Iamwir seni om Anongonong won Pusin Winikapom

Anisi ekkoch repwe pusin anongonong won pusin winikaper ne awora me iamiwir ussun ewe Samon.

Chommong chochon ach famini, chiechiach, me chon aruch ra pwapwaiti ar repwe konien anongonong won pusin winikaper. Aea napanpen an ewe Mwichefen ne anongonong won pusin winikapan, chon ewe Mwichefen ra kuna anen ar repwe aninis, tumun, me iamwir nupwen ra efeiochu ekkoch ren nongonong minne ra wato wachimuken “anean, kinamwe me fefeita.”¹

”Ua Nom Neimw”

Seni Chrissy Kepler, Arizona, USA

Ngang ua osukosuken mwoni mwirin ew mufesenin pupunu, ua satuni ne kutta anen ai upwe niwinsefaninong non ewe angang mwirin wanu ier ai ua chok nom neimw ussun emon inenap. Ua pwan osukosuken pekin ngun, ua kukkuta ennet me nuku, inamo ika use mo ipwenong non ew fan seni chok ai ierin serafo.

Ew Raninifen ua sopwuni ai kewe pisek non imwen pwi ewe watte, Priscilla, emon chon ei Mwichefen mi achocho. Non ewe atun ua nom ikana, Priscilla a tingor ngeniei ai upwe fitir non ar ewe famini ne fan—aewin tingor non ukukun 15 ier.

Akkom ngang mi tipemwaramwar, nge mwen chok ewe pwinin, ua tingor ngeni Kot epwe aiti ngeniei ifa ussun ai upwe arap ngeni I. Mwirin ai ua mefi ew weiwei non netipei, ua osopono ren, “Pwata kose no kopwe rong me kuna won pusin winikapom ussun emon mi mukono fiti pusin netipom me mesom?

Non ewe fansoun am oua nom ren ewe mwichen sakrament, ua kuna echo taropwe non ewe nenien taropwen esinesin non Raninifen usun ew sukunen anongonong won pusin. winikapom ren pekin mwoni tonong ren pusin en. Use mo moneta ai upwe niwiniti fan, nge ua mefi mwasang ngeni ewe sukun ren 12-wik. Seni kapasen pesepes seni pwi we me punuwan ewe, ua makkei itei ai upwe chok kaeo ifa ussun ai upwe fori ew pwachet me monano niwinimang. Ekkewe nesen, ussun nge, ra ekesiwiniei non pekin ngun.

Ua fen mairu ren ekkewe porous non pekin ngun non ewe aewin wiken ewe nesen, nge non fansoun ewe ounungatin nesen, ua chouno ren ewe memefin fataeochun pwe ua nom neimw me rongorong minefo nge mi chok nonno ngeni ekkewe ennet. Ua no seni ewe sukun me ua safochono ai upwe churi Prisilla. Non ai kechiw, ua eisini, “Ifa ussun ai upwe angei pwan ekkoch ussun ei memmef non manauei?” Neminewe a ota an kewe misineri repwene poputa ne osukunaei.

Chon ai ewe sukunen anongonong won pusin winikapom ra etto ngeni ai kewe sukun ren kewe misineri me ra anisiei. Ra fori ew omuchunon watten aninis won inisi ren pekin ngun me anisiei ne forata ew kapasen pwarata ussun ewe kapas allim me ekkewe soufos ikenai.

Non ewe fansoun a ngeniei ai upwe awesano ewe sukun, ua fori ekkoch ekkesiwin non manauei me pekin ngun. Ua poputani ew minefon angang ren ew compeny mi murinno, me ua monano chommong niwinimangen mwoni.

Nge ew anononunon, ekkewe murinon feioch ra feitto seni ewe sukun pachenong forutan murinon chiechi fengen, forata ew wenecharen chiechi fengen me emon pesepesochun pisop, kuna ew kapasen pwarata ren ewe asorun ew na engon, angei nei ewe taropwen mumutan non tempel, angei ekewe niffang mi pin, me kuna nei kewe ruemon watte ar ra papatais.

Ai an ngeni anongonong won pusin winikapei ese mwo pwano, nge ren meinisin non ai manau, upwe chok aucheani ekkewe nesen ua kaeo me ai chiechi ngeni ekkoch ua fen forata.

