Odingel el okiu a Siungel a Klechad

Olengeseu er a rebebil el mo meduch el di tir el mesiou er tir a meruul e olisechakl el ngara rolel a Rubak.

Betok a rechedal a telungalek er kid, resechelid, me a retonari er kid a sorir el mo meduch el di tir el mesiou a klechad er tir. Ousbech er tia el techall er a siungel a klechad er a Ikelesia, e a rechedal a Ikelesia osiik a techall el mo mesiou, omekerreu, e olisechakl el tir a omekngeltengat er a rebebil el olab a osisechakl el ngii a mo uchul a “klou el deureng, budech, e omakes.”¹

“Ak Mla er a Blik”

Mla er a Chrissy Kepler, Arizona, USA

Ak kmal mle kosekodel er a udoud el okiuellel a delort el chebechiil, e milasem el osiik a rolek el muut el mo oureor uriul er a di blek kiei er a blai el chedil el eai el rak. Ak dirrek el kmal mle chuarm er a chedaol el tekoi er a reng, osiik a klemerang me a klaumerang, el uaisei el dirkak a ta mek luut el soiseb er a chelsel a ikelesia er a dirke ngeasek.

A ta er a Sandei ak milsilek er a blil a udelek, er a Priscilla, el ngii a kmal meses el chedal a Ikelesia. Sera temek el ngar er sei, a Priscilla a mle siotai er ngak el obengkel el mo er a ikelesia el obengkel a telungalek er ngii—kot el siotai er ngak er a uriul er a teriuch me a eim el rak.

Ak mle oumededenger er a renguk er a kot, e ng di a kesus er ruchei, e ak milngeluch er a Dios mel lochotii er ngak el kmo ng mekera e ak mo kmeed er Ngii. Uriul er a kulechesuar er tial ouralm me sils er renguk, ak miltebengar, “Ngera meng bai diak bong mek renges ek ues er a medak me a renguk?”

Me a ki ngara temel a sakrament, e ak tilab osengek er a babier el mle llechukl er a kboub er a subed er a Sandei el kirel a omesubel a siungel a klechad er a rolel a udoud. Ng dimlak kldmokl el muut el mo er a ikelesia, e ng di ak mlurrimel el kirel tia el teruich me a eru el sandei el omesuub. Ngokiu a tekoi er a omekduch el reng er a chudelek me a bechil, e ak lileliang a ngklek, e olsingch el di mo mesuub el kmo ng mekera a bok meduch er a rolel a omengitel me a omengedechuul el udoud me a dirrek el omengkad el blals. Aika el omesuub, a milkera e bai, ngildechak er a chedaol el tekoi er a reng.

Ak kmal mle mechas a renguk er a chedaol el klumech er a ike el kot el sandei er a omesuub, e ng di sel ongedei el temel omesuub, e ak mlo klou melechesuar el kirel a ulterrekokl el kmo ak mla er a blik e ulerrenges a beches e ng di ngdi osisiu el klemerang. Ak milrael e millemalt el omekall el mo mesa Priscilla. Ak lilangel, e ulker er ngii el kmo, “Ng mekera e ak mo blechoel el melechesuar er a cheuaitiang er a chelsel a klengar er ngak?” Ngii a kildmeklii me a remisionari a ulemuchel el olisechakl er ngak.

Tirke el ulbengkek el mesuub el kirel a siungel a klechad a mlei er a temel a omesubek ngak me a remisionari e milngelim er ngak. Te rirelii a diak a ulebengelel el omelodech er a chedaol tekoi er a renguk e ngilsukak el mo er ngii a olechotel a klaumerang er ngak er a ebangkelio me a re profet er aika el uriul klebesei.

Chelsel a team el chiloit el mo merekui er tia el omesuub, e ak ngilodech a bebil er a tekoi er a klechad er ngak me a chedaol tekoi er a renguk. Ak ulemuchel el oureour el obengkel a kmal ungil el kombalii, e mlo sebechek el kokad a bebil er a belsek.

E ng di a dmolech, e meang el klengeltengat a mlei er se el omesuub a uldimukl er ngii a meruul a klebokel el deleongel, meruul a melemalt el deleongel el obengkel a kmal omekduch el reng el bisob, sikii a olechotel a klaumerang er a tenget, nguu a babier er a kengei el mo soiseb er a templo, nguu a klengeltengat er a templo, e mesterir a reteru el meklou el ngelekek el mo metecholb.

A rolek el mo er a siungel a klechad a dirk meleketek, e ng di a rokir el medechel el omrollek, e ak kmal mo oumadelchad aike el rokui el suobel el ngak a mla smuub me a deliongel el ngak a mla remuul.

Siotai, Ngar er Ngii, Melisiich

Olengeseu er a Uriul el klebesei el Santo el mo meduch er a tekoi er a siungel a klechad—el osisiu er a tekoi er a dour me a chedaol tekoi er a reng—e a Ikelesia a ulemuchel er a omengedmeklel a siungel a klechad er a rak er a 2014. Uriul er a chedaol el omesodel, e tirke el tir a uldimukl er ngii a melilt er a eua el bedengel a omesuub er a chelsel a teruich me a eru el sandei.

