Iamwir me non Feito, Tapweno Mwiri

Ifa usun Feito, Tapweno Mwiri epwe anisuk omw kopwe fori ew ekkesiwin non manuwen ekkoch?

Ika ka nomw ren ow famini, non ew klasrum ren emon sense ika chon sukun non Sukunen Raninfel, ika non sukun, angang, ika pwan non ew neni, kaeon pukefel non Feito, Tapweno Mwiri a aworato tufichin iamwir ngeni ekkoch. Pekin osukun, mwirinon meinisin, “mei nap seni emweni ew opworous non Raninfel; a fiti iamwiri fiti tong me efeiechu ekkoch ren ewe kapas allim.”¹

Chufengen me Chon Kaeo

Nupwen Ofelia Trejo de Cárdenas a keken wisan an epwe osukuna ekkewe sarafo non an ewe wart non Mexico City, a mefi pwe an epwe arapakan nefinan ngeni emon me emon neun kewe chon kaeo non an ewe Sukunen Raninfel epwe awateno an tongeni aitir me epochokuner.

“Ika ese arapakan nefinei ngeni nei kewe chon sukun me ika rese mefi ai tong, resapw tongeni nukuei nupwen uwa osukuner non klass ika pwarata ai kapasen pwarata,” neminewe a apasa. “Repwe tongeni mefi pwe ngang chok emon sensen Sukunen Rannifel.”

Nge ifa usun sister Cárdenas epwe awateno ei sokun nefin ika a chok osukun fan ew non iteiten ruu wiik? A kuna penuwan non pekin technology. A aea WhatsApp won noun fon, neminewe me neun kewe chon sukun ra mwitir me chiechi fengen iteiten raan ren pekin text me kapas non ngingi. Iei, iteiten ran memwen ewe afanafanen Sukunen Raninfel, emon chon aninis non ewe klas a tinano ngeni ekkoch chon ewe klas ew wokisin seni ewe pukefel seni ewe afanafan fiti an pwisin ekiek. Mwirin ra aneani ewe wokisin me ewe ekiek, chon ewe klas ra penueni fiti pwisin ar ekieki.

“Nupwen ra aneani ewe uwokisin pukefel, ra tinato ew maas mi pwapwa pwe upwe sinei pwe rafen annea ika kaeo ewe pukefel me rapwan ekieki usun,” Sister Cárdenas a apasa. Nupwen a tori ewe afanafanen ewe Raninfel mwirin, ekkewe chon sukun ra monota ar repwe fiti.

Ei chufengen iteiten ran mi keran chok anisi emon sarafo ewe inan me saman kewe rese pochokun non ewe Mwichefen.

“Ua sani nupwen ua kuna an a feito ngeni faan pwokiten ua sinei pwe an epwe tori ikewe, a wor chommong weires a fen tori,” Sister Cárdenas a apasa. “Ua nuku pwe ewe pukefel me ekiek chiechian kewe ra tinanu me ekkewe pukefel me ekiek a pwan tinanu nupwen an fansoun a unusen apochokuna ii fan chommong.”

Sister Cárdenas a apasa pwe iamwir seni ewe pukefel esapw keuno ren an ewe afanafanen Raninfel me an chiechian kewe pekin chufengen ren pekin pukefel iteiten ran.

“Ai amonata a fiti iotek fan iten nei kewe chon sukun,” nemine a apasa. “Ua ekiekir esapw chok non Raninfel nge pwan iteiten ran non ewe wiik. Emon me emon iir mi wor met ra mwochen mi sokono. Emon me emon ii noun Kot. Ua ekiekir nupwen uwa amonata ai we nesen.”

Me nupwen a osukun, nemin ewe a eusening—ngeni neun kewe chon sukun me pwan ewe Ngun mi Fel.

“Ewe chon osukun ii ewe Ngunupin,” ewe nemin ewe a rongorong iteitan non ngingin neun kewe chon sukun. “Mi auchea upwe rongech pwokiten met ra apasa ina ewe pwarata ewe Ngun mi Fel a ngenir.”

