Mga Hulagway sa Hugot nga Pagtuo
Abner Garcia ug Midalys Soto
Arecibo, Puerto Rico
Human ang Bagyong Maria miguba sa Puerto Rico niadtong Septyembre 2017, sila si Abner ug Midalys mibalhin ngadto sa Florida, USA. Sa wala madugay nakadawat sila og pag-aghat diha sa templo nga mobalik ngadto sa Puerto Rico ug mag-abli og usa ka barberohan.
Raul Sandoval, litratista (photographer)
Midalys
Lisud kadto pagkahuman sa Bagyong Maria nga miigo sa Puerto Rico. Bisan tuod og aduna kami pipila ka tubig ug pagkaon nga gipundo, wala kami kuryente o agas sa tubig.
Migamit kami og ulan sa paglaba sa among mga sinina ug sa pagkaligo. Kon mag-ulan, akong birahon ang among mga anak, ug managan sa gawas, ug moingon, “Dali, kaligo!”
Ang kinalisuran nga butang mao nga wala kami pamaagi nga makaistorya ang among pamilya, mga higala, o ang uban. Salamat nalang nga, ang usa ka silingan adunay generator ug mipaambit niini ngari kanamo aron makatawag kami sa among pamilya. Sa dihang mitawag kami sa among pamilya didto sa Florida, misulti sila namo sa pag-adto aron mopuyo uban kanila.
Didto mi sa Florida duha ka semana human sa bagyo. Nag-eskwela ko og nursing nianang higayuna ug mahimong makapadayon sa akong pagtuon didto. Apan gumikan kay ang igsoong lalaki ni Abner usa lang ang sakyanan, lisud alang namo ang paglibot-libot ug kang Abner sa pagpangita og trabaho. Gusto kami nga motrabaho ug mangita og paagi aron magpabilin.
Nakahunahuna ko nga magpuyo sa Florida samtang si Abner mobalik ngadto sa Puerto Rico sa pagtrabaho. Sa dihang akong gisultihan ang usa ka higala sa akong plano, miingon siya, “Dili, usa kamo ka pamilya. Kinahanglan nga magkauban kamo sa pagpuyo.”
Nag-ampo ko nga makapuyo sa Florida, apan si Abner nag-ampo aron masayud sa husto nga dalan nga gusto sa Ginoo alang kanamo. Miadto kami sa templo aron magiyahan sa unsa gayud ang among angay nga buhaton. Nabati nako ang Espiritu nga kusog kaayo sulod sa templo nga kami kinahanglan nga mobalik sa Puerto Rico. Lisud kadto, apan mao ang among gibuhat. Mipadayon ko sa akong pagtuon, ug mihukom kami nga mag-abli og usa ka barberohan. Si Abner usa ka barbero.
Abner
Nakakita ko og gamay nga pwesto nga among maabangan alang sa among barberohan. Sa dihang ang tag-iya misulti nako sa kantidad sa abang, sobra kini sa unsay among maabut. Mihangyo ko kon mahimo ba niyang paubsan ang kantidad. Mitawag siya pagkataud-taud ug miingon, “gusto ko makahibalo si kinsa ang akong paabangon. Dad-a ang imong asawa aron ako siyang mahimamat.”
Midalys
Nag-ampo mi nga iyang makita nga kami mga maayong tawo. Human sa among pakigkita kaniya, miingon siya, “ang Dios nagtabang kaninyo. Dugay na nako ni nga puwesto. Daghang mga tawo ang mihangyo nga moabang niini, apan dili gayud husto ang akong pamati. Kusog akong gibati nga kamo mga maayong tawo.”
Iyang gipaubsan ang abang sulod sa tulo ka tuig. Nasurprisa ko. Iyang gisulti ang eksaktong mga pulong nga giampo sa akong bana ug nako.
Abner
Kami karon mas tunhay ug malinawon kaayo. Mokita mi og kwarta, ug napanalanginan kami.
Midalys
Ang ubang mga tawo dili maayo ang pagtratar ngadto kang Abner tungod kay siya usa ka miyembro sa Simbahan. Sila mosulti usab nga, “Dili ka angayng magpadagan og negosyo uban sa imong asawa.” Apan moingon ko nga, “Siyempre makahimo kaming duha niini!” Sa pagkatinuod, nahimo kining usa ka dakong oportunidad alang kanamong duha. Motabang siya nako sa balay ug sa mga anak, ug ako motabang niya sa pagdumala sa shop.
Ang Dios nahigugma ug naggiya kanamo. Ang pagbalik ngadto sa Puerto Rico mao ang husto nga butang alang sa among pamilya. Mao kini ang perpekto nga plano sa Langitnong Amahan alang kanamo.
Sila si Abner ug Midalys nagtan-aw sa ilang mga anak, sila si Jatziel ug Abnahia, nga nagdula. Mapasalamaton sila sa direksyon ug mga panalangin sa Ginoo alang sa ilang pamilya.
Ang tanan nalingaw sa usa ka makalingaw nga dula. Si Midalys mapasalamaton sa tambag sa iyang higala nga magpabilin nga magkauban ang iyang pamilya bisan pa man sa mga hagit sa trabaho human sa Bagyong Maria.
Alang nilang Abner ug Midalys, ang pagdumala sa barberohan nahimong dakong oportunidad alang kanila aron molambo sila isip magtiayon.