E le cheldebechel er a siungel a klechad a ruul el ua le menguteling, te odars a mal ungil el techall el mo olisechakl er a rebebil a tekoi er a ngelsengesel a udoud, skuul, berobesong, me a chedaol el tekoi er a reng. A rechedal a cheldebechel a mesuub, mellach, e olengeseu er a tang me a tang. Te dirrek el ouchais a ungil uldasu e tir a ngerchelir el mesmechokl er a tang.

Moluluuch el kirel a kmo ng techa el chedal a telungalek, resechelim, me a lechub e ng tonari er kau a sebechem el siotai er tir el me er tia el omesubel a siungel a klechad, e bom teloi el obengterir. Bo molbedebek el kmo a osisecheklel a siungel a klechad a sebechel el omekngeltengat er a rokui el rengelekel a Dios, el diak el ior er a kmo te chedal a Ikelesia me a lechub.

“Ak Tilobed er a Bek el Klas el Melechesuar a Beltikelreng”

Se er a loldingel er a Temple Square er a Salt Lake City, Utah, el obengkel a teruich a rekil ngelekel sechal, el Vincent, er a Ongeteruich me a Ongeru el Buil er a rak er a 2016, a Katie Funk a ulemes er ngii el kmal mle “ungil er a rengul el diak el oumerang er a Dios.” Ng tilobed er a Ikelesia er a le teruich me a elollem a rekil, e mlo mesobil er a teruich me a euid a rekil, e ulemuchel el melengod er ngii, e mocha soal melim a kohi. E ng di chelsel sel temir el oldingel er a Temple Square, e a Vincent a ulemelchesiu er a Chedaol Reng e ulengit er a delal me bol losuub el obengterir a remisionari.

Ng dimlak el ior er a eru el urerel, el okai el sikang er a bek el sandei, a Katie a milsuub el kirel a ebangkelio el obengkel a Vincent, el osiik a nger el mo er a keril er a temel a ongdibel el obengterir a remisionari. A bocha el summer er a 2017, ngii a mocha ngara ongdibel er a Ikelesia, el ngii a siluub el kirel a omesubel a siungel a klechad el okiu a Ikelesia.

“Ak milchesuar el kmo ng tekoi el ngii a mle sebechel ngosukak,” ngii a millekoi. “Ng locha mo diak a ultutelel el kirek el oureor a eru el ureor me a lechub ek kulsirs er a rechad er a blik er a rokir el klengar er ngak.”

A Katie a ulemekedong er a omesubel “el mle klou el omelisiich er a tekoi er a klechad me a chedaol tekoi er a reng,” el diak el dil ior er a ngera ble lesuub ng dirrek el mle ior er a rechedal a cheldebechel el bla er ngii el tir a mle kongei e olisechakl er ngii.

Ng Mekera e Sebechem el Olengeseu

Aika a bebil er a uldasu el mla er a Katie el kmo ng mekera e kid a sebeched el rullii a Siungel a Klechad er a Ikelesia a mo techall el mo olisechakl el kirel a chedaol tekoi er a reng me a di klechad:

“Bom molengeseu e momekduch a reng. A rechedal a cheldebechel er ngak a ulngeseu er ngak el ngak a tilobed er a klas e milchesuar el mle betik a rengrir er ngak.”
“Mouchais a tekoi el ngii a mla duubech el leko er kau. A klemerang me a di mle beot el ouchais er a delongelam a riruul a rengmam el kmal mo ungil. Ng kmal diak modengei el kmo ng techang a mo sebechel el ngmai a klungiaol er a tekoi el kau a mo ouchais.”
“Bo beot el mengedecheduch. Ngak a kmal di beot el mengedecheduch el kirel a kmo ng mekera e a klengar er ngak a kmal ungil le ngak el harau a tenget e mo er a ikelesia. Ak nguu a babier er ngak er a Personal Finances for Self-Reliance el obengkek el mo er a urerek el kureor el behavioral therapist. Se el ungil temel, e ak ouchais a bebil er a osisechakl el mo er a rebebil.”
“Di lekau el mo er a omesubel a siungel a klechad el kirem, e ng di momes el kirir tirke el bebil el locha kmal ousbech er kau. Ak mlo diak el sebechek el mo er a bebil er a temel omesuub e le ng ngedechel a temek er a ureor a uchul, e ng di a rechedal a cheledebechel el kbla er ngii a mle blechoel el mengedecheduch er ngak e mle oieng er ngak. Ng kmal mle mengasireng el blo kulchesuar el kmo ngak a mle tebechedel el dirrek er a ike el taem el ngak a dimlak bong.”

© 2020 lokiu a Intellectual Reserve, Inc. Urrekodel a rokui el klisiich. Milluches er a USA. Kengei er a English: 6/19. Kengei er a Oidel: 6/19. Oidel a Osisechakl er a Odingel, Ongeai el Buil 2020. Palauan. 16723 881