Pagpangalagad pinaagi sa Pagbarug sa Kinaugalingong Paningkamot [Self-Reliance]

Ang pagtabang sa uban nga mahimong makabarug sa kinaugalingong paningkamot mao ang paghatag ug pagpangalagad diha sa pamaagi sa Ginoo.

Daghan sa atong mga sakop sa pamilya, mga higala ug silingan interesado nga mahimong mas makabarug sa kinaugalingong paningkamot. Gamit ang inisyatibo sa Simbahan sa pagbarug sa kinaugalingong paningkamot, ang mga miyembro sa Simbahan nakakaplag og mga oportunidad sa pagserbisyo, pag-amuma, ug pangalagad samtang sila makapanalangin sa uban sa mga baruganan nga makahatag sa “mas dakong paglaum, kalinaw, ug pag-uswag.”¹

“Nauli na Ako sa Panimalay”

Ni Chrissy Kepler, Arizona, USA

Nanglimbasug ko sa pinansyal pagkahuman sa diborsyo, naningkamot nga makabalik sa pagpanrabaho human nga nahimong mama nga dihara-sa-panimalay sulod sa walo ka tuig. Nanglimbasug usab ko sa espirituhanon nga paagi, nangita sa kamatuoran ug hugot nga pagtuo, bisan og wala nako mitambong sa simbahan sukad sa akong pagka-tin-edyer.

Usa ka Dominggo nanglaba ko diha sa panimalay sa akong magulang, nga si Priscilla, usa ka aktibo nga miyembro sa Simbahan. Samtang didto ko, gidapit ko ni Priscilla sa pagtambong sa simbahan uban sa iyang pamilya—ang una nakong imbitasyon sa milabay nga 15 ka tuig.

Nagduha-duha ko sa sinugdanan, apan sa gabii nga wala pa ako gidapit, nangamuyo ko sa Dios nga ipakita kanako kon unsaon nako nga mas mapaduol ko Kaniya. Human mibati nga moadto, nakaingon ko, “Nganong dili man moadto aron madungog ug makita sa imong kaugalingon mismo isip hamtong gamit ang imong kaugalingong kasingkasing ug mga mata?”

Samtang diha kami sa sakramento, nakamatngon ko og gamayng flyer diha sa bulletin sa Dominggo nga nagpahibalo sa usa ka kurso sa pagbarug sa kinaugalingong paningkamot sa personal nga panalapi. Dili pa ko andam nga mobalik sa simbahan, apan gibati ko og kainteresado ngadto sa 12 ka semana nga kurso. Inubanan sa pagdasig gikan sa akong igsoon ug bayaw, mipalista ko, naglaum nga makat-on lang kon unsaon sa paghimo og budget ug sa pag-impas sa utang. Ang mga klase, hinoon, miusab kanako sa espirituhanon nga paagi.

Nasurprisa ko sa espirituhanong mga mensahe sa unang duha ka semana sa klase, apan sa ikatulo nga klase, napuno ko sa pagbati sa kumpirmasyon nga nauli na ako sa panimalay ug nakadungog sa bag-o apan pamilyar nga mga kamatuoran. Mibiya ko sa klase ug mi-drive diretso aron sa pakigkita kang Priscilla. Naghilak, nga nangutana ko kaniya, “Unsaon nako sa pag-angkon og dugang pa niining pagbati sa akong kinabuhi?” Nakigsabut siya sa mga misyonaryo aron masugdan ang pagtudlo nako.

Ang mga sakop sa akong klase sa pagbarug sa kinaugalingong paningkamot mitambong sa akong mga leksyon ug misuporta kanako. Nakahimo sila og malungtaron nga epekto sa akong espirituwalidad ug mitabang kanato nga makaugmad og usa ka pagpamatuod sa ebanghelyo ug sa mga propeta sa bag-ong panahon.

Sa panahon nga akong nagahin sa pagkompleto sa kurso, mihimo ko og pipila ka temporal ug espiritwal nga mga kausaban. Gisugdan nako ang usa ka bag-ong panginabuhi sa usa ka maayong kompanya, ug nakaimpas ko og pipila ka mga utang.

Apan ang mas lawom, mas tam-is nga panalangin nga miabut gikan sa kurso naglakip sa paghimo og mga maanindot nga panaghigalaay, pagpalambo og positibo nga relasyon uban sa usa ka makapadasig nga bishop, pagpangita og usa ka pagpamatuod sa ikapulo, pagdawat sa akong rekomend sa templo, nga matugahan ug magtan-aw sa akong duha ka kamagulangan nga mga anak nga mabunyagan.

Ang akong dalan paingon sa pagbarug sa kinaugalingon nga paningkamot anaa pa gihapon sa proseso, apan sa tibuok nakong panaw, akong panggaon ang mga leksyon nga akong nakat-unan ug ang panaghigala nga akong nahimo.

Pagdapit, Pagtambong, Pagpalig-on

Aron matabangan ang mga Santos sa Ulahing mga Adlaw nga maabut ang pagbarug sa kinaugalingong paningkamot—sa pinansyal ug espiritwal—ang Simbahan misugod sa inisyatibo niini sa pagbarug sa kinaugalingong paningkamot niadtong 2014. Human sa usa ka pasiuna nga debosyonal, ang mga nanambong magpili gikan sa upat ka lain-laing mga kurso sa 12 ka semana.

