Karihngihn in Kuh in Sifwacna

Kahsruh mwet sahyac in kuh in kuh in sifwacna pa in sang ac karihngihn ke inkacnek luhn Leum.

Puhs sin mempucr ke sucu lasr uh, kawuck, ac mwet tuhlan lasr luhngse elos in muh kuh in sifwacna. Orekmakihn muhtwacwacackiyacn kuh in sifwacna luhn Alu uh, mempucr ke Alu uh konwacack ohiyac wo in kuhlwacnsap, elyahkihn, ac karihngihn oacna ke elos ahkinsewowoye mwet sahyac ke mwe luti ma sang “finsrak yohk, mihs, ac kapkapwack.”¹

“Nga Oasr Lohm ah”

Sel Chrissy Kepler, Arizona, USA

Nga tuh elyahkihn ip luhn mani tukun na fahsrwelihk luhn moul in pahyuck luhk, srihke in konwacack inkacnek in fohlohk orekma tukun nga ekihn sie ninac-muhta-lin-lohm se ke lusen yac alkosr. Nga oacyacpac elyah ke ip luhn nguhn, suk ma pwacye ac luhlahlfongi, tuh nga tiac luhman utyak nuh lun sie lohm alu ke pacl se nga sie mwet fuhsr ah.

Sie lwen Sacnri nga oruh owo se luhk ke lohm sin tahmtahel mahtuh se emet wiyuck, Priscilla, el sie mempucr fokoko ke Alu uh. Ke nga oasr we, Priscilla el suliyuc ngacn wi sucu lal som wi alu—solsol se emet nuh sihk ke yac 15.

Met wihnna nga sruhnga, tuhsruhk ke fong se met liki ah, nga siyuck sin God Elacn ahkkahlwemye nuh sihk lah ngac oruh fuhkah in fototoyang nuh Sel. Tukun nga puhlakihn moklweyuck luhn insiyuck, nga ahksahfye, “Efuh kuh kom te som na kom in sifacna lohng ac liye ke motom ac insrem sifacna ke kom sie mwet mahtuh?”

Ke kuht oasr ke miting in eis kuhfa luhn Leum, nga liyacack sie ipin pepuh srihsrihp lucng ke mwe fahkwack luhn lwen Sacnri ahkkahlwemye ke sie kuhlahs in Kuh in Sifwacna luhn mwet se ke ip luhn mani. Nga tiac ahkolah in fohlohk nuh ke alu ah, tuhsruhk nga puhla muh ahkfototoyeyuck nga nuh ke kuhlahs in wik-12 sac. Ke ahkkweyeyuck luhn tahmtahel se wiyuck ac mukul tuhmwacl ah, nga sang inek, finsraki muh in eis etacack muhkwena kac lah ac orek fuhkah in oraclah luhpan mani ac molelah misac la. Kuhlahs ah, ohinge, ikihlyuclac nuh ke nguhn.

Nga lut ke mwe luti luhn nguhn ke wik ekahsr emet ke kuhlahs sac, tuhsruhk ke pacl in kuhlahs ahktolu sac, nga sesseslah ke sie puhla in ahkkweyeyuck muh nga oasr lohm ah ac long ma sasuc tuh oacna in ma pwacye. Nga som liki kuhlahs sac ac kahsruhsr fohlohk suwohswohs in som liyacl Priscilla. Ke sronin muhta, nga siyuck sel, “Ngac is fuhkah in yohk kain puhla se inge ke moul luhk?” El ohsun sin misineri oraclah pacl elos in ohsun nuh sihk in lutiyuc.

Mempucr ke kuhlahs in kuh in sifwacna se luhk ah tuhkuh nuh ke lutlut luhn misineri luhk inge ac ahkkweyeyuc. Eltahl oraclah eklac na sahflah se nuh ke ip luhn nguhn luhk ac kahsreyuc in oraclah testimoni luhk ke wosasuc ac mwet pahluh moul-mihsenge.

Ke pacl utuckuh nuh sihk in ahksahfyelah kuhlahs sac, nga oraclah eklac ekahsr ke ip luhn mahno ac nguhn luhk. Nga muhtwacwacack ke sie orekma yohk sasuc ke sie company wowo, ac nga molwelah kwewa lon ekahsr luhk.

Tuhsruhk mwe insewowo loal, ac wolacna ma tuhkuh ke kuhlahs sac pa oraclah kawuck kahto, muhsahelah kuhpahsr wowo nuh sin sie pisap ahkkweyeyuck, konwacack sie testimoni ke sie tahfuh singucul, eis mwe sang luhn tempuhl, akmuhsrahlah muhtahl, ac liye tuhlihk mahtuh luo nuhtihk ke elos pacptaislac.

Inkacnek luhk nuh ke kuh in sifwacna srackna kaul, tuhsruhk inkaiyacn fuhfahsryucsr luhk, nga fah moulkihn mwe luti nga lotwelah ac kawuck wowo nga oraclah sin mwet sahyac.

