Ndinwam otode ke Di, Tiene Mi

Didie ke Di, Tiene Mi ekeme ndinwam mbufo man enma ukpuhode nkpo ke uwem mbon efen?

Mme ekpedi mbufo edu ye ufokemana mbufo, mme ke ubet-ukpeb Sunday School nte andikpeb mme nte eyen ufoknwed, mme odu ke utom, mme ke ebiet efen, edi-kot nwed Abasi otode Di, Tiene Mi onono akamba ufang man enwam mbon efen. Edino-ukpeb, nte ededi, “okpon akan ndida-usung ke nneme ke Sunday; oro esine ndinwam ke ima nnyung ndiong mbon efen ye iko Abasi.”¹

Ndinyene-ebuana ye Ndito-ufoknwed

Ini emi ekekotde Ofelia Trejo de Cárdenas ete ekpeb mme young adults nkpo ke ward Mexico City esie, enye ekekere ete ke ndinyene eti ebuana ye ndito ufoknwed Sunday School esie kiet-kiet eyenam ukeme esie ke ndino ukpeb-nkpo okpon onyung osongo mmo idem.

Enye ete, “Edieke ami mme nnyeneke eti ebuana ye ndito ufoknwed mi ndien edieke mmo mikopke ima mi, mmo idinimke mi ke akpaniko kini ami mkpebde nkpo mme kini nnode iko ntiense mi.” “Mmo ekeme ndikere ete ke ami ndi kpa andikpeb Sunday School kpot.”

Edi didie ke Sister Cárdenas edikeme nditongo oruk ebuana oro edieke enye ekpebde-nkpo ini kiet kpot ke ufang udua iba? Enye edikut iboro oro oto nkpo-technology. Ke ndida nkpo-utom handset emi ekotde WhatsApp, enye ye ndito ufoknwed esie ema esosop enyene ebuana kpukpru usen otode ke mme ediwe-wet ye ediko-kot etop. Idahaemi, kpukpru usen mbemiso edisim ukpebnkpo eke Sunday School efen, eyen-ufoknwed emi enyimede eyeno ufang nwed Abasi kiet eke ukpebnkpo efen ye se enye ekerede ke idemesie esok mbon class eken. Ke ekotde ufang nwed Abasi ye ekikere oro, mbon class eyeboro ye ekikere esit mmo.

“Ini emi mmo ekotde nwed Abasi, mmo eno ndiye ndise-iso mmo edi man ami mfiok ke mmo ema ekot mme ekpeb ufang nwed Abasi oro enyung ekere ebnaga nkpo oro,” Sister Cárdenas eting. Ini emi ekemde ndiduk ukpebnkpo ke Sunday efen, ndito-ufoknwed edu ke mbenge-idem man ebuana.

Idahaemi ebuana kpukpru usen emi ama odiong young adult kiet emi ete ye eka esie efiakde-edem ke Ufok Abasi.

Sister Cárdenas ete, “Ami mmema nkpo oro kini nkutde nte enye edide Ufok Abasi koro ami mmediongo ke ndikisim do, ana enye ebe ediwak idomo.” “Ami mmenim nte ke mme ufang nwed Abasi ye ekikere eke mbon class esie esinode aka ye ufang nwed Abasi ye ekikere emi enye esinode aka kini esimde ini esie ama enehede osongo enyene idem.”

Sister Cárdenas ete ke ndinwam otode ke nwed Abasi ikitreke ke ukpebnkpo Sunday ye class esie ndinyene ebuana nwed Abasi eke kpukpru usen.

Enye ete, “Mbenge-idem mi esine ndibong-akam mbanga ndito ufoknwed mi.” “Ami mmekere-nkpo mbanga mmo idige ke Sunday kpot edi nkere nkpo mbanga mmo ke ofuri usen ke udua nko. Mmo kiet-kiet enyene asanga-asanga ye nsio-nsio unana. Ofuri owo edi eyen Abasi. Ami nkere-nkpo mbanga mmo kini ami mbenge-ke ukpebnkpo mi.”

Ndien kini enye ekpebde, enye akpang-utong okop—ono ndito ufoknwed esie ye Edisana Spirit.

“Andikpeb edi Spirit oro,” emi enye esiwakde ndikop ke mme uyo eke ndito ufoknwed esie. “Ami nnyene nditing-enyin koro se mmo etingde edi eriyarare emi Spirit edinode mmo.”

