Veiqaravi ena Bula Rawati Koya

Na nodra vukei na tamata mera bula rawati ira sa ikoya na veivakarautaki kei na veiqaravi ena ivakarau ni Turaga.

E vuqa vei ira na noda lewe ni matavuvale, itokani, kei na wekada era sa kauwai tiko ena nodra rawata me ra bula rawati ira vakalevu cake. Ni ra vakayagataka na ituvatuva ni bula rawati koya ni Lotu, era sa raica tiko kina na lewe ni Lotu na madigi eso mera veikauwaitaki, veimaroroi, ka veiqaravi ni ra vakalougatataki ira na tani ena ivakavuvuli e kauta mai na “inuinui cecere, vakacegu, kei na tubu.”¹

“Au Sa Tiko e Vale”

Mai vei Chrissy Kepler, Arizona, Amerika

Au a sasaga dredre tiko vakailavo ni oti toka na veisere mai na vakamau, ka tovolea tiko meu lesu tale ki cakacaka ni sa oti e walu na yabaki noqu tu voli e vale vaka-tina. Au a sasaga dredre tale tikoga vakayalo, ka vakasaqara tiko na dina kei na vakabauta, e dina ga niu se sega ni curuma tale e dua na valenilotu mai na gauna au se yabaki tinivakacaca kina.

Ena dua na Sigatabu au a sava isulu tiko ena vale nei tuakaqu qase duadua, o Priscilla, e dua na lewe ni Lotu kaukauwa. Ena noqu a tiko ekea, a sureti au o Priscilla meu lako ki Lotu kei na nona matavuvale—na imatai ni noqu sureti ni sivia e 15 na yabaki.

Au a lomalomarua taumada, ia ena bogi ka dua, au a vakatakekere kina vua na Kalou me vakaraitaka vei au na sala meu toro voleka kina Vua. Ni oti na noqu vakila e dua na veidre e lomaqu, au a tinia, “Vakacava mo lako ka rogoca ka raica sara ga ena yalomu kei na matamu vakataki iko ena yabaki ni bula oqo?”

Ni keitou a tiko ena soqoni ni sakaramede, au raica sara e dua na ilavelave ena papa ni tukutuku ni Sigatabu ka kacivaka tiko e dua na vuli ni bula rawati koya ena veika vakailavo ni tamata yadua. Au a se sega ni vakarau tu meu lesu tale ki Lotu, ia au vakila niu vakauqeti ki na vuli macawa 12 oya. Ena veivakayaloqaqataki mai vei rau na tuakaqu kei watina, au mani lewena sara, niu namaka tiko meu vulica walega na iwalewale ni tuvailavo kei na saumi dinau. Ia, na kena veikalasi, a veisautaki au sara ga vakayalo.

Au a kurabui ena itukutuku vakayalo ni kalasi ena imatai ni rua na macawa, ia ena ikatolu ni kalasi, au a luvuci ena dua na yalo veivakadeitaki niu sa tiko e vale ka rogoca tiko na vei dina vou eso au sa rogoca oti mai. Au biuta mai na kalasi ka draiva vakadodonu sara meu lai raici Priscilla. Ena luluvu, au a tarogi koya, “Au na rawata vakalevu cake vakacava na yalo vakilai oqo ena noqu bula?” A vakarautaka sara o koya me tekivu vakavulici au o rau na daukaulotu.

Era a lako mai na noqu lewe ni kalasi ni bula rawati koya ki na noqu lesoni kei rau na daukaulotu ka tokoni au. Era a biuta e dua na mawe tudei kaukauwa ki na noqu bula vakayalo ka vukei au meu tara cake e dua na ivakadinadina ni kosipeli kei ira na parofita ni gauna oqo.

Ena loma ni gauna e tauri au kina meu vakacavara na vuli, au a vakayacora rawa e vica na veisau vakayago ka vakayalo. Au a tekivuna e dua na cakacaka vou ena dua na kabani vinaka, kau sauma rawa kina e vica na dinau.

Ia na veivakalougatataki titobu ka kamica cake e lako mai na vuli oqo a oka kina na bucini ni veitokani totoka, na tarai cake ni dua na veimaliwai vinaka kei na dua na bisopi veivakauqeti, na kunei ni dua na ivakadinadina ni ikatini, ciqomi ni noqu ivolatara ni valetabu, noqu edaumeni, kei na raici ni nodrau papitaiso na luvequ qase e rua.

Na noqu salatu ki na bula rawati koya e se cereki tikoga, ia ena vo ni noqu ilakolako, au na vakamareqeta na veilesoni au sa vulica kei na veitokani au sa bucina.

Veisureti, Tiko Kina, Veivaqaqacotaki

Me vukei ira na Yalododonu Edaidai me rawata na bula rawati koya— ena veika vakailavo ka vakayalo—a tekivuna kina na Lotu na ituvatuva ni bula rawati koya ena 2014. Ni oti e dua na lotu ni veivakatakilai, era digidigi sara na mai tiko ena vuli mai na va na vuli macawa-12 .

