Givhan tru long Fasin blong Gat Indipenden Laef.

Blong stap helpem ol narawan blong oli kam blong dipen long olgetawan, hem i blong givim samting mo givhan long olgeta long wei blong Lod.

Plante long ol memba blong famli blong yumi, ol fren mo ol neba oli wantem blong kam moa indipenden long laef blong olgeta. Ol memba blong Jos oli yusum ol puswok blong fasin blong gat indipenden laef, mo oli faenem ol janis blong givim seves, givim kea, mo givhan taem oli stap blesem ol narawan wetem ol prinsipol we i tekem “moa hop,pis mo progres” long laef blong olgeta.¹

“Mi Bin Stap long Hom”

I Kam long Chrissy Kepler, Arisona, YSA

Mi bin stap gat hadtaem long saed blong mane afta long wan divos, mi stap traem blong faenem wei blong mi i gobak long wan wok afta we mi bin stap hom olsem wan mama blong eit yia. Mi bin gat hadtaem tu long saed blong spirit,we mi stap lukaotem trutok mo fet, i nomata we mi nomo bin putum wan leg blong mi insaed long wan japel stat long taem we mi yangfala finis.

Wan Sandei, mi stap wasem klos long haos blong bigfala sista blong mi, Priscilla, we i wan aktiv memba blong Jos. Taem mi bin stap longwe, Priscilla i bin invaetem mi blong go long Jos wetem famli blong hem—fas invitesen blong mi afta long 15 yia.

Mi no bin wantem long fas taem; be long naet bifo, mi bin prea mo askem God blong Hem i soem long mi olsem wanem blong go kolosap moa long Hem. Afta we mi harem kat blong mi i fas insaed, mi talem: “?From wanem bae mi no go harem mo luk miwan olsem wan adalt, mo bae mi harem wetem stret hat mo luk wetem stret ae blong mi?”

Taem mifala i bin stap long sakramen miting, mi bin luk wan pepa i stap long Sandei notisbod we i anaonsem se i gat wan klas blong indipenden laef abaot Faenens blong Miwan. Mi no rere blong gobak long Jos, be mi harem glad long 12 wik klas ia. Sista blong mi mo hasban blong hem i leftemap tingting blong mi blong go, mo mi rejista, mi ting se bae mi go lanem olsem wanem blong mekem wan bajet blong pemaot sam kaon. Be ol klas ia, oli bin jenisim mi long saed blong spirit.

Mi bin sapraes long ol mesej long saed blong spirit we mi bin kasem long ol fasfala wik long klas, be long nambatri klas, mi bin harem bigwan se i gat wan konfemesen se mi bin stap hom mo mi bin stap harem ol niu trutok, be ol trutok we mi bin save finis. Mi bin lego klas mo mi draev i go stret blong go luk Priscilla. Wetem wota long ae blong mi, mi askem hem: “?Olsem wanem bae mi gat moa filing olsem insaed long laef blong mi?” Hem i mekem se ol misinari oli stat blong tijim mi.

Ol memba blong indipenden laef klas ia oli bin kam long ol misinari lesen blong mi mo oli bin sapotem mi. Oli mekem bigfala jenis long spirit fasin blong mi mo oli bin helpem mi blong developem wan testemoni abaot gospel mo ol profet blong tedei.

Long taem ia we i bin tekem mi blong finisim klas ia, mi bin mekem sam jenis, long saed blong laef long wol ia, mo long saed blong spirit. Mi bin statem wan niu wok wetem wan gudfala kampani, mo mi pemaot samfala lon blong mi.

Be ol blesing we oli bin moa dip, mo moa swit, oli kamaot long klas ia, wetem ol niufala naes frensip, mo blong developem wan gudfala rilesensip wetem wan bisop we i bin stap leftemap tingting blong mi, mo mi faenem wan testemoni long saed blong taeting, mo mi bin kasem tempol rekomen blong mi, mi kasem endaomen, mo mi bin luk tufala bigfala pikinini blong mi oli kasem baptaes.

Rod blong mi blong stap dipen long miwan i stap gohed yet, be long rod ia we mi stat blong stap wokbaot long hem, bambae mi holemtaet gud long hat blong mi ol lesen ia we mi bin lanem mo ol frensip ia we mi bin mekem.

