Te aupurura’a nā roto i te fa’arava’ira’a iāna iho

Te tauturura’a ia vetahi ’ē ’ia fa’arava’i ia rātou iho, ’o te hōro’ara’a ïa ’e te aupurura’a ’ia au i te rāve’a a te Fatu.

E rave rahi o tō tātou mau melo ’utuāfare, te mau hoa, ’e te mau ta’ata tupu e tītau nei ’ia riro ’ei ta’ata fa’arava’i iāna iho. Ma te fa’aohipa i te ’ōpuara’a nō te fa’arava’ira’a iāna iho, tē ’ite rā te mau melo o te ’Ēkālesia i te mau rāve’a nō te tāvini, nō te ’atu’atu ’e nō te aupuru a ha’amaita’i ai rātou ia vetahi ’ē i te mau parau tumu ’o tē hopoi mai i « te ti’aturira’a rahi a’e, te hau ’e te haerera’a i mua ».¹

« Tei te fare au »

Nā Chrissy Kepler, Arizona, Fenua Marite

’Ua fifi au i te pae moni i muri mai i te hō’ē fa’ata’a-’ē-ra’a, ma te tāmata i te ho’i i ni’a i te ’ē’a nō te ravera’a ’ohipa i muri iho i te rirora’a ’ei metua vahine i te fare e va’u matahiti. ’Ua fifi ato’a vau i te pae vārua, i te ’imira’a i te parau mau ’e te fa’aro’o, noa atu ē, ’aita vau i ta’ahi fa’ahou i te ’avae i roto i te hō’ē fare purera’a mai tō’u feiā-’āpī-ra’a.

I te hō’ē sābati, tē pu’a ra vau i tā’u ’ahu i te fare o tō’u tuahine matahiapo, ’o Priscilla, hō’ē ïa melo itoito nō te ’Ēkālesia. ’A vai ai au i reira, ’ua ani mai ’o Priscilla iā’u ’ia haere i te fare pure ’e tōna ’utuāfare—tā’u tītau-manihini-ra’a mātāmua roa a 15 matahiti i teienei.

’Ua taiā ri’i au, terā rā, i te pō nā muri noa a’e, ’ua tāparu vau i te Atua ’ia fa’a’ite mai iā’u nāhea ’ia ha’afātata atu iāna ra. I muri a’e i te tahi tūrorirorira’a mana’o, ’ua fa’aoti au ē : « Nō te aha ’eiaha e haere e fa’aro’o ’e e hi’o nō ’oe iho ’ei ta’ata pa’ari ma tō ’oe iho ’ā’au ’e tō ’oe iho mata » ?

’A pārahi noa ai mātou i roto i te purera’a ’ōro’a, ’ua ’ite a’era vau i te hō’ē parau pia i roto i te parau fa’aara o te sabati ’o tē fa’a’ite ra i te hō’ē ha’api’ira’a nō ni’a i te fa’arava’ira’a iāna iho nō ni’a i te pae faufa’a moni a te ta’ata iho. ’Aita vau i ineine nō te ho’i i te purera’a, ’ua tupu mai rā te hina’aro rahi i roto iā’u e haere i taua ha’api’ira’a ra nō e 12 hepetoma. Ma te fa’aitoitohia e tō’u tuahine ’e e tō’u tao’ete, ’ua tāpa’o vau iā’u, ma te ti’aturi ē, e ha’api’i noa mai e nāhea e hāmani i te hō’ē tāpura ha’amau’ara’a i te pae faufa’a moni ’e ’ia ’aufau i te tārahu. ’Āre’a ra, ’ua fa’ahuru ’ē te mau ha’api’ira’a iā’u i te pae vārua.

’Ua ha’amaerehia vau e te mau parau poro’i pae vārua i nā ārea hepetoma e piti o te ha’api’ira’a, i te toru rā o te ha’api’ira’a, ’ua fa’a’īhia vau i te mana’o ha’apāpū ē, tei te fare nei au ’e tē fa’aro’o nei au i te mau parau mau ’āpī, e mau parau mātauhia rā. I tō’u fa’aru’era’a i te piha ha’api’ira’a, ’ua haere ’āfaro vau e hi’o ia Priscilla. Ma te ta’i, ’ua ui atu vau iāna, « Nāhea e noa’a hau atu ai iā’u i teie huru mana’o i roto i tō’u orara’a » ? ’Ua fa’anaho ’oia ’ia nehenehe i te mau misiōnare e ha’amata i te ha’api’i iā’u.