Tungod kay ang mga grupo sa pagbarug sa kinaugalingong paningkamot nagtanyag og maanindot kaayo nga oportunidad sa pagpangalagad sa uban sa ilang pinansyal, pang-edukasyon, propesyonal ug espiritwal nga mga panginahanglan. Ang mga sakop sa grupo makakat-on gikan sa, pakigtambag, ug pagsuporta sa usag usa. Sila usab mopaambit og mga ideya ug may tulubagon ngadto sa usag usa.

Pag-ampo kon hain nga mga sakop sa pamilya, mga higala, o mga silingan nga mahimo nimong dapiton ngadto so sa kurso sa pagbarug sa kinaugalingong paningkamot, ug motambong uban kanila. Hinumdumi nga ang mga baruganan sa pagbarug sa kinaugalingong paningkamot makapanalangin sa tanang mga anak sa Dios, dili igsapayan kon sila mga miyembro sa Simbahan o dili.

“Mobiya Ko sa Matag Klase nga Mobati nga Gihigugma”

Sa dihang siya mibisita sa Temple Square sa Siyudad sa Salt Lake, Utah, uban ang iyang 10 anyos nga anak, nga si Vincent, niadtong Disyembre 2016, si Katie Funk miisip sa iyang kaugalingon nga “komportable na nga nagtuo nga walay nasayud kon anaa bay Dios o sa kinaiyahan niini [agnostic].” Mibiya siya sa Simbahan sa edad nga 16, napaangkan sa edad nga 17, misugod na nga magpatato, ug nakagusto na sa lasa sa kape. Apan atol niana nga pagbisita sa Temple Square, si Vincent mibati sa Espiritu Santo ug mihangyo sa iyang inahan kon mahimo ba siya nga magpatudlo sa misyonaryo.

Bisan pa sa iyang duha ka trabaho, mga 80 ka oras kada semana, si Katie nagtuon sa ebanghelyo uban ni Vincent, nagsiksik sa mga tubag sa iyang mga pangutana sa dili pa ang matag bisita sa misyonaryo. Sa ting-init niadtong 2017, misugod siya sa pagtambong sa mga miting sa Simbahan, diin nakat-on siya mahitungod sa mga kurso sa pagbarug sa kinaugalingong paningkamot.

“Nakaamgo ko nga mga butang kini nga makatabang kanako,” miingon siya. “Tingali dili kinahanglan kong motrabaho og duha ka mga trabaho o magsalig sa akong mga ginikanan sa tibuok nakong kinabuhi.”

Si Katie mitawag sa iyang dalan nga “hilabihan nga makapalig-on sa temporal ug espirituhanong paagi,” dili lamang tungod sa unsay iyang nakat-unan apan tungod usab kon giunsa siya sa pagdawat sa grupo sa pagbarug sa kinaugalingong paningkamot ug nangalagad kaniya.

Unsaon Ninyo sa Pagtabang

Ania ang pipila ka mga ideya gikan ni Katie kon sa unsang paagi atong mahimo ang inisyatibo sa pagbarug sa kinaugalingong paningkamot nga mahimong oportunidad sa pagpangalagad sa espirituwal ug temporal nga paagi:

“Kahibalo ko nga gasgas na kaayo, apan ayaw hukmi ang libro pinaagi sa hapin niini. Sa pagkatinuod nga nakahimo ko sa pag-apil sa kurso ug wala mobati nga gihukman sa uban dako na kaayo.”
“Hatag og pagsuporta ug pagdasig. Ang akong grupo misuporta kanako sa paagi nga mibiya ko sa matag klase nga mibati nga gihigugma.”
“Ipaambit ang inyong kasinatian. Ang pagkamatinuoron ug pagkadayag nga anaa kanamo alang sa matag usa nakapahimo sa among mga kasingkasing nga mobati og mas maayo. Dili gayud mo masayud kon si kinsa ang makabenepisyo gikan sa unsay inyong gipaambit.”
“Mosulti. Mosulti ko kon unsa ka mas maayo ang akong kinabuhi tungod kay nagbayad ko sa akong ikapulo ug moadto sa simbahan. Akong dad-on ang akong libro sa Personal nga Panalapi alang sa Self-Reliance sa akong trabaho isip usa ka behavioral therapist. Kon angay, ipaambit ang pipila sa mga baruganan niini sa uban.”
“Adtoa mismo ang kurso sa pagbarug sa kinaugalingong paningkamot, apan magbantay alang niadtong kinsa nagkinahanglan sa imong tabang. Dili nako maabtan ang hapit katunga sa akong mga klase tungod sa kausaban sa iskedyul sa akong trabaho, apan ang mga miyembro sa akong grupo nagpadayon sa pagkontak ug miabiba kanako. Nindot kaayo nga mobati nga ako nahisakop gihapon bisan kon dili ko makaadto.”

Background nga texture gikan sa Getty Images

Personal nga Panalapi alang sa self-reliance

Edukasyon alang sa Mas Maayong Trabaho alang sa pagbarug sa kinaugalingong paningkamot

Mangita og Mas Maayong Trabaho alang sa pagbarug sa kinaugalingong paningkamot

Pagsugod ug Pagpalambo sa Akong Negosyo alang sa pagbarug sa kinaugalingong paningkamot

Kini nga mga manwal nagrepresentar sa upat ka kurso sa pagbarug sa kinaugalingong paningkamot sa Simbahan. Alang sa dugang nga impormasyon, pangutan-a ang imong bishop o bisitaha ang srs. ChurchofJesusChrist.org.