Am ewe klas a “Usun Pwinin Famini”

Carla Gutiérrez Ortega Córdoba a mefi feiech ren an emon chon an Sister Cárdenas Sukunen Raninfel pwokiten an nenien aninis me iamwir. Carla a ekieki ei nenien kaeo ngeni ekkoch mettoch mi chommong, a pachenong:

Amonata: Pworous usun ewe pukefel me ekiek a anisi kewe chon sukun repwe monota ngeni ewe klas mwirin. “Pukefel iteiten ran a epochokuna kich me awateno ach sine,” neminewe a awewei.
Fiti: “Kich meinisin sia kapas. Ei a mwut ngeniei ai upwe awateno ai sineiochu chon ai klas, pwe ir chiechiei me mwongei me pwi.”
Tong: “Sister Cárdenas a uweuk ren peumw. Am ewe klas a usun pwinin famini, fiti ekoch mwongei me pwi. A men unusen echipwer.”
Ewe Ngun Mi Fel: “A wor rem ew pwapwan, echipwerun ngun non am ewe klas pwokiten auwa tipew fengen me ewe Ngun.”
Kapasen Pwarata: “Feito, Tapweno Mwiri a fen anisiei ai upwe monneta ne apasa ai kapasen pwarata. A wor ai anononun sinei usun ewe Puken Mormon me ewe Paipen. Ina a mwut ngeniei ai upwe aea met uwa kaeo ngeni ai we klas non sukun me aramas non ai angang.”

Iamwir ngeni Mwochenin Ngun

Nupwen Greg me Nicky Christensen, seni Kentucky, USA, ra aneani usun ewe pwonen Abram non ewe pukefel fiti neur kewe unumon at, ra kuna pwe a weires ar repwe awewei ngenir. Ra finata non ar famini pwe emon me emon iir epwe kaeo ewe pwonen Abram won winikaper me mwirin repwe aporousa met ra kuna.

“A wor ekkoch pworous mei amwarar,” Greg a apasa. “Neum ewe wanu-ierin a kaeo pwe iten Abraham akomw itan Abram. Itan ewe a siwin ngeni Abraham pwokiten an a fori ew pwon ngeni ewe Samon an epwe kun seni tipis me manaweni ew manaw mi pung. Ua unusen mairu ren an a tongeni pwisin tongeni kaeo ena.”

Ir meinisin ra kaeo ekkoch mettoch mi fo me a wor ar ochun pworous usun met ewe pwonen Abraham me met wewen ngeni Aramas mi Pin non Fansoun Soponon ikanai.

“Akkom auwa kan chok aneani wokisin seni ewe pukefel nupwen am ewe famini fansoun kaeo,” Nicky a apasa. “Feito, Tapwono Mwiri a angang ngeni osukun seni ewe Ngun. Iwi nupwen auwa kaeo fengen, ua mefi memef meren ewe Ngun ai upwe uwei ewe opworous ngeni ew kinikin a nongonong won met a auchea ngeni am we famini.”

Aean Feito, Tapwono Mwiri ese chok anisi ar ewe famini an epwe mwochen fiti me fori ar pekin kaeo ngeni ewe kapas allim, nge a pwan anisi Greg me Nicky repwe iamwir ngeni neur kewe non pekin ngun.

“Feito, Tapwono Mwiri a anisiei ne aiti nei kewe semirit,” Nicky a apasa. “A pwan anisiei ai upwe tongeni fiu ngeni kewe sosot a wor rei non ekkoch fansoun ngeni nei kewe. Ua mefi watten ewe Ngun, ua rongorongech, me ua angei eurur won ifa usun ai upwe anisi nei kewe.”

Greg a pwapwaiti ewe pworousen kapas allim mi tam ewe Feito, Tapwono Mwiri a aninis me fori non am we famini. “Neum kewe aat ra sokofesen non ar sinei ewe kapas allim,” atewe a apasa. “Feito, Tapwono Mwiri a awora ew anen am aupwe anisi emon me emon iir won nongonongun met a auchea ngenir. Kuner ar ra mamarita non ar tong ren ewe kapas allim me katon iir ar ra ekieki ifa usun ar repwe aea usun ar sinei ewe kapas allim non manawer a unusen feiech ngenir.”

© 2020 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Ministering Principles, September 2020.Chuukese. 16724 901