Ko ʻAisake mo e Temipalé
ʻOku nofo ʻa e tokotaha naʻá ne faʻú ʻi Kololato, USA.
Naʻe punopuna ʻa ʻAisake ʻi hono nofoʻangá. Naʻá ne fakasio ki tuʻa he matapā sioʻata ʻo e kaá. Naʻa nau ō ke ʻeva kia Kulenimā mo Kulenipā. Naʻa nau ō foki ke sio ki ha meʻa makehe ʻe taha.
“Te tau sio nai ʻafē ʻi he temipale foʻoú?” Ko e fehuʻi ange ia ʻa ʻAisake kia Mamí.
Naʻá ne pehē ange, “ʻApongipongi.”
Naʻe malimali ʻa ‘Aisake.
Ne faifai pea aʻu ʻa ʻAisake mo hono fāmilí ki he ʻapi ʻo Kulenimā mo Kulenipaá.
ʻI he pongipongi hono hokó, naʻe tui ʻe ʻAisake hono teunga faka-Sāpaté. Naʻe ongo fakaoli ʻene tui hēkesi ʻi he lolotonga ʻa e uiké. Naʻe kai pongipongi ʻa ʻAisake mo hono fāmilí. Naʻa nau fakaʻuli leva ki he ʻoupeni hausi ʻa e temipalé. Naʻa nau ō ke mamata ʻi loto he temipale foʻoú kimuʻa pea fakatapuí.
“ʻOku ou sio ki he temipalé!” Ko ʻAisake ange ia. Naʻá ne tuhu ki he fale hinehina ʻoku tuʻu ʻi ʻolunga ʻa e ʻāngelo ko Molonaí.
Naʻe ʻi ai ha falelotu ʻo e Siasí he tafaʻaki ʻo e temipalé. Naʻe ʻuluaki ʻalu ʻa ʻAisake mo hono fāmilí ki ai. Naʻa nau sio ʻi ha foʻi vitiō. Naʻe tokoni ha taha ke fakatui ha meʻa-kofu hinehina ʻi honau suú.
Ne faifai pea hokosia e taimi ke nau hū ai ki loto ʻi he temipalé! Naʻe hū ʻa ʻAisake ʻi he matapā ʻo e temipalé. Naʻe fiefia hono lotó.
Naʻe mamata ʻa ʻAisake ki ha ʻū tā valivali lahi ʻi he holisí. Naʻe hā ʻi he tā valivali ʻe niʻihi ha kakai ʻoku lotu. Ne hā ʻi he tā valivali ʻe niʻihi ha ʻakau mo e fanga monumanu fakaʻofoʻofa.
Pea naʻe sio leva ʻa ʻAisake ki ha tā valivali naʻá ne saiʻia taha aí. Ko e tā valivali ia ʻo Sīsū! Naʻe tuʻu ʻa Sīsū ʻo fakamafao mai Hono ongo toʻukupú.
Naʻe fanafana ange ʻa ʻAisake kia Teti, “Hangē ʻoku fakamafao mai ʻe Sīsū Hono ongo toʻukupú kiate aú.”
Naʻe fanafana ange ʻa Teti, “ʻOku mafao atu maʻu pē ʻe Sīsū Hono ongo toʻukupú kiate koe. ʻOku Ne ʻofa ʻiate kitautolu takitaha.”
Naʻe maʻu ʻe ʻAisake ha ongo fakafiemālie ʻi hono lotó. Naʻá ne fakakaukauloto ʻokú ne lue he tafaʻaki ʻo Sīsuú ʻi he temipalé. Naʻá ne fakakaukauloto ki he fāʻofua ange ʻa Sīsū kiate iá.
ʻOku ʻofa ʻa Sīsū ʻia ʻAisake. Pea ʻoku ʻofa foki ʻa ʻAisake ʻia Sīsū! ●