Class Nnyin “Ebiet Home Evening”

Carla Gutiérrez Ortega Córdoba obo edidiong ke ndi-di owo Sunday School class eke Sister Cárdenas oto ke edikpeme ye edinwam emi odude ke class oro. Caria odoho ke ebiet oro ofon oto ke ediwak ntak, edide:

Mbenge-idem: Ndibuana nwed Abasi ye ekikere anwam ndito ufoknwed ke ndibenge idem nno class efen. Enye anam anwanga ete ke, “Ndikot nwed Abasi kpukpru usen obok mmimo onyung anam ifiok mmimo atara.”
Ebuana: “Kpukpru nnyin imeting iko. Emi anam mi nehede ndiongo owo class mi ofon, nte mme ufan ye nte ndito-eka iren ye iban.”
Ima: “Sister Cárdenas eyemum mbufo ke ubok. Class nnyin ebiet home evening, ye ediwak ndito-eka iren ye iban. Oro edi ata isio-isio.”
Edisana Spirit: “Nnyin imenyene inem-inem, spirit edidiana-kiet ke class nnyin koro nnyin idu ke ukem ndaha ye Spirit oro.”
Iko ntiense: “Di, Tiene Mi ama anwam mi ndibenge-idem man mbuana iko ntiense mi. Ami mmenyene ntotungo ifiok mbanga Nwed Mormon ye Bible. Oro anwam mi ke ndibuana se ami mkpebde ye mme mbon class mi ke ufoknwed ye mme owo ke itie-utom.”

Ndinwam ke mme Unana eke Nkpo-Abasi

Ini emi Greg ye Nicky Christensen, emi etode Kentucky, USA ekotde ebanga ediomi eke Abaraham ke nwed Abasi ye ndito ita iren mmo, ama osong ono mmo ndinam nkpo oro anwanga mmo. Mmo edibiere nte ufokemana ete ke mmo kiet-kiet eyekot ediomi eke Abraham ke idem mmo enyung ebuana se mmo ekutde.

Greg ete, “Nnyin imebo mme inem etop.” “Eyen-eren nnyin isua itiaita edikpeb ete ke enying Abraham ekesidi Abram. Ekekpuho enying esie ekot Abraham koro enye ama anam enwongo ono Abasi ete iyekpong idioknkpo inyung idu uwem edinen ido. Ami nkodu ke ata mkpa-idem ke enye ekeme ndiifiok nkpo ntre.”

Kpukpru mmo ema ekpeb mbufa nkpo enyung enyene inem nneme kabanga se ediomi eke Abraham edide ye se oworode ono mbon Latter-day Saint mfin emi.

Nicky ete, “Nnyin ikesiwak ndisanga nkanare ubet-ufok inyung ida ndaha nnyin ikoot mme ufang ke nwed Abasi ke edikpeb nwed Abasi eke ufokemana nnyin.” “Di, Tiene Mi enehede owut abanga ndikpeb nkpo ke Spirit. Idahaemi nnyin ikpeb-nkpo otokiet, ami mmesikop mkpri ntuk otode ete nda nneme nnyin ke usung efen kabanga mme unana eke ufokemana nnyin.”

Ndida Di,Tiene Mi ikenwamke ufokemana mmo kpot ke ndinehede nyiri nnyung nkop-inem eke edikot nwed Abasi ke ufokemana, edi oro nko ama anwam Greg ye Nicky ke ndinwam ke mme unana nkpo-Abasi eke ndito mmo.

Nicky ete, “Di, Tiene Mi anwam mi ke ndikpeb ndito mi nkpo.” “Oro nko anwam mi ke ndiyo mme nsio-nsio mfina emi nsinyenede ke ubak-ini ye ndito mi. Ami mmediwak ndikop uyo Spirit, ami nehede nno mkpang-utong, ndien ami mmedibo mme ntuk kabanga nte ami nkemede edinwam eyen kiet-kiet.”

Greg okop-inem anyan nneme iko-Abasi emi Di, Tiene Mi anwamde anam atara ke ufokemana esie. Enye ete, “Ofuri ndito nnyin iren ekpuho ke ndaha emi mmo edade ke ifiok iko Abasi mmo.”. “Di, Tiene Mi edi-no nnyin usung man inwam mmo kiet-kiet ekpeb-nkpo ke nte unana mmo edide. Ndikut nte mmo ekoride ke ima mmo eno iko Abasi nnyung nse nte mmo eyomde usung nte edade ifiok iko Abasi enam nkpo ke uwem mmo edi ata akpan edidiong ono nnyin.”

© 2020 otode Intellectual Reserve, Inc. Ekpan kpukpru unen ndiming. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare eke Ukpebnkpɔ Unwam, Ɔfiɔŋ September ke isua 2020. Efik. 16724 553