis tau paub nws yuav ua li cas pab nws tsev neeg kom sov so.
David, nws tus poj niam, thiab ob tug ntxhais nyuam qhuav tsiv tsev los nyob hauv lub zos Fredonia, Arizona, Teb Chaws Amelikas, yog tiaj siab puam uas muaj tej pob tsuas liab, tej nroj tsuag, thiab tej ntoo ntsuab tas niaj xyoo.
Lub tsev uas tsev neeg Dickson tau yuav los tsuas muaj ib lub qhov cub hlawv taws kom lub tsev thiaj sov sov. David tau kawm sai sai hais tias nws yuav tsum khaws cov ntoo taws vim tias thaum lub caij no no hauv lub zos Fredonia ntawd muaj daus thiab dej khov.
“Kuv tsis tau muaj ntoo taws, tsis muaj ib rab kaw thiab kuv yeej tsis paub siv ib rab kaw hlo li!” David hais tias. “Kuv tsis tau paub tias kuv yuav ua li cas.”
Pawg ntseeg cov mej zeej ib txhia nug David seb nws tsev neeg puas muaj ntoo txaus kom dhau lub caij no no. David hais tias, “Tsis ntev ces lawv txawm pom tias kuv tsis muaj txaus. Ces pawg txwj laug hais tias lawv mam li pab kuv sau cov ntoo. Kuv ris lawv txiaj heev, es kuv thiaj li txaus siab cia lawv pab.”
David kawm tias txoj kev mus khaws ntoo taws yeej zoo li lwm yam ntxim saib ntxim ua uas pawg ntseeg tau npaj zoo ua. Muaj ib hnub Saturday sawv ntxov, David, pawg txwj laug, thiab lwm tus mej zeej tau mus rau pem roob nyob hauv lawv tej tsheb loj thiab lub thawv rau tsheb cab.
David hais tias, “Peb siv ib nrab hnub xwb, es vim lawv paub ua thiab muaj tej rab kaw zoo, cov mej zeej twb pab kuv tsev neeg tau ib pawg ntoo uas tsis tas mus txog ob lub caij nov no tiav lawm. Qhov tseem ceeb ntxiv, lawv qhia kuv txhua yam kuv yuav tsum paub kom khaws cov ntoo taws kuv tus kheej. Thaum txog lub sij hawm kuv tsiv tsev tawm mus Fredonia lawm, kuv paub siv rab kaw, thiab kuv twb pab thaum pawg ntseeg mus pab lwm tus khaws ntoo taws ntau zaus.”
Tej yam ntxim saib ntxim ua li no yeej pab cov mej zeej ntawm lub Koom Txoos sib raug zoo es kuj pab txhua tus hauv zej zog sib raug zoo ib yam thiab.
David hais tias, “Kuv nco txog ib tug poj niam uas tsis yog lub Koom Txoos tus mej zeej, uas yog nyuam qhuav tsiv tsev rau cheeb tsam no. Nws tsis muaj ntoo taws nws thiaj li tshem tej daim los ntawm nws lub tsev kom thiaj sov sov. Thaum peb kawm txog nws qhov teeb meem no, peb tau khaws cov ntoo taws txaus kom tas lub caij no no. Nws zoo siab kawg nws thiaj li tsis tshua hais tau lus.”
Tej kev txhawb pab hauv lub zos Fredonia ua rau txhua tus nyob nyab xeeb thiab sov sov thaum lub caij no no.
Ncav Tes Pab Lwm Tus
Thaum nws ua ntxhais txib hauv lub teb chaws Romania, Meg Yost thiab nws tus khub tau mus xyuas ib tsev neeg uas tsis tau tuaj koom lub koom txoos ntev lawm. Meg hais tias, “Tsev neeg Stanicas yog cov mej zeej ntawm lub Koom Txoos tau ntev lawm, thiab wb hlub lawv heev.”
