Usa ka Saad sa Pagkaayo ug sa Pagbugkos
Pinaagi sa pagkamatinud-anon sa ebanghelyo ug sa pagpangita sa among mga katigulangan, ang akong inahan ug ako napanalanginan sa mga paagi nga wala namo damha.
Paghulagway pinaagi ni Stephanie Hock
Sukad nabunyagan ko, nainteresado ko sa family history ug sa buhat sa templo. Ganahan ko sa ideya nga mabugkos ngadto sa akong pamilya sa kahangturan, apan wala ko sukad magtuo nga mahitabo kini tungod kay daghan sa mga sakop sa akong pamilya, lakip na ang akong amahan, nanlimbasug sa adiksyon sa ilimnong makahubog.
Nagtubo ko niana nga kahimtang, apan ang maayo nga tambag sa akong pinalanggang inahan nakatabang kanako sa pagdesisyon nga dili mosunod niana nga dalan. Nabunyagan siya usa ka tuig human nako.
Sa dihang nag-edad ko og 18, midesisyon ko sa pagserbisyo og misyon ug nakadawat og tawag sa pagserbisyo didto sa Arizona, USA. Mao kini ang usa sa labing nindot nga mga kasinatian sa akong kinabuhi. Sa dihang miuli ko, nadiskobrehan nako nga ang adiksyon sa akong amahan grabe na kaayo. Nakahinumdom ko sa pagpangutana kon ang akong pagserbisyo ba adunay bili kon ang kahimtang karon sa panimalay dili na gayud maayo.
Atol sa Abril 2018 nga kinatibuk-ang komperensya, nakadungog ko ni Elder Dale G. Renlund sa Korum sa Napulog Duha ka mga Apostoles miingon, “Kon inyong … makaplagan, mapundok, ug makonektar ang inyong pamilya … mamaayo kamo sa mga butang nga nagkinahanglang mamaayo.”1
Ang akong inahan nagpadayon sa pag-ampo, pagbasa sa mga kasulatan, ug pagtinguha og inspirasyon sa pagtabang sa akong amahan. Sa katapusan, nakumbinser niya ang akong amahan sa pagpangayo og tabang. Misulod siya sa usa ka tambalanan sulod sa siyam ka bulan. Makabisita lang kami kaniya kausa sa usa ka bulan. Dili kadto sayon, ilabi na sa sinugdanan, apan matag bulan ang akong inahan ug ako nagpadayon nga magmatinud-anon sa ebanghelyo ug sa pagpangita sa among mga katigulangan. Sa pagbuhat sa ingon, hilabihan kaming napanalanginan sa mga paagi nga wala namo damha.
Human sa pagtambal sa akong amahan, mipauli siya sa panimalay ug wala na mag-inom ug makahubog sukad. Nakigkita siya sa mga misyonaryo apan dili pa andam mopasalig ngadto sa ebanghelyo. Misugyot ang akong inahan nga kami moadto sa mga nataran sa templo ug mobati sa Espiritu didto.
Wala madugay human niini, ang mga misyonaryo nadasig nga moadto sa among panimalay ug mobisita sa akong amahan. Mipaambit siya kanila sa iyang tinguha nga magpabunyag. Nianang gabhiona, ang akong amahan ug inahan mipaambit sa maayong balita ngari kanako.
Ang Ginoo mituman sa Iyang saad. Ang butang nga nagkinahanglang mamaayo kay naayo. Ang akong amahan naayo gikan sa iyang adiksyon, ug naayo ang akong mga pagduha-duha uban sa nabag-o nga pagtuo. Ang among pamilya nangandam na karon nga mabugkos.