Buambi kupitshila ku Budikadidi

Diambuluisha dia bakuabu bua bikala badikadila didi diumvuija difila ne dienza buambi mu ngikadilu wa Mukalenga.

Babungi ba ku bidimba bia mêku etu, balunda betu ne bena mutumba betu badi bikala baleja dianyisha dia kuikala badikadila menemene. Kukuata kua mudimu ne lungenyi lua Budikadidi bua Ekelezia,bidimba bia Ekelezia mbipeta mishindu ya kusadila, kukuba ne kusamba mu kubenesha bakuabu ne tunungu tudi tutuala “ditekemena dinena, ditalala ne dilubuluka.”¹

“Mvua mu Nzubu”

Kudi Chrissy Kepler wa ku Arizona mu Etats Unis d Amerique

Mvua ne lutatu lua makuta panyima pa difua dia dibaka, ntêta bua kupeta mushindu wa kupingana ku mudimu panyima pa bidimu muanda mukulu bimvua muikala mamu wa kumbelu. Mvua kabidi ne lutatu mu Nyuma, nkeba bulelela ne ditabuja, nansha mumvua tshiyi muela dikasa munda mua nzubu wa tshitendelelu katsha ku bunsongakaji buanyi.

Dimua Dialumingu mvua nsukula bilamba ku nzubu wa yaya wanyi, Priscilla, uvua muikala tshidimba tshia bukola tshia Ekelezia. Pamvua koku aku, Priscilla wakambikila bua kuya mu ekelezia ne dîku dienda—dibikila dianyi dia kumpala panyima pa bidimu bipita 15.

Ngakadi ne kudikanda kumbangilu, kadi mu muladilu, ngakadi musengelela Nzambi bua andeja mushindu wa mema kuikala pabuipi Nenda. Panyima pa mema mumvua makokianganyi munda, Ngakakosoloja se, “Buatshinyi kubenga kuya bua kumvua ne kumona nkayeba bu muntu mukola muikala ne moyo ne mesu?”

Patuvua mu tshisangilu tshia biadidia bia tshijila, Ngakamona mu mabeji a kubalulula a Dialumingu amanyisha bua dilongesha dia budikadidi pa mpetu ya nkaya. Ntshivua pabuipi bua kupingana mu ekelezia to, kadi mvua ndiumvua mukokibua ku mbingu 12 ya dilongesha. Ku makankamiki a yaya wanyi ne bukonda mulume, ngakadifundisha, mu ditekemena dia kulonga anu mushindu wa kuenza ndongamu wa lupetu ne kufuta kua dibanza dianyi. Kadi malongesha akankudimuna mu Nyuma.

Ngakadi mukemeshibua ku mikenji ya nyuma ya mbingu ibidi ya kumpala, kadi munkatshi mua dilongesha disatu, ngakadi muikala muujibua ne ngumvuilu wa bujadiki bua se mvua mu Nzubu ne mvua ngumvua malelela mapiamapia kadi mikala a pa tshibidilu. Ngakumbuka mu kalasa ne mema kuya ngendesha bua kumona Priscilla. Ngakamukonka mu binsonji ne, “Mushindu kayi undi mua kupeta nguvuilu wa nunku wabungi mu moyo wanyi?” Wakalongolola dilua dia ba mishionyi bua babangisha kundongesha.

Bidimba bia mu kalasa kanyi ka budikadidi biakalua mu malongesha a ba mishionyi anyi ne biakantua mpanda. Bakadi benza tshipeta tshia bukola mu buikadianganyi buanyi mu nyuma ne bakangambuluisha bua kutantshisha bujadiki buanyi bua lumu luimpa ne bua baprofeta ba mpidieu.

Mu mutantshi umvua muikala ndonga malongesha, ngakashintuluka bikola mu mubidi ne mu nyuma. Ngakabangisha mudimu mupiamupia mu ditanda dimpa ne ngakafuta bintu biabungi bimvua musomba.

Kadi mabenesha a bujitu ne a mashema avua mafuma ku malongesha, avua mafuka kabidi bulunda buimpa, ditanta dia malanda majalama ne muepiskopo mukankamiki, dikeba dia bujadiki pa tshia dikumi, dipeta dia dianyishi dia ku ntempelo dianyi, dikala doté ne dimona dia bana banyi bakulumpa babatijibua.

Njila wanyi wa budikadidi utshidi anu utungunuka, kadi bua matuku adi manshadila mu luendu luanyi, nentamba kunanga malongesha amvua mulonga ne malunda amvua muenza.