Suli, Wi, Ahkkweye

In kahsruh Mwet Luhlahlfongi ke Lwen-sahflah ke kuh in sifwacna—kewana ip luhn mani ac nguhn—Alu uh muhtwacwacack ke kuh in sifwacna ke 2014. Tukun aluiyuck ke muhtwacwackiyac ah, mwet wi ah sulwaclah inmahsrlon kuhlahs se ke wik-12 ah.

Ke srihpen un mwet ke kuh in sifacna ah oreklac in sie u ah, eltahl sang sie ohiyac na wo emet in karihngihn nuh sin mwet sahyac ke ip luhn mani, lutlut, orekma,ac enenuh luhn nguhn. Un mempucr lotwelah ke, sramsram nuh sin, ac tahpuhk sie sin sie. Eltahl oacyacpac akacsruhi mwe nuhnak ac orekma fal nuh sin sie sin sie.

Pruhe kac lah suc sin mempucr ke sucu, kawuck, kuh mwet tuhlan ma kom kuh in suli nuh ke kuhlahs in kuh in sifwacna se, ac weluhltahl. Esam lah mwe luti ke kuh in sifwacna kuh in ahkinsewowoye tuhlihk nuhkwewa nuhtin God, macnsis kuhnlah lah elos mempucr kuh tiac ke Alu.

“Nga Som Liki Kais Sie Kuhlahs Puhlakihn Luhngse”

Ke el muhtwacta nuh in Tempuhl Square fin acn Salt Lake, Utah, wi tuhlihk mokul yac singucul se nahtuhl, Vincent, ke Tisacmpuh 2016, Katie Funk el nuhnkacl sifacna muh el “wokihn in tahfuh luo.” El som liki Alu uh ke el yac 16, tuh ekihn sie ninac lolacp ke el yac 17, muhtwacwacack in srihsrihnglac, ac ahkyohkye nihm kohfi la. Tuhsruhk ke muhtwacta se nuh Tempuhl Square ah, Vincent el puhla Nguhn Muhtahl ac siyuck sin ninac kiyacl lah el kuh in eis mwe lutlut sin misineri.

Sahyen orekma-luo lal, orekma ao-80, Katie el lutlut ke wosasuc weluhl Vincent, suk top nuh ke kihsensiycuk inmahsrlon muhtwacta luhn misineri. Ke suhmuhr 2017, el muhtwacwacack in wi miting luhn Alu, yac el lotwelah ke Alu uh kuhlahs in kuh in sifwacna sac.

“Nga etwacack lah ma inge ma kuh in kahsrweyuc,” el fahk. “Sahp nga tiac enenuh in oerkma luo kuh epacl nuh sin ninac pahpah tuhmuhk ke lusen moul luhk.”

Katie el pahngon inkacnek lal muh “ahkkweyeyuck wolacna ke ip luhn mahno ac nguhn,” tiac ke srihpen ma ke ma el lotwelah tushruhk oacyacpac ke srihpen un mwet ma kuhlahs in kuh in sifwacna sac eisacl ac karuhnguhnuhl.

Kom ac Kahsruh Fuhkah

Pa inge kuhtuh sin mwe nuhnak sel Katie ma kuht ac oruh fuhkah in oruh in kuh in sifwacna luhn Alu uh in pihrihk se ohiyac wowo ah in karihngihn kewana ip luhn nguhn ac mahno:

“Sang kahsruh ac kahs in ahkkweye. U se luhk ah tahpuhkyuc ke sie ohiyac nga puhakihn luhngse ke ngac som liki kais sie pacl in kuhlahs uh.”
“Akacsruhi puhla lom. Suwohs ac sukohsohk ma oasr sesr sie sin sie oruh insiacsr puhla wo. Kom ac fah tiac etuh lah suc ac muh eis woiyacn ma kom akacsruhi uh.”
“Oruh in oasr puhsrem. Nga fahkack kac lah moul luhk woyak liki met ah ke srihpen nga moli sie tahfuh singucul ac som wi alu. Nga us puk in Personal Finances for Self-Reliance nuhtihk wiyuc nuh ke orekma luhk ah sruhluhkihn ohiyac in kahsruh se nuh sihk. Ke pacl fal, nga akacsruhi kuhtuh sin mwe luti nuh sin mwet sahyac.”
“Som sifacna weacng kuhlahs in kuh in sifwacna sac, tuh fah liye lah suc ac muh enenuh kahsruh lom. Nga tuh tiac ahkfalye in wi apkuhran in tahfuhn kuhlahs ke sihpen eklac luhn ao in orekma luhk, tuhsruhk un mempucr wiyuck ke kuhlahs sac akacsruhi nuh sihk ac ahkkweyeyuc. Wolacna in puhla lah nga srackna wi finne nga tiac kuh in oasr we.”

© 2020 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng ke Ministering Principles, August 2020. Kosraean. 16723 868