Invaetem, Go, Mekem I Kam Strong Moa

Blong helpem ol Lata-dei Sent oli kasem wan indipenden laef—tugeta long saed blong mane mo long saed blong spirit—Jos ia statem puswok blong hem long saed blong indipenden laef long 2014. Afta wan divosen blong presentem hemia, olgeta we oli kam oli jusum wan long ol fo klas we i tekem 12 wik.

From se ol grup blong indipenden laef oli wok olsem wan kaonsel, oli givim wan gudfala janis blong givhan long ol nid blong ol narawan long saed blong mane, edukesen, wok, mo spirit. Ol memba blong grup oli lan aot long wanwan, oli kaonsel wetem wanwan, mo oli sapotem wanwan. Oli stap serem tu ol aedia mo oli akaontebol long wanwan long olgeta.

Oli prea abaot wijwan memba blong famli, fren, o neba blong save invaetem long wan klas blong indipenden laef, mo oli go wetem olgeta. Tingbaot se ol prinsipol blong fasin blong stap dipen long yuwan i save blesem evriwan long ol pikinini blong God, i nomata se oli memba blong Jos, o nogat.

“Afta long Wanwan Klas, Mi Filim se Oli Lavem Mi”

Taem hem i bin visitim Tempol Skwea long Sol Lek Siti, Yuta, wetem boe blong hem we i gat 10 yia, Vincent, long Disemba 2016, Katie Funk i bin ting se hem i “no biliv nating long God.” Hem i aot long Jos taem hem i bin gat 16 yia, i kam wan singgel mama taem hem i gat 17 yia, i stat blong mekem tatu, mo i kam blong laekem kofi. Be long taem blong visit ia long Tempol Skwea, Vincent i bin filim Tabu Spirit mo i askem mama blong hem sapos hem i save tekem ol misinari lesen.

I nomata se hem i gat tu wok, mo i wok 80 aoa long wan wik, Katie i bin stadi long gospel wetem Vincent, i lukaotem ol ansa long ol kwestin blong hem bitwin ol visit blong ol misinari. Taem Samataem blong 2017 i bin kam, hem i stat blong go long ol miting blong Jos, mo long ples ia hem i bin lanem abaot ol klas blong Jos long saed blong indipenden laef.

Hem i talem:“Mi luksave se i gat wan samting we bae i save helpem mi. “Sapos mi no nid blong gat 2 wok,o stap dipen long papa mo mama blong mi long ful laef blong mi.”

Katie i talem se klas blong hem “i mekem hem i kam strong moa bigwan long saed blong laef long wol ia mo long saed blong spirit,” i no jes from ol samting we hem i bin lanem, be tu, long wei we indipenden laef grup blong hem i bin akseptem mo givhan long hem.

Olsem Wanem Nao Yu Save Help

Hemia samfala aedia we oli kam long Katie long wei blong mekem puswok blong Jos long saed blong fasin blong stap dipen long yuwan i kam wan janis blong givhan long saed blong spirit, mo tu, long saed blong laef long wol ia:

“Givim sapot mo toktok blong leftemap tingting. Grup blong mi i bin sapotem mi long wan wei we mi bin stap aot long wanwan klas wetem harem glad ia se i gat wan i lavem mi.”
“Serem eksperiens blong yu. Fasin blong tok tru, mo gat open tingting we wanwan long mifala i bin gat, we i mekem hat blong mifala i harem gud moa. Yu neva save huia bae i tekem wan samting aot long wanem we bae yu serem.”
“Mas save toktok laod. Mi save tokbaot olsem wanem laef blong mi i gud moa from se mi stap pem taeting blong mi mo from se mi stap go long jos. Mi tekem buk blong mi, blong Faenens blong Miwan blong Dipen long Miwan i go wetem mi long wok, blong i stretem ol fasin blong mi. Taem we i stret, mi serem samfala prinsipol insaed wetem ol narawan.”
“Go long wan klas blong indipenden laef, blong yuwan nomo, be lukluk raon blong faenem wan we i nidim help blong yu. Mi mas mestem kolosap haf blong ol klas blong mi from se i bin gat jenis long wok taemtebol blong mi, be ol memba blong grup blong mi oli bin gohed blong gat kontak wetem mi, mo oli pusum mi i go. I bin gud tumas blong filim se mi stap pat blong grup ia iven we mi no bin save stap long klas.”

© 2020 i kam long Intellectual Reserve, Inc. Oli holem evri raet. Oli printim long YSA. Oli letem long Inglis: 6/19. Oli letem translesen: 6 /19. Translesen blong Ol Givhan Prinsipol, Ogis 2020. Bislama. 16723 852