“Oldingel lokiu Omilil m ea Omeruul er a Ikelesia,” Liahona, Ongeuid el buil 2020
Siasing er a rengeasek el sechal lomekedechor er a tento lulai er ngii a Bud Corkin; me a siasing er a ngalek el redil el mengedmokl er a tebel lulai er ngii a Sherie Price McFarland; e a background a ml er a Getty Images.
Osisechakl er a Odingel, Ongeuid el buil 2020
Odingel lokiu Omilil me a omeruul er a Ikelesia
Tekingel a milluches: Tial klumech a mlekedmokl ruchei er a secherel a COVID-19. A bebil er a tekoi el beldukl e riou a diak lusbechall er chelechal taem el kired el hacheroid eng di mo usbechall sel luut lomuchel a miting me a omilil e ra Ikelesia. A lusbechall, e mruul aika el tekoi el mo oltirakl a teletael me a llechul a Ikelesia me a kabelment.
A tara rolel e kede oldingel er a rechedal a ward er kid, me a retonari er kid, me a rsechelid a okiu omilil me a omeruul er a Ikelesia. A molib omilil me a omeruul lultuil er a ngelsengesel me a soal a chad el moldingel er ngii a lechub e ke siotai er ngii el mei er a ika lomilil a lechub eng techall er a omesiou el kirir a rebebil, e a omilil me a omeruul er a ward, stake, a lechub a betok el stake el dmak a sebechel kmal klou a relii el mekdebechii a kltalreng e smisicheterir a rechedal a ikelesia.
A omilil me a omeruul er a Ikelesia a dirrek el sebechel mok a betok el techall er a odingel. Okesiul tiang, a omilil er a Ikelesia a sebechel luchul a techall el kirel omesiou el ngii a mo omekngeltengat er a rebebil e toketekii a ungil deleuill er a beluu. A omilil er a Ikelesia a dirrek el sebechel techall el bo dosiou er tirkel diak el sal mesisiich el chedal a Ikelesia me a dirrek el resechelid er a kakerous el klechelid a lechub a rsechelid el kuk diak a klechelid er tir.
Sel dongesuseu er a rebetok el chad el mei er a omilil er a Ikelesia a msa techall a Rubak el mo omekngeltengat e melisiich a ward me a branch, me a buai, me a beluu el dengarngii.
Meleketek er a Ungil Deleuill
Ng merema temel a kelekolt, e a David Dickson a dimlak lodengei el kmo ng mekerang e a telungalek er ngii a di ungil beserir.
A David, me a bechil, me a reteru el ngelekir el redil a dirk millukl el mo er a beluu er a Fredonia, Arizona, er a Merikel, el chelelluut el basio el di risois, me a mekekerei el chudel, me a ngas a ngarngii el basio.
Tial blai lulleng er ngii a re Dicksons a dousbech el mengumel a ngau el mengeald er a blai. A David a mlo medengei el kmo ng kirel mo meduch lomngar a iidungel le taem er a kelekolt er a Fredonia a okrokr el snow me a ice.
“Ng dimlak a idengelek a lechub el chainsaw er ngak a lechub e ble kudengei el kmo ng mekera dousbech!” Ng melekoi a David. “Ng dimlak kudengei el kmo ak mo mekerang.”
A rebebil er a rechedal a ward a uleker er a David el kmo ngarngii a klebech el idengelir er a taem er a kelekolt. “Te mlo medengei el kmo ng dimlak a klebech el idengelam,” ng melekoi a David. “A chelechad er a re elders a mle sorir el ngosukak el kudmokl a idengelek. Ng kmal mlo ungil a renguk e mereng a saul, e kilengei er a uldeseuir.”
A David a mlo medengei el kmo tial teletael lomngar a iidungel a mle kldmokl el moktek, kldmokl el teletael, e ulterekokl lomeruul er a rechedal a ward er ngii. A tal Sabadong er a tutau, e a David, me a chelechad er a elders, me a rebebil er a rechedal a ward a tilobed el ngara torak me a trailer el bedul aike risois.
“Ng di mle tedobech el sils, el dongu lullab me a remeduch el chad, er a ward a kildmokl a iidungel el ngilsukemam er a erul taem er a kelekolt,” ng melekoi a David. “E ssel ngaruchei klou a belkul, e ak siluub aikel kirek el mo medengei el kirel a tekoi er a omngar a iidungel. Sera bocha el temek el kuk melukl er a beluu er a Fredonia, e ak mla mo meduch lorreked er a chainsaw, meng mlo sebechek el kuk olngeseu era ward lomngar a iidungel.”
Aikaikid lomeruul er a ward a diak el teketekii a ungil deleuill er a delongelir a rechedal a Ikelesia ng dirrek el mekdebechii a ungil deleuill er a rokui el chad er a beluu.