Koko ngeni, Fiti, Apochokunano

Ach sipwe anisi Aramas mi Pin non Fansoun Soponon ar repwe sinei ar repwe anongonong won pusin winikaper—ren ir me ruu pekin mwoni me pekin ngun—ewe Mwichefen a poputani an sukunen anongonong won pusin winikapan a foruta non 2014. Mwirin ew iotekin nepoputan mwich, chon fiti ewe sukun ra finata seni ruanu nesen mi sokofesen ren 12-wik.

Pokiten mwichen ewe anongonong won pusin winikapom ra amokut ussun ew mwichen sou pung, ra awora ew tufich mi murinno ar repwe iamwiri ekkoch non ar osupwang non pekin mwoni, sukun me angang, me non pekin ngun. Chon ewe mwich ra kaeo seni, ourour fengen, me anisi fengenir. Ra pwan aea fengen ekiek me met a murinno ngeni emon me emon neir.

Iotek fan iten menni chochon famini, chiechier, ika monun unukur ka tongeni kokorato ngeni ew sukunen anongonong won pusin winikapom. Chemeni ekkewe nongonongun anongonong won pusin winikapom ra tongeni efeiochu meinisin noun Kot kewe inamo ika ir chon ei Mwichefen ika esap.

“Ua No Seni Ew Me Ew Kewe Class Non Ai Mefi Tong”

Nupwen an neminewe a feinno ngeni ewe Tempel Square non Salt Lake City, Utah, fiti noun ewe att 10 ierin, itan Vincent, non December 2016, Katie Funk a ekieki pwe i pusin a “kinamweino non an nuku pwe esor emon Kot.” A suseni ewe Mwichefen non an 16 ier, a winiti emon inenap ese wor punuwan an a 17 ier, a poputa ne tatuni, me forata an a neni kofi. Nge non ena fansoun chuno ren ewe Temple Square, Vincent a mefi ewe Ngun mi Fel me a eisini inan ewe ika mi tongeni an ekkewe misineri repwe aiti.

Ina mo ika a wor an kewe ruu angang, 80-awa ruu wik, Katie a fiti Vincent ne kaeo ewe kapas allim, kutta ponuwen an kewe kapas eis nefinen an kewe misineri feito churir. Non ewe Summer 2017, a poputa ne fifiti fan, ikewe ia a kaeo ekkewe nesen ussun anongonong won pusin winikapom an ewe Mwichefen.

“Ua sinei pwe ir ekkoch mettoch ra tongeni anisiei,” a apasa. “Meni ese pwan namot ai upwe aani ruu angang ika anongonong won inei me semei kewe non unusen maauei.”

Katie a apasa ussun an ewe nesen “wesewesen apochokunaei non pekin aion me ngun,” esap chok ren met neminewe a kaeo nge pwan pokiten an chon an ewe mwichen anongonong won pusin winikapom a etiwa me iamwiri.

Ifa Ussun Om Kopwe Tongeni Aninis

Ikkei ekkoch ekiek seni Katie ren ifa ussun sia tongeni fori an ewe Mwichefen ewe anongonong won pusin winikapom a forata ew tufich ne iamwir non pekin aion me ngun:

“Awora aninis me pesepes. Ai ewe mwich ra anisiei non ew an minne a ngeni ei ai upwe mefi ar tong.”
“Aporousa om Sinei. Ewe wenechar me sukun netip a wor rech meinisin a fori netipach an epwe murino. Kosap sinei ika ion epwe namot ngeni met ka aporousa.”
“Pochokun ne aporousa. Ua pochokun ne aporousa ifa ussun manauei a murinono pokiten ua monatiw ai asoren ew na engon me feinno fiti fan. Ua uwei nei ewe puken Pusin Nei Mwoni ren Anongonong Won Pusin Winikapom ngeni ai ewe nenien angang pwe epwe anisi mokutun manauei. Nupwen mi tufich, ua aporousa ekkoch nongonongun ngeni ekkoch.”
“Fiti ew sukunen anongonong won pusin winikapom fan itom, nge nengeni ion kana ka tongeni anisir. Ua etiwano arapakan nesopun ekkewe sukun pun ren ekkesiwinin kokkotun ai angang, nge chon ai we mwich ra nom non nge ra chok koriei me apwapwaeita. A men amwarar ai mefi pwe ngang mi chok choni ina mwo ika use tongeni upwe nom.”

© 2020 seni Intellectual Reserve, Inc. Meinisin pung mi kawor. A för non Amerika. Kapungunon non fosun Merika: 6/19. Kapungunon chiakun: 6/19. Chiakun Ministering Principles, August 2020. Chuukese. 16723 901