2020
Wie Papah nan Mwekid kan en Mwomwohdiso
Sulahi 2020

“Wie Papah nan Mwekid kan en Mwomwohdiso,” Liahona, Suhlai 2020

doadoahk en papah

Kilel en mwahnakapw kan arail kakauwada ihmw likou ehu sang Bud Corkin; kilel en serepein men koaskoasone tehpel ehu sang Price McFarland; sansal en mwuri sang Getty Images

Padahk en Papah, Suhlai 2020

Wie Papah nan Mwekid kan en Mwomwohdiso

En Editor ireh kan: Padahk pwoatet wiawihda mwohn ikiparpeseng en soumwahu COVID-19. Ekei irehn kehkehlik me sansal pah sohte pahn doadoahk ni ansoun kahpwal pwukat ahpw pahn uhd doadoahk ansou me mihting oh mwekid kan en Mwomwohdiso pahn pwurehng wiawi. Ma mie anahnepe, menlau doadoahngki ire pwukat nin duwen koasondi kan en Mwomwohdiso oh wehi nan ansou pwukat.

Ehu ahl me kitail kak papah tohn atail ward, mehn mpatail kan, oh kempoakepatail kan iei nan mwekid kan en Mwomwohdiso. Mendahte ma kumwail pilahne ehu mwekid me irail kan me kumwail kin papah anahne de pereniki de kumwail luke irail en iang towehda mwekid de doadoahk en papah ong mehteikan, mwekid kan en ward, steik, de steik kei kak kihda ansou mwahu en kemweit oh kakairada miniminpene oh kakehlaka toweh kan.

Mwekid kan en Mwomwohdiso pil kin langahda wenihmw ong ansou mwahu kan en papah. Karasepe, mwekid kan en Mwomwohdiso kak kihda ansou mwahu kan en iang wia doadoak en papah kan me kin kapaiahda mehteikan oh kakairada ehupene nan wasahn kouson kan. Mwekid kan en Mwomwohdiso pil kin kak wia ehu ansou mwahu en tuhong toweh kan me solahr iang sarawi oh kempoakepamwail kan me ieiang ehu palien lamalam tohrohr de sohta kin iang sarawi.

Kahrehdo aramas tohto nan mwekid kan en Mwomwohdiso kin kihda ansou mwahu ong Kauno en ketin kapaiada oh kakehlaka atail ward oh branch kan, mehn mpatail kan, oh atail wasahn kouson kan.

Kauwada Ehupene Mehlel Kan

Ansoun kepeu samwsamwodohr, oh David Dickson sehse mwomwen eh pahn kak kakarakarih tohn ah peneinei.

David, ah pwoudo, oh neira serepein riemen apwtehn keseula nan kahnihmw en Fredonia, Arizona, USA, wasa me ileile duwehte sahpwtehn ehu mihmi nan pwungen nahna weitata lingan kei, dihpw oh tuhke pohn tehndipw kei.

Ihmw me peneinei en Dickson kouson loale kin doadohngki mehn kakarakar sidohp ehu me doadoahngki tuwi. David mwadangete diarada me weseituwi wia mehkoat kesempwal pwehki Fredonia kin direkihla sino oh ais ni ansoun kepeu.

“Sohte aht tuwi de ehu misihn en rasaras oh I pil sehse mwomwen ei pahn doadoahngki misihno!” David nda. “I sehse dahme I pahn wia.”

Ekei tohn wardo peidek rehn David ma mie en ah peneineio tuwi me itar ong ansoun kepeuo. “E sohte werei arail diarada me sohte aht tuwi,” David nda. “Pwihn en elder ko mwadangete nda me irail pahn sewese ie wesei tuwi. Direkihla kalahngan, I pwungkihla arail sawaso.”

David mwadangete diarada me mwekid en wesei tuwio duwehtehte mwekid tohto kan en wardo me kin pilahnda mwahu, pweida, oh tohto me kin iang. Ni menseng en ehu Rahnkaunopo, David, tohn pwihn en elder ko, oh towe teikan en wardo mwesel lahng nan nahna ko pohn kahng en pickup oh trailer kei.

“Kalahngan pwehki dipwisoun doadoahk oh semen en tohn wardo, nan irair en mwurin souwas ehute, irail weseda uwen tuwi me se doadoahngkihki nan ansoun kepeu riau,” David nda. “Ahpw ihme keieu kesempwal, I esehla wiepen wesei tuwi koaros me I anahne ese pwe I en kak pein weseda ahi tuwi. Lel ni ansou me I mweselsang Fredonia, I eselahr doadoahngki misihn en rasaras, oh I pil iangehr mwekid en wesei tuwi tohto me I sohte kak wadek.”