“Ak lotkii a tal mechas, el diak el chedal a Ikelesia, el dirk millukl el mei er tial basio,” ng melekoi a David. “Ng di mirrael mo olsiu a tebtebil a kerrekar me luchul el di el mekekeald a blil. Sera ki mrenges chisel, e a ki kildmokl a klebeche el iidungel el kirel er a taem er a kelekolt. Ng kmal iimis el ngara omereng el saul meng mlo diak el sal sebechel mengedecheduch.”
A teletael er a odingel er a beluu er a Fredonia a mle uchul e a rebek el chad a selbechakl er a kelekolt.
Mo Olngeseu er a Rebebil
Sera lengara mission er a beluu er a Romania, e a Meg Yost, me a kldemel a mle blehcoel loldingel er a tal telungalek el meketeketang el diak el ngara ikelesia. “Tirkal Stanicas a tara meketeketang el chedal a Ikelesia er a Romanis,” ng melekoi a Meg,“e kmal betik a rengmam er tir.”
A bocha el temel omelib me a kedmeklel omilil er a branch, e a roungerachel a tilbir el kmo ng mo “Pioneer Night.” Tia kmal ungil taem el doudkeu er tirkel mle meduch a rengrir uchelel a ikelesia el tir a milleboteb er a beluu er a Merikel el mei er a Salt Lake Valley. Ng dirrek el kmal ungil techall el doudkeu er tirkel uchelel a Ikelesia er a beluu er a Romania.
“Aki ulemdasou el kmo ng kmal ungil techall el bebil er a rechedal a ikelesia a mo ouchais a chisel a beltir me a osengir el kirel a teketekel a Ikelesia er a beluu er a Romania,” ng melekoi a Meg. “Aki mle mereched lomdasou el kmo a telungalek er a Stanicas a kirir el mei. Aki ulengit er tir, meng kmal mlo ungil a rengrir!”
Sel kesus er a temel tial omilil, e tirkal Stanicas a dirkak el be el dum e mocha taem el ki momuchel.
“Ng mlo suebek a rengmam el kmo ng locha diak el mei,” ng melekoi a Meg. “Eng di di mle telkib, e te dumiang er a tuangel. A re Stanicas a uluchais er a klebokel klaumera er tir el kirel ebangkelio me a Ikelesia. Te dirrek el mlo kaodengei tir me a rebebil er a rechedal a ikelesia el meketeketang el diak el kaseues.”
A rechedal a branch a kmal luledkeu er tirkal Stanicas. A bocha le Sandei, e a Meg a mlo mechas a rengul er a lesa Sister Stanica er a ikelesia.
“Sera kluut el mo oldingel er tial branch er a sesei el buil ruriul, eng millemolem lomais el mei!” Ng melekoi a Meg. “A kumdasou e a techall lengiluu el mo ouchais er a klaumera er ngii e omelchesiu el ngarngii a relii er a branch a kmal ngilseuir.”
Kleua el Tekoi el kirel Odingel lokiu Omilil me a Omeruul er a Ikelesia
-
Mkedmokl omeruul el ngii a ngarngii a relii: A omeruul a bedochel rael er a kakerous el ngesou. Ng sebechel mekedmokl el kirel a usbechellel a dersta el chad a lechub a chelechad. Ng dirrek el kirel ngosuterir tirkel tir a ngara omeruul, a di bo lungil kaodengei, a lechub e te mesuub el kirel ebangkelio, a lechub e te kuk di mo melchesuar Chedaol Reng.
-
Siotai er a rokui el chad:Me sel molib omilil, e mosiik rolel el siotai er tirkel tir a ngarngii a lesubii sel bol ngara omeruul. Molatk er a rebeches el chedal a ikelesia, me tirkel diak el blechoel mei er a ikelesia, rengeasek, remesobil, me tirkel sechudel, me a dirrek tirkel kuk ngodech a klechelid er tir. Msiotai er tir lultuil er a ikel sorir el meruul, e mochotii el kmo ko molsingch el kirir el mo teloi er kemiu.
-
Mengelechel er tir el mo ngara omeruul: Tirkel msiotai er tir a sebechel ngarngii a lenguu alsekum e ko mesterir a techall el mo ngara omeruul. A tara rolel e a rechad a mo ngara omeruul a sel mousbech a sengk, duch, me a kldachelbil a dersta el chad sel mdak el ngara omilil.
-
Oudkeu er a rokui el chad: Alsekum a rsechelim a ngara omilil er a ikelesia, e molasm el rulterir el mo mimokl e ungil a rengrir. Osisiu, alsekum e ke mesterir a rechad el diak modengelterir, bo mongedecheduch er tir e dirrek el moudkeu er tir!
© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Osisechakl er a Odingel, July 2020. Palauan. 16989 881