“ການປະຕິບັດສາດສະໜາກິດຜ່ານທາງການກຸ້ມຕົນເອງ,” Liahona, ເດືອນສິງຫາ 2020
ຫລັກທຳຂອງການປະຕິບັດສາດສະໜາກິດ, ເດືອນສິງຫາ 2020
ການປະຕິບັດສາດສະໜາກິດຜ່ານທາງການກຸ້ມຕົນເອງ
ການຊ່ວຍເຫລືອຄົນອື່ນໃຫ້ກາຍເປັນຄົນກຸ້ມຕົນເອງ ເປັນການຈັດຫາໃຫ້ ແລະ ການປະຕິບັດສາດສະໜາກິດໃນວິທີທາງຂອງພຣະຜູ້ເປັນເຈົ້າ.
ສະມາຊິກໃນຄອບຄົວ, ໝູ່ເພື່ອນ, ແລະ ເພື່ອນບ້ານຂອງເຮົາຫລາຍຄົນ ມີຄວາມສົນໃຈໃນການກາຍເປັນຄົນກຸ້ມຕົນເອງຫລາຍກວ່າເກົ່າ. ການໃຊ້ໂຄງການລິເລີ່ມການກຸ້ມຕົນເອງຂອງສາດສະໜາຈັກ, ສະມາຊິກຂອງສາດສະໜາຈັກພົບເຫັນໂອກາດທີ່ຈະຮັບໃຊ້, ດູແລ, ແລະ ປະຕິບັດສາດສະໜາກິດ ຂະນະທີ່ເຂົາເຈົ້າເປັນພອນໃຫ້ແກ່ຄົນອື່ນດ້ວຍຫລັກທຳທີ່ນຳ “ຄວາມຫວັງ, ຄວາມສະຫງົບ, ແລະ ຄວາມກ້າວໜ້າທີ່ຍິ່ງໃຫຍ່ກວ່າເກົ່າ” ມາໃຫ້.1
“ຂ້ອຍຢູ່ຖືກບ່ອນແລ້ວ”
ໂດຍ ຄຣິດຊີ ແຄັບເລີ, ແອຣິໂຊນາ, ສະຫະລັດອາເມຣິກາ
ຂ້ອຍໄດ້ດີ້ນລົນຫລາຍທີ່ສຸດກ່ຽວກັບການເງິນຫລັງຈາກທີ່ໄດ້ຢ່າຮ້າງ, ພະຍາຍາມຫາຫົນທາງກັບຄືນໄປທຳງານ ຫລັງຈາກໄດ້ຢູ່ເຮືອນດູແລລູກເຕົ້າເປັນເວລາແປດປີ. ຂ້ອຍກໍດີ້ນລົນທາງວິນຍານນຳອີກ, ຊອກຫາຄວາມຈິງ ແລະ ສັດທາ, ແຕ່ຂ້ອຍຍັງບໍ່ໄດ້ກັບຄືນໄປໂບດເທື່ອ ນັບຕັ້ງແຕ່ຕອນເປັນໄວລຸ້ນ.
ວັນອາທິດມື້ໜຶ່ງ ຂ້ອຍກຳລັງຊັກເຄື່ອງຢູ່ບ້ານຂອງເອື້ອຍຂ້ອຍ ຊື່ ປີຊາລາ, ຜູ້ເປັນສະມາຊິກທີ່ເຂັ້ມແຂງຂອງສາດສະໜາຈັກ. ຂະນະທີ່ຂ້ອຍຢູ່ທີ່ນັ້ນ, ເອື້ອຍປີຊາລາ ໄດ້ເຊື້ອເຊີນຂ້ອຍໃຫ້ໄປໂບດກັບຄອບຄົວຂອງລາວ—ມັນເປັນການເຊື້ອເຊີນເທື່ອທຳອິດ ເປັນເວລາ 15 ປີ.
ທຳອິດຂ້ອຍກໍລັງເລໃຈ, ແຕ່ຄືນກ່ອນນັ້ນ, ຂ້ອຍໄດ້ອ້ອນວອນຫາພຣະເຈົ້າເພື່ອສະແດງໃຫ້ຂ້ອຍເຫັນວິທີທີ່ຈະເຂົ້າໃກ້ພຣະອົງຫລາຍກວ່າເກົ່າ. ຫລັງຈາກທີ່ໄດ້ຄິດໄປຄິດມາ, ຂ້ອຍກໍໄດ້ຕົກລົງໃຈວ່າ, “ໃຫ້ລອງໄປຟັງ ແລະ ໄປເບິ່ງດ້ວຍຕົວເອງ ໃນຖານະເປັນຜູ້ໃຫຍ່ ດ້ວຍໃຈ ແລະ ດ້ວຍຕາຂອງຕົວເອງ.”
