“Kev Txhawb Pab Dhau Los ntawm Kev Vam Khom Yus tus Kheej,” Liahona, Yim Hli Ntuj 2020
Tej Ntsiab Cai txog Kev Txhawb Pab, Yim Hli Ntuj 2020
Kev Txhawb Pab Dhau Los ntawm Kev Vam Khom Yus tus Kheej
Qhov uas peb pab lwm tus vam khom lawv tus kheej yog kev txhawb pab raws li tus Tswv txoj kev.
Peb tsev neeg, phooj ywg, thiab cov neeg zej zog feem coob xav kawm kom paub vam khom lawv tus kheej. Cov mej zeej yeej muaj cib fim txhawb pab, txhawb nqa, thiab saib xyuas lwm tus thaum lawv siv tej lub ntsiab cai los ntawm lub Koom Txoos txoj kev qhia txog kev vam khom yus tus kheej uas ua rau tib neeg txais tau “kev cia siab, kev kaj siab lug, thiab kev vam meej ntxiv.”1
“Kuv Twb Los Tsev Lawm”
Los ntawm Chrissy Kepler, Arizona, USA
Kuv tsis tshua muaj nyiaj tom qab kuv nrauj txiv, es kuv sim rov qab mus ua hauj lwm tom qab kuv tu me nyuam hauv tsev tau yim xyoo lawm. Kuj nyuaj rau kuv mloog tus ntsuj plig, nrhiav qhov tseeb thiab kev ntseeg, kuv tsis tau nkag hauv ib lub tsev teev ntuj txij thaum kuv yog ib tug ntxhais hluas los.
Muaj ib hnub Sunday kuv ntxhua khaub ncaws hauv kuv niam hlob lub tsev Priscilla, uas yog ib tug mej zeej uas muaj siab ntseeg lub Koom Txoos. Nyob ntawd, Priscilla caw kuv nrog nws thiab nws tsev neeg mus rau lub koom txoos—yog thawj zaug uas leej twg caw kuv tau 15 xyoos tas los.
Kuv tsis tshua xav mus, tiam sis hmo ua ntej, kuv twb thov Vajtswv qhia kuv tias kuv yuav tsum ua li cas kom nyob ze Nws ntxiv. Tom qab kuv tau txais kev tshoov siab, kuv xav tias, “Vim li cas koj yuav tsis mus cia koj lub siab hnov thiab koj qhov maug pom ntawm koj tus kheej?”
Thaum peb nyob hauv kev sib ntsib txais lub cim nco txog, kuv pom nyob rau hauv daim ntawv tshaj tawm muaj ib qho txog kev vam khom yus tus kheej kom tseg tau nyiaj. Kuv tsis tau npaj siab rov qab mus rau lub koom txoos, tiam sis kuv xav koom hoob kawm ntawd uas yuav siv 12 lub lim tiam. Kuv tus niam laus thiab txiv laus tau hais tias kom kuv kawm txog me ntsis, kuv thiaj li sau npe, es kuv xav tias kuv yuav mus kawm txog qhov ntawd kom pab tau kuv them tej nuj nqis tau thiab tseg tau me ntsis nyiaj. Tiam sis, hoob kawm ntawd twb hloov kuv sab ntsuj plig thiab.
Ob peb lim tiam thaum kuv kawm kuv tau txais tej zaj lus uas tshoov kuv lub siab, tiam sis thaum kuv kawm hoob thib peb, ua rau kuv paub tseeb tias zoo li kuv twb los tsev lawm thiab kuv mloog tej lus tseeb uas kuv ib txwm paub lawm. Tom qab kuv tawm hoob kawm kuv tsav tsheb mus xyuas Priscilla. Kuv los kua muag nug nws tias, “Kuv yuav ua li cas kom xav li no hauv kuv lub siab ntxiv?” Nws tau hais kom cov tub txib tuaj qhia kuv.
Cov mej zeej hauv kuv hoob kawm txog kev vam khom yus tus kheej tau tuaj nrog nyob thaum cov tub txib qhia kuv thiab lawv txhawb nqa kuv. Lawv twb pab kuv sab ntsuj plig muaj zog thiab pab kuv paub tias txoj moo zoo muaj tseeb thiab paub tias muaj cov yaj saub hauv lub caij nyoog kawg no.
Ua ntej kuv twb kawm tiav lawm, kuv twb hloov ntau yam hauv kuv lub neej thiab hloov kuv sab ntsuj plig. Kuv twb pib ib txoj hauj lwm tshiab rau ib lub koom haum zoo, thiab kuv tau them ob peb daim nqi lawm.
Tiam sis, tej koob hmoov zoo tshaj los ntawm kuv hoob kawm ntawd yog qhov uas kuv ntaus phooj ywg tshiab, qhov uas kuv tau sib raug zoo nrog ib tug npisov zoo, kuv paub tias kev them ib feem kaum yeej muaj tseeb, kuv tau txais ib daim ntawv tso cai nkag tuam tsev, kuv txais kuv qhov vaj txiaj ntsim, thiab kuv ob tug me nyuam hlob tau ua kev cai raus dej.
Kuv tseem kawm kev vam khom yus tus kheej, tiam sis txij no mus kuv yuav nco ntsoov tej yam uas kuv tau kawm thiab cov phooj ywg uas kuv muaj.
“Txhua Zaus Kuv Mus Kuv Paub tias Lawv Hlub Kuv”
Thaum nws mus xyuas Tshav Tuam Tsev nyob hauv Salt Lake City, Utah, nrog nws tus tub uas muaj 10 xyoo, Vincent, thaum lub Kaum Ob Hlis Ntuj 2016, Katie Funk xav tias nws yog ib tug uas “txaus siab tsis ntseeg Vajtswv.” Nws tau tso lub Koom Txoos tseg thaum nws muaj 16 xyoo, nws yog ib tug niam tsev uas tsis tau yuav txiv thaum nws muaj 17 xyoo, nws pib kos duab rau tawv nqaij, thiab nyiam haus kasfes. Tiam sis thaum nws mus xyuas Tshav Tuam Tsev, Vincent tau hnov tus Vaj Ntsuj Plig Dawb Huv thiab thov nws niam mloog cov tub txib qhia lawv.
Txawm nws ua ob txog hauj lwm, ntev li 80 teev txhua lub lim tiam, Katie tseem tau kawm txog txoj moo zoo nrog Vincent, kom kawm teb Vincent tej lus nug tom qab cov tub txib qhia nws. Thaum txog xyoo 2017 lub caij sov, nws pib koom kev sib ntsib hauv lub Koom Txoos, es nyob ntawd nws kawm txog lub Koom Txoos tej hoob kawm txog kev vam khom yus tus kheej.
Nws hais tias, “Kuv paub tias yog ib yam uas yuav pab tau kuv. Tej zaum kuv tsis tas ua ob txoj hauj lwm los yog cia kuv niam kuv txiv pab txhawb nqa kuv tas kuv lub neej.”
Katie hais tias nws hoob kawm yog ib qho uas “txhawb nws dag zog ntawm sab cev nqaij daim tawv thiab sab ntsuj plig,” tsis yog los ntawm tej yam uas nws kawm xwb tiam sis kuj yog los ntawm qhov uas nws pawg kawm kev vam khom yus tus kheej tau lees yuav nws thiab txhawb pab nws.
© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, August 2020. Hmong. 16723 295