Thaum lawv ceg ntseeg tau npaj rau ib yam ntxim saib ntxim ua, cov thawj coj txiav txim siab tias lawv yuav ua “Hmo Pioneer.” Hmo ntawd lawv yuav ua koob tsheej txog cov pioneer uas hla teb chaws Amelikas kom mus txog lub Hav Salt Lake. Ces lawv kuj yuav muaj cib fim qhuas cov pioneer hauv lub Koom Txoos nyob hauv Romania.
Meg hais tias, “Peb xav tias cov mej zeej yuav muaj cib fim ua tim khawv txog lawv txoj kev hloov siab los ntseeg thiab lawv tau pom lub Koom Txoos loj tuaj li cas nyob hauv Romania. Ua rau wb xav tias yuav tsum thov tsev neeg Stanica koom nrog peb ua. Wb tau caw lawv koom tes pab, thiab lawv zoo siab kawg!”
Thaum txog hmo yuav ua li ntawd, twb txog lub sij hawm yuav pib es tsev neeg Stanica tseem tsis tau tuaj.
Meg hais tias, “Peb tau txhawj hais tias lawv yuav tsis tuaj. Yuav luag tsis ncav, lawv tuaj txog lawm.” Tsev neeg Stanica tau ua tim khawv txog txoj moo zoo thiab lub Koom Txoos. Lawv tau muaj sij hawm sib tham nrog lwm tus mej zeej uas lawv tsis tau pom tau ntev.”
Ceg ntseeg cov mej zeej yeej zoo siab tos txais tsev neeg Stanica. Hnub Sunday tom qab ntawd, Meg zoo siab heev vim nws pom Viv Ncaus Stanica tuaj lub koom txoos.
“Ob peb hlis tom qab ntawd thaum kuv tuaj xyuas ceg ntseeg ntawd, nws tseem tuaj thiab!” Meg hais tias. “Kuv xav tias qhov uas nws muaj cib fim hais lus tim khawv thiab zoo li lwm tus hauv ceg ntseeg xav tau lawv es qhov ntawd twb pab nws heev.”
4 lub Tswv Yim rau Kev Txhawb Pab Los ntawm lub Koom Txoos tej Yam Ntxim Saib Ntxim Ua
-
Npaj tej yam ntxim saib ntxim ua uas pab lwm tus: Tej yam ntxim saib ntxim ua los yeej yuav pab ntau tus neeg. Yus npaj tau kom pab ib tug neeg los sis ib pawg neeg. Yeej yuav tsum pab txhua tus uas koom ua ke, tsis hais lawv yuav tsum sib paub zoo dua ntxiv, kawm ntxiv txog txoj moo zoo, los sis muaj tus Ntsuj Plig ntxiv.
-
Caw txhua tus: Thaum koj npaj tej yam ntxim saib ntxim ua, cia li siv zog caw cov uas yuav tau zoo yog lawv koom nrog nej. Cia li xav txog cov mej zeej tshiab, cov mej zeej uas tsis tshua muab siab rau ntseeg, cov uas tsis tau sib yuav, cov uas xiam hoob qhab, thiab cov uas ntseeg txawv peb. Cia li cas lawv thaum koj xav txog tej yam zoo uas lawv yuav txais, thiab hais rau lawv tias koj xav xav kom lawv tuaj.
-
Pab lawv koom tes ua tej yam zoo: Cov uas koj caw yeej yuav tau zoo ntxiv los ntawm tej yam ntxim saib ntxim ua yog tias lawv muaj cib fim koom tes pab. Ib yam uas koj ua tau kom lawv xav koom tes yog hais kom lawv siv lawv tej txuj ci, tej txiaj ntsim, thiab tej yam lawv txawj ua nyob hauv yam ntxim saib ntxim ua ntawd.
-
Hais nyob zoo rau sawv daws: Yog koj cov phooj ywg tuaj rau ib yam ntxim saib ntxim ua, ua txhua yam koj ua tau kom lawv txaus siab. Ib yam li ntawd, yog koj pom neeg uas koj tsis paub, cia li ua siab zoo thiab hais nyob zoo rau lawv thiab!
© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, July 2020. Hmong. 16989 295