“Jerbal in Karejar ikkijeen Un̄n̄are Peid Make,” Liaona, O̧kwōj 2020
Pedped ko an Jerbal in Karejar, O̧kwōj 2020
Jerbal in Karejar ikkijeen Un̄n̄are Peid Make
Jipan̄ ro jet n̄an un̄n̄are peier make ej bōk eddoin im jerbal in karejar ilo wāween eo an Irooj.
Elōn̄ iaan ro ilo baam̧le eo ad, ro m̧ōttad, im ro rūtūrūr rej ikdeleel n̄an un̄n̄are peier make. Kōjerbale jibadbad eo kōn un̄n̄are peid make an Kabūn in, membōr ro ilo Kabun̄ in rej kappukot iien ko rem̧m̧an n̄an jipan̄, lale, im jerbal in karejar ilo aer kōjeraam̧m̧an ro jet kōn katak ko me rej bōktok “eļap kōjatdikdik, aenōm̧m̧an, im wōnm̧aanļo̧k.”1
“Iaar Pād Kapijuknen”
Jān Chrissy Kepler, Arizona, USA
Ikar lukkuun apan̄ kōn jāān kobaļo̧k aō kar tin jepel, kajjeon̄ in bar pukōt iaļ ļo̧k n̄an bar jerbal ālkin aō kar juon m̧am̧a eo ej pād wōt m̧weeo ium̧win ruwalitōk iiō ko. Ikar barāinwōt apan̄ ilo mour in jetōb, kappukot m̧ool im tōmak, mekarta ijjan̄in kar bar juuri lowaan m̧ōn jar ko jān ke ikar juon jodikdik.
Juon Jabōt ikar kwaļkwōļ ilo m̧weeo im̧ōn sister eo aō, etan Priscilla, juon membōr eo eniknik ilo Kabun̄ in. Ke ikar pād m̧weeo, Priscilla ekar karuwainene n̄a n̄an etal im jar ippān baam̧le eo an—karuwainene eo aō jinointata ium̧win 15 iiō ko.
Ikar āliklik jinoin, im bon̄ōn eo m̧okta, ikar akweļap ippān Anij n̄an kwaļo̧k n̄an n̄a elmen aō epaakeļo̧k E. Ālkin aō en̄jake ke ij aikuj bar rool im jar, ikar kōjemļo̧k, “Ta eo bwe in jab etal bwe in make ron̄ im loe kōn n̄a make āinwōt juon rūtto kōn būruō make im meja?”
Ke kōm kar pād ilo iien jar ļapļap eo, ikar loe juon peba ilo bo̧o̧t ilo Jabōt ej kōjjelā kōn juon kūlaaj in un̄n̄are peid make ikkijeen jāān ko ad make. Ikar jab pojak in ro̧o̧l n̄an jikin jar, ak ikar kōņaan bōk koņaaō ilo kūlaaj eo ej kōm̧m̧an iumwin 12-wiik. Kōn naan in rōjan̄ eo an sister eo aō im brother in law eo aō, ikar jeik eta, ikar katak wōt kilen bajet im kōļļāik m̧uri ko ad. Bōtaab, kūlaaj in, ekar ukōt eō ilo mour in jetōb.
Ikar lukkuun bwilōn̄ kōn ennaan ko ilo jetōb ilo wiik ko ruo ilo kūlaaj eo, ak wiik eo kein kajilu, ikar obrak kōn juon en̄jake in kam̧ool bwe ikar pād ilo kapijuknen im ron̄ m̧ool ko rekāāl ak em̧ōj kar ron̄ kaki juon kōttan. Ikar etal jān kūlaaj eo im kajjuļo̧k ippān Priscilla. Kōn dān in kimjalal, ikar kajjitōk ippān, “Elmen aō bōk eļapļo̧k en̄jake?” Ekar pepe ippān mijenede ro n̄an jino katakin n̄a.
Ro uwaan kūlaaj in un̄n̄are peid make ro rekar itok n̄an iien ekatak ko aō ippān mijenede ro im rekar jipan̄ n̄a. Rekar jipan̄ ilo mour in jetōb eo aō im jipan̄ n̄a ejaake juon naan in kam̧ool kōn gospel in im rikanaan ro rainin.
Ilo iien eo ekar bōk iien n̄an aō kadedeļo̧k kūlaaj eo, ikar kōm̧m̧ane jet oktak ko ilo mour in kanniōk im mour in jetōb. Ikar jino juon jerbal ilo juon kampani em̧m̧an, im kōllā jet loen.
Bōtaab ilo tumwiļlalin, kōjeraam̧m̧ōn ko rekar itok jān kūlaaj eo āinwōt ekoba jem̧jerā ko raiboojoj, ejaake jem̧jerā ko rem̧m̧an kōn naan in rōjan ko an bisop, bōk juon naan in kam̧ool kōn juon mōttan jon̄oul, bōke peba in mālim n̄an deļo̧n̄e tampeļ eo aō, kar bōk menin letok kwojarjar an tampeļ, im kar loe ruo iaan ajri ro nejū rerūtto kar peptaij.
Iaļ eo aō n̄an un̄n̄are peid make ej wōnm̧aanļo̧k wōt, ak ilo jemļo̧kin iaļ eo aō, inaaj keememej aolep katak ko ikar ekkatak im jem̧jerā ko ikar ejaaki.
“Ikar En̄jake Iakwe ilo Aō Rool Jān Kajjojo Kūlaaj”
Ke ikar loļo̧k Temple Square ilo Salt Lake City, Utah, ippān ļaddik eo nejin 10 an iiō, Vincent, ilo Tijem̧ba 2016, Katie Funk ekar loe ilo e make bwe “ejjeļo̧k anij.” Ekar etal jān Kabun̄ in ke ej 16 an iiō, kar erom̧ juon m̧am̧a ke ej 17 an iiō, kar jino eo̧o̧, im ekar jino an̄n̄ūri coffee. Ak ilo iien loļo̧k eo n̄an Temple Square, Vincent ekar en̄jake Jetōb Kwojarjar im kajjitōk ippān jinen eļan̄n̄e emaron̄ bōki katak ko jān mijenede ro.
Jekdo̧o̧n jerbal ko ruo an, 80 awa ilo wiik in jerbal ko, Katie ekar katak kōn gospel eo ippān Vincent, kappukot uwaak n̄an kajjitōk ko an ijjeļo̧kin an mijenede ro lotok e im katakin e. Ke kar jōm̧ar ilo 2017 eo, kōrā in ekar jino etal n̄an kweiļo̧k ko an Kabun̄ in, ijo ekar ekkatak kōn kūlaaj in un̄n̄are peid make.
“Ikar kile bwe ekar wōr juon men eo emaron̄ kar jipan̄ n̄a,” ekar ba. “Bolen imaron̄ jab lukkuun aikuji ruo aō jerbal ak pedped ioon jinō im jema ilo aolepān mour eo aō.”
Katie ekar ņae etan kūlaaj in “lukkuun kōkajoor mour in kanniōk im jetōb,” ejjab wōt kōn ta ko ekar ekkatak ak barāinwōt kōn an ro ilo kurup eo an kar bōke im jerbal in karejar n̄an e.
© 2020 jān Intellectual Reserve, Inc. Aolep jim̧we ko rej pād ie. Kar būriin ilo USA. Kōmālim ilo kajin Pālle: 6/19. Kōmālim an ukook: 6/19. Ukook eo an Katak ko an Jerbal in Karejar, O̧kwōj 2020. Marshallese. 16723 874