“Ministering paagi sa Pagsalig-sa-Kaugalingon (Self-Reliance),” Liahona, Agosto 2020
Mga Prinsipyo sa Ministering, Agosto 2020
Ministering paagi sa Pagsalig-sa-Kaugalingon
Ang pagbulig sa iban nga magsalig-sa-kaugalingon, amo ang pagtigana kag pagminister sa paagi sang Ginuo.
Madamo sang aton mga miyembro sa pamilya, mga kaabyanan, kag mga kasilingan ang interesado nga mangin mas nagasalig-sa-kaugalingon. Gamit ang programa sang Simbahan sa pagsalig-sa-kaugalingon (self-reliance), makakita ang mga miyembro sang Simbahan sang mga oportunidad sa pag-alagad, pag-atipan, kag pagminister samtang ila ginabugayan ang iban paagi sa mga prinsipyo nga nagadala sang “mas dako nga paglaum, kalinong, kag pag-uswag.”1
“Nakapauli na Ako”
Ni Chrissy Kepler, Arizona, USA
Napigaduhan ako pagkatapos magdiborsyo, nga nagatinguha nga magbalik sa pagtrabaho pagkatapos nga nangin sa-balay-lang nga nanay sa sulod sang walo ka tuig. Ginbudlayan man ako sa espirituhanon, nga nagapangita sang kamatuoran kag pagtuo, bisan pa nga wala na ako makasulod liwat sa isa ka simbahan halin sang tin-edyer ako.
Isa ka Domingo nagpanglaba ako sa balay sang akon kamagulangan nga utod, nga si Priscilla, isa ka aktibo nga miyembro sang Simbahan. Samtang didto ako, ginhagad ako ni Priscilla nga magsimba upod sa iya pamilya—ang una ko nga imbitasyon sa masobra 15 ka tuig.
Nang-alang-alang ako sang primero, pero sang gab-i antes sina, nagpangamuyo ako sa Dios nga ipakita sa akon kon paano mangin mas malapit sa Iya. Pagkatapos nga makabatyag sang pagtulod, nagdesisyon ako, “Ngaa nga indi ka mag-upod para mabatian kag makita mo mismo bilang hamtong sa imo kaugalingon nga tagipusuon kag mga mata?”
Samtang ara kami sa pangsakramento nga miting, natalupangdan ko ang paskil sa pang-Domingo nga balita nga nagaanunsyo sang kurso sa pagsalig-sa-kaugalingon parte sa personal nga pagdumala sang kuwarta. Indi pa ako handa nga magbalik sa simbahan, pero interesado ako sa 12-ka-semana nga kurso. Upod ang pagpaisog sang akon utod kag bayaw, nagpalista ako, nga nagapaabot nga magtuon lamang kon paano maghimo sang badyet kag magbayad sang utang. Ugaling, ginbag-o ako sa espirituhanon sang mga klase.
Nasorpresa ako sa espirituhanon nga mga mensahe sang una nga duha ka semana sang klase, pero sa ikatatlo nga klase, napuno ako sang balatyagon sang kumpirmasyon nga nakapauli na ako kag nagapamati sa bag-o pero pamilyar nga mga kamatuoran. Naggwa ako sa klase kag diretso nga nakigkita kay Priscilla. Nga nagahibi, ginpamangkot ko sia, “Paano ako makabaton sang dugang pa sining balatyagon sa akon kabuhi?” Ginpatigayon niya nga masugdan ako tudlo sang mga misyonero.
Ang mga miyembro sa akon klase sa self-reliance nagkadto sa akon mga leksyon upod sa mga misyonero kag ginsuportahan ako. Nagbilin sila sang nagadugay nga impluwensya sa akon espiritwalidad kag ginbuligan ako nga magpatubo sang testimonya sa ebanghelyo kag sa moderno nga mga propeta.
Sa sulod sang panahon nga ginatapos ko ang kurso, nakahimo ako sang pila ka temporal kag espirituhanon nga mga pagbag-o. Nagsugod ako obra sa isa ka maayo nga kompanya, kag nabayran ko na ang pila ka mga utang.
Pero ang mas madalom, mas matam-is nga mga bugay nga nag-abot tungod sa kurso nagalakip sang pagtuga sang matahum nga mga pag-abyanay, lakip na ang positibo nga kaangtanan sa nagapaisog nga bishop, ang pag-angkon sang testimonya parte sa ikapulo, pagbaton sang akon rekomendasyon sa templo, mangin endowed, kag ang makita ang akon duha ka magulang nga mga kabataan nga mabunyagan.
Ang akon dalan padulong sa pagsalig-sa-kaugalingon nagapadayon pa sa gihapon, pero sa nabilin ko nga lalakton, pagahatagan ko sing bili ang mga leksyon nga akon natun-an kag ang mga pag-abyanay nga akon nahimo.
“Nagagwa ako sa Tagsa ka Klase nga Nagabatyag nga Ginapalangga”
Sang magbisita sia sa Temple Square sa Salt Lake City, Utah, upod ang iya 10-katuig nga anak, nga si Vincent, sang Disyembre 2016, ginakabig ni Katie Funk ang iya kaugalingon nga “kontento nga wala sing may ginapatihan.” Nagbiya sia sa Simbahan sa edad nga 16, nangin solo nga iloy sang 17 anyos, nagsugod nga magpapika, kag nangin mahiligon sa kape. Pero sa tion sinang pagbisita sa Temple Square, nabatyagan ni Vincent ang Balaan nga Espiritu kag ginpamangkot ang iya nanay kon pwede sia magpatudlo sa mga misyonero.
Sa pihak sang iya duha ka obra, 80-ka oras nga trabaho kada semana, gintun-an ni Katie ang ebanghelyo upod ni Vincent, nga nagapangita sang mga sabat sa iya mga pamangkot sa lang-at sang mga pagbisita sang mga misyonero. Sang tig-ilinit sang 2017, nagsugod sia nga magtambong sa mga miting sa Simbahan, kon sa diin iya nabal-an ang parte sa mga kurso sa pagsalig-sa-kaugalingon sang Simbahan.
“Narealisar ko nga makabulig ang mga ini sa akon,” siling niya. “Basi indi ko na kinahanglan magtrabaho sa duha ka obra ukon magsalig sa akon mga ginikanan sa bilog ko nga kabuhi.”
Gintawag ni Katie ang iya kurso nga “grabe magpabakod sa temporal kag espirituhanon,” indi lamang bangud sa iya mga natun-an kundi sa kon paano sia ginbaton kag ginministeran sang iya grupo sa pagsalig-sa-kaugalingon.
© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, August 2020. Hiligaynon. 16723 861