’Ua haere mai te mau melo o tā’u piha nō te fa’arava’ira’a iāna iho i roto i tā’u mau ha’api’ira’a misiōnare ’e ’ua turu mai iā’u. ’Ua riro rātou ’ei tumu taraire i ni’a i tō’u pae vārua ’e ’ua tauturu iā’u ’ia fa’ananea i te hō’ē ’itera’a pāpū nō ni’a i te ’evanelia ’e i te mau peropheta nō teie ’anotau.

I roto i te taime e ti’a ai iā’u e fa’aoti i te ha’api’ira’a, ’ua rave au e rave rahi mau tauira’a pae tino ’e pae vārua. ’Ua ha’amata vau i te hō’ē tōro’a ’āpī i roto i te hō’ē taiete maita’i, ’e ’ua ’aufau i te mau tārahu e rave rahi.

Terā rā, te mau ha’amaita’ira’a hōhonu mau ’e te pāpū mau tei tae mai nā roto mai i te ha’api’ira’a, ’o te tupura’a ïa i te auhoara’a nehenehe, te fa’ananeara’a i te hō’ē tā’amura’a maita’i ’e te hō’ē ’episekōpo e fa’aitoito, te ’itera’a mai i te hō’ē ’itera’a pāpū nō te tuha’a ’ahuru, te fāri’ira’a i tā’u parau fa’ati’a nō te hiero, te fāri’ira’a i tō’u ’ōro’a hiero, ’e te ’itera’a i tā’u nā tamari’i matahiapo e piti ’ia bāpetizohia.

Tē tāmau noa nei tō’u ’ē’a nō te fa’arava’ira’a iāna iho, terā ra, nō te toe’a o tō’u tere, e poihere au i te mau ha’api’ira’a tā’u i ’apo mai ’e i te auhoara’a tei roa’a mai iā’u.

’A ani, ’a haere, ’a ha’apūai

Nō te tauturu i te feiā mo’a i te mau mahana hope’a nei ’ia fa’arava’i iāna iho—i te pae moni ’e i te pae vārua—’ua ha’amata te ’Ēkālesia i tāna fa’anahora’a nō te fa’arava’ira’a iāna iho i te matahiti 2014. I muri mai i te hō’ē purera’a ’ōmuara’a, e ma’iti te mau ta’ata i rotopū e maha ha’api’ira’a ta’a ’ē nō e 12-hepetoma te roa.

Nō te mea ho’i ē, e ’ohipa te mau pupu fa’arava’ira’a iāna iho ’ei ’āpo’ora’a, e hōro’a te reira i te hō’ē rāve’a maita’i roa nō te aupuru ia vetahi ’ē i te pae moni, i te pae ha’api’ira’a, i te pae tōro’a ’ohipa, ’e i te mau hina’aro pae vārua. E ha’api’i mai te mau melo o te pupu, ’e e ’āparau, ’e e turu te tahi i te tahi. E fa’a’ite ato’a mai rātou i te mau mana’o ’e e mea ti’a te reira nō te tahi ’e te tahi.

’A pure ’o vai te mau melo o te ’utuāfare, te mau hoa, ’e ’aore rā te mau ta’ata tupu tā ’outou e nehenehe e ani atu ’ia haere mai i te ha’api’ira’a fa’arava’ira’a iāna iho, ’e ’a haere mai nā muri iho ia rātou. E ha’amana’o ra ē, e nehenehe te mau parau tumu nō te fa’arava’ira’a iāna iho e ha’amaita’i i te tā’ato’ara’a o te mau tamari’i a te Atua, noa atu ē, e melo ānei rātou nō te ’Ēkālesia ’e ’aore rā ’aita.

