“Ministering babaen kadagiti Aktibidad iti Simbaan,” Liahona, Hulio 2020
Ladawan dagiti babbarito a mangipatpatakder iti tolda ni Bud Corkin; ladawan ti balasitang a mangisagsagana iti lamisaan ni Sherie Price McFarland; background manipud iti Getty Images
Dagiti Pagbatayan iti Ministering, Hulio 2020
Ministering babaen kadagiti Aktibidad iti Simbaan
Editor’s note: Naaramid daytoy nga artikulo sakbay ti COVID-19 pandemic. Sumagmamano kadagiti singasing iti baba ti saanton a maaramat kabayatan ti panawen ti social distancing ngem maaramatdanto apaman a maisubli dagiti miting ken aktibidad iti Simbaan. No kasapulan, ibagayyo koma dagitoy a singasing a mayannurot kadagiti agdama a pangiwanwan iti Simbaan ken gobierno.
Maysa a wagas a makapagministertayo kadagiti padatayo a miembro iti ward, kaarruba, ken gagayyem ket babaen dagiti aktibidad iti Simbaan. Agplanoka man iti maysa nga aktibidad maipanggep kadagiti kasapulan wenno interes ti maysa a tao nga iministermo wenno awisem ida a makiraman kadagiti aktibidad wenno gundaway iti serbisio para iti dadduma, dagiti aktibidad iti ward, stake, wenno multistake level ket makaited kadagiti napateg ken makaay-ayo a wagas a pangpadur-as iti panagkaykaysa ken mangpapigsa kadagiti miembro.
Dagiti aktibidad iti Simbaan ket makalukat pay iti ridaw ti adu a gundaway nga agminister. Kas pagarigan, makaited dagiti aktibidad iti Simbaan kadagiti gundaway a makiraman kadagiti proyekto iti serbisio a mangbendision kadagiti dadduma ken mangbangon kadagiti pagnanaigan iti komunidad. Mabalin pay a dagiti aktibidad iti Simbaan ti gundaway a mangtulong kadagiti saan unay nga aktibo a miembro ti Simbaan ken kadagiti gagayyem iti sabali a pammati wenno gagayyem nga awan timpuyogda iti relihion.
Ti panagiraman iti adu a tattao kadagiti aktibidad iti Simbaan ket mangparnuay iti gundaway a pangbendisionan ken pangpapigsaan ti Apo kadagiti ward ken branchtayo, kaarrubatayo, ken komunidadtayo.
Panangbuangay kadagiti Nasayaat a Pannakilangen
Umay ti panawen ti lamiis, ket saan nga ammo ni David Dickson no kasano a pangtalinaedenna a di malammin ti pamiliana.
Kaak-akar laeng ni David, ti asawana, ken dua nga annakna a babbai iti siudad ti Fredonia, Arizona, USA, maysa a high-desert landscape a napalawlawan kadagiti nangayed a nalabaga a dalisdis, sagebrush, ken evergreen.
Ti pagtaengan nga inupaan dagiti Dickson nagpannuray iti dalikan a magangtan iti kayo kas kangrunaan a pagtaudan ti pudot. Alisto a naadal ni David a ti panangurnong iti kayo a pagsungrod ket kasapulan a paglaingan gapu ta napno iti niebe ken yelo dagiti panawen ti lamiis iti Fredonia.
“Awananak iti ania man a kayo a pagsungrod wenno ragadi [chainsaw] wenno pannakaammo no kasano ti panangusar iti maysa!” Kuna ni David. “Diak ammo no ania ti aramidek.”
Sinasudsod ti sumagmamano a miembro ti ward ken ni David no adda umdas a kayo a pagtungo ti pamiliana a pagsarkenanda iti panawen ti lamiis. “Saan a nabayag tapno maamirisda nga awananak,” kuna ni David. Di nabayag indiaya ti elders quorum a tulonganda a mangurnong iti kayo a pagsungrod. Napalaus iti panagyamanko, inawatko ti diayada a tulong.”
Dagus a naammuan ti David a daytoy a biahe iti panangurnong iti kayo ket gagangay iti adu a naplano a nasayaat, naurnos a nasayaat, ken nadar-ayan a nasayaat nga aktibidad iti ward. Maysa a bigat ti Sabado, nagturong ni David, ti elders quorum, ken dadduma pay a miembro ti ward iti kabambantayan a nakaluganda iti trak ken trailer.
“Iti maysa a malem, agyamanak kadagiti ramitda ken ti pannakaammoda, nangted dagiti miembro ti ward iti pamiliak iti sangasalansan a kayo a nagpaut nga inusarmi iti dua a panawen ti lamiis,” kuna ni David. “Napatpateg pay, nasuruannak iti amin a banag a nasken a maammuak maipapan iti panangurnong iti kayo iti bukodko. Idi panawenen a pumanawak iti Fredonia, ammok no kasano ti mangiggem iti ragadi [chainsaw], ken nakatulongak iti ad-adu pay kadagiti aktibidad iti ward iti panangummong iti kayo a mabalinko a bilangen.”