Me vaka ni ra cakacaka na ilawalawa ni bula rawati koya me vaka e dua na matabose, era solia e dua na madigi totoka me ra veiqaravi vei ira na tani ena nodra veika vakailavo, vakavuli, vaka kenadau, kei na vei gagadre vakayalo. Era vuli, veivakasalataki, ka veitokoni o ira na lewe ni lawalawa. Era veiwasei talega ka ra dui soli itukutuku vakai ira.

Masulaka me baleta na lewe ni matavuvale, itokani, se wekamu cava o rawa ni sureta ki na dua na vuli ni bula rawati koya, ka tiko kina vata kei ira. Nanuma tiko ni ivakavuvuli ni bula rawati koya e rawa ni vakalougatataki ira kece na luve ni Kalou, veitalia ga ke ra lewe ni Lotu se sega.

“Au Dau Biuta na Kalasi Yadua Ena Noqu Vakila Niu Lomani”

Ena gauna a sikova kina o koya na Lomanibai ni Valetabu e Salt Lake City, Utah, kei na luvena tagane yabaki 10, o Vincent, ena Tiseba 2016, a okati koya voli o Katie Funk me “dua e tawavakabauta.” A biuta na Lotu o koya ni yabaki 16, ka yaco me dua na tina sebera ni vakawati ni seqai yabaki17, sa tekivu me samuqawe na yagona, ka dau taleitaka na kofi. Ia ena gauna ni veisiko o ya ki na Lomanibai ni Valetabu, a vakila o Vincent na Yalo Tabu ka tarogi tinana kevaka e rawa ni taura o koya na lesoni mai vei ira na daukaulotu.

Dina ga ena nona 80-na-auwa, rua-na-cakacaka e veimacawa, a vulica na kosipeli o Katie kei Vincent, ka vakadikeva na isau ni nona vakatataro eso ena maliwa ni nodra veisiko na daukaulotu. Ena vulaikatakata ni 2017, a tekivu lakova o koya na soqoni ni Lotu, ka lai kila sara mai kina baleta na vuli eso ni bula rawati koya ni Lotu.

“Au a qai kila ni ra na rawa ni vukei au ena dua na ka,” e kaya o koya. “Au sa na sega beka ni gadreva meu cakacakataka e rua na cakacaka se vakararavi vei rau na noqu itubutubu ena vo ni noqu bula.”

A vakatoka o Katie na nona vuli me “veivakurabuitaki ka veivaqaqacotaki vakayago ka vakayalo,” sega ni baleta walega na ka a vulica kina o koya ia ena vuku talega ni nodra dau ciqomi ka qaravi koya na nona ilawalawa ni bula rawati koya.

Na Sala O Rawa Ni Veivuke Kina

Oqo eso na vakasama mai vei Katie ena sala eda na rawa kina ni cakava na ituvatuva ni bula rawati koya ni Lotu me dua na madigi me da veiqaravi kina vakayalo ka vakayago:

“Solia na veitokoni kei na veivakauqeti. Era a tokoni au na noqu ilawalawa ena dua na ivakarau kau dau tinia tu ga kina na kalasi yadua ena yalo e vakila na loloma.”
Wasea na veika o sa sotava. Na dina kei na yalorawarawa keimami a wasea vata a vakavuna na neimami yalovinaka cake sara. O sega ni kila o cei ena lai vinaka cake mai na ka o wasea.”
“Mo dau vosa tiko. Au dau tukuna na kena sa vinaka cake na noqu bula baleta niu dau sauma na noqu ikatini ka lako ki lotu. Au dau kauta vata kei au na noqu ivola ni Veika Vakailavo Yadua ni Bula Rawati Koya ki na noqu vanua ni cakacaka vaka kenadau ena bula vakaitovo. Ni ganita, au dau wasea eso na kena ivakavuvuli vei ira na tani. ”
“Lako ki na dua na vuli ni bula rawati koya me baleti iko, ia mo vakaraici ira tiko o ira era na rawa ni gadreva na nomu veivuke. Au a calata e voleka ni veimama na kalasi baleta na veisau ni ituvatuva ni noqu cakacaka, ia era a veitaratara tikoga mai na lewe ni noqu ilawalawa ka ra dau uqeti au tikoga. E veivakurabuitaki niu vakila au se vakabau tikoga niu sega mada ni tiko rawa kina.”

© 2020 mai na Intellectual Reserve, Inc. Dodonu kece e taqomaki. Tabaki e Amerika. Vakadonui me vaka-Valagi: 6/19. Vakadonui me vakadewataki: 6/19. iVakadewa ni Ministering Principles, August 2020. Fijian. 15769 858