ຂະນະທີ່ພວກເຮົາຢູ່ໃນກອງປະຊຸມສິນລະລຶກ, ຂ້ອຍໄດ້ສັງເກດເຫັນໃບປະກາດຢູ່ທີ່ກະດານໃນວັນອາທິດ ບອກເຖິງຫ້ອງຮຽນການກຸ້ມຕົນເອງ ຝ່າຍການເງິນສ່ວນຕົວ. ຂ້ອຍຍັງບໍ່ພ້ອມທີ່ຈະກັບໄປໂບດ, ແຕ່ຂ້ອຍຮູ້ສຶກຢາກໄປຮ່ວມຫ້ອງຮຽນ 12 ອາທິດ. ໂດຍທີ່ໄດ້ຮັບການສະໜັບສະໜູນຈາກເອື້ອຍ ແລະ ອ້າຍເຂີຍຂອງຂ້ອຍ, ຂ້ອຍກໍເລີຍຈົດຊື່ເຂົ້າຮຽນ, ຫວັງພຽງແຕ່ຢາກຮູ້ຈັກວິທີງົບປະມານເງິນ ແລະ ຈ່າຍໜີ້ສິນເທົ່ານັ້ນ. ເຖິງຢ່າງໃດກໍຕາມ, ຫ້ອງຮຽນນັ້ນໄດ້ປ່ຽນແປງຂ້ອຍທາງວິນຍານ.
ຂ້ອຍປະຫລາດໃຈກັບຂ່າວສານທາງວິນຍານ ໃນສອງອາທິດທຳອິດຂອງຫ້ອງຮຽນ, ແຕ່ອາທິດທີສາມ, ຂ້ອຍໄດ້ເຕັມໄປດ້ວຍຄວາມຮູ້ສຶກທີ່ໄດ້ຮັບການຢືນຢັນວ່າ ຂ້ອຍຢູ່ຖືກບ່ອນແລ້ວ ແລະ ກຳລັງໄດ້ຍິນຄວາມຈິງໃໝ່ ທີ່ຄຸ້ນເຄີຍມາກ່ອນ. ຂ້ອຍໄດ້ອອກຈາກຫ້ອງຮຽນ ແລະ ໄດ້ຂັບລົດໄປຫາເອື້ອຍປີຊາລາທັນທີ. ທັງນ້ຳຫູນ້ຳຕາ, ຂ້ອຍໄດ້ຖາມລາວວ່າ, “ເຮັດແນວໃດຂ້ອຍຈຶ່ງຈະສາມາດໄດ້ຮັບຄວາມຮູ້ສຶກແບບນີ້ຫລາຍຕື່ມອີກໃນຊີວິດຂອງຂ້ອຍ?” ລາວໄດ້ຕິດຕໍ່ຫາຜູ້ສອນສາດສະໜາ ເພື່ອໃຫ້ເລີ່ມຕົ້ນສິດສອນຂ້ອຍ.
ສະມາຊິກຢູ່ໃນຫ້ອງຮຽນການກຸ້ມຕົນເອງ ໄດ້ມາຟັງບົດຮຽນຂອງຜູ້ສອນສາດສະໜານຳຂ້ອຍ ແລະ ສະໜັບສະໜູນຂ້ອຍ. ເຂົາເຈົ້າມີຜົນກະທົບອັນຍາວນານທາງວິນຍານຕໍ່ຂ້ອຍ ແລະ ໄດ້ຊ່ວຍຂ້ອຍພັດທະນາປະຈັກພະຍານເຖິງພຣະກິດຕິຄຸນ ແລະ ສາດສະດາໃນຍຸກໃໝ່.
ໃນໄລຍະນັ້ນ ຈົນເຖິງເວລາທີ່ຂ້ອຍຮຽນຈົບຫ້ອງຮຽນ, ຂ້ອຍໄດ້ປ່ຽນແປງຫລາຍຢ່າງທາງໂລກ ແລະ ທາງວິນຍານ. ຂ້ອຍໄດ້ເລີ່ມຕົ້ນເຮັດວຽກນຳບໍລິສັດທີ່ດີແຫ່ງໜຶ່ງ, ແລະ ຂ້ອຍໄດ້ຊຳລະໜີ້ສິນຫລາຍຢ່າງ.
ແຕ່ພອນທີ່ເລິກຊຶ້ງ ແລະ ຫວານຊື່ນຫລາຍກວ່າທີ່ມາຈາກຫ້ອງຮຽນນັ້ນ ແມ່ນຮ່ວມດ້ວຍການສ້າງມິດຕະພາບທີ່ງົດງາມ, ການພັດທະນາຄວາມສຳພັນໃນທາງບວກກັບອະທິການທີ່ໃຫ້ກຳລັງໃຈ, ການພົບເຫັນປະຈັກພະຍານເລື່ອງການຈ່າຍເງິນສ່ວນສິບ, ການຮັບເອົາໃບຮັບຮອງເຂົ້າພຣະວິຫານຂອງຂ້ອຍ, ການໄດ້ຮັບຂອງປະທານສັກສິດ, ແລະ ການໄດ້ເຫັນລູກຜູ້ໃຫຍ່ສອງຄົນຂອງຂ້ອຍຮັບບັບຕິສະມາ.