Bikila, Ikalapu, Kankamika

Bua kuambuluisha Bansantu ba Matuku a Ndekelu bua bafika ku budikadidi—mu lupetu ne mu nyuma—Ekelezia wakabangisha ndongololu wenda wa budikadidi mu 2014. Panyima pa muaku wa lulamatu wa ntuadijilu, badi mu kalasa badi basungula munkatshi mua malongesha anayi mashilangana a mbingu 12.

Bualu bisumbu bia budikadidi bidi bikala bu bipangu bia mibelu, bidi bifila mushindu muimpa wa kuandamuna ku majinga a bakuabu a lupetu, a dilonga, a midimu ne a nyuma. bidimba bia tshisumbu bidi bidilongesha, bidibela ne bidikankamika umua ne umua. Bidi kabidi bishintakajangana ngenyi ne bidimanyina umua ne umua.

Sambila bua kumanya bidimba bia dîku, balunda anyi bena mutumba baudi mua kubikila ku kalasa ka budikadidi ne ikalapu nabu. Uvuluka bua se tunungu tua budikadidi tudi mua kubenesha bana bonso ba Nzambi, nansha bobu bikala bidimba bia Ekelezia anyi to.

“Mvua Ngumbuka Kalasa Konso Mudiumvua Munangibua”

Pavua Katie Funk mukumbula Ntempelo wa Square mu Salt Lake City, ku Utah, ne muanende Vincent wa bidimu 10 mu Ngondo wa Dikumi ne muibidi 2016, wakadiumvua “bu muntu muimpe kayi bualu.” Uvua mumbuka mu Ekelezia pavuaye ne bidimu 16, ne kuluaye mamu mudisombela pavuaye ne bidimu 17, kubangaye kudifundisha pambidi ne kubangaye kunanga dinua dia kafee. Kadi mu tshikondu tshia kukumbula Ntempelo wa Square atshi, Vincent wakumvua Nyuma Muimpa ne kukonkaye Mamuende neudi mua kuangata malongesha a ba mishionyi.

Nansha muvua Katie muikala ne midimu ibidi, imulomba meba 80 mu lubingu, wakalonga lumu luimpe ne Vincent, wakasemena pabuipi ne mandamuna a ku nkonko yenda kupitshila ku makumbula a bamishionyi. Mu tshikondo tshia luya tshia mu 2017, wakabanga kuya mu bisangilu bia Ekelezia, ne momu amu wa kalonga bua malongesha a Ekelezia a budikadidi.

Wakamba ne “ngakajandula bua se kuvua tshintu tshivua mua kungambuluisha.” “Pamuapa ntshivua dijinga ne kuenza midimu ibidi to anyi kueyemena baledi banyi bua matuku adi mashala bua moyo wanyi.”

Katie wakamba bua kalasa kenda ne “ka dikema mu dikankamika mubidi ne nyuma,” kabiyi anu bualu bua bivuaye mulonga, kadi kabidi bua mushindu uvua tshisumbu tshienda tshia budikadidi tshimuitaba ne tshimukumbula.

Mushindu Kayi Uudi Mua Kuambuluisha

Eyi idi ngenyi ya kudi Katie bua kumanya mushindu utudi mua kuenza bua se ndongamu wa Ekelezia wa budikadidi alua mushindu wa kuenza buambi mu nyuma ne mu mubidi:

“Tuaku mpanda ne kankamika. Tshisumbu tshianyi tshiakantua mpanda mu ngikadilu wa se mvua ngumbuka mu kalasa konso mudiumvua munangibua.”
“Fila mamanya eba. Malu malulama ne kudiunzulula kutuvua naku bua umua ne umua kuakuvuija mioyo yetu bimpa. Kuakumanya nansha udi ubeneshibua ku biwafila to.”
“Ikala wakula. Ndi ngakula bualu bua mushindu udi moyo wanyi muikala bimpa bikola bualu ndi mfuta tshia dikumi ne nya mu disambila. Ndi nya ne mukanda wanyi wa Mpentu ya Nkaya mu Budikadidi ku mudimu bu tshikudimunyi tshianyi tshia ngikadilu. Padiku mushindu, ndi ntangalaja tumua tua ku tunungu tuawu ne bakuabu.”
“Ndaku mu kalasa ka budikadidi bueba nkayeba, kadi tangila bakuabu badi mua kuikala dijinga ne diambuluisha dieba. Mvua mpangila nkatshinkatshi ya kalasa bua mashintuluka ku mudimu wanyi, kadi bidimba bia mu tshisumbu bivua biyukila nanyi ne binkankamika. Bivua bia dikema bua kudiumvua muikalamu nansha pamvua ntshiyi momu.”

© 2020 kudi Intellectual Reserve, Inc. All rights reserved. Mupatula mu USA. Dianyisha mu Angele: 6/19. Dianyisha dia dikudimuna: 6/19. Dikudimuna dia Ministering Principles, August 2020. Tshiluba. 16723 760