Soangen mwekid en ward pwukat sohte kin kakairadahte miniminpene nan pwungen toweh kan ahpw e pil kin kakairada miniminpenehn aramas koaros nan wasahn kouson akan.

“I tamataman emen lih me sohte wia tohn Mwomwohdiso, me apwtehn lella wasao,” David nda. “Liho tepda doadaohngki did en imweho pwehn wiahki ah tuwi pwehn kakarakari ih. Ni aht esehda en liho ah kahpwalo, se wesehdo ah tuwi me itar en doadoahngki nan irair en ansoun kepeuo. Uwen en liho ah kaping kalahngan e kereniong sohla kak lokaia.”

Doadoahk en papah kan nan Fredonia kahrehda aramas koaros nsenamwahu nan irair en ansoun kepeuo.

Pohnese Mehteikan

Ni eh wiewia ah misin nan Romania, Meg Yost oh iengeo kin pwarek ehu peneinei me wereilahr arail sohte iang sarawi. “Peneinei en Stanica wia tepin toweh kan me iangala Mwomwohdisou nan Romania,” Meg nda, “oh se poakehng irail.”

Ni ansou me tohn brancho pilahnehda irail en wia ehu mwekid, sounkaweid kan koasonehdi me brancho pahn wia ehu “Pioneer Night.” Met pahn wia ehu soutik me irail pahn kawauwih en towe eimah kei arail kotehla United States pwehn lella nan Wahu en Salt Lake. E pil pahn wia ehu ansou mwahu en kauwauwih irail tepin toweh kan en Mwomwohdisou nan Romania.

“Se medewe me e pahn wia ehu ansou mwahu ong ekei towehkan en kadehdeda mwomwen arail weliakapwala oh mwomwen arail kilang keirdahn Mwomwohdisou nan Romania,” Meg nda. “Se mwadangete medewe me peneinei en Stanica anahne iang. Se luke irail en iang, oh irail inenen perenkihda!”

Ni pwong en mwekido, peneinei en Stanica ko saikinte lella wasa ansou me mwekido pahn tepda.

“Se salohda pwe irail deh sohte iang,” Meg katamanda. “Ahpw lel ni ansoun tepo, peneineio pidelongala nan wenihmwo. Peneinei en Stanica ko ehukihda kadehde lingan ehu duwen rongamwahuo oh Mwomwohdisou. Irail pil kapehseiong towehkan me irail sohla kilangki ansou reirei.”

Tohn brancho kapapeseng pehrail kan oh kasamwo peneinei en Stanica ko. Rahn Sarawihn mwurio, Meg perenkihda eh kilangada Sister Stanica nan sarawi.

“Ni ahi pwarek brancho sounpwong kei mwuri, liho ieiangete sarawi!” Meg nda. “I medewe me pwehki en liho eh iang wia ah kadehde oh pepehm me e ieiang oh mie anahnepe nan brancho inenen sewesehda liho.”

Madamadau 4 ong Wie Papah nan Mwekid kan en Mwomwohdiso

  • Koasonehdi mwekid kan me kin pahsan anahn kan: Mwekid kan wia ehu wiepe kaselel pwehn pahsan anahn tohto wekpeseng kan. Mwekid kan kak koasondi pwehn apwalih anahn kan en emen aramas de ehu pwihn. Mwekid kan pil kak apwalihala anahn kan en irail me ieiang mwekido, me duwehte anahn en pehseiongla mehteikan, esehla rongamwahuo, de ale loiloi tikitik kan en Ngeno.

  • Luke koaros: Ni amwail pilahne mwekid kan, kumwail anahne luke koaros me pahn ale kapai sang arail iang wia mwekid kan. Tamataman towe kapw kan, towe me solahr iang sarawi, me pwulepwul kan, me kiripw mah kan, me mia arail anahn tohrohr kan, oh tohn palien lamalam teikan. Luke irail ni amwail loalloale dahme irail keieu pereniki, oh padahkihong irail uwen amwail men irail en kohdo.

  • Kangoange irail en iang: Irail me kumwail luke kan pahn ale kapai sang mwekidko ma irail ahneki ansou mwahu en iang. Ehu wiepen kangoange irail en iang iei en kin lukehkin irail en kin doadoahngki arail kisakis kan, me irail samani wia oh arail talent kan nan mwekido.

  • Kasamwo koaros: Ma kempoakepamwail kan iang ehu mwekido, wia uwen amwail kak pwe irail en pehm me kumwail kasamwo irail ni mehlel. Pil duwehte, ma kumwail kilang aramas me kumwail sehse, pil mwomw mwahu oh kasamwo irail ni mehlel!

© 2020 sang Intellectual Reserve, Inc. Kolokol pwuhng koaros. Intingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwehpen Padahk en Papah, Suhlai 2020.Pohnpeian. 16989 885