ຂ້ອຍຍັງຢູ່ໃນເສັ້ນທາງກັບຄືນສູ່ການກຸ້ມຕົນເອງຢູ່ໃນເວລານີ້, ແຕ່ສ່ວນທີ່ເຫລືອຢູ່ໃນເສັ້ນທາງຂອງຂ້ອຍ, ຂ້ອຍຈະທະນຸຖະໜອມບົດຮຽນທີ່ຂ້ອຍໄດ້ຮັບ ແລະ ມິດຕະພາບທີ່ຂ້ອຍໄດ້ສ້າງ.
“ຂ້ອຍອອກຈາກຫ້ອງຮຽນແຕ່ລະເທື່ອດ້ວຍຄວາມຮູ້ສຶກວ່າມີຄົນຮັກຂ້ອຍ”
ຕອນນາງໄດ້ໄປຢ້ຽມຢາມບໍລິເວນພຣະວິຫານເຊົາເລັກ, ຢູທາ, ກັບທ້າວວິນເຊັນ ລູກຊາຍອາຍຸ 10 ປີຂອງນາງ, ໃນເດືອນທັນວາ ປີ 2016, ນາງແຄຕີ້ ຟັ້ງ ໄດ້ຖືຕົວເອງວ່າເປັນຄົນທີ່ “ບໍ່ເຊື່ອເລື່ອງພຣະເຈົ້າ.” ນາງໄດ້ອອກຈາກສາດສະໜາຈັກຕອນນາງມີອາຍຸໄດ້ 16 ປີ, ກາຍເປັນແມ່ລ້ຽງລູກດ່ຽວ ຕອນມີອາຍຸໄດ້ 17 ປີ, ໄດ້ເລີ່ມຕົ້ນສັກລາຍ, ແລະ ດື່ມກາເຟ. ແຕ່ໃນລະຫວ່າງການໄປຢ້ຽມຢາມບໍລິເວນພຣະວິຫານເທື່ອນັ້ນ, ທ້າວວິນເຊັນໄດ້ຮູ້ສຶກເຖິງພຣະວິນຍານບໍລິສຸດ ແລະ ໄດ້ບອກແມ່ຂອງລາວວ່າ ລາວຢາກຮັບບົດຮຽນຈາກຜູ້ສອນສາດສະໜາ.
ເຖິງແມ່ນວ່ານາງຕ້ອງທຳງານສອງບ່ອນ, 80 ຊົ່ວໂມງຕໍ່ອາທິດ, ແຕ່ນາງແຄຕີ້ໄດ້ສຶກສາພຣະກິດຕິຄຸນກັບທ້າວວິນເຊັນ, ຄົ້ນຫາຄຳຕອບຕໍ່ຄຳຖາມຂອງລາວ ໃນໄລຍະທີ່ຜູ້ສອນສາດສະໜາໄປຢ້ຽມຢາມ. ເມື່ອເຖິງລະດູແລ້ງປີ 2017, ນາງໄດ້ເລີ່ມຕົ້ນໄປໂບດ, ບ່ອນທີ່ນາງໄດ້ຍິນກ່ຽວກັບຫ້ອງຮຽນການກຸ້ມຕົນເອງຂອງສາດສະໜາຈັກ.
“ຂ້ອຍຮັບຮູ້ວ່າ ມັນເປັນບາງສິ່ງທີ່ສາມາດຊ່ວຍເຫລືອຂ້ອຍໄດ້,” ນາງເວົ້າ. “ບາງທີຂ້ອຍບໍ່ຈຳເປັນຕ້ອງທຳງານສອງບ່ອນ ຫລື ເພິ່ງອາໄສພໍ່ແມ່ຂອງຂ້ອຍ ໄປຕະຫລອດຊີວິດຂອງຂ້ອຍ.”
ນາງແຄຕີ້ເອີ້ນຫ້ອງຮຽນຂອງນາງວ່າ “ເປັນການເພີ່ມຄວາມເຂັ້ມແຂງໃຫ້ແກ່ທາງໂລກ ແລະ ທາງວິນຍານຢ່າງໜ້າເຫລືອເຊື່ອ,” ບໍ່ພຽງແຕ່ເປັນເພາະສິ່ງທີ່ນາງໄດ້ຮຽນຮູ້ເທົ່ານັ້ນ ແຕ່ເປັນເພາະວິທີທີ່ກຸ່ມກຸ້ມຕົນເອງຮັບເອົານາງ ແລະ ປະຕິບັດສາດສະໜາກິດຕໍ່ນາງນຳອີກ.
© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, August 2020. Laotian. 16723 331