« ’Ua vaiiho vau i te mau piha tāta’itahi ma te mana’o ’ua herehia vau »

I tōna haerera’a e māta’ita’i i Temple Square i Roto Miti, i Utaha, ’e tāna tamaiti 10 matahiti, ’o Vincent, i te ’āva’e Tītema 2016, ’ua feruri ’o Katie Funk iāna iho ’ei, « ta’ata ’aita hō’ē a’e ti’aturira’a ». ’Ua fa’aru’e ’oia i te ’Ēkālesia i te 16ra’a o tōna matahiti, ’ua riro mai ’oia ’ei metua vahine ’ōtahi i te 17ra’a o tōna matahiti, ’ua ha’amata i te tātau iāna, ’e ’ua fa’atupu i te hia’ai rahi nō te taofe. Terā ra, i roto i taua tere māta’ita’ira’a nō Temple Square, ’ua fāri’i ’o Vincent i te Vārua maita’i ’e ’ua ani i tōna metua vahine e nehenehe ānei iāna e fāri’i i te mau ha’api’ira’a misiōnare.

Noa atu tāna nā ’ohipa e piti e 80 hora i te hepetoma, ’ua tuātapapa Katie i te ’evanelia ’e ’o Vincent, ma te mā’imira’a i te mau pāhonora’a i tāna mau uira’a i rotopū i te mau tere fārerei misiōnare. I te tau ve’ave’a nō te matahiti 2017, ’ua ha’amata ’oia i te haere i te mau purera’a a te ’Ēkālesia, i reira ’oia i te ha’api’ira’a mai nō ni’a i te mau ha’api’ira’a fa’arava’ira’a iāna iho a te ’Ēkālesia.

« ’Ua ’ite a’era vau ē, ’o te reira te ’ohipa ’o te nehenehe e tauturu iā’u », tāna ïa parau. « Penei a’e ’aita e ti’a iā’u e rave e piti ’ohipa ’aore rā, ’ia ti’aturi i tō’u nā metua nō te toe’a o tō’u orara’a ».

’Ua pi’i Katie i tāna ha’api’ira’a « te ha’apūaira’a mana’o-’ore-hia i te pae tino ’e i te pae vārua », ’eiaha noa nō te mea tāna i ha’api’i mai, nō te mea ato’a rā ’ua fāri’i tāna pupu nō te fa’arava’ira’a iāna iho ’iāna ’e ’ua aupurura’a ’iāna.

Nāhea ’outou e nehenehe ai e tauturu

Teie te tahi mau mana’o nō roto mai ia Katie, e nāhea tātou i te fa’ariro i te fa’anahora’a fa’arava’ira’a iāna iho ’ei rāve’a nō te aupuru i nā pae e piti i te pae vārua ’e i te pae tino :

« Hōro’a i te pāturura’a ’e te fa’aitoitora’a. ’Ua pāturu tā’u pupu iā’u, ’ua tae roa vau i te mana’o ē, ’ua vaiiho vau i te piha ha’api’ira’a tāta’itahi, ma te ’ite ē ’ua herehia vau » .
« E fa’aite i tō ’outou ’itera’a. Nā te ha’avare ’ore ’e te parau matara noa e vai ra i rotopū i te tahi ’e te tahi, i hōro’a i te mana’o maita’i i te ’ā’au. ’Aita roa ’outou i ’ite ē, ’o vai tē fāna’o ra i te maita’i o tā ’outou e fa’a’ite ra ».
« E parau vaha atu. Tē parau atu nei au ē, ’ua maita’i roa a’e tō’u orara’a nō tō’u ’aufaura’a i tā’u tuha’a ’ahuru e te haerera’a i te purera’a. E rave au i tā’u buka ’Ohipa moni nō te fa’arava’ira’a iāna iho nā muri iā’u i tā’u ravera’a ’ohipa mai te huru ra ē, e taote tauturu nō tō’u mau haere’a. Mai te mea e tano, e fa’a’ite au i te tahi o te mau parau tumu ia vetahi ’ē ».
« ’A haere i te hō’ē ha’api’ira’a nō te fa’arava’ira’a iāna iho nō ’outou iho, terā rā e ha’apa’o atu i te feiā tei hina’aro i tā ’outou tauturu. ’Ua ma’iri paha vau fātata i te ’āfara’a o te mau ha’api’ira’a nō te tauira’a tārena hora o tā’u ’ohipa, ’ua fārerei noa mai rā te mau mero o tā’u pupu iā’u ’e ’ua fa’aitoito noa rātou iā’u. E mea maere mau terā mana’o ē, hō’ē ā mātou noa atu ’aita vau i reira ».

© 2020 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, August 2020. Language. 16723 895