Dagiti kasta nga aktibidad ti saan laeng a nangbangon kadagiti nasayaat a pannakilangen kadagiti miembro ti Simbaan ngem nangbangon pay kadagiti nasayaat a pannakilangen iti tunggal maysa iti komunidad.
“Malagipko ti maysa a babai, saan a miembro ti Simbaan, a baro iti lugar,” kuna ni David. “Napilitan isuna a mangpuor iti entrepanio ti kayo iti pagtaenganna a pagpapudotna. Apaman a naammuanmi ti pakaseknanna, siniguradomi nga adda umdas a kayo a pagsungrodna a mangsarked kenkuana iti unos ti panawen ti lamiis. Kasta unay ti panagyamanna a dumani saan a makapagsao.”
Dagiti aramid iti ministering iti Fredonia ti nangsigurado a nagtalinaed a natalged ken naimeng ti tunggal maysa iti unos ti panawen ti lamiis.
Panangtulong kadagiti Dadduma
Kabayatan ti panagserbina iti mision in Romania, masansan a bisitaen ni Meg Yost ken ti kompanionna ti maysa a pamilia a saan a nakimismisa iti nabayag a panawen. “Maibilang dagiti Stanica kadagiti immuna a miembro ti Simbaan iti Romania,” kuna ni Meg, “ken ay-ayatenmi ida.”
Idi dumteng ti panawen nga agplano ken mangurnos iti maysa nga aktibidad iti branch, inkeddeng dagiti lider a maaddaan ti branch iti maysa a “Pioneer Night.” Daytoy ti maysa a sardam a panangrambak kadagiti natured a pioneer wenno nagkauna a kameng ti simbaan a nangballasiw iti Estados Unidos a mapan iti Salt Lake Valley. Daytoy pay ti gundaway a mangted pammadayaw kadagiti pioneer ti Simbaan iti Romania.
“Napanunotmi a daytoy ti naindaklan a wagas para iti sumagmamano a miembro a mangiburay iti pammaneknekda maipapan iti kumbersionda ken no kasano a nakitadan a dumur-as ti Simbaan iti Romania,” kuna ni Meg. “Dagus a napanunotmi a nasken a mairaman ti pamilia Stanica. Inawismi ida a makiraman, ket naragsakanda!”
Iti sardam ti aktibidad, saan pay a simmangpet dagiti Stanica iti orasen a mangrugi.
“Nagdanagkami amangan no dida umay,” nalagip ni Meg. “Ngem apagisu ti sangpetda, simrekda iti ridaw. Nagiburay dagiti Stanica iti napintas a pammaneknek maipapan iti ebanghelio ken iti Simbaan. Nakilinnangenda pay iti dadduma a miembro a saan a nagpakpakita iti nabayag a panawen.”
Nakialamano dagiti miembro ti branch ket nabara a pinasangbayda dagiti Stanica. Iti sumaruno a Domingo, siraragsak a nasorpresa ni Meg a nakakita ken ni Sister Stanica iti simbaan.
“Idi binisitak ti branch sumagmamano a bulan kalpasanna, um-umay pay laeng isuna!” Kuna ni Meg. “Panagkunak ti gundaway a mangiburay iti pammaneknekna ken makarikna a nairaman ken kasapulan isuna iti branch ti talaga a nakatulong kenkuana.”
4 a Kapanunotan para iti Ministering babaen kadagiti Aktibidad iti Simbaan
-
Mangplano kadagiti aktibidad a mangipaay kadagiti kasapulan: Dagiti aktibidad ti naindaklan a wagas a pangipaayan iti adu a nadumaduma a kasapulan. Mabalin a maplanoda a mangipaay kadagiti kangrunaan a kasapulan ti maysa a tao wenno grupo. Nasken pay a maipaayda dagiti kasapulan dagiti makiraman, dayta man a kasapulan ket panaggiinnammo a nasaysayaat, panagsursuro iti ad-adu pay maipapan iti ebanghelio, wenno panangrikna iti Espiritu.
-
Mangawis iti tunggal maysa: Bayat ti panangplanom kadagiti aktibidad, ipangpangruna ti panangawis kadagiti mairanudto iti pannakiraman. Laglagipen dagiti baro a miembro, saan unay nga aktibo a miembro, agtutubo, babbaro/babbalasang, tattao nga addaan pagkurangan, ken tattao a sabali ti pammatina. Mangawis a pampanunotem dagiti magusgustuanda unay, ket ipeksam no kasano ti panagayatmo iti yuumayda.
-
Mangyallukoy iti pannakiraman: Adunto ti magun-od dagiti awisem kadagiti aktibidad no addaanda iti gundaway a makiraman. Maysa a wagas a pangyallukoy iti pannakiraman ket panangpausar kadagiti indibidual dagiti sagut, paglaingan, ken talentoda kabayatan ti aktibidad.
-
Nabara a mangpasangbay iti tunggal maysa: No dumar-ay dagiti gagayyemmo iti maysa nga aktibidad, aramidem ti amin a kabaelam a mangparikna kadakuada a nabara a mapasangbayda. Kasta met a, no makitam dagiti tao a saanmo nga am-ammo, makigayyemka ket nabara a pasangbayem ida!
© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, July 2020. Ilokano. 16989 864